ಉತ್ತರ ಪ್ರದೇಶದ ಕಾನ್ಪುರ ಜಿಲ್ಲೆಯ ನೌಬಸ್ತ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಭಾನುವಾರ ಬೆಳ್ಳಂಬೆಳಿಗ್ಗೆ ಘನ ಘೋರ ಕೃತ್ಯವೊಂದು ನಡೆದಿದೆ. ಇಲ್ಲಿನ ವಿರಾಟ್ ನಗರದಲ್ಲಿರುವ ತ್ರಿಮೂರ್ತಿ ಅಪಾರ್ಟ್‌ಮೆಂಟ್‌ನಲ್ಲಿ ವಾಸವಿದ್ದ ಔಷಧಿ ವ್ಯಾಪಾರಿಯೊಬ್ಬ ತನ್ನ 11 ವರ್ಷದ ಇಬ್ಬರು ಅವಳಿ ಪುತ್ರಿಯರನ್ನು ಅತ್ಯಂತ ಕ್ರೂರವಾಗಿ ಹತ್ಯೆ ಮಾಡಿದ್ದಾನೆ. ಶಶಿ ರಂಜನ್ ಮಿಶ್ರಾ ಎಂಬ ಆರೋಪಿ ತಂದೆಯನ್ನು ಪೊಲೀಸರು ಸ್ಥಳದಲ್ಲೇ ಬಂಧಿಸಿದ್ದಾರೆ.
ಭಾನುವಾರ ಮುಂಜಾನೆ ಸುಮಾರು 4:30ರ ಸುಮಾರಿಗೆ ಮನೆಯವರೆಲ್ಲರೂ ನಿದ್ರೆಯಲ್ಲಿದ್ದಾಗ ಈ ಹತ್ಯೆ ನಡೆದಿದೆ. ತನ್ನ ಸ್ವಂತ ಮಕ್ಕಳಾದ ರಿದ್ದಿ ಮತ್ತು ಸಿದ್ದಿ ಗಾಢ ನಿದ್ರೆಯಲ್ಲಿದ್ದಾಗ, ಆರೋಪಿ ಮಿಶ್ರಾ ಚಾಕುವಿನಿಂದ ಅವರ ಗಂಟಲು ಸೀಳಿದ್ದಾನೆ. ಮಕ್ಕಳ ಕಿರುಚಾಟ ಕೇಳದಂತೆ ಅತ್ಯಂತ ಸಂಚಿನಿಂದ ಈ ಕೃತ್ಯ ಎಸಗಲಾಗಿದ್ದು, ಹತ್ಯೆಯ ನಂತರ ಇಡೀ ಮನೆಯ ನೆಲವೆಲ್ಲಾ ರಕ್ತಮಯವಾಗಿತ್ತು. ಈ ಘಟನೆಯ ಬಗ್ಗೆ ಮಾಹಿತಿ ಪಡೆದ ಪೊಲೀಸರು ಸ್ಥಳಕ್ಕೆ ಧಾವಿಸಿದಾಗ, ಮಕ್ಕಳ ರಕ್ತಸಿಕ್ತ ದೇಹಗಳು ನೆಲದ ಮೇಲೆ ಬಿದ್ದಿದ್ದವು ಮತ್ತು ಹಂತಕ ತಂದೆ ಯಾವುದೇ ಪಶ್ಚಾತ್ತಾಪವಿಲ್ಲದೆ ಶವಗಳ ಪಕ್ಕದಲ್ಲೇ ಕುಳಿತಿದ್ದನು ಎಂದು ವರದಿಯಾಗಿದೆ.
ಈ ಕುರಿತು ಮಾಹಿತಿ ಹಂಚಿಕೊಂಡಿರುವ ಕಾನ್ಪುರ ದಕ್ಷಿಣ ವಿಭಾಗದ ಉಪ ಪೊಲೀಸ್ ಆಯುಕ್ತ (DCP) ದೀಪೇಂದ್ರ ನಾಥ್ ಚೌಧರಿ, ಆರೋಪಿಯ ಪತ್ನಿ ರೇಷ್ಮಾ ಅವರು ಬೆಳಗಿನ ಜಾವ 4:30ಕ್ಕೆ ಯುಪಿ-112 ಸಹಾಯವಾಣಿಗೆ ಕರೆ ಮಾಡಿ ವಿಷಯ ತಿಳಿಸಿದ್ದರು ಎಂದು ಹೇಳಿದ್ದಾರೆ. ಪೊಲೀಸರು ಮತ್ತು ವಿಧಿವಿಜ್ಞಾನ ತಂಡ ಸ್ಥಳಕ್ಕೆ ಭೇಟಿ ನೀಡಿ ಅಗತ್ಯ ಸಾಕ್ಷ್ಯಗಳನ್ನು ಸಂಗ್ರಹಿಸಿದ್ದು, ಮಕ್ಕಳ ದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದೆ. ಹತ್ಯೆ ನಡೆಯುವಾಗ ಮನೆಯಲ್ಲೇ ಇದ್ದ ಪತ್ನಿ ಪತಿಗೆ ಅಡ್ಡಿಪಡಿಸಲಿಲ್ಲವೇಕೆ ಅಥವಾ ನೆರೆಹೊರೆಯವರ ಸಹಾಯ ಕೋರಲಿಲ್ಲವೇಕೆ ಎಂಬ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಇದನ್ನೂ ಓದಿ: IPL 2026 | CSK ನಾಯಕ ಋತುರಾಜ್ ತೀವ್ರ ಒತ್ತಡದಲ್ಲಿದ್ದಾರೆ: ಆರ್ ಅಶ್ವಿನ್ ಕಳವಳ
ಆರೋಪಿ ಮಿಶ್ರಾ ಒಬ್ಬ ಔಷಧಿ ವ್ಯಾಪಾರಿಯಾಗಿದ್ದು, ಈ ದಂಪತಿಗೆ ಇಬ್ಬರು ಪುತ್ರಿಯರಲ್ಲದೆ ಆರು ವರ್ಷದ ಮಗನೂ ಇದ್ದಾನೆ. ಹತ್ಯೆಯ ನಂತರ ಆಘಾತಕ್ಕೊಳಗಾಗಿರುವ ತಾಯಿ ರೇಷ್ಮಾ ಸದ್ಯ ಮಾತನಾಡಲು ಸಾಧ್ಯವಾಗದ ಸ್ಥಿತಿಯಲ್ಲಿದ್ದಾರೆ. ಅವರು ಚೇತರಿಸಿಕೊಂಡ ನಂತರ ನೀಡುವ ಹೇಳಿಕೆಯು ಹತ್ಯೆಯ ಹಿಂದಿನ ನೈಜ ಕಾರಣವನ್ನು ಬಹಿರಂಗಪಡಿಸಲಿದೆ. ಸದ್ಯ ಅಪಾರ್ಟ್‌ಮೆಂಟ್ ಆವರಣದಲ್ಲಿ ಬಿಗುವಿನ ವಾತಾವರಣವಿರುವುದರಿಂದ ಮುನ್ನೆಚ್ಚರಿಕಾ ಕ್ರಮವಾಗಿ ಪೊಲೀಸ್ ಬಂದೋಬಸ್ತ್ ನಿಯೋಜಿಸಲಾಗಿದೆ.
