ರಕ್ತದಾನವು ಜೀವ ಉಳಿಸುವ ಮಹತ್ವದ ಸೇವೆಯಾಗಿದ್ದು, ಯುವ ಜನಾಂಗ ಹೆಚ್ಚಿನ ಸಂಖ್ಯೆಯಲ್ಲಿ ಸ್ವಯಂಪ್ರೇರಿತರಾಗಿ ರಕ್ತದಾನ ಮಾಡಲು ಮುಂದೆ ಬರಬೇಕು ಎಂದು ಶಕುಂತಲಾ ಬೆಲ್ದಾಳೆ ಕರೆ ನೀಡಿದರು.
ಬೀದರ್ ತಾಲೂಕಿನ ಕೋಳಾರ (ಕೆ) ಗ್ರಾಮದ ಬಸವ ಮಂಟಪದಲ್ಲಿ ಶ್ರೀ ಬಸವಸಿರಿ ಎಜ್ಯುಕೇಶನಲ್ ಮತ್ತು ಚಾರಿಟೇಬಲ್ ಟ್ರಸ್ಟ್ ಬೀದರ್, ರಾಷ್ಟ್ರೀಯ ಬಸವ ದಳ ಕೋಳಾರ (ಕೆ) ಹಾಗೂ ಬೀದರ್ ಬ್ರಿಮ್ಸ್ ಸಹಯೋಗದಲ್ಲಿ ಭಾನುವಾರ ಆಯೋಜಿಸಿದ್ದ ರಕ್ತದಾನ ಶಿಬಿರವನ್ನು ಗುರುಬಸವ ಪೂಜೆಯೊಂದಿಗೆ ಉದ್ಘಾಟಿಸಿ ಅವರು ಮಾತನಾಡಿದರು.
“ಇಂದಿನ ದಿನಗಳಲ್ಲಿ ಎಲ್ಲಾ ದಾನಗಳಿಗಿಂತ ರಕ್ತದಾನವು ಅತ್ಯಂತ ಶ್ರೇಷ್ಠ ಹಾಗೂ ಮಹತ್ವದ ದಾನವಾಗಿದೆ. ಅಪಘಾತ, ಶಸ್ತ್ರಚಿಕಿತ್ಸೆ ಸೇರಿದಂತೆ ವಿವಿಧ ತುರ್ತು ಸಂದರ್ಭಗಳಲ್ಲಿ ರಕ್ತದ ಅವಶ್ಯಕತೆ ಎದುರಾಗುತ್ತದೆ. ಪ್ರತಿಯೊಬ್ಬ ಆರೋಗ್ಯವಂತ ವ್ಯಕ್ತಿಯೂ ರಕ್ತದಾನ ಮಾಡುವ ಮೂಲಕ ಮತ್ತೊಬ್ಬರ ಜೀವ ಉಳಿಸುವ ಮಹತ್ಕಾರ್ಯದಲ್ಲಿ ಪಾಲ್ಗೊಳ್ಳಬೇಕು” ಎಂದರು.
ಬೀದರ್ ಬ್ರಿಮ್ಸ್ ನಿರ್ದೇಶಕಿ ಡಾ.ಶಾಂತಲಾ ಕೌಜಲಗಿ ಮಾತನಾಡಿ, “ಹಿಂದಿನ ದಿನಗಳಿಗಿಂತ ಇಂದು ರಕ್ತದಾನದ ಅಗತ್ಯತೆ ಮತ್ತು ಅನಿವಾರ್ಯತೆ ಹೆಚ್ಚಾಗಿದೆ. ಕೋಳಾರ ಗ್ರಾಮದಲ್ಲಿ ಇಂತಹ ಮಹತ್ವದ ಶಿಬಿರವನ್ನು ಆಯೋಜಿಸಿರುವುದು ಶ್ಲಾಘನೀಯ” ಎಂದರು.
ಚರ್ಮರೋಗ ತಜ್ಞ ಡಾ.ವಿಜಯಕುಮಾರ್ ಕೋಟೆ ಮಾತನಾಡಿ, “ಯುವಕರು ರಕ್ತದಾನ ಮಾಡಲು ಹೆಚ್ಚಿನ ಸಂಖ್ಯೆಯಲ್ಲಿ ಮುಂದೆ ಬರಬೇಕು. ರಕ್ತದಾನದಿಂದ ದೇಹದಲ್ಲಿ ಹೊಸ ರಕ್ತಕಣಗಳ ಉತ್ಪತ್ತಿಗೆ ಸಹಕಾರಿಯಾಗುತ್ತದೆ. ಗ್ರಾಮದ ಯುವಕರು ಸ್ವಯಂಪ್ರೇರಿತರಾಗಿ ರಕ್ತದಾನಕ್ಕೆ ಮುಂದಾಗಿರುವುದು ಹೆಮ್ಮೆಯ ಸಂಗತಿಯಾಗಿದೆ” ಎಂದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಟ್ರಸ್ಟ್ ಅಧ್ಯಕ್ಷೆ ಶೈಲಜಾ ಜಿ. ಹುಡಗೆ ಮಾತನಾಡಿ, “ಗ್ರಾಮದ ಯುವಕರು ಹೆಚ್ಚಿನ ಸಂಖ್ಯೆಯಲ್ಲಿ ಮುಂದೆ ಬಂದು ರಕ್ತದಾನ ಮಾಡಿರುವುದು ಹೆಮ್ಮೆಯ ಸಂಗತಿ. ರಕ್ತದಾನದ ಮೂಲಕ ಗ್ರಾಮದ ಸೌಹಾರ್ದತೆ ಮತ್ತು ಮಾನವೀಯತೆಯನ್ನು ಎಲ್ಲರೂ ಎತ್ತಿಹಿಡಿದಿದ್ದಾರೆ” ಎಂದು ಹೇಳಿದರು.
ಸಾನಿಧ್ಯ ವಹಿಸಿದ್ದ ಬಸವಕಲ್ಯಾಣ ಗುಣತೀರ್ಥವಾಡಿಯ ಬಸವಪ್ರಭು ಸ್ವಾಮೀಜಿ ಅವರು ಸ್ವತಃ 13ನೇ ಬಾರಿ ರಕ್ತದಾನ ಮಾಡಿ, ರಕ್ತದಾನದ ಮಹತ್ವ ಹಾಗೂ ಅದರಿಂದ ಸಮಾಜಕ್ಕೆ ದೊರೆಯುವ ಪ್ರಯೋಜನಗಳ ಕುರಿತು ತಿಳಿಸಿದರು. ರಕ್ತವು ರಕ್ತನಾಡಿಗಳಲ್ಲಿ ಹರಿಯಬೇಕು ವಿನಃ ನಾಲಿಗಳಲ್ಲಿ ಹರಿಯಬಾರದು ಎಂಬ ಸಂದೇಶದ ಮೂಲಕ ಯುವಜನರಲ್ಲಿ ಸೌಹಾರ್ದತೆ ಭಾವನೆ ಬೆಳೆಸುವಂತೆ ಕರೆ ನೀಡಿದರು.
ಇದನ್ನೂ ಓದಿ : ವಚನ ಕಲ್ಯಾಣ | ಭಕ್ತಿಯೆಂಬ ಪೃಥ್ವಿಯಲ್ಲಿ ಗುರೂಪದೇಶವೆಂಬ ನೇಗಿಲಂ ಪಿಡಿದು
ಕಾರ್ಯಕ್ರಮದಲ್ಲಿ ಪ್ರಮುಖರಾದ ರಾಷ್ಟ್ರೀಯ ಬಸವ ದಳದ ಅಧ್ಯಕ್ಷ ಅಶೋಕ ಶಂಭು, ಅಖಿಲ ಭಾರತ ಕರ್ನಾಟಕ ಬ್ರಾಹ್ಮಣ ಮಹಾಸಭೆಯ ಸಂಘಟನಾ ಕಾರ್ಯದರ್ಶಿ ಸತೀಶ ಕುಲಕರ್ಣಿ, ಅಕ್ಕಮಹಾದೇವಿ ಮಹಿಳಾ ಘಟಕದ ಪರವಾಗಿ ಭಕ್ತಿಶ್ರೀ ತುಪ್ಪದ, ಮಲ್ಲಿಕಾರ್ಜುನ ಶಂಭು, ರಾಜಕುಮಾರ್ ಚಿಲ್ಲರ್ಗೆ, ವಿಶ್ವನಾಥ ಪಾಪಡೆ, ರಾಮಶೆಟ್ಟಿ ಸಿದ್ದೇಶ್ವರ, ಅರುಣಕುಮಾರ್ ಬಿರಾದಾರ, ಅರವಿಂದ ಧುಮ್ಮನಸೂರೆ, ಡಾ.ಬಸವದರ್ಶನ ಹುಡಗೆ, ವೈಜಿನಾಥರಾವ ಶಂಭು, ಅಮೃತಪ್ಪ ಪಾಪಡೆ, ಅಮೃತಪ್ಪ ಚಿಲ್ಲರೆ, ಗುರುಬಸವ ಹುಡಗೆ, ಬಸವಕುಮಾರ್ ಪಾಪಡೆ, ಶರಣು ಖ್ಯಾಮ, ಚೇತನಾ ಬಿರಾದಾರ, ಐಶ್ವರ್ಯ ಪಾಟೀಲ, ಮಹಾನಂದ ಪಾಪಡೆ, ರೇಖಾ ಪಾಪಡೆ, ಶಕ್ತಿ ಯಾಬಾ ಸೇರಿದಂತೆ ಅನೇಕರಿದ್ದರು. ರವಿ ಶಂಭು ಸ್ವಾಗತಿಸಿದರು. ಗುಂಡಪ್ಪ ಹುಡಗೆ ವಂದಿಸಿದರು. ರವಿ ಪಾಪಡೆ ನಿರೂಪಿಸಿದರು.
