ಕಾಡು ಪ್ರಾಣಿಗಳ ಬೇಟೆಗೆಂದು ಅಕ್ರಮ ಶಸ್ತ್ರಾಸ್ತ್ರಗಳನ್ನು ವಾಹನದಲ್ಲಿ ಸಾಗಿಸುತ್ತಿದ್ದ ಮೂಡಿಗೆರೆ ಮತ್ತು ಕಡೂರು ತಾಲ್ಲೂಕಿನ 7 ಆರೋಪಿಗಳನ್ನು ಸಿಂಗಟಗೆರೆ ಪೊಲೀಸರು ಸಿನಿಮೀಯ ಶೈಲಿಯಲ್ಲಿ ಬೆನ್ನಟ್ಟಿ ವಶಕ್ಕೆ ಪಡೆದಿದ್ದಾರೆ.
ಸಿಂಗಟಗೆರೆ ಹೋಬಳಿಯ ಮಲ್ಲಾಘಟ್ಟ ರಸ್ತೆಯಲ್ಲಿ ಪೊಲೀಸ್ ಸಿಬ್ಬಂದಿಗಳು ರಾತ್ರಿ ಗಸ್ತು ಕರ್ತವ್ಯದಲ್ಲಿದ್ದಾಗ ಈ ಕಾರ್ಯಾಚರಣೆ ನಡೆದಿದೆ. ಅನುಮಾನಾಸ್ಪದವಾಗಿ ಬಂದ ಕೆಎ-18/ಬಿ-6332 ಸಂಖ್ಯೆಯ ಬುಲೆರೋ ಪಿಕಪ್ ವಾಹನವನ್ನು ತಡೆದು ಪೊಲೀಸರು ತೀವ್ರ ತಪಾಸಣೆ ನಡೆಸಿದ್ದಾರೆ. ಸಿಂಗಲ್ ಬ್ಯಾರೆಲ್ ಬಂದೂಕುಗಳು, 25 ಜೀವಂತ ಕಾಟ್ರೇಜ್‌ಗಳು (ಮದ್ದುಗುಂಡು), ತಲೆಗೆ ಧರಿಸುವ ಹಣೆ ಬ್ಯಾಟರಿಗಳು ಹಾಗೂ ದಟ್ಟ ಕತ್ತಲಲ್ಲೂ ಪ್ರಾಣಿಗಳನ್ನು ಗುರುತಿಸಬಲ್ಲ 02 ದೊಡ್ಡ ಫೋಕಸ್ ಲೈಟ್‌ಗಳು ಪತ್ತೆಯಾಗಿವೆ. ವಿಚಾರಣೆಗೆ ಒಳಪಡಿಸಿದಾಗ, ಇವರೆಲ್ಲರೂ ಕಾಡು ಹಂದಿಗಳನ್ನು ಬೇಟೆಯಾಡಲು ಬಂದಿದ್ವಿ ಎಂದಿದ್ದಾರೆ. ಬಂಧಿತ ಆರೋಪಿಗಳು ಮೂಡಿಗೆರೆ ಕಸಬಾ ಹೋಬಳಿ ಬಿದರಹಳ್ಳಿಯ ಗಂಧನ್ ಜಿ.ಎಂ, ಗೌತಮ್ ಜಿ.ಎಂ, ಬಣಕಲ್ ಹೋಬಳಿ ಕುಂದೂರು ಗ್ರಾಮದ ಸಚ್ಚಿನ್ಎಸ್.ಎಂ, ಅಭಿಷೇಕ್ ಎಸ್.ಎಂ, ದರ್ಶನ ಗ್ರಾಮದ ಸಂಜೀವ್ ಕುಮಾರ್, ನೂತನ ಡಿ.ಎಸ್ ಹಾಗೂ ಕಡೂರು ತಾಲ್ಲೂಕು ಯಗಟಿ ಹೋಬಳಿಯ ಮುಗಳಿಕಟ್ಟೆ ಗೇಟ್ ನಿವಾಸಿ ದೇವರಾಜ ಎಂದು ಗುರುತಿಸಲಾಗಿದೆ.
ಇದನ್ನೂ ಓದಿದ್ದೀರಾ?ಚಿಕ್ಕಮಗಳೂರು | ಯುವತಿ ಮೇಲೆ ದೇವಸ್ಥಾನ ಅರ್ಚಕನಿಂದ ಅತ್ಯಾಚಾರ: ಪ್ರಕರಣ ದಾಖಲು
ಈ ಕುರಿತು ಅಕ್ರಮವಾಗಿ ಶಸ್ತ್ರಾಸ್ತ್ರಗಳನ್ನು ಸಾಗಿಸಿ, ವನ್ಯಜೀವಿಗಳ ಬೇಟೆಗೆ ಸಂಚು ರೂಪಿಸಿದ ಹಿನ್ನೆಲೆಯಲ್ಲಿ ಸಿಂಗಟಗೆರೆ ಪೊಲೀಸ್ ಠಾಣೆಯಲ್ಲಿ ಅಕ್ರಮ ಶಸ್ತ್ರಾಸ್ತ್ರ ಕಾಯ್ದೆ ಕಲಂ 3, 20, 25 ಆರ್ಮ್ಸ್ ಆಕ್ಟ್ ಹಾಗೂ 3(5) ಬಿಎನ್‌ಎಸ್‌ ಅಡಿ ಗಂಭೀರ ಮೊಕದ್ದಮೆ ದಾಖಲಿಸಲಾಗಿದೆ. ಸದ್ಯ ಎಲ್ಲ 7 ಜನ ಆರೋಪಿಗಳನ್ನು ಬಂಧಿಸಲಾಗಿದೆ. ಪೊಲೀಸರ ಕಾರ್ಯಾಚರಣೆ ಬಗ್ಗೆ ಸಾರ್ವಜನಿಕರು ಅಭಿನಂದನೆ ಸಲ್ಲಿಸಿದ್ದಾರೆ.
