ಮಹಿಳೆಯೊಬ್ಬಳ ಮೇಲಿನ ಸಾಮೂಹಿಕ ಅತ್ಯಾಚಾರ ಪ್ರಕರಣದಲ್ಲಿ ಮತ್ತೊಬ್ಬ ಮಹಿಳೆ ಪ್ರತ್ಯಕ್ಷವಾಗಿ ದೈಹಿಕ ದೌರ್ಜನ್ಯ ಎಸಗದೇ ಇದ್ದರೂ, ಕೃತ್ಯ ಎಸಗಲು ಸಮಾನ ಉದ್ದೇಶದಿಂದ ಸಹಕರಿಸಿದ್ದರೆ ಆಕೆಯನ್ನೂ ‘ಸಾಮೂಹಿಕ ಅತ್ಯಾಚಾರ’ದ ಆರೋಪಿಯನ್ನಾಗಿ ಪರಿಗಣಿಸಬಹುದು ಎಂದು ದೆಹಲಿ ಹೈಕೋರ್ಟ್ ಅತ್ಯಂತ ಮಹತ್ವದ ತೀರ್ಪು ನೀಡಿದೆ.
ಅಪ್ರಾಪ್ತ ಹೆಣ್ಣುಮಗಳಿಗೆ ಬೆದರಿಕೆ ಹಾಕಿ, ಮತ್ತೊಬ್ಬ ವ್ಯಕ್ತಿಯೊಂದಿಗೆ ಲೈಂಗಿಕ ಸಂಬಂಧ ಬೆಳೆಸುವಂತೆ ಬಲವಂತಪಡಿಸಿದ ಮತ್ತು ಘಟನೆಯ ಸಮಯದಲ್ಲಿ ಕೋಣೆಯಲ್ಲಿ ಉಪಸ್ಥಿತರಿದ್ದು ಅಪರಾಧಕ್ಕೆ ನೆರವಾದ ತಾಯಿಯೊಬ್ಬಳ ವಿರುದ್ಧ ವಿಚಾರಣಾ ನ್ಯಾಯಾಲಯವು ದೋಷಾರೋಪ ನಿಗದಿಪಡಿಸಿತ್ತು. ಇದನ್ನು ಪ್ರಶ್ನಿಸಿ ಆ ಮಹಿಳೆ ದೆಹಲಿ ಹೈಕೋರ್ಟ್ ಮೆಟ್ಟಿಲೇರಿದ್ದಳು.
ಇದನ್ನೂ ಓದಿ: ಉತ್ತರಪ್ರದೇಶ: ದಲಿತ ಮಹಿಳೆಯ ಮೇಲೆ ಅತ್ಯಾಚಾರ
“ಕಾನೂನಿನಲ್ಲಿ ಅತ್ಯಾಚಾರ ಎಸಗುವವರನ್ನು ‘ಪುರುಷ’ ಎಂದು ವ್ಯಾಖ್ಯಾನಿಸಿರುವುದರಿಂದ, ಮಹಿಳೆಯೊಬ್ಬಳ ಮೇಲೆ ಸಾಮೂಹಿಕ ಅತ್ಯಾಚಾರದ ಆರೋಪ ಹೊರಿಸಲು ಬರುವುದಿಲ್ಲ” ಎಂಬುದು ಅರ್ಜಿದಾರ ಮಹಿಳೆಯ ವಾದವಾಗಿತ್ತು.
ಈ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಅನೂಪ್ ಜೈರಾಮ್ ಭಂಭಾನಿ ಅವರಿದ್ದ ಪೀಠವು ಅರ್ಜಿಯನ್ನು ವಜಾಗೊಳಿಸಿದೆ. ಭಾರತೀಯ ದಂಡ ಸಂಹಿತೆಯ (IPC) ಕಾಯ್ದೆಯ ಸೆಕ್ಷನ್ 376D ಮತ್ತು ಭಾರತೀಯ ನ್ಯಾಯ ಸಂಹಿತೆಯ (BNS) ಸೆಕ್ಷನ್ 70ರ ಅಡಿಯಲ್ಲಿ ‘ಸಾಮೂಹಿಕ ಅತ್ಯಾಚಾರ’ ಎಂಬುದು ಪ್ರತ್ಯೇಕ ಅಪರಾಧವಾಗಿದೆ. ಕಾನೂನಿನಲ್ಲಿ ಉಲ್ಲೇಖವಾಗಿರುವ ‘ಗುಂಪು ರಚಿಸುವ ವ್ಯಕ್ತಿಗಳು’ ಎಂಬ ಪದವು ಕೇವಲ ಪುರುಷರಿಗಷ್ಟೇ ಸೀಮಿತವಾಗಿಲ್ಲ ಎಂದು ಹೇಳಿದೆ.
ಅಪರಾಧ ಎಸಗಲು ಪ್ರತ್ಯಕ್ಷವಾಗಿ ದೈಹಿಕವಾಗಿ ತೊಡಗಿಸಿಕೊಂಡಿರಲೇಬೇಕು ಎಂದೇನಿಲ್ಲ. ಕೃತ್ಯ ಎಸಗಲು ಬೆಂಬಲವಾಗಿ ನಿಂತು, ಸಮಾನ ಉದ್ದೇಶದಿಂದ ಪ್ರಚೋದನೆ ಅಥವಾ ನೆರವು ನೀಡಿದ್ದರೆ ಆಕೆಯೂ ಅಪರಾಧದ ಭಾಗವಾಗುತ್ತಾಳೆ. ಆದರೆ, ಮಹಿಳೆಯೊಬ್ಬಳು ಒಬ್ಬಂಟಿಯಾಗಿ ಗ್ಯಾಂಗ್‌ರೇಪ್ ಆರೋಪವನ್ನು ಎದುರಿಸಲು ಸಾಧ್ಯವಿಲ್ಲ. ಆದರೆ ಗುಂಪೊಂದರ ಭಾಗವಾಗಿ ಕೃತ್ಯಕ್ಕೆ ಅನುವು ಮಾಡಿಕೊಟ್ಟಾಗ ಈ ನಿಯಮ ಅನ್ವಯವಾಗುತ್ತದೆ ಎಂದು ಕೋರ್ಟ್ ಸ್ಪಷ್ಟಪಡಿಸಿದೆ.
