ಕರ್ನಾಟಕದಲ್ಲಿ ದಶಕಗಳಿಂದ ʼಕಾಯುʼತ್ತಿರುವ ‘ಪರಿಶಿಷ್ಟ ಜಾತಿ ಒಳಮೀಸಲಾತಿ’ ಕುರಿತ ಐತಿಹಾಸಿಕ ನಿರ್ಧಾರಕ್ಕೆ ಸಿದ್ದರಾಮಯ್ಯ ಸರ್ಕಾರ ಇಂದು (ಏಪ್ರಿಲ್ 24) ಸಮಯ ನಿಗದಿ ಮಾಡಿದೆ. ಮಧ್ಯಾಹ್ನ 2 ಗಂಟೆಗೆ ನಡೆಯಲಿರುವ ವಿಶೇಷ ಸಚಿವ ಸಂಪುಟ ಸಭೆಯ ಕಡೆಗೆ ಇಡೀ ರಾಜ್ಯದ ಅವಕಾಶವಂಚಿತ ಸಮುದಾಯಗಳ ದೃಷ್ಟಿ ನೆಟ್ಟಿದೆ.
ಯಾರಿಗೆ ಎಷ್ಟು ಪಾಲು?:
ಸರ್ಕಾರದ ಮುಖ್ಯ ಕಾರ್ಯದರ್ಶಿ ಶಾಲಿನಿ ರಜನೀಶ್ ನೇತೃತ್ವದ ತಾಂತ್ರಿಕ ಸಮಿತಿಯಲ್ಲಿ, ಲಭ್ಯವಿರುವ ಶೇ.15ರ ಮೀಸಲಾತಿಯಲ್ಲಿ ಪರಿಶಿಷ್ಟ ಜಾತಿ ‘ಎ’ (ಎಡಗೈ)ಗೆ ಶೇ.5.3, ಪರಿಶಿಷ್ಟ ಜಾತಿ ‘ಬಿ’ (ಬಲಗೈ)ಗೆ ಶೇ.5.3 ಹಾಗೂ ಪರಿಶಿಷ್ಟ ಜಾತಿ ‘ಸಿ’ (ಸ್ಪೃಶ್ಯ, ಅಲೆಮಾರಿ ಹಾಗೂ ಇತರರು)ಗೆ ಶೇ.4.4 ಮೀಸಲಾತಿ ನಿಗದಿ ಮಾಡಲು ಸಲಹೆ ನೀಡಲಾಗಿದೆ ಎನ್ನಲಾಗಿದೆ.
ಈ ಮೂಲಕ ಎಲ್ಲ ಉಪಜಾತಿಗಳಿಗೂ ಅವರ ಜನಸಂಖ್ಯೆ ಮತ್ತು ಶೈಕ್ಷಣಿಕ ಸ್ಥಿತಿಗತಿಗೆ ಅನುಗುಣವಾಗಿ ನ್ಯಾಯ ಒದಗಿಸುವ ಕಸರತ್ತು ನಡೆದಿದೆ.
ಕೇವಲ ಸಮಿತಿ ವರದಿ ಜಾರಿಯಷ್ಟೇ ಅಲ್ಲ, ಸಂಪುಟದ ಒಳಗಿರುವ ಸಚಿವರ ಅಭಿಪ್ರಾಯಗಳನ್ನು ತೂಗಿಸಿ ನೋಡುವುದು ಸಿಎಂ ಸಿದ್ದರಾಮಯ್ಯನವರಿಗೆ ಸದ್ಯ ಅಗ್ನಿಪರೀಕ್ಷೆಯಾಗಿದೆ. ಎಡಗೈ ಸಮುದಾಯದ ಸಚಿವರು ‘ತಕ್ಷಣ ಜಾರಿ’ಗೆ ಪಟ್ಟು ಹಿಡಿದಿದ್ದರೆ, ಇತರೆ ಗುಂಪುಗಳ ಸಚಿವರ ಆತಂಕಗಳನ್ನು ನಿವಾರಿಸುವ ಜವಾಬ್ದಾರಿ ಸಿಎಂ ಮೇಲಿದೆ. ಸಂಪುಟ ಸಭೆಗೂ ಮುನ್ನ ಪರಿಶಿಷ್ಟ ಜಾತಿಯ ಸಚಿವರೊಂದಿಗೆ ಸಿದ್ದರಾಮಯ್ಯ ನಡೆಸಲಿರುವ ಪ್ರತ್ಯೇಕ ಸಭೆ, ಅಂತಿಮ ತೀರ್ಮಾನಕ್ಕೆ ಬೇಕಾದ ಸಿದ್ಧತೆ ಮಾಡಿಕೊಳ್ಳಲಿದೆ.
ಇದನ್ನೂ ಓದಿ: ಸೇನಾ ಮುಖ್ಯಸ್ಥನನ್ನು ಮನೆಗೆ ಕಳಿಸಿದ ಬೆನ್ನಲ್ಲೇ ಅಮೆರಿಕದ ನೌಕಾದಳ ಕಾರ್ಯದರ್ಶಿ ರಾಜೀನಾಮೆ
ಮಾರ್ಚ್ 27 ರಂದು ನಡೆಯಬೇಕಿದ್ದ ಸಭೆ ಉಪ ಚುನಾವಣೆಗಳ ಕಾರಣಕ್ಕೆ ಮುಂದೂಡಲ್ಪಟ್ಟಿತ್ತು. ಈಗ ಯಾವುದೇ ಅಡೆತಡೆಗಳಿಲ್ಲದ ಕಾರಣ, ಸರ್ಕಾರ ಈ ವಿಚಾರದಲ್ಲಿ ಅಂತಿಮ ತೀರ್ಮಾನ ಕೈಗೊಳ್ಳಲೇಬೇಕಾದ ಒತ್ತಡದಲ್ಲಿದೆ. ಒಳಮೀಸಲಾತಿ ಜಾರಿಯಾದರೆ ಅದು ಸಿದ್ದರಾಮಯ್ಯ ಸರ್ಕಾರದ ಪಾಲಿಗೆ ‘ಅಹಿಂದ’ ಅಸ್ತ್ರವನ್ನು ಮತ್ತಷ್ಟು ಗಟ್ಟಿಗೊಳಿಸುವ ಮಾಸ್ಟರ್‌ಸ್ಟ್ರೋಕ್ ಆಗಲಿದೆ.
ರಾಜ್ಯದ 30 ವರ್ಷಗಳ ಹೋರಾಟ, ಕೆ ಜೆ ಸದಾಶಿವ ಆಯೋಗದ ವರದಿಯಿಂದ ಹಿಡಿದು ಇಂದಿನ ತಾಂತ್ರಿಕ ಸಮಿತಿಯವರೆಗೆ ಸಾಗಿ ಬಂದ ಹಾದಿ ಇಂದು ಸುಖಾಂತ್ಯ ಕಾಣುತ್ತದೆಯೇ ಅಥವಾ ಮತ್ತೆ ಕಾನೂನು ಸಂಘರ್ಷಕ್ಕೆ ನಾಂದಿ ಹಾಡುತ್ತದೆಯೇ ಎಂಬುದು ಕೆಲವೇ ಗಂಟೆಗಳಲ್ಲಿ ನಿರ್ಧಾರವಾಗಲಿದೆ.
