ಅಗ್ಗದ ಪ್ರೋಟೀನ್‌ ಮೂಲವಾಗಿರುವ ಕೋಳಿ ಮೊಟ್ಟೆಯ ಬೆಲೆ ದಿನೇ ದಿನೇ ಗಗನಕ್ಕೇರುತ್ತಿದೆ. ದೇಶದ ಹಲವು ಭಾಗಗಳಲ್ಲಿ ಫಾರ್ಮ್‌ ಮಟ್ಟದಲ್ಲೇ ಒಂದು ಮೊಟ್ಟೆಯ ಬೆಲೆ ₹7ರ ಆಸುಪಾಸಿಗೆ ತಲುಪಿದ್ದು, ಚಿಲ್ಲರೆ ಮಾರುಕಟ್ಟೆಯಲ್ಲಿ ₹8.50ರಿಂದ ₹9ರವರೆಗೆ ಮಾರಾಟವಾಗುತ್ತಿದೆ. ಮೊಟ್ಟೆ ಬೆಲೆ ಏರಿಕೆಗೆ ಎಥನಾಲ್‌ ಉತ್ಪಾದನೆಗೆ ಹೆಚ್ಚುತ್ತಿರುವ ಮೆಕ್ಕೆಜೋಳದ ಬಳಕೆ ಮುಖ್ಯ ಕಾರಣ ಎನ್ನಲಾಗುತ್ತಿದೆ. ಜತೆಗೆ ಕೋಳಿ ಆಹಾರದ ಬೆಲೆ ಏರಿಕೆ, ಪಶ್ಚಿಮ ಏಷ್ಯಾದ ಸಂಘರ್ಷ, ಹಕ್ಕಿಜ್ವರ ಹಾಗೂ ತೀವ್ರ ಬಿಸಿಲು ಸೇರಿದಂತೆ ಹಲವು ಕಾರಣಗಳಿವೆ.
ರಾಷ್ಟ್ರೀಯ ಮೊಟ್ಟೆ ಸಮನ್ವಯ ಸಮಿತಿ (NECC)ಯ ಅಂಕಿ-ಅಂಶಗಳ ಪ್ರಕಾರ, ದೇಶದ ವಿವಿಧ ಕೇಂದ್ರಗಳ ಸರಾಸರಿ ಸಗಟು ಬೆಲೆ ಏಪ್ರಿಲ್‌ನಲ್ಲಿ ₹5.07 ಇದ್ದದ್ದು ಜುಲೈ ವೇಳೆಗೆ ₹6.82ಕ್ಕೆ ಏರಿತ್ತು. ಆಗಸ್ಟ್‌ನಲ್ಲಿ ₹5.46ಕ್ಕೆ ಇಳಿದಿದ್ದರೂ, ಬೆಲೆ ಹಿಂದಿನ ಮಟ್ಟಕ್ಕೆ ಮರಳಿಲ್ಲ. ದೆಹಲಿಯಲ್ಲೂ ಏಪ್ರಿಲ್‌ನಲ್ಲಿ ₹4.11ರಷ್ಟಿದ್ದ ಸರಾಸರಿ ಬೆಲೆ ಜುಲೈನಲ್ಲಿ ₹6.70ಕ್ಕೆ ಏರಿಕೆಯಾಗಿ, ಆಗಸ್ಟ್‌ನಲ್ಲಿ ₹5.47ಕ್ಕೆ ಇಳಿದಿದೆ.
ಮೆಕ್ಕೆಜೋಳಕ್ಕಾಗಿ ಎಥನಾಲ್‌ ಘಟಕಗಳ ಜತೆ ಪೈಪೋಟಿ
ಕೋಳಿ ಆಹಾರದಲ್ಲಿ ಪ್ರಮುಖವಾಗಿ ಬಳಸುವ ಮೆಕ್ಕೆಜೋಳ ಈಗ ಎಥನಾಲ್‌ ತಯಾರಿಕೆಗೂ ದೊಡ್ಡ ಪ್ರಮಾಣದಲ್ಲಿ ಬಳಕೆಯಾಗುತ್ತಿದೆ. ಹೀಗಾಗಿ ಕೋಳಿ ಸಾಕಾಣಿಕೆದಾರರು ಆಹಾರ ತಯಾರಿಸಲು ಬೇಕಾದ ಮೆಕ್ಕೆಜೋಳಕ್ಕಾಗಿ ಎಥನಾಲ್‌ ಘಟಕಗಳೊಂದಿಗೆ ಪೈಪೋಟಿ ನಡೆಸಬೇಕಾಗಿದೆ. ಒಂದು ಮೊಟ್ಟೆಯನ್ನು ಉತ್ಪಾದಿಸುವ ಒಟ್ಟು ವೆಚ್ಚದಲ್ಲಿ ಕೋಳಿ ಆಹಾರದ ಪಾಲು ಶೇ.70ಕ್ಕಿಂತ ಹೆಚ್ಚಿದೆ. ಹೀಗಾಗಿ ಆಹಾರದ ಬೆಲೆಯಲ್ಲಿ ಆಗುವ ಸಣ್ಣ ಏರಿಕೆಯೂ ಅಂತಿಮವಾಗಿ ಮೊಟ್ಟೆಯ ಬೆಲೆಯಲ್ಲಿ ಪ್ರತಿಫಲಿಸುತ್ತದೆ.
ಪೌಲ್ಟ್ರಿ ಫೆಡರೇಶನ್‌ ಆಫ್‌ ಇಂಡಿಯಾದ ಜಂಟಿ ಕಾರ್ಯದರ್ಶಿ ರಿಕ್ಕಿ ಥಾಪರ್‌ ಪ್ರಕಾರ, ಲೇಯರ್‌ ಕೋಳಿಗಳಿಗೆ ನೀಡುವ ಆಹಾರದ ಬೆಲೆ ಏಪ್ರಿಲ್‌ನಲ್ಲಿ ಪ್ರತಿ ಟನ್‌ಗೆ ಸುಮಾರು ₹24,000 ಇದ್ದದ್ದು ಈಗ ₹30,000-32,000ಕ್ಕೆ ಏರಿದೆ. ಅಂದರೆ ನಾಲ್ಕು ತಿಂಗಳಲ್ಲಿ ಶೇ.20–25ರಷ್ಟು ಹೆಚ್ಚಳವಾಗಿದೆ.
ಮೆಕ್ಕೆಜೋಳದ ಬೆಲೆಯೂ ಇದೇ ಅವಧಿಯಲ್ಲಿ ಪ್ರತಿ ಟನ್‌ಗೆ ₹21,000ರಿಂದ ₹26,500-27,000ಕ್ಕೆ ಏರಿದೆ. ಕೋಳಿ ಆಹಾರದಲ್ಲಿ ಬಳಸುವ ಡಿ-ಆಯಿಲ್ಡ್‌ ರೈಸ್‌ ಬ್ರಾನ್‌ ಬೆಲೆ ಕೂಡ ₹14,000ದಿಂದ ₹22,000ಕ್ಕೆ ಹೆಚ್ಚಾಗಿದೆ. ಮೆಕ್ಕೆಜೋಳದಿಂದ ಎಥನಾಲ್‌ ಉತ್ಪಾದನೆ ಹೆಚ್ಚಿಸುವುದಕ್ಕೆ ಕೇಂದ್ರ ಸರ್ಕಾರ ಉತ್ತೇಜನ ನೀಡುತ್ತಿದೆ. ಸಕ್ಕರೆಯ ಲಭ್ಯತೆ ಕಡಿಮೆಯಾಗಿರುವುದು ಮತ್ತು ಭಾರತೀಯ ಆಹಾರ ನಿಗಮ (FCI)ಯ ಅಕ್ಕಿ ಮಾರಾಟ ಸ್ಥಗಿತಗೊಂಡಿರುವುದು ಕೂಡ ಎಥನಾಲ್‌ ಉತ್ಪಾದಕರನ್ನು ಮೆಕ್ಕೆಜೋಳದತ್ತ ಹೆಚ್ಚು ಅವಲಂಬಿತರನ್ನಾಗಿಸಿದೆ.
2025–26ರಲ್ಲಿ ದೇಶದಲ್ಲಿ ಸುಮಾರು 55 ಮಿಲಿಯನ್‌ ಟನ್ ಮೆಕ್ಕೆಜೋಳ ಉತ್ಪಾದನೆಯಾಗಿದೆ ಎಂಬುದು ಉದ್ಯಮ ವಲಯದ ಅಂದಾಜು. ಇದರಲ್ಲಿ ಸುಮಾರು 16 ಮಿಲಿಯನ್‌ ಟನ್ ಎಥನಾಲ್‌ ಉತ್ಪಾದನೆಗೆ ಬಳಕೆಯಾಗಿದೆ. ಇತ್ತೀಚೆಗೆ ಎಥನಾಲ್‌ ಪೂರೈಕೆ ವರ್ಷದ ನಾಲ್ಕನೇ ತ್ರೈಮಾಸಿಕಕ್ಕೆ ಹೆಚ್ಚುವರಿಯಾಗಿ 149 ಕೋಟಿ ಲೀಟರ್‌ ಎಥನಾಲ್‌ ಹಂಚಿಕೆ ಮಾಡಲಾಗಿದೆ. ಇದರಲ್ಲಿ 135 ಕೋಟಿ ಲೀಟರ್‌, ಅಂದರೆ ಶೇ.91ರಷ್ಟು, ಮೆಕ್ಕೆಜೋಳದಿಂದ ಉತ್ಪಾದಿಸಬೇಕಿದೆ. ಹೀಗಾಗಿ ಮೆಕ್ಕೆಜೋಳದ ಮೇಲಿನ ಎಥನಾಲ್‌ ಉದ್ಯಮದ ಬೇಡಿಕೆ ಮತ್ತಷ್ಟು ಹೆಚ್ಚಿದೆ.
ಮೆಕ್ಕೆಜೋಳಕ್ಕೆ ಕೇವಲ ಎಥನಾಲ್‌ ಉದ್ಯಮದಿಂದ ಮಾತ್ರವಲ್ಲ, ಕೋಳಿ ಸಾಕಾಣಿಕೆ, ಪಿಷ್ಟ, ಮದ್ಯ ಮತ್ತು ಆಹಾರ ಉದ್ಯಮಗಳಿಂದಲೂ ಬೇಡಿಕೆಯಿದೆ. ಹೀಗಾಗಿ ಒಂದೇ ಬೆಳೆಯನ್ನು ಹಲವು ಕ್ಷೇತ್ರಗಳು ಕೇಳುತ್ತಿರುವುದರಿಂದ ಪೂರೈಕೆ ಮೇಲೆ ಒತ್ತಡ ಹೆಚ್ಚಿದೆ. ಇದರ ನಡುವೆ ಈ ವರ್ಷದ ಖಾರಿಫ್‌ ಮೆಕ್ಕೆಜೋಳ ಉತ್ಪಾದನೆಯೂ ಕಳೆದ ವರ್ಷದ 24.8 ಮಿಲಿಯನ್‌ ಟನ್‌ನಿಂದ ಸುಮಾರು 23.8 ಮಿಲಿಯನ್‌ ಟನ್‌ಗೆ ಇಳಿಯುವ ನಿರೀಕ್ಷೆಯಿದೆ. ಉತ್ಪಾದನೆ ಕುಸಿಯುವ ಸಾಧ್ಯತೆ ಮತ್ತು ಬೇಡಿಕೆ ಹೆಚ್ಚಳ ಎರಡೂ ಸೇರಿ ಬೆಲೆಯನ್ನು ಏರಿಸಿವೆ.
ಏಪ್ರಿಲ್‌ನಲ್ಲಿ 100 ಕೆಜಿ ಮೆಕ್ಕೆಜೋಳಕ್ಕೆ ಸುಮಾರು ₹2,100 ಇದ್ದ ಬೆಲೆ ಈಗ ₹2,700ಕ್ಕೆ ಏರಿಕೆಯಾಗಿದೆ. ಆದರೆ ಸೆಪ್ಟೆಂಬರ್‌ ಅಂತ್ಯದಿಂದ ಹೊಸ ಬೆಳೆ ಮಾರುಕಟ್ಟೆಗೆ ಬರಲಾರಂಭಿಸಿದ ಬಳಿಕ ಬೆಲೆಯಲ್ಲಿ ಸ್ವಲ್ಪ ಇಳಿಕೆ ಕಾಣಬಹುದು ಎಂಬ ನಿರೀಕ್ಷೆಯಿದೆ. FCI ಅಕ್ಕಿ ಮಾರಾಟವನ್ನು ಮತ್ತೆ ಆರಂಭಿಸಿದರೆ ಎಥನಾಲ್‌ ಘಟಕಗಳ ಮೆಕ್ಕೆಜೋಳದ ಮೇಲಿನ ಒತ್ತಡವೂ ಕೊಂಚ ಕಡಿಮೆಯಾಗಬಹುದು.
ಮೊಟ್ಟೆ ಬೆಲೆ ಏರಿಕೆಯಲ್ಲಿ ಪಶ್ಚಿಮ ಏಷ್ಯಾದ ಸಂಘರ್ಷದ ಪರಿಣಾಮವೂ ಇದೆ. ಕೋಳಿ ಆಹಾರದಲ್ಲಿ ಬಳಸುವ ಲೈಸಿನ್‌, ಮೆಥಿಯೋನಿನ್‌ ಸೇರಿದಂತೆ ಹಲವು ಅಮಿನೊ ಆಮ್ಲಗಳು ಮತ್ತು ವಿಟಮಿನ್‌ಗಳನ್ನು ಆಮದು ಮಾಡಿಕೊಳ್ಳಲಾಗುತ್ತದೆ. ಇರಾನ್ ಯುದ್ಧದ ಬಳಿಕ ಸಾಗಣೆ ವೆಚ್ಚ ಹಲವು ಪಟ್ಟು ಹೆಚ್ಚಿರುವುದರಿಂದ ಇವುಗಳ ಆಮದು ವೆಚ್ಚವೂ ಏರಿದೆ.
ಹೀಗಾಗಿ ಮಾರುಕಟ್ಟೆಯಲ್ಲಿ ಮೊಟ್ಟೆಯ ಬೆಲೆ ಹೆಚ್ಚಾದರೂ ಕೋಳಿ ಸಾಕಾಣಿಕೆದಾರರಿಗೆ ಅದರಿಂದ ಹೆಚ್ಚಿನ ಲಾಭ ಸಿಗುತ್ತಿಲ್ಲ. ಆಹಾರ ಸೇರಿದಂತೆ ಉತ್ಪಾದನಾ ವೆಚ್ಚಗಳು ಅದಕ್ಕಿಂತ ವೇಗವಾಗಿ ಏರಿರುವುದರಿಂದ ಕೆಲವರು ನಷ್ಟದಲ್ಲೇ ವ್ಯವಹಾರ ನಡೆಸುತ್ತಿದ್ದಾರೆ. ಕೆಲವರ ಲಾಭದ ಪ್ರಮಾಣ ಶೇ.1-2ಕ್ಕೆ ಕುಸಿದಿದೆ ಎಂದು ಉದ್ಯಮ ವಲಯ ಹೇಳಿದೆ.
ದೇಶದಲ್ಲಿ ಮೊಟ್ಟೆ ಸೇವನೆಯೂ ಹೆಚ್ಚುತ್ತಿದೆ. 2024-25ರಲ್ಲಿ ಪ್ರತಿ ವ್ಯಕ್ತಿಗೆ ಮೊಟ್ಟೆಯ ಲಭ್ಯತೆ 106ಕ್ಕೆ ಏರಿದೆ. ಹಿಂದಿನ ವರ್ಷ ಇದು 103 ಹಾಗೂ ಅದಕ್ಕೂ ಹಿಂದಿನ ವರ್ಷ 101 ಆಗಿತ್ತು. ಒಟ್ಟಾರೆ 2024-25ರಲ್ಲಿ ದೇಶದಲ್ಲಿ ಸುಮಾರು 149.1 ಶತಕೋಟಿ ಮೊಟ್ಟೆ ಉತ್ಪಾದನೆಯಾಗಿದ್ದು, ಹಿಂದಿನ ವರ್ಷಕ್ಕಿಂತ ಶೇ.4.4ರಷ್ಟು ಹೆಚ್ಚಾಗಿದೆ. ಆದರೆ ಬೇಡಿಕೆ ಹೆಚ್ಚುತ್ತಿರುವ ನಡುವೆಯೇ ಹಕ್ಕಿಜ್ವರ, ತೀವ್ರ ಬಿಸಿಲು ಮತ್ತು ಹೆಚ್ಚಿನ ಪ್ರಮಾಣದ ಕೋಳಿ ಸಾವುಗಳಿಂದ ಕೆಲವು ಪ್ರಮುಖ ಉತ್ಪಾದನಾ ಪ್ರದೇಶಗಳಲ್ಲಿ ಮೊಟ್ಟೆ ನೀಡುವ ಕೋಳಿಗಳ ಸಂಖ್ಯೆ ಕುಸಿದಿದೆ.
ಇದನ್ನೂ ಓದಿ: ಜಗತ್ತಿನ ಕಬ್ಬು ಕೃಷಿ ದೈತ್ಯ ಭಾರತವನ್ನು, ಸಕ್ಕರೆ ಆಮದಿನ ದೈನೇಸಿ ಸ್ಥಿತಿಗೆ ಯಾಕೆ ತಂದಿರಿ ಮೋದೀಜೀ?
ಉದ್ಯಮ ವಲಯದ ಪ್ರಕಾರ, ಕಳೆದ ವರ್ಷ ಸುಮಾರು ಶೇ.20ರಷ್ಟು ಕೋಳಿಗಳು ರೋಗದಿಂದ ಅಥವಾ ಇತರ ಕಾರಣಗಳಿಂದ ಪರಿಣಾಮಕ್ಕೊಳಗಾಗಿದ್ದವು. ಈ ವರ್ಷ ಕೆಲವು ಪ್ರದೇಶಗಳಲ್ಲಿ ರೋಗ ಮತ್ತು ತೀವ್ರ ಬಿಸಿಲಿನಿಂದ ಉತ್ಪಾದನೆ ಶೇ.30–35ರಷ್ಟು ಕುಸಿದಿದೆ. ಕೋಳಿ ಸಾಕಾಣಿಕೆಯಲ್ಲಿ ಹೊಸ ಮರಿಗಳನ್ನು ಬೆಳೆಸಿ ಅವು ಮೊಟ್ಟೆ ನೀಡುವ ಹಂತಕ್ಕೆ ಬರಲು ಸಮಯ ಬೇಕಾಗುತ್ತದೆ. ಹೊಸ ಹಿಂಡುಗಳು ಉತ್ಪಾದನೆಗೆ ಬರಲು ಆರಂಭಿಸಿದ ಬಳಿಕ ಡಿಸೆಂಬರ್‌ ವೇಳೆಗೆ ಬೆಲೆಯಲ್ಲಿ ಸ್ವಲ್ಪ ಇಳಿಕೆ ಕಾಣಬಹುದು ಎಂಬ ನಿರೀಕ್ಷೆಯಿದೆ.
ಆದರೆ ಎಥನಾಲ್‌ ಉತ್ಪಾದನೆಗೆ ಮೆಕ್ಕೆಜೋಳದ ಬೇಡಿಕೆ ಮುಂದುವರಿಯುತ್ತಿರುವುದು, ಸಕ್ಕರೆಯ ಲಭ್ಯತೆ ಕಡಿಮೆಯಾಗಿರುವುದು ಮತ್ತು ದೇಶದಲ್ಲಿ ಪ್ರೋಟೀನ್‌ ಆಹಾರದ ಬೇಡಿಕೆ ಹೆಚ್ಚುತ್ತಿರುವುದರಿಂದ ಮೊಟ್ಟೆ ಬೆಲೆ ಶೀಘ್ರದಲ್ಲೇ ದೊಡ್ಡ ಪ್ರಮಾಣದಲ್ಲಿ ಇಳಿಯುವ ಸಾಧ್ಯತೆ ಕಡಿಮೆ ಎನ್ನಲಾಗಿದೆ. ಹೀಗಾಗಿ ಗ್ರಾಹಕರ ತಟ್ಟೆಯಲ್ಲಿನ ಮೊಟ್ಟೆಯ ಬೆಲೆ ಏರಿಕೆಯ ಹಿಂದೆ ಕೋಳಿ ಸಾಕಾಣಿಕೆ ವೆಚ್ಚ, ಎಥನಾಲ್‌ ನೀತಿಯಿಂದ ಮೆಕ್ಕೆಜೋಳದ ಬೇಡಿಕೆ ಹೆಚ್ಚಳದಿಂದ ಹಿಡಿದು ಯುದ್ಧ, ಹವಾಮಾನ ವೈಪರೀತ್ಯ ಮತ್ತು ಕೋಳಿ ರೋಗಗಳವರೆಗೆ ಹಲವು ಕಾರಣಗಳಿವೆ.
