ಅಮೆರಿಕ ಮತ್ತು ಇರಾನ್ ನಡುವಿನ ಯುದ್ಧದ ಬಿಕ್ಕಟ್ಟಿನ ಮಧ್ಯೆಯೇ ಟ್ರಂಪ್ ಆಡಳಿತದಲ್ಲಿ ಉನ್ನತ ಸೇನಾಧಿಕಾರಿಗಳ ವಜಾ ಮತ್ತು ರಾಜೀನಾಮೆ ಪರ್ವ ಮುಂದುವರಿದಿದೆ. ಅಮೆರಿಕದ ಸೇನಾ ಮುಖ್ಯಸ್ಥ ಜನರಲ್ ರಾಂಡಿ ಜಾರ್ಜ್ ಅವರನ್ನು ವಜಾಗೊಳಿಸಿದ ಬೆನ್ನಲ್ಲೇ, ಇದೀಗ ಅಮೆರಿಕದ ನೌಕಾದಳದ ಕಾರ್ಯದರ್ಶಿ ಜಾನ್ ಫೆಲನ್ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ ಅಥವಾ ಅವರನ್ನು ಹುದ್ದೆಯಿಂದ ಕೆಳಗಿಳಿಸಲಾಗಿದೆ.
ಬುಧವಾರವಷ್ಟೇ (ಏಪ್ರಿಲ್ 22) ಪೆಂಟಗನ್ ವಕ್ತಾರ ಸೀನ್ ಪಾರ್ನೆಲ್ ಅವರು ಜಾನ್ ಫೆಲನ್ ಅವರ ನಿರ್ಗಮನವನ್ನು ಖಚಿತಪಡಿಸಿದ್ದು, ಅವರು ತಕ್ಷಣದಿಂದಲೇ ಜಾರಿಗೆ ಬರುವಂತೆ ಆಡಳಿತದಿಂದ ನಿರ್ಗಮಿಸುತ್ತಿದ್ದಾರೆ ಎಂದು ಎಕ್ಸ್ ಖಾತೆಯಲ್ಲಿ ತಿಳಿಸಿದ್ದಾರೆ. ನೌಕಾದಳದ ಅಧೀನ ಕಾರ್ಯದರ್ಶಿಯಾಗಿರುವ ಹಂಗ್ ಕಾವೊ ಅವರು ನೂತನ ಹಂಗಾಮಿ ಕಾರ್ಯದರ್ಶಿಯಾಗಿ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ.
ಹಡಗು ನಿರ್ಮಾಣ ಯೋಜನೆಗಳ ವಿಳಂಬ ಮತ್ತು ಪೆಂಟಗನ್‌ನ ಉನ್ನತ ಅಧಿಕಾರಿಗಳೊಂದಿಗಿನ ತೀವ್ರ ಭಿನ್ನಾಭಿಪ್ರಾಯವೇ ಜಾನ್ ಫೆಲನ್ ಅವರ ನಿರ್ಗಮನಕ್ಕೆ ಪ್ರಮುಖ ಕಾರಣವಾಗಿದೆ. ಇರಾನ್‌ನೊಂದಿಗಿನ ಯುದ್ಧದ ಹಿನ್ನೆಲೆಯಲ್ಲಿ ಮತ್ತು ಹಾರ್ಮುಜ್ ಜಲಸಂಧಿಯಲ್ಲಿ ನೌಕಾ ದಿಗ್ಬಂಧನದಂತಹ ಮಹತ್ವದ ಕಾರ್ಯಾಚರಣೆಗಳ ಸಮಯದಲ್ಲಿ ಹಡಗು ನಿರ್ಮಾಣವನ್ನು ವೇಗಗೊಳಿಸುವಂತೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೂಚಿಸಿದ್ದರು. ಈ ನಿಟ್ಟಿನಲ್ಲಿ ಫೆಲನ್ ಅವರ ಕಾರ್ಯವೈಖರಿ ತೃಪ್ತಿದಾಯಕವಾಗಿರಲಿಲ್ಲ ಎನ್ನಲಾಗಿದೆ. ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಮತ್ತು ಉಪ ಕಾರ್ಯದರ್ಶಿ ಸ್ಟೀಫನ್ ಫೈನ್‌ಬರ್ಗ್ ಅವರೊಂದಿಗೆ ಫೆಲನ್ ಗುದ್ದಾಟಕ್ಕಿಳಿದಿದ್ದರು ಎಂಬ ಮಾಹಿತಿಯನ್ನು ಮೂಲಗಳು ದೃಢಪಡಿಸಿವೆ. ಕೊನೆಗೆ ಪೀಟ್ ಹೆಗ್ಸೆತ್ ಅವರು ಫೆಲನ್ ಅವರಿಗೆ ‘ರಾಜೀನಾಮೆ ನೀಡಿ, ಇಲ್ಲವೇ ವಜಾಗೊಳ್ಳಿ’ ಎಂಬ ಅಂತಿಮ ಎಚ್ಚರಿಕೆ ನೀಡಿದ್ದರು.
ಇದನ್ನು ಓದಿದ್ದೀರಾ? ದೀದಿ ಕೋಟೆಯಲ್ಲಿ ಕಮಲ ಅರಳುವುದೇ? ನಿರ್ಣಾಯಕ ಹಂತದಲ್ಲಿ 59 ಕ್ಷೇತ್ರಗಳ ಅಸಲಿ ಆಟ
ಇತ್ತೀಚೆಗಷ್ಟೇ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಅವರು ಅಮೆರಿಕದ ಸೇನಾ ಮುಖ್ಯಸ್ಥ ಜನರಲ್ ರಾಂಡಿ ಜಾರ್ಜ್ ಮತ್ತು ಇತರ ಇಬ್ಬರು ಉನ್ನತ ಜನರಲ್‌ಗಳನ್ನು (ಮೇಜರ್ ಜನರಲ್ ವಿಲಿಯಂ ಗ್ರೀನ್ ಜೂನಿಯರ್ ಮತ್ತು ಜನರಲ್ ಡೇವಿಡ್ ಹಾಡ್ನೆ) ದಿಢೀರ್ ಆಗಿ ವಜಾಗೊಳಿಸಿದ್ದರು. ಇದೀಗ ಆ ಘಟನೆ ನಡೆದ ಕೆಲವೇ ದಿನಗಳಲ್ಲಿ ಜಾನ್ ಫೆಲನ್ ಅವರನ್ನು ಹುದ್ದೆಯಿಂದ ಕೆಳಗಿಳಿಸಲಾಗಿದೆ. ಫೆಲನ್ ಅವರು ಫ್ಲೋರಿಡಾದ ಖಾಸಗಿ ಹೂಡಿಕೆ ಸಂಸ್ಥೆಯ (Rugger Management LLC) ಸಂಸ್ಥಾಪಕರಾಗಿದ್ದು, ಟ್ರಂಪ್ ಅವರ ಚುನಾವಣಾ ಪ್ರಚಾರದ ಪ್ರಮುಖ ದಾನಿಯಾಗಿದ್ದರು. ಅವರಿಗೆ ಈ ಮೊದಲು ಯಾವುದೇ ಮಿಲಿಟರಿ ಅನುಭವವಿರಲಿಲ್ಲ ಎಂಬುದು ಗಮನಾರ್ಹ.
ಕಳೆದ 8 ವಾರಗಳಿಂದ ಅಮೆರಿಕ ಮತ್ತು ಇರಾನ್ ನಡುವೆ ಯುದ್ಧ ನಡೆಯುತ್ತಿದ್ದು, ಇರಾನ್‌ನ ಇಸ್ಲಾಮಿಕ್ ರಿವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಇತ್ತೀಚೆಗಷ್ಟೇ ಹಾರ್ಮುಜ್ ಜಲಸಂಧಿಯಲ್ಲಿ ಎರಡು ಸರಕು ಸಾಗಣೆ ಹಡಗುಗಳನ್ನು ವಶಪಡಿಸಿಕೊಂಡಿದೆ. ಜಾಗತಿಕ ತೈಲ ಮತ್ತು ಅನಿಲದ ಶೇ 20ರಷ್ಟು ಸಾಗಣೆಯಾಗುವ ಈ ಜಲಸಂಧಿಯಲ್ಲಿ ಅಮೆರಿಕ ಬಿಗಿ ಭದ್ರತೆ ಒದಗಿಸುತ್ತಿರುವ ಹೊತ್ತಿನಲ್ಲೇ ನೌಕಾದಳದ ಉನ್ನತ ಅಧಿಕಾರಿಯ ನಿರ್ಗಮನವಾಗಿರುವುದು ಅಮೆರಿಕದ ಸೇನಾ ಕಾರ್ಯಾಚರಣೆಗಳ ಮೇಲೆ ಪ್ರಭಾವ ಬೀರುವ ಸಾಧ್ಯತೆಯಿದೆ. 2025ರ ಆರಂಭದಿಂದಲೂ ಟ್ರಂಪ್ ಆಡಳಿತವು ಸುಮಾರು ಹನ್ನೆರಡಕ್ಕೂ ಹೆಚ್ಚು ಉನ್ನತ ಸೇನಾ ಕಮಾಂಡರ್‌ಗಳನ್ನು ವಜಾಗೊಳಿಸಿದೆ ಅಥವಾ ನಿವೃತ್ತಿಗೊಳಿಸಿದೆ ಎಂದು ವರದಿಗಳು ತಿಳಿಸಿವೆ.
