ಮೈಸೂರಿನ ರಾಮಕೃಷ್ಣನಗರದ ಮಂಡ್ಯ ರಮೇಶ್ ಅವರ ನಟನ ರಂಗಮಂದಿರದಲ್ಲಿ ಸೆಪ್ಟೆಂಬರ್ 6ರಂದು ‘ಕತ್ತಲ ನೆರಳು’ ನಾಟಕದ ಎರಡು ಪ್ರದರ್ಶನಗಳನ್ನು ಆಯೋಜಿಸಲಾಗಿದೆ.
ಬೆಂಗಳೂರು ಥಿಯೇಟರ್ ಕಲೆಕ್ಟಿವ್ ಸಂಸ್ಥೆಯ ವತಿಯಿಂದ ಡೇವಿಡ್ ಹ್ಯಾರೋವರ್ ಅವರ ‘ಬ್ಲ್ಯಾಕ್ ಬರ್ಡ್’ ನಾಟಕವನ್ನು ಆಧರಿಸಿ ರೂಪಾಂತರಗೊಂಡಿರುವ ‘ಕತ್ತಲ ನೆರಳು’ ನಾಟಕವನ್ನು ರಂಗಕರ್ಮಿ ವೆಂಕಟೇಶ್ ಪ್ರಸಾದ್ ರೂಪಾಂತರಿಸಿ ನಿರ್ದೇಶಿಸಿದ್ದಾರೆ.
ಹೆಸರಾಂತ ಚಲನಚಿತ್ರ ಹಾಗೂ ರಂಗಕಲಾವಿದ ಬಾಲಾಜಿ ಮನೋಹರ್, ಸಿರಿರವಿಕುಮಾರ್ ಹಾಗೂ ರಂಗಾಯಣ ರಘು ಅವರ ಪುತ್ರಿ ಚುಕ್ಕಿ. ರ.ಮ. ಅವರು ನಾಟಕದಲ್ಲಿ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ನಿನ್ನೆಯ ನೆನಪುಗಳನ್ನು ಎದುರಿಸುವುದು ಹೇಗೆ? ಅವುಗಳನ್ನು ಬಿಟ್ಟು ಇಂದು ಹಾಗೂ ನಾಳೆಯನ್ನು ಬದುಕಲು ಸಾಧ್ಯವೇ ಎಂಬ ಗಂಭೀರ ಪ್ರಶ್ನೆಯನ್ನು ನಾಟಕ ಮುಂದಿಡುತ್ತದೆ.
15 ವರ್ಷಗಳ ಬಳಿಕ ಮತ್ತೆ ಭೇಟಿಯಾಗುವ ಇಬ್ಬರು ವ್ಯಕ್ತಿಗಳು ಒಂದೇ ಕೋಣೆಯಲ್ಲಿ ಮುಖಾಮುಖಿಯಾಗುತ್ತಾರೆ. ಅವರ ನಡುವೆ ಮೌನವಾಗಿ ಇಣುಕುವ ನೆನಪುಗಳ ಜೊತೆಗೆ ವಿದ್ರೋಹ, ಕೋಪ, ದುಗುಡ ಹಾಗೂ ಪಾಪಪ್ರಜ್ಞೆಯಂತಹ ಭಾವನೆಗಳು ಸಂಘರ್ಷಕ್ಕೆ ಕಾರಣವಾಗುತ್ತವೆ. ಪ್ರತಿಯೊಂದು ನೋಟವೂ ಹಳೆಯ ನೆನಪುಗಳನ್ನು ಕೆದಕಿದರೆ, ಪ್ರತಿಯೊಂದು ಮಾತೂ ಆರದ ಗಾಯಗಳಿಗೆ ಉಪ್ಪು ಸವರುವಂತಾಗುತ್ತದೆ. ಈ ಮಾನಸಿಕ ಸಂಘರ್ಷದ ಮೂಲಕ ನಾಟಕ ಪ್ರೇಕ್ಷಕರನ್ನು ಆಳವಾದ ಚಿಂತನೆಗೆ ಒಳಪಡಿಸುತ್ತದೆ.
ಈ ವಿಶೇಷ ಸುದ್ದಿ ಓದಿದ್ದೀರಾ? ‘ಓದಿನಲ್ಲಿ ಜೀವ, ಓದಿನಲ್ಲೇ ಜೀವನ’
ಸೆಪ್ಟೆಂಬರ್ 6ರಂದು ಮಧ್ಯಾಹ್ನ 3.30ಕ್ಕೆ ಹಾಗೂ ಸಂಜೆ 6.30ಕ್ಕೆ ಎರಡು ಪ್ರದರ್ಶನಗಳು ನಡೆಯಲಿವೆ. ಪ್ರವೇಶ ದರ ರೂ.200 ನಿಗದಿಪಡಿಸಲಾಗಿದೆ. ಟಿಕೆಟ್‌ಗಳಿಗಾಗಿ 9900182400 ಸಂಖ್ಯೆಯನ್ನು ಸಂಪರ್ಕಿಸಬಹುದು. ಅಲ್ಲದೆ, BookMyShow ಮೂಲಕವೂ ಟಿಕೆಟ್‌ಗಳು ಲಭ್ಯವಿವೆ. ರಂಗಾಸಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ನಾಟಕ ವೀಕ್ಷಿಸಿ ಕಲಾವಿದರನ್ನು ಪ್ರೋತ್ಸಾಹಿಸುವಂತೆ ಆಯೋಜಕರು ಮನವಿ ಮಾಡಿದ್ದಾರೆ.
