2023ರ ಮೊದಲಾರ್ಧದಲ್ಲಿ ಮುಸ್ಲಿಂ ಸಮುದಾಯವನ್ನು ಗುರಿಯಾಗಿಸಿಕೊಂಡು ದ್ವೇಷ ಭಾಷಣಗಳ ಸಭೆಗಳು ಅಥವಾ ರ‍್ಯಾಲಿಗಳು ಒಂದಕ್ಕಿಂತ ಹೆಚ್ಚು ನಿದರ್ಶನಗಳು ಪ್ರತಿನಿತ್ಯ ದಾಖಲಾಗಿವೆ ಎಂದು ಅಮೆರಿಕ ಮೂಲದ ಹಿಂದುತ್ವ ವಾಚ್ ಎಂಬ ಸ್ವಯಂ ಸೇವಾ ಸಂಸ್ಥೆ ವರದಿ ಮಾಡಿದೆ.
2023ರ ಮೊದಲ ಆರು ತಿಂಗಳಲ್ಲಿ ಮುಸ್ಲಿಮರನ್ನು ಗುರಿಯಾಗಿಸಿಕೊಂಡು 255 ದ್ವೇಷ ಭಾಷಣ ಕೂಟಗಳು ಅಥವಾ ರ‍್ಯಾಲಿಗಳ ದಾಖಲಾದ ನಿದರ್ಶನಗಳಿವೆ ಎಂದು ಹೇಳಿದೆ.
ಈ ದ್ವೇಷ ಭಾಷಣದ ಘಟನೆಗಳಲ್ಲಿ 205 (ಶೇ. 80) ಬಿಜೆಪಿ ಆಡಳಿತವಿರುವ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಸಂಭವಿಸಿವೆ ಎಂದು ತಿಳಿಸಿದೆ.
ಈ ಘಟನೆಗಳಲ್ಲಿ ಹೆಚ್ಚಿನ ಸಂಖ್ಯೆಯ ಘಟನೆಗಳು ಮಹಾರಾಷ್ಟ್ರದಲ್ಲಿ ನಡೆದಿವೆ. ನಂತರ ಕರ್ನಾಟಕ, ಮಧ್ಯಪ್ರದೇಶ, ರಾಜಸ್ಥಾನ ಮತ್ತು ಗುಜರಾತ್‌ನಲ್ಲಿ ಸಂಭವಿಸಿದೆ. ಉತ್ತರಾಖಂಡವು ಭಾರತದ ಒಟ್ಟು ಜನಸಂಖ್ಯೆಯ ಶೇಕಡಾ 1 ಕ್ಕಿಂತ ಕಡಿಮೆಯಿದ್ದರೂ, ಈ ವರ್ಷ ಸುಮಾರು ಶೇಕಡಾ 5 ರಷ್ಟು ದ್ವೇಷದ ಘಟನೆಗಳು ಆ ರಾಜ್ಯದಲ್ಲಿ ನಡೆದಿವೆ ಎಂದು ಹಿಂದುತ್ವ ವಾಚ್ ವರದಿಯಲ್ಲಿ ದಾಖಲಿಸಿದೆ.
2023 ಮತ್ತು 2024 ರಲ್ಲಿ ವಿದಾನಸಭೆ ಚುನಾವಣೆಗಳನ್ನು ನಡೆಸಲು ನಿರ್ಧರಿಸಲಾದ ರಾಜ್ಯಗಳಲ್ಲಿ ಈ ಘಟನೆಗಳ ಗಮನಾರ್ಹ ಪ್ರಮಾಣವು ಸಂಭವಿಸಿದೆ ಎಂದು ವರದಿಯು ಬಹಿರಂಗಪಡಿಸಿದೆ. ಮತದಾರರ ಸಜ್ಜುಗೊಳಿಸುವಿಕೆಗಾಗಿ ಮುಸ್ಲಿಂ ವಿರೋಧಿ ದ್ವೇಷ ಭಾಷಣದ ಘಟನೆಗಳ ಸಂಭಾವ್ಯ ಬಳಕೆಯನ್ನು ಎತ್ತಿ ತೋರಿಸುತ್ತದೆ.
ಈ ಸುದ್ದಿ ಓದಿದ್ದೀರಾ? ನವದೆಹಲಿ | ಅಂಗವಿಕಲ ಮುಸ್ಲಿಂ ವ್ಯಕ್ತಿಗೆ ದೇವಸ್ಥಾನದಲ್ಲಿ ಪ್ರಸಾದ ಸೇವಿಸಿದ್ದಕ್ಕೆ ಹಲ್ಲೆ; ಸಾವು
ವಿಶ್ವ ಹಿಂದೂ ಪರಿಷತ್, ಬಜರಂಗದಳ, ಸಕಲ್ ಹಿಂದೂ ಸಮಾಜ ಮತ್ತು ಬಿಜೆಪಿ ಸೇರಿದಂತೆ ರಾಷ್ಟ್ರೀಯ ಸ್ವಯಂಸೇವಕ ಸಂಘದೊಂದಿಗೆ ಸಂಯೋಜಿತವಾಗಿರುವ ಘಟಕಗಳಿಂದ ಹೆಚ್ಚಿನ ದ್ವೇಷ ಭಾಷಣ ಕೂಟಗಳನ್ನು ಆಯೋಜಿಸಲಾಗಿದೆ. ಲವ್ ಜಿಹಾದ್, ಲ್ಯಾಂಡ್ ಜಿಹಾದ್ ಮತ್ತು ಭಾರತದಲ್ಲಿ ಮುಸ್ಲಿಂ ಜನಸಂಖ್ಯೆಯ ಬೆಳವಣಿಗೆಯ ಬಗ್ಗೆ ತಪ್ಪು ಮಾಹಿತಿಯಂತಹ ಪ್ರಮುಖ ಮುಸ್ಲಿಂ ವಿರೋಧಿ ಪಿತೂರಿ ಸಿದ್ಧಾಂತಗಳನ್ನು ಪ್ರಚಾರ ಮಾಡುವುದು ಈ ಗುಂಪುಗಳು ಹೆಚ್ಚು ಬಳಸಿಕೊಳ್ಳುವ ವಿಧಾನವಾಗಿದೆ.
ಎಲ್ಲ ಸಂಸ್ಥೆಗಳಲ್ಲಿ ಅಲ್ಲಿ ನೇತೃತ್ವ ವಹಿಸಿದ ಸುಮಾರು ಶೇ. 33 ರಷ್ಟು ಜನರು ಮುಸ್ಲಿಮರ ವಿರುದ್ಧ ಹಿಂಸಾಚಾರಕ್ಕೆ ಸ್ಪಷ್ಟವಾಗಿ ಕರೆ ನೀಡಿದ್ದಾರೆ. ಸುಮಾರು ಶೇ. 11 ರಷ್ಟು ಘಟನೆಗಳು ಹಿಂದೂಗಳು ಮುಸ್ಲಿಮರನ್ನು ಬಹಿಷ್ಕರಿಸಲು ಸ್ಪಷ್ಟವಾದ ಕರೆಗಳನ್ನು ಒಳಗೊಂಡಿವೆ. ಆದರೆ ಎಲ್ಲ ಘಟನೆಗಳಲ್ಲಿ ಶೇ. 4 ರಷ್ಟು ಮುಸ್ಲಿಂ ಮಹಿಳೆಯರನ್ನು ಸ್ಪಷ್ಟವಾಗಿ ಗುರಿಯಾಗಿಸುವ ದ್ವೇಷ ತುಂಬಿದ ಭಾಷಣಗಳನ್ನು ಒಳಗೊಂಡಿತ್ತು.
ಮಾರ್ಚ್‌ನಲ್ಲಿ ಹಿಂದೂ ಹಬ್ಬವಾದ ರಾಮನವಮಿಯೊಂದಿಗೆ ದ್ವೇಷ ಭಾಷಣದ ಘಟನೆಗಳು ಉಲ್ಬಣಗೊಂಡಿವೆ ಎಂದು ವರದಿ ಒತ್ತಿಹೇಳಿದೆ. ತಿಂಗಳ ಕೊನೆಯ ವಾರದಲ್ಲಿ ಹದಿನೆಂಟು ದ್ವೇಷ ಭಾಷಣದ ಘಟನೆಗಳು ದೇಶದಾದ್ಯಂತ ನಡೆದಿದ್ದು, ಈ ದಿನದಂದು ಹಿಂಸಾಚಾರವನ್ನು ಪ್ರಚೋದಿಸಲು ಸಾಧ್ಯವಿರುವ ಸಂಘಟಿತ ಪ್ರಯತ್ನವನ್ನು ಸೂಚಿಸುತ್ತದೆ.
ಹಿಂದುತ್ವ ವಾಚ್ ಈ ಅಂಕಿಅಂಶಗಳನ್ನು ಸಂಗ್ರಹಿಸಲು ಸಾಮಾಜಿಕ ಮಾಧ್ಯಮ ಮತ್ತು ಸುದ್ದಿ ವರದಿಗಳನ್ನು ಅವಲಂಬಿಸಿದೆ. ದ್ವೇಷ ಭಾಷಣದ ಘಟನೆಗಳ ಪರಿಶೀಲಿಸಬಹುದಾದ ವಿಡಿಯೋಗಳನ್ನು ಗುರುತಿಸಲು ವಿವಿಧ ತಂಡಗಳನ್ನು ನಿಯೋಜಿಸಲಾಗಿತ್ತು. ಅದರ ವಿಧಾನದ ಭಾಗವಾಗಿ ಸಂಶೋಧಕರು ಮತ್ತು ಪತ್ರಕರ್ತರ ವಿಸ್ತೃತ ಸಂದರ್ಶನಗಳೊಂದಿಗೆ ವರದಿಯನ್ನು ಕಲೆ ಹಾಕಿದೆ.
ಭಾರತದಲ್ಲಿ “ದ್ವೇಷ ಭಾಷಣ”ದ ಅಧಿಕೃತ ವ್ಯಾಖ್ಯಾನವನ್ನು ಹೊಂದಿಲ್ಲದ ಕಾರಣ, ಹಿಂದುತ್ವ ವಾಚ್ ಸಂಸ್ಥೆ ವಿಶ್ವಸಂಸ್ಥೆ ನೀಡಿರುವ ಮಾನದಂಡವನ್ನು ಅನುಸರಿಸಿದೆ.
ವಿಶ್ವಸಂಸ್ಥೆಯು ದ್ವೇಷದ ಭಾಷಣವನ್ನು “ಮೌಖಿಕ, ಲಿಖಿತ ಅಥವಾ ನಡವಳಿಕೆಯ ಯಾವುದೇ ರೀತಿಯ ಸಂವಹನ ಎಂದು ವ್ಯಾಖ್ಯಾನಿಸುತ್ತದೆ. ಅದು ಧರ್ಮ, ಜನಾಂಗೀಯತೆ, ರಾಷ್ಟ್ರೀಯತೆ, ಜನಾಂಗ, ಬಣ್ಣ, ವಂಶ, ಲಿಂಗ ಅಥವಾ ಗುಣಲಕ್ಷಣಗಳ ಆಧಾರದ ಮೇಲೆ ವ್ಯಕ್ತಿ ಅಥವಾ ಗುಂಪಿನ ಕಡೆಗೆ ಪೂರ್ವಗ್ರಹ ಪೀಡಿತ ಅಥವಾ ತಾರತಮ್ಯದ ಭಾಷೆಯನ್ನು ಬಳಸುತ್ತದೆ ಎಂದು ತಿಳಿಸುತ್ತದೆ.
