- ‘ನಮ್ಮದೇ ಪರಿಸರದ ಬರಹಗಾರರು ಎನ್ನುವುದು ಅಭಿಮಾನದ ಸಂಗತಿ’
- ಕನ್ನಡ ಸಾಹಿತ್ಯ ಪರಿಷತ್ತು ಆಯೋಜಿಸಿದ್ದ ವಿಶೇಷ ಉಪನ್ಯಾಸ ಕಾರ್ಯಕ್ರಮ
‘ಪಂಚತಂತ್ರ’ ರಚಿಸಿದ ಸವಡಿಯ ದುರ್ಗಸಿಂಹ, ‘ಮಣ್ಣು’ ಎನ್ನುವ ಅಪರೂಪದ ಕತೆ ಬರೆದ ಅಬ್ಬಿಗೇರಿಯ ಗಿರಡ್ಡಿ ಗೋವಿಂದರಾಜ ಅವರು ನಮ್ಮದೇ ಪರಿಸರದ ಬರಹಗಾರರು ಎನ್ನುವುದು ಅಭಿಮಾನದ ಸಂಗತಿ. ಕನ್ನಡ ಕಥಾ ಪರಂಪರೆ ವಿಸ್ತರಿಸುವಲ್ಲಿ ನಮ್ಮ ನೆಲದ ಕೊಡುಗೆ ಅನನ್ಯ ಎಂದು ಕಥೆಗಾರ ಟಿ ಎಸ್ ಗೊರವರ ಹೇಳಿದರು.
ಗದಗ ಜಿಲ್ಲೆ ಗಜೇಂದ್ರಗಡ ತಾಲೂಕಿನ ಅನ್ನದಾನೇಶ್ವರ ಪದವಿ ಮಹಾವಿದ್ಯಾಲಯದಲ್ಲಿ ಕನ್ನಡ ಸಾಹಿತ್ಯ ಪರಿಷತ್ತು ಆಯೋಜಿಸಿದ್ದ ವಿಶೇಷ ಉಪನ್ಯಾಸ ಹಾಗೂ ಸಂವಾದ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.
“ನವೋದಯ, ನವ್ಯ, ಪ್ರಗತಿಶೀಲ ಹಾಗೂ ದಲಿತ-ಬಂಡಾಯ ಸಾಹಿತ್ಯ ಕಾಲಘಟ್ಟಗಳ ಭಿನ್ನ ಭಿನ್ನ ವಸ್ತು, ವಿಷಯ, ವಿನ್ಯಾಸ, ನಿರೂಪಣೆಗಳಿಂದ ನಮ್ಮ ಕಥನ ಪರಂಪರೆ ಶ್ರೀಮಂತಗೊಂಡಿದೆ. ನವೋದಯ ಕಾಲದ ಸಣ್ಣಕಥೆಗಳು ಬಹು ಮುಖ್ಯವಾಗಿ ಮಾನವತಾವಾದ, ಆದರ್ಶವಾದ, ರಾಷ್ಟ್ರೀಯತೆಯನ್ನು ತಳಹದಿಯನ್ನಾಗಿಸಿಕೊಂಡು ರಚನೆಯಾಗಿವೆ. ನಂತರ ಬಂದ ಪ್ರಗತಿಶೀಲ ಸಾಹಿತ್ಯ ನವೋದಯದ ಮಿತಿ ಮತ್ತು ಕೊರತೆಗಳನ್ನು ಗುರುತಿಸಿಕೊಂಡು ಕಥಾ ವಸ್ತುವಿನ ಆಯ್ಕೆಯಲ್ಲಿ ಹೊಸತನ ತಂದಿದೆ” ಎಂದರು.
ಈ ಸುದ್ದಿ ಓದಿದ್ದೀರಾ? ಕೆಪಿಸಿಸಿ ಮಾಧ್ಯಮ ವಕ್ತಾರೆಯಾಗಿ ಯುಟಿ ಫರ್ಝಾನ ನೇಮಕಗೊಳಿಸಿದ ಡಿ ಕೆ ಶಿವಕುಮಾರ್
“ಪಶ್ಚಿಮ ಸಾಹಿತ್ಯದ ಪ್ರೇರಣೆಯಿಂದ ನವ್ಯ ಚಳುವಳಿ ಪ್ರಾರಂಭವಾಯಿತು. ನವ್ಯದ ನಂತರ ಬಂದ ದಲಿತ-ಬಂಡಾಯ ಘಟ್ಟದ ಕತೆಗಾರರು ವರ್ಣ ಮತ್ತು ವರ್ಗ ವ್ಯವಸ್ಥೆಯನ್ನು ವಿರೋಧಿಸುತ್ತ ಶೋಷಣೆಯ ವಿರುದ್ಧ ಗಟ್ಟಿಯಾದ ಸೈದ್ಧಾಂತಿಕ ತಳಹದಿಯ ಮೇಲೆ ಕತೆಗಳನ್ನು ರಚನೆ ಮಾಡಿದ್ದಾರೆ” ಎಂದು ಹೇಳಿದರು.
ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ ಎಸ್ ಎಸ್ ಪಟ್ಟೇದ, “ಕಥೆ ಕೇಳುವುದೆಂದರೆ ಎಲ್ಲರಿಗೂ ಬಹಳ ಇಷ್ಟ, ಕಥೆಯಿಂದ ಮಾನವೀಯ ಮೌಲ್ಯಗಳನ್ನೂ ಜೀವನದಲ್ಲಿ ಅಳವಡಿಸಿಕೊಂಡರೆ ಒಳ್ಳೆಯದು. ಇಂದು ಕಥೆ ಬರೆಯುವವರ ಮಾತುಗಳನ್ನು ಹಾಗೂ ಅವರ ಅನುಭವಗಳನ್ನು ಕೇಳೋಣ” ಎಂದರು.
ಕಸಾಪ ತಾಲೂಕ ಅಧ್ಯಕ್ಷ ಅಮರೇಶ ಗಾಣಿಗೇರ ಅಧ್ಯಕ್ಷತೆ ವಹಿಸಿ ಮಾತನಾಡಿ, “ತಾಲೂಕು ಘಟಕವು ಕರ್ನಾಟಕ ನಾಮಕರಣ ಸಂಭ್ರಮ ವಿಶೇಷ ಉಪನ್ಯಾಸ ಹಾಗೂ ಸಂವಾದಗಳ ಮೂಲಕ ಆಚರಿಸುತ್ತಿದೆ. ಮುಂದಿನ ದಿನಗಳಲ್ಲಿ ತಾಲೂಕಿನ ಎಲ್ಲ ಗ್ರಾಮಗಳಲ್ಲಿ ವಿಶೇಷ ಉಪನ್ಯಾಸ ಹಾಗೂ ಸಂವಾದ ಕಾರ್ಯಕ್ರಮ ಆಯೋಜಿಲಾಗುವುದು” ಎಂದು ಹೇಳಿದರು.
ಪ್ರೊ ಬಿ ಎ ಕೆಂಚರಡ್ಡಿ, ಗುರುಸಿದ್ದಯ್ಯ ಸೂಗಿರಯ್ಯನಮಠ, ಶರಣಪ್ಪ ರೇವಡಿ, ಪ್ರಭು ಚವಡಿ, ಶಿವಯ್ಯ ಚಕ್ಕಡಿಮಠ, ಪ್ರಾಚಾರ್ಯ ಬಸಯ್ಯ ಹಿರೇಮಠ, ಪ್ರೊ ಬಿ ವಿ ಮುನವಳ್ಳಿ, ಡಾ ಐ ಜೆ ಮ್ಯಾಗೇರಿ ಅಕ್ಕಮಹಾದೇವಿ ನರಗುಂದ, ಬಸಣ್ಣ ಕೊಟಗಿ ಸೇರಿದಂತೆ ಇತರರು ಇದ್ದರು.
