ಕವಿ ಹಾಗೂ ಬರಹಗಾರರು ತಮ್ಮ ಬರವಣಿಗೆ ಮೂಲಕ ಮನಸ್ಸುಗಳನ್ನು ಕೂಡಿಸುವ ಕೆಲಸ ಮಾಡಬೇಕು ಎಂದು ಸಾಗರ ಲೇಖಕ ಡಾ.ಸರ್ಫ್ರಾಜ್ ಚಂದ್ರಗುತ್ತಿ ಸಲಹೆ ನೀಡಿದರು. ಶಿಕಾರಿಪುರ ಪಟ್ಟಣದ ಕನ್ನಡ ಸಾಹಿತ್ಯ ಪರಿಷತ್ತಿನ ಕನ್ನಡ ಸಾಹಿತ್ಯ ಭವನದಲ್ಲಿ ಶುಕ್ರವಾರ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ ಆಯೋಜಿಸಿದ್ದ ದಸರಾ ಕಾವ್ಯ ಸಂಭ್ರಮ(ಕವಿಗೋಷ್ಠಿ) ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
ಯಾವುದು ಯಾವುದೋ ವಿಷಯಗಳಿಗೆ ನಾವೆಲ್ಲಾ ಪ್ರಕ್ಸುಬ್ಧರಾಗಿದ್ದೇವೆ ಹಾಗೂ ಮನಸ್ಸುಗಳು ಛಿದ್ರವಾಗಿದ್ದಾವೆ. ಜಾತಿ,ಮತ,ಧರ್ಮ,ಭಾಷೆ ಎಲ್ಲವನ್ನು ರಾಜಕೀಕರಣಗೊಳಿಸಿ ನಾವೆಲ್ಲಾ ಬೇರ್ಪಟ್ಟಿರುವ ಈ ಹೊತ್ತಲ್ಲಿ ನಮ್ಮ ಮನಸ್ಸುಗಳನ್ನು ಜೋಡಿಸಲು ಒಂದು ಹಣತೆ ಹೆಚ್ಚಬೇಕಾಗಿದೆ. ರಾಷ್ಟ್ರಕವಿ ಜಿ.ಎಸ್. ಶಿವರುದ್ರಪ್ಪ ಅವರ ಹಣತೆ ಹಚ್ಚುವ ಪದ್ಯ ಅದನ್ನು ಹೇಳುತ್ತದೆ. ಯುವಕರೇ ನೀವು ಬೆಂಕಿ ಆಗಬೇಡಿ,ಬೆಳಕಾಗಿ ಎಂದು ಜಿ.ಎಸ್. ಶಿವರುದ್ರಪ್ಪ ಹೇಳಿದ್ದಾರೆ. ಸಮಾಜದ ಸ್ವಾಸ್ಥ್ಯ ಕಾಪಾಡುವ ಬಹುದೊಡ್ಡ ಜವಾಬ್ದಾರಿ ಕವಿಗಳು ಹಾಗೂ ಬರಹಗಾರರ ಮೇಲಿದೆ ಎಂದರು.
ತಾಲೂಕು ಜಾನಪದ ಪರಿಷತ್ ಅಧ್ಯಕ್ಷ ಬಿ. ಪಾಪಯ್ಯ ಮಾತನಾಡಿ, ಪದೇ ಪದೇ ತೋಚಿದನ್ನು ಗೀಚಿದಾಗ ನೀವು ಕವಿಯಾಗಲು ಸಾಧ್ಯತೆ ಇದೆ. ಮನಸ್ಸಿನ ಭಾವನೆಗಳನ್ನು ಕ್ರೂಡಿಕರಿಸಿದಾಗ ಕವಿಯಾಗಲು ಅವಕಾಶ ಇದೆ. ಈ ಕವಿಗೋಷ್ಠಿ ವೇದಿಕೆಯನ್ನು ನೀವು ಸದ್ಬಳಕೆ ಮಾಡಿಕೊಳ್ಳಬೇಕು ಎಂದು ಸಲಹೆ ನೀಡಿದರು.
ಅಧ್ಯಕ್ಷತೆ ವಹಿಸಿದ್ದ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷ ಹೆಚ್.ಎಸ್. ರಘು ಮಾತನಾಡಿ, ಯುವ ಕವಿ ಸಮುದಾಯವನ್ನು ಪ್ರೋತ್ಸಾಹಿಸುವ ಉದ್ದೇಶದಿಂದ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ ಹಲವು ವರ್ಷಗಳಿಂದ ಕವಿಗೋಷ್ಠಿ ಕಾರ್ಯಕ್ರಮ ಆಯೋಜಿಸುತ್ತಿದೆ. ಕವಿಗಳಾಗಿ ಹಾಗೂ ಬರಹಗಾರರಾಗಿ ಹೊರಹೊಮ್ಮುವ ಮೂಲಕ ನೀವು ಸಾಹಿತ್ಯ ಕ್ಷೇತ್ರಕ್ಕೆ ಕೊಡುಗೆ ನೀಡಬೇಕು.
ಕಾವ್ಯ ಸಂಭ್ರಮದಲ್ಲಿ ೩೫ಕ್ಕೂ ಹೆಚ್ಚು ಕವಿಗಳು ತಮ್ಮ ಕವನ ವಾಚನ ಮಾಡಿದರು.ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಎಂ.ನವೀನ್ ಕುಮಾರ್, ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ ಮಾಜಿ ಅಧ್ಯಕ್ಷ ಶಿವರಂಜನಿ ಸುದರ್ಶನ್, ಸೆಲೆಬ್ರೇಷನ್ ವರ್ಲ್ಡ್ ಮಾಲೀಕ ವೀರನಗೌಡ, ತಾಲೂಕು ಕನ್ನಡ ಸಾಹಿತ್ಯ ಸಾಂಸ್ಕೃತಿಕ ವೇದಿಕೆ ಅಧ್ಯಕ್ಷ ಎಸ್.ಎನ್. ನರಸಿಂಹಸ್ವಾಮಿ, ಕನ್ನಡ ಸಾಹಿತ್ಯ ಪರಿಷತ್ ಪದಾಧಿಕಾರಿಗಳಾದ ಶಿವಲಿಂಗಪ್ಪ ಪಾರಿವಾಳ, ಡಾ.ಪ್ರಕಾಶ್, ಜಿಯಾವುಲ್ಲಾ, ಜಿ.ಎಚ್ ತಿಪ್ಪೇಶ್ ಮತ್ತಿತರರು ಉಪಸ್ಥಿತರಿದ್ದರು.
