ಫುಟ್ಬಾಲ್‌ ಪಂದ್ಯ ವೀಕ್ಷಣೆ ವೇಳೆ ಕುಸಿದು ಬಿದ್ದಿದ್ದ ಮಾಮುಕೋಯ
450ಕ್ಕೂ ಹೆಚ್ಚು ಮಲಯಾಳಂ ಚಿತ್ರಗಳಲ್ಲಿ ನಟನೆ
ಮಲಯಾಳಂ ಚಿತ್ರರಂಗದ ಹಿರಿಯ ನಟ ಮಾಮುಕೋಯ ಬುಧವಾರ ಮಧ್ಯಾಹ್ನ ಕೋಝೀಕ್ಕೋಡ್‌ನ ಖಾಸಗಿ ಆಸ್ಪತ್ರೆಯಲ್ಲಿ ನಿಧನರಾಗಿದ್ದಾರೆ.
76 ವರ್ಷದ ಮಾಮಕೋಯ ಕಳೆದ ಸೋಮವಾರ ಕಾಳಿಕಾವು ಎಂಬಲ್ಲಿ ನಡೆದ ಫುಟ್ಬಾಲ್‌ ಪಂದ್ಯಾವಳಿಯನ್ನು ವೀಕ್ಷಿಸುತ್ತಿದ್ದ ವೇಳೆ ಕುಸಿದು ಬಿದ್ದಿದ್ದರು. ಸ್ಥಳದಲ್ಲಿದ್ದವರು ಕೂಡಲೇ ಅವರನ್ನು ವಂಡೂರಿನ ಆಸ್ಪತ್ರೆಗೆ ದಾಖಲಿಸಿದ್ದರು. ಅವರ ಆರೋಗ್ಯ ಸ್ಥಿತಿ ಗಂಭೀರಗೊಂಡಿದ್ದರಿಂದ ವೈದ್ಯರ ಸಲಹೆಯಂತೆ ಮಂಗಳವಾರ ಕೋಝೀಕ್ಕೋಡ್‌ನ ಖಾಸಗಿ ಆಸ್ಪತ್ರೆಗೆ ಸ್ಥಳಾಂತರಿಸಿ, ತುರ್ತು ನಿಗಾ ಘಟಕದಲ್ಲಿರಿಸಿ ಚಿಕಿತ್ಸೆ ನೀಡಲಾಗುತ್ತಿತ್ತು. ಚಿಕಿತ್ಸೆ ಫಲಿಸದೆ ಬುಧವಾರ ಮಧ್ಯಾಹ್ನ 1 ಗಂಟೆ ಸುಮಾರಿಗೆ ಕೊನೆಯುಸಿರೆಳೆದಿದ್ದಾರೆ.
ರಂಗಭೂಮಿ ಕಲಾವಿದರಾಗಿದ್ದ ಮಾಮುಕೋಯ 1979ರಲ್ಲಿ ನಿಲಂಬೂರ್‌ ಬಾಲನ್‌ ನಿರ್ದೇಶನದ ʼಅನ್ಯಾರುಡೆ ಭೂಮಿʼ ಚಿತ್ರದಲ್ಲಿ ಪ್ರಮುಕ ಪಾತ್ರದಲ್ಲಿ ನಟಿಸುವ ಮೂಲಕ ಮಲಯಾಳಂ ಚಿತ್ರರಂಗ ಪ್ರವೇಶಿಸಿದರು. ನೋಡ ನೋಡುತ್ತಲೇ ಹಾಸ್ಯ ನಟನಾಗಿ ಹೆಸರು ಮಾಡಿದ ಮಾಮುಕೋಯ, ʼಗಾಂಧಿನಗರ ಸೆಕೆಂಡ್‌ ಸ್ಟ್ರೀಟ್‌ʼ, ʼಧ್ವನಿʼ, ʼಅರ್ಧಂʼ, ʼಸ್ವಾಗತಂʼ, ʼಜೋಕರ್‌ʼ, ʼಉಸ್ತಾದ್‌ ಹೋಟೆಲ್‌ʼ ಸೇರಿದಂತೆ ಮಲಯಾಳಂನ 450ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ವೈಯಕ್ತಿಕ ಕೆಲಸಕ್ಕೆ ಸರ್ಕಾರಿ ವಾಹನ ಬಳಕೆ: ತಾರಾ ವಿರುದ್ಧ ಪ್ರಕರಣ ದಾಖಲು
ಕಿರುತೆರೆಯಲ್ಲೂ ಜನಪ್ರಿಯತೆ ಗಳಿಸಿದ್ದ ಮಾಮುಕೋಯ ತಮಿಳಿನ ʼಅರಂಗೇತ್ರ ವೇಲೈʼ, ʼಕಾಸುʼ, ʼಮರಕ್ಕರ್‌ʼ, ʼಕೋಬ್ರಾʼ ಮುಂತಾದ ಚಿತ್ರಗಳಲ್ಲೂ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದರು.
