ಜನಪರ ಚಳುವಳಿಗಳು ಪರ್ಯಾಯ ರಾಜಕೀಯ ಶಕ್ತಿಯಾಗಿ ಬೆಳೆಯಬೇಕಾದ ಅಗತ್ಯವಿದ್ದು, ಮಾನವೀಯ ಮೌಲ್ಯಗಳನ್ನು ಕಾಪಾಡುವ ಎಲ್ಲರೂ ಒಂದಾಗಬೇಕು ಎಂದು ಪ್ರಗತಿಪರ ಚಿಂತಕ ಹಾಗೂ ಉಪನ್ಯಾಸಕ ಶಂಕರ್ ವಾಲೀಕಾರ ಅಭಿಪ್ರಾಯಪಟ್ಟರು.
ನಗರದ ಟೌನ್ ಹಾಲ್‌ನಲ್ಲಿ ನಡೆದ ಕರ್ನಾಟಕ ಜನಶಕ್ತಿ ಕಾರ್ಯಕರ್ತರು ಹಾಗೂ ಹಿತೈಷಿಗಳ ವಲಯ ಸಮ್ಮೇಳನದಲ್ಲಿ ಮಾತನಾಡಿದ ಅವರು, ಶೋಷಿತ ಸಮುದಾಯಗಳು ಇನ್ನೂ ವಿಭಜಿತವಾಗಿರುವುದು ದುರ್ಬಲತೆಯಾಗಿದೆ ಎಂದು ಹೇಳಿದರು.
ಬಸವ ತತ್ವ, ಅಂಬೇಡ್ಕರ್ ತತ್ವ, ಪೆರಿಯಾರ್ ಸೇರಿದಂತೆ ಮಹಾನ್ ನಾಯಕರ ಚಿಂತನೆಗಳನ್ನು ಆಧಾರವಾಗಿಸಿಕೊಂಡು ಅವರ ಆಶಯಗಳ ಸಾಧನೆಗಾಗಿ ಎಲ್ಲರೂ ಒಂದಾಗಿ ಬಲಿಷ್ಠ ಶಕ್ತಿಯಾಗಿ ರೂಪುಗೊಳ್ಳಬೇಕು ಎಂದು ಕರೆ ನೀಡಿದರು.
ನಂತರ ಮಾತನಾಡಿದ ಹಿರಿಯ ಹೋರಾಟಗಾರ ಹಾಗೂ ದಲಿತ ಮುಖಂಡ ಎಂ.ಆರ್. ಭೇರಿ, ವೈರಿತ್ವದಿಂದ ಮಾನವತ್ವ ನಾಶವಾಗುವುದಿಲ್ಲ; ಮಾನವತ್ವದಿಂದ ವೈರಿತ್ವವೇ ನಾಶವಾಗುತ್ತದೆ. ಸಮಾಜದಲ್ಲಿ ದ್ವೇಷಕ್ಕಿಂತ ಪ್ರೀತಿಯೇ ಅಗತ್ಯವಾಗಿದ್ದು, ಪ್ರೀತಿಗೆ ಸೃಜನಶೀಲ ಶಕ್ತಿಯಿದೆ, ಆದರೆ ದ್ವೇಷಕ್ಕೆ ಅಂತಹ ಶಕ್ತಿ ಇಲ್ಲ ಎಂದರು.
ನ್ಯಾಯ, ಸ್ವಾತಂತ್ರ್ಯ, ಸಮಾನತೆ ಹಾಗೂ ಭ್ರಾತೃತ್ವವನ್ನು ವಿರೋಧಿಸುವವರ ಕೈಯಲ್ಲೇ ಅಧಿಕಾರವಿರುವುದು ವಿಷಾದನೀಯ. ಮನುವಾದಿಗಳ ಆಕರ್ಷಕ ಮಾತುಗಳಿಗೆ ನಾವು ಮರುಳಾಗಿದ್ದೇವೆ. ಇಂತಹ ಪರಿಸ್ಥಿತಿಯನ್ನು ಎದುರಿಸಲು ಎಲ್ಲರೂ ಒಂದಾಗಿ ಸಂಘಟಿತರಾಗಬೇಕಾಗಿದೆ ಎಂದು ಕರೆ ನೀಡಿದರು.
ಕಾರ್ಯಕ್ರಮದಲ್ಲಿ ಬಣ್ಣ ಬಣ್ಣದ ಧ್ವಜಗಳನ್ನು ಹಿಡಿದು ಕೈ ಕೈ ಮಿಲಾಯಿಸಿ ಹಲಿಗೆ ಬಾರಿಸುವ ಮೂಲಕ ನಾವೆಲ್ಲಾ ಒಂದಾಗಿದ್ದೇವೆ ಎಂದು ಸಂದೇಶ ನೀಡಿದರು.
ಈ ಸುದ್ದಿ ಓದಿದ್ದೀರಾ? ರಾಯಚೂರು | ಕೊಲೆ ಪ್ರಕರಣ; 10 ಮಂದಿಗೆ ಜೀವಾವಧಿ ಶಿಕ್ಷೆ
ಕಾರ್ಯಕ್ರಮದಲ್ಲಿ ಹಿರಿಯ ದಲಿತ ಹೋರಾಟಗಾರ ಭೀಮಣ್ಣ ನಗನೂರು, ಕರ್ನಾಟಕ ಜನಶಕ್ತಿ ರಾಜ್ಯ ಮುಖಂಡ ಕೆ ಎಲ್ ಅಶೋಕ್, ಜನ ಸಂಗ್ರಾಮ ಪರಿಷತ್ ಜಿಲ್ಲಾ ಮುಖಂಡ ಅಸ್ಲಾಂ ಪಾಷಾ, ಜಾನ್ ವೆಸ್ಲಿ, ಮಂಜುನಾಥ ಗಾಂಧಿನಗರ, ಅಶೋಕ ನಂಜಲದಿನ್ನಿ, ರೈತ ಮುಖಂಡ ಅಮೀನ್ ದಿದ್ದಿಗಿ, ನಾರಾಯಣ ಬೆಳಗುರ್ಕಿ, ಸರಸ್ವತಿ, ಇನ್ನಿತರರು ಇದ್ದರು.
