ವಾಹನಗಳು ರಸ್ತೆಗೆ ಇಳಿಯುವ ಮುನ್ನ ಕಡ್ಡಾಯವಾಗಿ ನಂಬರ್‌ ಪ್ಲೇಟ್ ಹೊಂದಿರಬೇಕಾದದ್ದು ಕಡ್ಡಾಯ. ಆದರೆ, ಹುಬ್ಬಳ್ಳಿಯಲ್ಲಿ ನೋಂದಣಿಯಿಲ್ಲದ ಬೈಕ್‌, ಕಾರು, ರಿಕ್ಷಾ, ಜೀಪ್‌, ರೋಲರ್‌ ಹಾಗೂ ಇತರ ವಾಹನಗಳು ಸಂಚರಿಸುತ್ತಿದ್ದು, ಇಂತಹ ವಾಹನಗಳ ಮೇಲೆ ಕ್ರಮ ಕೈಗೊಳ್ಳಲಾಗುತ್ತಿದೆ.
ನಂಬರ್‌ ಪ್ಲೇಟ್ ಇಲ್ಲದ ವಾಹನಗಳನ್ನು ಹಗಲಿನ ವೇಳೆ ಒಳರಸ್ತೆಗಳಲ್ಲಿ ಹೆಚ್ಚಾಗಿ ಓಡಿಸುತ್ತಾರೆ. ಮುಖ್ಯ ರಸ್ತೆಯಲ್ಲೂ ಕೆಲವರು ಓಡಿಸುತ್ತಾರೆ. ಆದರೆ, ಸಂಚಾರ ಪೊಲೀಸರು ದೂರದಲ್ಲಿ ಕಂಡರೆ, ಅಲ್ಲಿಯೇ ವಾಹನಗಳನ್ನು ತಿರುಗಿಸಿ ಬೇರೆ ಮಾರ್ಗ ಹಿಡಿಯುತ್ತಾರೆ. ಸಿಕ್ಕಿಬೀಳುವ ಕೆಲವರು ದಂಡ ಕಟ್ಟುತ್ತಾರೆ. ಇನ್ನೂ ಕೆಲವರು ನಮ್ಮ ಕಣ್ತಪ್ಪಿಸಿ, ಓಡಿಸುತ್ತಾರೆ. ಅಂತಹ ವಾಹನಗಳು ಬಹುತೇಕ ಸಂದರ್ಭಗಳಲ್ಲಿ ಅಪರಾಧ ಕೃತ್ಯಗಳಿಗೂ ಬಳಕೆಯಾಗುವ ಸಾಧ್ಯತೆ ಇರುತ್ತದೆ’ ಎಂದು ಪೊಲೀಸರು ತಿಳಿಸಿದರು.
‘ಕಳೆದ ವರ್ಷದಿಂದ ವಾಹನಗಳಿಗೆ ಹೆಚ್ಚು ಸುರಕ್ಷಿತ ನೋಂದಣಿ ಪ್ಲೇಟ್ (ಎಚ್‌ಎಸ್‌ಆರ್‌ಪಿ) ಕಡ್ಡಾಯಗೊಳಿಸಲಾಗಿದ್ದು, ಡೀಲರ್‌ಗಳು ಅವುಗಳನ್ನು ಅಳವಡಿಸಿಯೇ ಮಾರಬೇಕು. ಶಾಶ್ವತ ನೋಂದಣಿಯಿಲ್ಲದ ವಾಹನಗಳನ್ನು ಮಾರಲು ಅವಕಾಶವಿಲ್ಲ. ಆದರೂ, ಕೆಲವು ಡೀಲರ್‌ಗಳು ಮೊದಲಿನಂತೆಯೇ ವಾಹನಗಳನ್ನು ಮಾರಿರುವ ಆರೋಪಗಳು ಕೇಳಿ ಬಂದಿವೆ. ಈಗಾಗಲೇ ಎಚ್ಚರಿಕೆ ಸಹ ನೀಡಲಾಗಿದೆ’ ಎಂದು ಪ್ರಾದೇಶಿಕ ಸಾರಿಗೆ ಅಧಿಕಾರಿ (ಆರ್‌ಟಿಒ) ಕೆ. ದಾಮೋದರ ಮಾದ್ಯಮಗಳಿಗೆ ತಿಳಿಸಿದ್ದಾರೆ.
‘ಎರಡು-ಮೂರು ವರ್ಷಗಳ ಹಿಂದೆ ಖರೀದಿಸಿದ ಬೈಕ್‌, ಕಾರುಗಳಿಗೆ ಕೆಲವರು ಈವರೆಗೂ ನಂಬರ್‌ ಪ್ಲೇಟ್ ಅಳವಡಿಸಿಕೊಂಡಿಲ್ಲ. ಇನ್ನು ಕೆಲವರು ಎಚ್‌ಎಸ್‌ಆರ್‌ಪಿ ನಂಬರ್‌ ಪ್ಲೇಟ್ ಪಡೆದುಕೊಂಡಿದ್ದರೂ ಅಳವಡಿಸಿಕೊಂಡಿಲ್ಲ. ಈಗಾಗಲೇ ಕಾರ್ಯಾಚರಣೆ ನಡೆಸಿ ಮ್ಯಾಕ್ಸಿ ಕ್ಯಾಬ್‌ 3.21 ಲಕ್ಷ, ರೋಡ್‌ ರೋಲರ್‌ 1.34 ಲಕ್ಷ, ಗೂಡ್ಸ್‌ ವಾಹನಕ್ಕೆ 23 ಸಾವಿರ ಸೇರಿದಂತೆ ಐದು ವಾಹನಗಳ ಮಾಲೀಕರಿಂದ ದಂಡ ಕಟ್ಟಿಸಿಕೊಂಡಿದ್ದು, ಪೊಲೀಸ್ ಇಲಾಖೆ ಜೊತೆ ಸಭೆ ನಡೆಸಿ, ಶೀಘ್ರ ಕಾರ್ಯಾಚರಣೆ ನಡೆಸಲಾಗುವುದು ಎಂದಿದ್ದಾರೆ.
