ಅಲ್ಲಮ ತನ್ನ ವಚನಗಳಲ್ಲಿ ಬಳಸಿರುವ ವಿಶಿಷ್ಟವಾದ 101 ಪದಗಳನ್ನು ಗುರುತಿಸಿ, ಪ್ರತಿ ಪದದ ಬಗ್ಗೆ ಈ ಕೆಳಗಿನ ಮಾದರಿಯಲ್ಲಿ ವಿವರಿಸಲಾಗುವುದು. ಈದಿನ ಓದುಗರಿಗಾಗಿ ಅಲ್ಲಮನ ಅರಿವು…
ಒಡಲು
ಒಡಲೊಳಗಿದ್ದು
ಒಡಲಿಂಗಾಧಾರವಾಗಿ
ಒಡಲ ಸೋಂಕದೆ ಒಡಲ
ಬೆಳಗುವ ಪರಿಯ ನೋಡಾ!
ಬೆಳಗಿಂಗೆ ಬೆಳಗಾಗಿ
ಬೆಳಗುವ ಪರಿಯ ನೋಡಾ!
ಪರಮಚೈತನ್ಯ ನಿರಾಳ
ಗುಹೇಶ್ವರಲಿಂಗವ ನೋಡಾ.
ವಚನಾರ್ಥ:
ಒಡಲು ಎಂಬ ಪದಕ್ಕೆ ಹೊಟ್ಟೆ ಎಂಬ ಅರ್ಥವಿದೆ. ಈ ವಚನ ಸಂದರ್ಭದಲ್ಲಿ ಒಡಲು ಅಂದರೆ ದೇಹ. ತಾನು ಸೃಷ್ಟಿಸಿದ ಪ್ರತೀ ದೇಹ ಜೀವ ಜಂತು ಪ್ರಾಣಿ ಪಕ್ಷಿಗಳಲ್ಲಿ ದೈವವು ಸ್ವಯಂ ನೆಲೆಸಿರುತ್ತಾನೆ ಎಂದು ಐತರೀಯೋಪನಿಷತ್ ಹೇಳುತ್ತದೆ. ಎಲ್ಲಿಯವರೆಗೆ ದೇಹ ಭಾಗದಲ್ಲಿ ದೇವಪ್ರಭೆ ಇರುವುದೋ ಅಲ್ಲಿಯವರೆಗೆ ಆ ದೇಹ ಜೀವಂತವಾಗಿರುತ್ತದೆ. ಆ ದೇವಪ್ರಭೆ ಕ್ಷೀಣಿಸಿದಾಗ ಜೀವದ ಅಂತ್ಯವಾಗುತ್ತದೆ. ಅಂತಹ ದೇವಪ್ರಭೆಯನ್ನೇ ಅಲ್ಲಮ ಒಡಲಿಗೆ ಆಧಾರವಾದದ್ದು ಅಂದಿರುವುದು. ಅದು ಒಡಲ ಒಳಗಿದೆ. ಒಡಲಿಗೆ ಆಧಾರವಾಗಿದೆ. ಆದರೆ ಒಡಲನ್ನು ಮುಟ್ಟದಂತಿದೆ. ಒಡಲಿಗೆ ಚೈತನ್ಯದ ಸೆಲೆಯಾಗಿದ್ದುಕೊಂಡು ಒಡಲನ್ನು ಬೆಳಗುತ್ತಿದೆ. ಹಾಗೆ ಬೆಳಗುವ ಬೆಳಕಿನ ಪ್ರಖರತೆ ಎಷ್ಟಿದೆ ಎಂದರೆ ಅದು ಬೆಳಕಿಗೇ ಬೆಳಕಾಗಿ ಒಡಲಾಳದಲ್ಲಿ ಬೆಳಗುತ್ತದೆ. ಆ ಬೆಳಗು ಬೇರಾವುದೂ ಅಲ್ಲ, ಪರಮ ಚೈತನ್ಯವಾದ ನಿರ್ಮಲವಾದ ನಿರಾಳವಾದ ಜ್ಯೋತಿರ್ಲಿಂಗ.
ಪದ ಪ್ರಯೋಗಾರ್ಥ:
ಒಡಲು ಮತ್ತು ಬೆಳಗು ಈ ವಚನದಲ್ಲಿ ಪ್ರಮುಖವಾಗಿ ಪ್ರಯೋಗವಾಗಿರುವ ಪದಗಳು. ಎಂಟು ಸಾಲಿನ ವಚನದಲ್ಲಿ ಒಡಲು ಮತ್ತು ಬೆಳಗು ತಲಾ ನಾಲ್ಕು ಬಾರಿ ಬಳಕೆಯಾಗಿವೆ. ಒಂದೇ ಪದವನ್ನು ವಿವಿಧ ಅರ್ಥಗಳಲ್ಲಿ ಪ್ರಯೋಗಿಸಿ ವಿಷಯ ನಿರೂಪಣೆ ಮಾಡಿರುವುದು ಅಲ್ಲಮನ ಅನನ್ಯತೆ. ಒಡಲು ಎಂಬ ಪದಕ್ಕೆ ವಿಶೇಷ ಪದಶಕ್ತಿಯಿದೆ. ಇಂತಹ ಶಕ್ತಿಶಾಲಿ ಪದವನ್ನು ಆದ್ಯ ವಚನಕಾರ ದೇವರ ದಾಸಿಮಯ್ಯ ಬಳಸಿರುವ ಪರಿ ಇಲ್ಲಿ ಉಲ್ಲೇಖನೀಯವಾಗುತ್ತದೆ. “ಒಡಲುಗೊಂಡವ ಹಸಿವ; ಒಡಲುಗೊಂಡವ ಹುಸಿವ; ಒಡಲುಗೊಂಡವನೆಂದು ನೀನೆನ್ನ ಜಡಿದೊಮ್ಮೆ ನುಡಿಯದಿರಾ! ನೀನೆನ್ನಂತೆ ಒಮ್ಮೆ ಒಡಲುಗೊಂಡು ನೋಡಾ! ರಾಮನಾಥ” ಇಲ್ಲೂ ಕೂಡ ವಚನದಲ್ಲಿ ಒಡಲು ನಾಲ್ಕು ಬಾರಿ ಪ್ರಯೋಗವಾಗಿದ್ದು ಇಡೀ ವಚನದ ಆಶಯವನ್ನು ಗಟ್ಟಿಗೊಳಿಸುತ್ತದೆ. ಅಲ್ಲಮ ದಾಸಿಮಯ್ಯನವರಂತೆ ಇತರೆ ಎಲ್ಲಾ ವಚನಕಾರರು ವಚನ ಸಾಹಿತ್ಯವನ್ನು ಕನ್ನಡ ಪದಸಂಪತ್ತಿನಿಂದ ಶ್ರೀಮಂತಗೊಳಿಸಿದ್ದಾರೆ. ಆ ಅಭಿಮಾನ ನಮ್ಮ ಒಡಲ ಮತ್ತು ಮಡಿಲ ತುಂಬಬೇಕು.
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಕೀಲು ಮಡಗಿದಾತ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾದುದು ಮಾದುದಲ್ಲ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾಯದ ಮಂಜು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ದಳದುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಯಲು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಷ್ಟಸಂತಾನ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅಗ್ನಿಸ್ತಂಭದ ರಕ್ಷೆ
ಹರಿಹರ ಶಿವಕುಮಾರ್
ಲೇಖಕ, ವೃತ್ತಿಯಿಂದ ಚಾರ್ಟರ್ಡ್ ಅಕೌಂಟೆಂಟ್. ಲೆಕ್ಕಪರಿಶೋಧನೆ ಮತ್ತು ತೆರಿಗೆ ವಿಚಾರಗಳಲ್ಲಿ ಪರಿಣತಿ. ಕನ್ನಡದಲ್ಲಿ ಕಂಪ್ಯೂಟರ್ ಬಳಕೆ ಇವರ ಹವ್ಯಾಸ. ಕನ್ನಡ ಭಾಷೆ ಮತ್ತು ಸಾಹಿತ್ಯದಲ್ಲಿ ಆಸಕ್ತರು. ಶಿವಮೊಗ್ಗ ಜಿಲ್ಲೆಯವರು, ಸದ್ಯ ಬೆಂಗಳೂರಿನಲ್ಲಿ ನೆಲೆ.
