ಹಿಮಾಚಲ ಪ್ರದೇಶದಲ್ಲಿ ಕಳೆದ 64 ದಿನಗಳಲ್ಲಿ ಮಾನ್ಸೂನ್ ಭೀಕರ ವಿಪತ್ತನ್ನುಂಟುಮಾಡಿದೆ. ಜೂನ್ 30ರಿಂದ ಸೆಪ್ಟೆಂಬರ್ 1ರವರೆಗಿನ ಅವಧಿಯಲ್ಲಿ ಭೂಕುಸಿತ, ಪ್ರವಾಹಕ್ಕೆ ಸಿಲುಕಿ ರಾಜ್ಯದ ಒಟ್ಟು 259 ಮಂದಿ ಸಾವನ್ನಪ್ಪಿದ್ದಾರೆ. ಹಿಮಾಚಲ ಪ್ರದೇಶದಲ್ಲಿ ಕಳೆದ ಎರಡು ತಿಂಗಳ ಅವಧಿಯೊಳಗೆ ಪ್ರಕೃತಿ ವಿಕೋಪದಿಂದ ಸಂಭವಿಸಿದ ಹಾನಿಯಿಂದಾಗಿ, ರೂ. 1,200 ಕೋಟಿಗೂ ಹೆಚ್ಚು ನಷ್ಟ ಸಂಭವಿಸಿದೆ ಎಂದು ರಾಜ್ಯ ತುರ್ತು ಕಾರ್ಯಾಚರಣೆ ಕೇಂದ್ರ (SEOC) ದತ್ತಾಂಶ ತಿಳಿಸುತ್ತಿದೆ.
ಇದರಲ್ಲಿ 106 ಮಂದಿ ನೇರವಾಗಿ ಮಳೆ ಮತ್ತು ವಿಪತ್ತು ಸಂಬಂಧಿತ ಘಟನೆಗಳಿಂದ ಸತ್ತಿದ್ದಾರೆ. ಇವುಗಳಲ್ಲಿ 18 ಜನರು ಭೂಕುಸಿತದಲ್ಲಿ ಮತ್ತು 13 ಜನರು ಮುಳುಗಿ ಸಾವನ್ನಪ್ಪಿದ್ದಾರೆ. ಉಳಿದ 153 ಮಂದಿ ರಸ್ತೆ ಅಪಘಾತಗಳಲ್ಲಿ ಸತ್ತಿದ್ದಾರೆ. ಎತ್ತರದ ಬುಡಕಟ್ಟು ಜಿಲ್ಲೆಯಾದ ಲಾಹೌಲ್ ಮತ್ತು ಸ್ಪಿತಿಯಲ್ಲಿ ಮಾನ್ಸೂನ್ ಸಂಬಂಧಿತ ವಿಪತ್ತುಗಳಿಂದ 15 ಮಂದಿ ಸಾವನ್ನಪ್ಪಿದ್ದಾರೆ.
ಮಳೆಯಿಂದ ಸಾರ್ವಜನಿಕ ಮತ್ತು ಖಾಸಗಿ ಮೂಲಸೌಕರ್ಯಗಳಿಗೆ ವ್ಯಾಪಕ ಹಾನಿಯಾಗಿದ್ದು, ಒಟ್ಟು ನಷ್ಟ ₹1,202.64 ಕೋಟಿ ಎಂದು ಅಂದಾಜಿಸಲಾಗಿದೆ. ಇದರಲ್ಲಿ ಸಾರವಜನಿಕ ಸೇವಾ ವಲಯಗಳಿಗೆ ₹914 ಕೋಟಿಗಿಂತ ಹೆಚ್ಚು ನಷ್ಟವಾಗಿದ್ದು, ಜಲ ಶಕ್ತಿ ವಿಭಾಗಕ್ಕೆ ₹258 ಕೋಟಿಗಿಂತ ಹೆಚ್ಚು ನಷ್ಟವಾಗಿದೆ. ವಿಪತ್ತಿನಿಂದ 460 ಮನೆಗಳು ಸಂಪೂರ್ಣವಾಗಿ ಹಾನಿಗೊಳಗಾಗಿವೆ ಮತ್ತು 460 ಪ್ರಾಣಿಗಳು ಜೀವಂತ ಸಮಾಧಿಯಾಗಿವೆ.
ಇತ್ತೀಚಿನ ಅತೀವೃಷ್ಟಿಯಿಂದ ಸಂಪರ್ಕ ವ್ಯವಸ್ಥೆ ತೀವ್ರವಾಗಿ ಬಾಧಿತವಾಗಿದ್ದು, ಪ್ರಸ್ತುತ ರಾಜ್ಯದಲ್ಲಿ 150 ರಸ್ತೆಗಳು ಸಂಪೂರ್ಣ ಕಡಿತಗೊಂಡಿವೆ. ಮಂಡಿ ಜಿಲ್ಲೆಯಲ್ಲಿ ಅತಿ ಹೆಚ್ಚು 78 ರಸ್ತೆಗಳು ಹಾನಿಗೊಳಗಾದರೆ, ಶಿಮ್ಲಾದಲ್ಲಿ 30 ರಸ್ತೆಗಳು ನಿರ್ನಾಮಗೊಂಡಿವೆ. ವಿದ್ಯುತ್ ಸರಬರಾಜಿಗೂ ತೊಂದರೆಯಾಗಿದ್ದು, 374 ವಿತರಣಾ ಟ್ರಾನ್ಸ್‌ಫಾರ್ಮರ್‌ಗಳು (DTRs) ಕಾರ್ಯನಿರ್ವಹಿಸುತ್ತಿಲ್ಲ. ಮಂಡಿಯಲ್ಲಿ 128, ಶಿಮ್ಲಾದಲ್ಲಿ 84 ಮತ್ತು ಕುಲ್ಲುವಿನಲ್ಲಿ 81 ಟ್ರಾನ್ಸ್‌ಫಾರ್ಮರ್‌ಗಳು ಕೆಟ್ಟುಹೋಗಿದ್ದು, ಇತ್ತ ನೀರು ಸರಬರಾಜು ಜಾಲವೂ ಹಾನಿಗೊಳಗಾಗಿದೆ. 40 ನೀರು ಸರಬರಾಜು ಯೋಜನೆಗಳು ಪ್ರಸ್ತುತ ಬಾಧಿತವಾಗಿವೆ. ಹಮೀರ್‌ಪುರ್‌ನಲ್ಲಿ 23 ಮತ್ತು ಶಿಮ್ಲಾದಲ್ಲಿ 17 ಯೋಜನೆಗಳು ತೊಂದರೆಯಲ್ಲಿವೆ.
ರಾಜ್ಯ ಸರ್ಕಾರದ ಇಲಾಖೆಗಳು ಮತ್ತು ಕ್ಷೇತ್ರ ಸಂಸ್ಥೆಗಳು ಬಾಧಿತ ಜಿಲ್ಲೆಗಳಲ್ಲಿ ಪುನಃಸ್ಥಾಪನೆ ಕಾರ್ಯಾಚರಣೆ ನಡೆಸುತ್ತಿವೆ. ಮುಚ್ಚಿದ ರಸ್ತೆಗಳನ್ನು ಸಂಪರ್ಕಕ್ಕೆ ಸಿದ್ಧಗೊಳಿಸಲು, ವಿದ್ಯುತ್ ಮತ್ತು ನೀರು ಸರಬರಾಜನ್ನು ತಹಬದಿಗೆ ತರಲು ಪ್ರಯತ್ನಗಳು ನಡೆಯುತ್ತಿವೆ. ಮಳೆ ಇನ್ನೂ ಮುಂದುವರಿಯುತ್ತಿರುವುದರಿಂದ ಜನಜೀವನ ತಾಪತ್ರಯಕ್ಕೆ ಒಳಗಾಗಿದ್ದು, ಕೇವಲ ಎರಡು ತಿಂಗಳಲ್ಲಿ ಲೆಕ್ಕವಿರದಷ್ಟು ಬದುಕುಗಳು ವಿಕೋಪಕ್ಕೆ ಸಿಲುಕಿ ನಲುಗಿವೆ. ಮೂಲಸೌಕರ್ಯಗಳಿಗೆ ವ್ಯಾಪಕ ಹಾನಿಯಾಗಿರುವುದು ಹಿಮಾಚಲ ಪ್ರದೇಶದ ಮುಂದಿರುವ ಬಿಕ್ಕಟ್ಟಿನ ಚಿತ್ರಣವನ್ನು ಸೂಚಿಸುತ್ತಿದೆ.
