ಹುಟ್ಟಿ ಕೇವಲ ನಾಲ್ಕು ದಿನ ಬದುಕಿದ್ದ ಹಸುಗೂಸೊಂದು ಅಂಗಾಂಗ ದಾನದ ಮೂಲಕ ನಾಲ್ಕು ಮಂದಿಯ ಬಾಳಿಗೆ ಬೆಳಕಾದ ಮನ ಕಲುಕುವ ಘಟನೆ ಗುಜರಾತ್‌ನ ಸೂರತ್‌ನಲ್ಲಿ ನಡೆದಿದೆ.
ಸೂರತ್‌ನ ಡೈಮಂಡ್ ಘಟಕದ ಯೋಜನಾ ವಿಭಾಗದಲ್ಲಿ ಉದ್ಯೋಗಿಯಾಗಿರುವ ಅನೂಪ್ ಠಾಕೂರ್ ಅವರು ತಮ್ಮ ಪತ್ನಿ, ತುಂಬುಗರ್ಭಿಣಿ ವಂದನಾ ಅವರನ್ನು ಪರೀಕ್ಷೆಗೆಂದು ಆಸ್ಪತ್ರೆಗೆ ಕರೆದೊಯ್ದರು. ವೈದ್ಯರು ತಕ್ಷಣವೇ ಆಸ್ಪತ್ರೆಗೆ ದಾಖಲಾಗುವಂತೆ ಸಲಹೆ ನೀಡಿದರು. ಅವರಿಗೆ ಸಿಸೇರಿಯನ್ ಮಾಡಲಾಯಿತು. ವಂದನಾ ಠಾಕೂರ್ ಅವರಿಗೆ ಅಕ್ಟೋಬರ್ 23 ರಂದು ಸಂಜೆ 7. 50 ರ ಸುಮಾರಿಗೆ ಗಂಡು ಮಗು ಜನಿಸಿತು.
ಆದರೆ, ಹುಟ್ಟಿದ ಮಗು ಸಹಜವಾಗಿರಲಿಲ್ಲ. ಮಗುವಿಗೆ ಸಾಮಾನ್ಯ ಹೃದಯ ಬಡಿತದ 15% ಮಾತ್ರ ಇತ್ತು ಮತ್ತು ಅದು ಸರಿಯಾಗಿ ಉಸಿರಾಡುತ್ತಿರಲಿಲ್ಲ. ಮಗು ಹುಟ್ಟಿದಾಗ ಅಳಲಿಲ್ಲ ಮತ್ತು ಅದರ ದೇಹದಲ್ಲಿ ಯಾವುದೇ ಚಲನೆಯೂ ಇರಲಿಲ್ಲ. 48 ಗಂಟೆಗಳ ವೀಕ್ಷಣೆಯ ನಂತರ, ವೈದ್ಯರು ಮಗುವಿನ ಮೆದುಳು ನಿಷ್ಕ್ರಿಯಗೊಂಡಿದೆ ಎಂದು ಘೋಷಿಸಿದರು.
ಅನುಪ್ ಮತ್ತು ವಂದನಾ ಠಾಕೂರ್ ಕ್ಲಿಷ್ಟಕರ ಸಂದರ್ಭದಲ್ಲಿ ಅಸಾಧಾರಣವಾದ ನಿರ್ಧಾರವನ್ನು ಕೈಗೊಂಡರು. ತಮ್ಮ ಮಗನ ಮೆದುಳು ನಿಷ್ಕ್ರಿಯಗೊಂಡಿದೆ ಎಂದು ಘೋಷಿಸಿದ ನಂತರ ಅವರು ಮಗನ ಅಂಗಗಳನ್ನು ದಾನ ಮಾಡಲು ನಿರ್ಧರಿಸಿದರು. ಹಸುಗೂಸಿನ ಮೂತ್ರಪಿಂಡಗಳು, ಕಾರ್ನಿಯಾ ಮತ್ತು ಗುಲ್ಮ ಸೇರಿದಂತೆ ಹಲವು ಅಂಗಗಳನ್ನು ಶುಕ್ರವಾರ ರಾತ್ರಿ ಹಸುಗೂಸಿನ ದೇಹದಿಂದ ತೆಗೆದು ನಾಲ್ವರು ರೋಗಿಗಳಿಗೆ ಅಳವಡಿಸಲಾಯತು.
ಹುಟ್ಟಿ ಕೇವಲ 100 ಗಂಟೆ ಬದುಕಿದ್ದ ಹಸುಗೂಸೊಂದು ನಾಲ್ವರಿಗೆ ಜೀವ ದಾನ ಮಾಡಿದ್ದು ಒಂದು ಅಸಾಧಾರಣ ಘಟನೆಯೇ ಸರಿ.
