ಉತ್ತರ ಕನ್ನಡ ಜಿಲ್ಲೆಯಾದ್ಯಂತ ಮಳೆ ಹೆಚ್ಚುತ್ತಿದ್ದಂತೆ ಭೂಕುಸಿತದ ಭೀತಿ ಎದುರಾಗಿದ್ದು, ಕಾರವಾರ ತಾಲೂಕಿನ ಸಂಕ್ರುಬಾಗ್ ಘಾಟ್‌ನ ರಾಷ್ಟ್ರೀಯ ಹೆದ್ದಾರಿ 66ರಲ್ಲಿ ಗುಡ್ಡ ಕುಸಿಯುವ ಆತಂಕ ನಿರ್ಮಾಣವಾಗಿದೆ. ಪರಿಸ್ಥಿತಿಗೆ ಜಿಲ್ಲಾಡಳಿತದ ನಿರ್ಲಕ್ಷ್ಯವೇ ಕಾರಣ ಎಂಬ ಆರೋಪ ಕೇಳಿಬಂದಿದೆ.
ಜಿಲ್ಲೆಯಲ್ಲಿ ಹೆದ್ದಾರಿ ವಿಸ್ತರಣೆಯ ಹೆಸರಿನಲ್ಲಿ ಬೆಟ್ಟದ ಇಳಿಜಾರನ್ನು ಬಗೆದು ಹಾಕಲಾಗಿದೆ. ಭೂ ವೈಜ್ಞಾನಿಕ ಸಮೀಕ್ಷಾ ತಜ್ಞರು ಕಳೆದ ಮೂರು ವರ್ಷಗಳ ಹಿಂದೆಯೇ ಬೆಟ್ಟ ಕಡಿದು, ಹೆದ್ದಾರಿ ನಿರ್ಮಿಸುವ ಈ ಯೋಜನೆಯಿಂದ ಭೂಕುಸಿತ ಅಪಾಯ ಸಂಭವಿಸುತ್ತದೆ ಎಂಬ ಮುನ್ನೆಚ್ಚರಿಕೆ ನೀಡಿದ್ದರೂ ಜಿಲ್ಲಾಡಳಿತ ಈ ಕುರಿತು ಯಾವುದೇ ಸುರಕ್ಷತಾ ಕ್ರಮವನ್ನು ಅನುಸರಿಸಲಿಲ್ಲ.
ಜಿಲ್ಲಾಡಳಿತ ಕಾರವಾರ ತಾಲೂಕಿನ ಸಂಕ್ರುಬಾಗ್ ಘಾಟ್ ವಿಭಾಗದ ಮೂಲಕ ಹೆದ್ದಾರಿಯ ಒಂದು ಕ್ಯಾರೇಜ್‌ವೇಯಲ್ಲಿ ಮಳೆಗಾಲ ಮುಗಿಯುವವರೆಗೆ ಸಂಚಾರ ನಿಷೇಧಿಸಿದೆ. ಮಳೆಗಾಲದ ಆರಂಭದಲ್ಲಿಯೇ ಹೊನ್ನಾವರ ಪಟ್ಟಣದ ರಾಮತೀರ್ಥ ಕ್ರಾಸ್ ಬಳಿ ಕುಸಿತ ಸಂಭವಿಸಿದ್ದು, ಅರ್ಬೈಲ್ ಮತ್ತು ದೇವಿಮನೆ ಘಾಟ್ ವಿಭಾಗಗಳಲ್ಲೂ ಭೂಕುಸಿತದ ಸ್ಥಿತಿ ಬಂದೊದಗಿದೆ.
ಉತ್ತರ ಕನ್ನಡ ಜಿಲ್ಲೆಯ 29% ಗುಡ್ಡಗಾಡು ಪ್ರದೇಶ ಭೂಕುಸಿತಕ್ಕೆ ಗುರಿಯಾಗುವ ಸಾಧ್ಯತೆಯಿದೆ ಎಂದು ಮಣಿಪಾಲ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (MIT) ಎಂಜಿನಿಯರಿಂಗ್ ವಿದ್ಯಾರ್ಥಿಗಳ ಸಂಶೋಧನಾ ವರದಿ ತಿಳಿಸಿದೆ. ಇದರಲ್ಲಿ ಬಹುತೇಕ ಸ್ಥಳಗಳು ರಾಷ್ಟ್ರೀಯ ಹೆದ್ದಾರಿಯಲ್ಲಿವೆ. ಶಿರೂರು ದುರಂತದ ನಂತರ ಜಿಎಸ್‌ಐ ತಜ್ಞರು ಎಂಟು ದುರ್ಬಲ ರಾಷ್ಟ್ರೀಯ ಹೆದ್ದಾರಿ ಪ್ರದೇಶಗಳನ್ನು ಗುರುತಿಸಿದ್ದಾರೆ. ಶಿರೂರು ಹೊರತುಪಡಿಸಿ ಉಳಿದೆಡೆ ಯಾವುದೇ ರಕ್ಷಣಾ ಕ್ರಮಗಳನ್ನು ಜಾರಿಗೆ ತರಲಾಗಿಲ್ಲ ಎಂದು ಸ್ಥಳೀಯರು ಜಿಲ್ಲಾಡಳಿತವನ್ನು ದೂರಿದ್ದಾರೆ.
