ಮಧ್ಯಪ್ರಾಚ್ಯದ ಯುದ್ಧದ ಪರಿಣಾಮದಿಂದ ತೈಲ ಕೊರತೆ ಎದುರಾಗಿದ್ದು, ತಾಲೂಕಿನಾದ್ಯಂತ ಪೆಟ್ರೋಲ್, ಡೀಸೆಲ್‌ಗಾಗಿ ವಾಹನ ಸವಾರರು ದಿನವಿಡೀ ಸರತಿಯಲ್ಲಿ ನಿಲ್ಲುವಂತಾಗಿದೆ. ವಿಜಯಪುರ ಜಿಲ್ಲೆಯ ಇಂಡಿ ನಗರದಲ್ಲಿ 12 ಪೆಟ್ರೋಲ್ ಬಂಕ್ ಸೇರಿದಂತೆ ತಾಲ್ಲೂಕಿನ ಹಲವೆಡೆ ಪೆಟ್ರೋಲ್ ಬಂಕ್‌ಗಳಿವೆ. ಆದರೆ, ನಗರದಲ್ಲಿ ನಿತ್ಯ ಎರಡು ಮೂರು ಬಂಕ್‌ಗಳು ಕಾರ್ಯ ನಿರ್ವಹಿಸಿದರೆ, ಉಳಿದ ಬಂಕ್‌ಗಳು ಬಂದ್ ಆಗಿರುತ್ತದೆ.
ರೈತರು ಹೈರಾಣ: ಮುಂಗಾರು ಬಿತ್ತನೆ ಶುರುವಾಗಿದೆ. ಕೃಷಿ ಚಟುವಟಿಕೆ ಯಂತ್ರಾಧಾರಿ0ತವಾಗಿದ್ದರಿಂದ ರೈತರಿಗೆ ಡೀಸೆಲ್ ಅಭಾವ ಎದುರಾಗಿದೆ, ಟ್ರ್ಯಾಕ್ಟರ್‌ನಿಂದ ಭೂಮಿ ಹದಗೊಳಿಸುವ, ಬಿತ್ತನೆ ಮಾಡುವ ಕಾರ್ಯಕ್ಕೆ ಹಿನ್ನಡೆಯಾಗುತ್ತಿದೆ. ತಾಲೂಕಿನಲ್ಲಿ ಹೆಸರು, ಉದ್ದು, ಸೂರ್ಯಕಾಂತಿ, ಶೇಂಗಾ, ಮುಕಣಿ ಮೊದಲಾದ ಬೆಳೆಗಳ ಬಿತ್ತನೆ ಆರಂಭಿಸಲು ರೈತರು ಸಜ್ಜಾಗಿದ್ದಾರೆ. ಇದೀಗ ಬಂಕ್‌ಗಳಲ್ಲಿ ಡೀಸೆಲ್‌ಗಾಗಿ ಕ್ಯಾನ್ ಹಿಡಿದು ಸಾಲುಗಟ್ಟಿ ನಿಲ್ಲುವ ಪರಿಸ್ಥಿತಿ ಉಂಟಾಗಿದೆ. ಕ್ಯಾನ್ ತೆಗೆದುಕೊಂಡು ಹೋದರೆ ಬಂಕ್‌ನವರು ಡೀಸೆಲ್ ನೀಡುತ್ತಿಲ್ಲ. ಡೀಸೆಲ್ ಇಲ್ಲದೆ ರೈತರು ಬಿತ್ತನೆಗೆ ಎದರು ನೋಡುವಂತಾಗಿದೆ. ಅಲ್ಲೆದೆ ಪೆಟ್ರೋಲ್‌ಗಾಗಿ ಗಂಟೆಗಟ್ಟಲೇ ಕ್ಯೂನಲ್ಲಿ ನಿಲ್ಲುವ ಪರಿಸ್ಥಿತಿ ಎದುರಾಗಿದೆ.
ದಿನದ ದುಡಿಮೆಗೆ ಪೆಟ್ಟು: ವಾಹನಗಳನ್ನೇ ನಂಬಿ ತಾಲ್ಲೂಕಿನಾದ್ಯಂತ ಸಾವಿರಾರು ಜನರು ಬದುಕು ಕಟ್ಟಿಕೊಂಡಿದ್ದಾರೆ. ಈಗ ಡೀಸೆಲ್ ಕೊರತೆಯಿಂಬ ದಿನದ ದುಡಿಮೆಗೆ ಕೊಕ್ಕೆ ಬೀಳುತ್ತಿದೆ. ತಾಲ್ಲೂಕಿನಲ್ಲಿ ಸಾವಿರಾರು ಟ್ಯಾಕ್ಟರ್‌ಗಳು, ಇಂಡಿಯಿಂದ ಸೊಲ್ಲಾಪುರಕ್ಕೆ ಪ್ರತಿದಿನ 200 ಜೀಪು, ಸಿಂದಗಿಗೆ 50 ಸೇರಿದಂತೆ ಒಟ್ಟು 400 ಜೀಪುಗಳು ಸಾರ್ವಜನಿಕರ ಸಂಚಾರಕ್ಕೆ ಬಳಕೆಯಾಗುತ್ತಿವೆ. 50ಕ್ಕೂ ಹೆಚ್ಚು ಮಿನಿ ಬಸ್‌ಗಳು, 100ಕ್ಕೂ ಹೆಚ್ಚು ಆಟೋ, 200 ಟಂಟಂ, 200 ಗೂಡ್ಸ್, ಸಾವಿರಕ್ಕೂ ಹೆಚ್ಚು ಕಾರುಗಳು ಮತ್ತು 50ಕ್ಕೂ ಹೆಚ್ಚು ಸರ್ಕಾರಿ ಇಲಾಖೆ ವಾಹನಗಳು, 50 ಟ್ರಕ್‌ಗಳು ಓಡಾಡುತ್ತಿವೆ.
ಕೆಲವರು ಕ್ಯಾನ್ ಮೂಲಕ ದುಪ್ಪಟ್ಟು ದರಕ್ಕೆ ಕಾಳಸಂತೆಯಲ್ಲಿ ಡೀಸೆಲ್ ಮಾರುತ್ತಿದ್ದಾರೆ. ಡೀಸೆಲ್, ಪೆಟ್ರೋಲ್‌ಗಳ ಬೆಲೆ ಏರಿಕೆ ಯಿಂದ ಸಾರ್ವಜನಿಕ ವಾಹನಗಳ ಚಾಲಕರು ಬಾಡಿಗೆ, ಕಿ.ಮೀ ದರ ಹೆಚ್ಚಿಸಿದ್ದಾರೆ . ಪ್ರಯಾಣ ದರದ ಏರಿಕೆಯ ಬಿಸಿ ಗ್ರಾಹಕರಿಗೆ ತಟ್ಟುತ್ತಿದೆ.
