ದೇಶದಲ್ಲಿ ಗೃಹ ಬಳಕೆಯ 14.2 ಕೆ.ಜಿ. ತೂಕದ ಎಲ್‌ಪಿಜಿ ಸಿಲಿಂಡರ್ ಬೆಲೆಯನ್ನು 29 ರೂ. ಹೆಚ್ಚಳ ಮಾಡಿರುವ ಕೇಂದ್ರ ಸರ್ಕಾರದ ವಿರುದ್ಧ ವ್ಯಾಪಕ ಆಕ್ರೋಶ ವ್ಯಕ್ತವಾಗುತ್ತಿದೆ. ಮಧ್ಯಮ ಮತ್ತು ಬಡ ವರ್ಗದ ಕುಟುಂಬಗಳ ಬಜೆಟ್‌ಗೆ ಮತ್ತಷ್ಟು ಹೊಡೆತ ಬಿದ್ದಿದೆ. ಇದೇ ವಿಚಾರವಾಗಿ ಮೋದಿ ಸರ್ಕಾರದ ವಿರುದ್ಧ ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. “ಸಿಲಿಂಡರ್ ಬೆಲೆ ಏರಿಕೆಯಾಗಿರುವ ಹಿನ್ನೆಲೆ, ದೇಶದ ಜನರಿಗೆ ‘ಕಡಿಮೆ ಊಟ ಮಾಡಿ’ ಎಂದು 8 ಗಂಟೆಯ ಪ್ರಧಾನಿ ಸಲಹೆ ನೀಡಬಹುದೇನೋ” ಎಂದು ವ್ಯಂಗ್ಯವಾಡಿದ್ದಾರೆ.
ಎಕ್ಸ್‌ನಲ್ಲಿ ಸರಣಿ ಟ್ವೀಟ್‌ ಮಾಡಿರುವ ಅವರು, “ವಾಣಿಜ್ಯ ಬಳಕೆಯ ಸಿಲಿಂಡರ್ ಬೆಲೆಗಳು ಈಗಾಗಲೇ ದಾಖಲೆ ಮಟ್ಟವನ್ನು ತಲುಪಿ, ಹೋಟೆಲ್ ಹಾಗೂ ಸಣ್ಣ ಉದ್ಯಮಗಳ ಮೇಲೆ ಗಂಭೀರ ಪರಿಣಾಮ ಬೀರಿವೆ. ಇದರ ನಡುವೆಯೇ, ಗೃಹಬಳಕೆಯ ಸಿಲಿಂಡರ್ ಬೆಲೆಯನ್ನು ಕೇವಲ ಮೂರು ತಿಂಗಳ ಅವಧಿಯಲ್ಲಿ ಎರಡನೇ ಬಾರಿಗೆ 29 ರೂ. ಏರಿಕೆ ಮಾಡಿರುವುದು ಸಾರ್ವಜನಿಕರನ್ನು ಕಂಗೆಡಿಸಿದೆ” ಎಂದಿದ್ದಾರೆ.
“ಪರಿಸ್ಥಿತಿ ಹೀಗೆಯೇ ಮುಂದುವರಿದರೆ, ಬಹುಶಃ ಪ್ರಧಾನಿಯವರು ರಾತ್ರಿ 8 ಗಂಟೆಗೆ (8 PM) ಮತ್ತೊಮ್ಮೆ ದೇಶವನ್ನುದ್ದೇಶಿಸಿ ಟಿವಿಯಲ್ಲಿ ಪ್ರತ್ಯಕ್ಷರಾಗಿ, ಜನಸಾಮಾನ್ಯರಿಗೆ ‘ಕಡಿಮೆ ಊಟ ಮಾಡಿ‘ ಎಂಬ ಹೊಸ ಮಾದರಿಯ ‘ಆತ್ಮನಿರ್ಭರತೆ’ಯ ಉಚಿತ ಸಲಹೆ ನೀಡಿದರೂ ಅಚ್ಚರಿಯಿಲ್ಲ!” ಎಂದಿದ್ದಾರೆ
“ಕಾಂಗ್ರೆಸ್ ಪಕ್ಷ ಅಧಿಕಾರಕ್ಕೆ ಬಂದರೆ ದೇಶದ ಮಹಿಳೆಯರ ಮಾಂಗಲ್ಯವನ್ನು ಕಸಿಯುತ್ತದೆ ಎಂಬ ಅತ್ಯಂತ ಕೀಳು ಮಟ್ಟದ, ಭಾವನಾತ್ಮಕ ರಾಜಕೀಯ ಹೇಳಿಕೆಯನ್ನು ಪ್ರಧಾನಿಯವರು ನೀಡಿದ್ದರು. ಆದರೆ, ಇಂದು ದೇಶದ ವಾಸ್ತವವೇ ಬೇರೆಯಾಗಿದೆ. ಮಾಂಗಲ್ಯದ ರಕ್ಷಣೆ ನೆಪದಲ್ಲಿ ಮತ ಪಡೆದ ಪ್ರಧಾನಿ, ಇಂದು ಬೆಲೆ ಏರಿಕೆಯ ಗದಾಪ್ರಹಾರದ ಮೂಲಕ ನೇರವಾಗಿ ಜನರ ಅನ್ನದ ತಟ್ಟೆಯನ್ನೇ ಕಸಿಯುತ್ತಿದ್ದಾರೆ” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: ಬಂಗಾರ ಸಾಮ್ರಾಜ್ಯ ಪತನ: ರಾಜೇಶ್ ಎಕ್ಸ್‌ಪೋರ್ಟ್ಸ್‌ನ 15.15 ಲಕ್ಷ ಕೋಟಿ ರೂ. ಮಹಾ ಹಗರಣ
“ಕೇಂದ್ರ ಸರ್ಕಾರದ ಈ ಜನವಿರೋಧಿ ನಿರ್ಧಾರ ಮತ್ತು ಬೆಲೆ ಏರಿಕೆಯ ‘ಅಚ್ಚೇ ದಿನಗಳ’ (ಒಳ್ಳೆಯ ದಿನಗಳು) ಬಗ್ಗೆ ಕರ್ನಾಟಕದ ಬಿಜೆಪಿ ನಾಯಕರು ತಳೆದಿರುವ ಗಾಢ ಮೌನವು ಆಘಾತಕಾರಿಯಾಗಿದೆ. ಸಾರ್ವಜನಿಕರ ಸಂಕಷ್ಟಕ್ಕೆ ಸ್ಪಂದಿಸದ ಇವರ ಈ ನಡವಳಿಕೆಯು, ಜನಸಾಮಾನ್ಯರ ಎಡೆಗೆ ಅವರಿಗಿರುವ ಮಾನಸಿಕ ಕ್ರೌರ್ಯ ಮತ್ತು ಬೇಜವಾಬ್ದಾರಿತನವನ್ನು ಎತ್ತಿ ತೋರಿಸುತ್ತದೆ” ಎಂದು ಸಚಿವರು ಕುಟುಕಿದ್ದಾರೆ.
