ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ಹಾಗೂ ಬಿಜೆಪಿ ಹಿರಿಯ ನಾಯಕ ನಿತಿನ್ ಗಡ್ಕರಿ ಅವರು ಚುನಾವಣೆಯಲ್ಲಿ ತಮಗೆ ಸಿಗುವ ಬೆಂಬಲ ಮತ್ತು ಮತಗಳ ಕುರಿತು ನೀಡಿರುವ ಹೇಳಿಕೆಯೊಂದು ತೀವ್ರ ರಾಜಕೀಯ ಚರ್ಚೆಗೆ ಗ್ರಾಸವಾಗಿದೆ. ನಾಗಪುರದಲ್ಲಿ ನಡೆದ ‘ಮಿಡಿಯಾ ಕಾನ್‌ಕ್ಲೇವ್ 2026’ ಕಾರ್ಯಕ್ರಮದಲ್ಲಿ ಮಾತನಾಡಿದ ಗಡ್ಕರಿ, “ಶಿಕ್ಷಿತ ವರ್ಗದ ಪ್ರದೇಶಗಳಿಗಿಂತಲೂ ಅಂಡರ್‌ವರ್ಲ್ಡ್, ಅಪರಾಧ ಹಿನ್ನೆಲೆ ಮತ್ತು ರೆಡ್-ಲೈಟ್ ಪ್ರದೇಶಗಳಿಂದಲೇ ತಮಗೆ ಅತಿ ಹೆಚ್ಚು ಮತಗಳು ಲಭಿಸಿವೆ” ಎಂದು ಗಡ್ಕರಿ ಹೇಳಿದ್ದಾರೆ.
ನಿತಿನ್ ಗಡ್ಕರಿ ಹೇಳಿಕೆಯು ಈಗ ತೀವ್ರ ವಿವಾದಕ್ಕೆ ಈಡಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ನೆಟ್ಟಿಗರ ತೀವ್ರ ಟೀಕೆಗೆ ಗುರಿಯಾಗಿದೆ, ಟ್ರೋಲ್‌ಗೆ ಗುರಿಯಾಗಿದೆ. “ಅಪರಾಧ ಲೋಕದ ಶೇ. 99 ರಷ್ಟು ಜನರು ನನ್ನ ಬೆಂಬಲಿಗರು ಎಂದು ಒಬ್ಬ ಕೇಂದ್ರ ಸಚಿವರೇ ಮುಕ್ತವಾಗಿ ಹೇಳಿಕೊಳ್ಳುವುದು ಪ್ರಜಾಪ್ರಭುತ್ವಕ್ಕೆ ಶೋಭೆಯಲ್ಲ” ಎಂದು ಹಲವು ನೆಟ್ಟಿಗರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ಸಾವರ್ಕರ್‌ ಪಠ್ಯ ಕೈಬಿಟ್ಟಿರುವುದು ನೋವು ತಂದಿದೆ: ನಿತಿನ್ ಗಡ್ಕರಿ
“ನಾಗಪುರದ ಪ್ರಬುದ್ಧ ಮತ್ತು ಶಿಕ್ಷಿತ ಜನರು ವಾಸಿಸುವ ಭಾಗಗಳಲ್ಲಿ ತಮಗೆ ಸುಮಾರು 70% ರಿಂದ 75% ರಷ್ಟು ಮತಗಳು ಸಿಕ್ಕಿವೆ. ಅದೇ ಸಮಯದಲ್ಲಿ ಅಪರಾಧ ಹಿನ್ನೆಲೆ, ಅಂಡರ್‌ವರ್ಲ್ಡ್ ಹಾಗೂ ರೆಡ್-ಲೈಟ್ ಪ್ರದೇಶಗಳೆಂದು ಗುರುತಿಸಿಕೊಂಡಿರುವ ಭಾಗಗಳಲ್ಲಿ ತಮಗೆ ಬರೋಬ್ಬರಿ 92% ರಷ್ಟು ಮತಗಳು ಲಭಿಸಿವೆ” ಎಂದು ಹೇಳಿದ್ದರು.
“ನಾಗಪುರದ 99% ಅಂಡರ್‌ವರ್ಲ್ಡ್ ಮತ್ತು ಸಾಮಾಜಿಕ ಕ್ಷೇತ್ರದ ಜನರು ನನ್ನ ಬೆಂಬಲಿಗರು. ಆದರೆ, ಇದರರ್ಥ ನಾನು ಅವರ ಅಕ್ರಮ ಅಥವಾ ಅಪರಾಧ ಚಟುವಟಿಕೆಗಳನ್ನು ಬೆಂಬಲಿಸುತ್ತೇನೆ ಎಂದಲ್ಲ” ಎಂದು ಹೇಳಿದ್ದರು. ಸಂಬಂಧಿತ ಪ್ರದೇಶಗಳಲ್ಲಿ ತಾವೇ ಸ್ವತಃ ರಸ್ತೆಗಳು, ಮೂಲಸೌಕರ್ಯ ಮತ್ತು ಸಾಮಾಜಿಕ ಕಾರ್ಯಗಳನ್ನು ಕೈಗೊಂಡಿದ್ದರಿಂದ ಈ ಬೆಂಬಲ ಸಿಕ್ಕಿದೆ ಎಂದು ಸ್ಪಷ್ಟನೆ ನೀಡಿದ್ದರು.
ಸಚಿವರ ಈ ಹೇಳಿಕೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ (X, ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್) ವೈರಲ್ ಆಗುತ್ತಿದ್ದಂತೆಯೇ, ನೆಟ್ಟಿಗರು ಹಾಗೂ ವಿಪಕ್ಷಗಳು ಸಚಿವರ ನಾಲಿಗೆ ಜಾರುವಿಕೆಯನ್ನು ಕಟುವಾಗಿ ಟೀಕಿಸಲು ಪ್ರಾರಂಭಿಸಿದ್ದಾರೆ. “ಸುಶಿಕ್ಷಿತ ನಾಗರಿಕರಿಗಿಂತ ಅಪರಾಧ ಹಿನ್ನೆಲೆಯ ವಲಯದಿಂದಲೇ ತಮಗೆ ಹೆಚ್ಚು ಬೆಂಬಲ ಸಿಕ್ಕಿದೆ ಎಂದು ಹೇಳುವ ಮೂಲಕ, ಸಚಿವರು ಶಿಕ್ಷಿತ ಮತದಾರರನ್ನು ಪರೋಕ್ಷವಾಗಿ ಹಗುರವಾಗಿ ಕಂಡಿದ್ದಾರೆ” ಎಂದು ಕೆಲವರು ಕಮೆಂಟ್ ಮಾಡಿದ್ದಾರೆ.
ಅಪರಾಧಿಗಳೊಂದಿಗಿನ ‘ಸಂಬಂಧ’ ಅಥವಾ ‘ಬೆಂಬಲ’ದ ಮಾತುಗಳು ಕಾನೂನು ಜಾರಿ ವ್ಯವಸ್ಥೆಯ ಮೇಲಿನ ಸಾರ್ವಜನಿಕರ ನಂಬಿಕೆಯನ್ನು ಕುಗ್ಗಿಸುತ್ತವೆ ಎಂದು ಜಾಲತಾಣ ಬಳಕೆದಾರರು ವಾದಿಸಿದ್ದಾರೆ.
