ಪ್ರಸ್ತುತ ನಾವು ಎದುರಿಸುತ್ತಿರುವ ಬಹುಮುಖ್ಯ ಸವಾಲು ಪರಿಸರ ಸಂರಕ್ಷಣೆ ಮತ್ತು ಜಾಗೃತಿ ಕುರಿತು ಹೆಚ್ಚಿನ ಸಾಹಿತ್ಯ ರಚನೆಯಾಗಬೇಕಾಗಿದೆ ಎಂದು ಸಂಸ್ಕೃತಿ ಚಿಂತಕ ಜಗನ್ನಾಥ ಮೂಲಗೆ ಅಭಿಪ್ರಾಯಪಟ್ಟರು.
ಔರಾದ ಪಟ್ಟಣದ ಕನ್ನಡ ಭವನದಲ್ಲಿ ಶನಿವಾರ ವಿಶ್ವ ಪರಿಸರ ದಿನಾಚರಣೆ ಅಂಗವಾಗಿ ಕಸಾಪ ಹಮ್ಮಿಕೊಂಡ ‘ಕನ್ನಡ ಸಾಹಿತ್ಯ-ಪರಿಸರ ಪ್ರಜ್ಞೆ’ ವಿಚಾರ ಗೋಷ್ಠಿ ಉದ್ಘಾಟಿಸಿ ಮಾತನಾಡಿದ ಅವರು, “ನಾವು ವಾಸಿಸುವ ಜನವಸತಿ ಪ್ರದೇಶದ ವಾತಾವರಣ, ಪರಿಸರ, ಹವಾಮಾನದ ಕುರಿತು ಅಕ್ಷರಗಳ ಮೂಲಕ ಜನರಲ್ಲಿ ಜಾಗೃತಿ ಮೂಡಿಸುವ ಕೆಲಸ ಸಾಹಿತಿಗಳು, ಬುದ್ದಿಜೀವಿಗಳು, ಸಮಾಜ ಸೇವಕರು ಮಾಡಬೇಕಿದೆ” ಎಂದರು.
ಸಂಪನ್ಮೂಲ ಶಿಕ್ಷಕ ಪ್ರದೀಪ ಗುಬನೂರೆ ಮಾತನಾಡಿ, “ನಾವು ಹೆಚ್ಚು ಆಲೋಚಿಸಬೇಕಿರುವುದು ಪರಿಸರ ಸಂರಕ್ಷಣೆ ಬಗ್ಗೆಯೇ. ಹಾಗಾಗಿ ಸಾಹಿತ್ಯ ಕ್ಷೇತ್ರದ ಸಾಧಕರು, ಚಿಂತಕರು ಗಾಳಿ, ಬೆಳಕು, ನೀರಿನ ಮಿತವ್ಯಯ ಇಂತಹ ವಿಷಯಗಳಿಗೆ ಒತ್ತು ನೀಡಿ ಅದಕ್ಕೆ ಪೂರಕವಾದ ಸಾಹಿತ್ಯ ರಚಿಸಲು ಮುಂದಾಗಬೇಕು” ಎಂದರು.
ಕಸಾಪ ಅಧ್ಯಕ್ಷ ಬಿ.ಎಂ.ಅಮರವಾಡಿ ಮಾತನಾಡಿ, “ಕನ್ನಡ ಸಾಹಿತ್ಯದಲ್ಲಿ ಕುವೆಂಪು, ಪೂರ್ಣಚಂದ್ರ ತೇಜಸ್ವಿ, ಬೇಂದ್ರೆ ಸೇರಿದಂತೆ ಅನೇಕರು ಪರಿಸರ ಕಾಳಜಿ, ಸಂರಕ್ಷಣೆ ಹಾಗೂ ಮಾನವ ಜೀವನದ ಮೇಲೆ ಪರಿಸರದ ಪ್ರಭಾವ, ಪರಿಣಾಮ, ವೈಚಾರಿಕತೆ ಮತ್ತು ಸೌಂದರ್ಯದ ಕುರಿತು ಬರೆದಿದ್ದಾರೆ. ಜನಪದ ಗಾಯಕರು, ವಚನಕಾರರು, ದಾಸರು, ಆಧುನಿಕ ಕವಿ ಲೇಖಕರು ಪರಿಸರ ಬಗ್ಗೆ ಕೃಷಿ ಮಾಡಿರುವುದು ನಮಗೆಲ್ಲ ದಾರಿದೀಪ” ಎಂದರು.
ಶಿಕ್ಷಕ ಸಂಘದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಪಂಡರಿ ಆಡೆ, ಔರಾದ್ ತಾಲ್ಲೂಕು ಅಧ್ಯಕ್ಷ ಗಜಾನನ ಮಳ್ಳಾ ಹಾಗೂ ಕಮಲನಗರ ತಾಲ್ಲೂಕು ಅಧ್ಯಕ್ಷ ವಿಜಯಕುಮಾರ ನುದನೂರೆ ಮಾತನಾಡಿದರು.
ಇದನ್ನೂ ಓದಿ : ಅಡುಗೆ ಅನಿಲ ದರ ₹29 ಹೆಚ್ಚಳ : ಇದೇನಾ ಅಚ್ಛೇದಿನ್ ಎಂದು ಪ್ರಶ್ನಿಸಿದ ಸಚಿವ ಈಶ್ವರ ಖಂಡ್ರೆ
ಈ ಸಂದರ್ಭದಲ್ಲಿ ಕಸಾಪ ಗೌರವ ಕಾರ್ಯದರ್ಶಿ ಜಗನ್ನಾಥ ದೇಶಮುಖ, ಮಲ್ಲಿಕಾರ್ಜುನ ಟಂಕಸಾಲೆ, ಗುರುನಾಥ ದೇಶಮುಖ, ಗೋವಿಂದ ಪಾಟೀಲ್, ವಿರೇಶ ಅಲಮಾಜೆ, ಜಗನ್ನಾಥ ಬಿರಾದಾರ, ಅಮರಸ್ವಾಮಿ ಸ್ಥಾವರಮಠ, ಆನಂದ ದ್ಯಾಡೆ, ಅಮೃತರಾವ ಬಿರಾದಾರ, ನಾಗನಾಥ ಅಣದೂರೆ, ಧನರಾಜ ಮಾನೆ, ಮಾರುತಿ ಚವ್ಹಾಣ ಸೇರಿದಂತೆ ಇನ್ನಿತರರಿದ್ದರು.
ಶಿಕ್ಷಕ ಸಂಘದ ಪ್ರತಿನಿಧಿಗಳಿಗೆ ಸಮ್ಮಾನ
ಇತ್ತೀಚೆಗೆ ಪ್ರಾಥಮಿಕ ಶಾಲಾ ಶಿಕ್ಷಕ ಸಂಘಕ್ಕೆ ಆಯ್ಕೆಯಾದ ಪಂಡರಿ ಆಡೆ, ಗಜಾನನ ಮಳ್ಳಾ, ವಿಜಯಕುಮಾರ ನುದನೂರೆ, ಮನೋಹರ ಅಂಬಾಟೆ, ಕಾಶಪ್ಪ ಮೇಗೂರೆ, ಪ್ರಭು ಬಾಳೂರೆ, ಶಿವಾನಂದ ಗಾದಗೆ, ಶರಣಪ್ಪ ಜಟಗೊಂಡ್, ವಿಠ್ಠಲ ದೇವಕತೆ, ವನಮಾಲಾ ಮಾರುತಿ ಚವ್ಹಾಣ, ಸಂಗೀತಾ ಮಾರುತಿ ರೆಡ್ಡಿ, ಸಮೀನಾ ನಯೀಮ ಅವರಿಗೆ ಸನ್ಮಾನಿಸಿ ಗೌರವಿಸಲಾಯಿತು.
