ನೇಪಾಳದಲ್ಲಿ ಆಗಸ್ಟ್‌ 26ರಂದು ಸಂಭವಿಸಿದ ಭೀಕರ ಪ್ರವಾಹ ಮತ್ತು ಭೂಕುಸಿತದಲ್ಲಿ ನದಿಯ ದಡದಲ್ಲಿದ್ದ ಮನೆಗಳು, ಸೇತುವೆಗಳು, ರಸ್ತೆಗಳು ಸೇರಿದಂತೆ ಹಲವು ಪ್ರದೇಶಗಳು ಕೊಚ್ಚಿಹೋಗಿವೆ. ಆದರೆ ನುವಾಕೋಟ್‌ ಜಿಲ್ಲೆಯ ದೇವಿಘಾಟ್‌ ಪ್ರದೇಶದಲ್ಲಿರುವ ಸುಮಾರು 40 ವರ್ಷ ಹಳೆಯ ಮನೆಯೊಂದು ಮಾತ್ರ ಭಾರೀ ಪ್ರವಾಹದ ನಡುವೆಯೂ ಬಹುತೇಕ ಹಾಗೆಯೇ ಉಳಿದುಕೊಂಡಿದೆ. ಸುತ್ತಮುತ್ತಲಿನ ಪ್ರದೇಶ ಕೆಸರು, ಕಲ್ಲು ಮತ್ತು ಅವಶೇಷಗಳಿಂದ ತುಂಬಿದ್ದರೂ ಮನೆ ಮಾತ್ರ ಎದ್ದು ನಿಂತಿರುವ ದೃಶ್ಯ ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್‌ ಆಗಿದೆ.
ಮನೆ ಮಾಲೀಕ ಪ್ರಕಾಶ್‌ ಪಾಂಡೆ ಮತ್ತು ಅವರ ಕುಟುಂಬದ ಸದಸ್ಯರು ಪ್ರವಾಹದ ವೇಳೆ ಮನೆಯ ಮೇಲಿನ ಮಹಡಿಗಳಿಗೆ ತೆರಳಿ ಆಶ್ರಯ ಪಡೆದಿದ್ದರು. ನೀರು ಏರುತ್ತಲೇ ಇದ್ದಾಗ ಕುಟುಂಬವು ಕೊನೆಯ ಮಹಡಿಯವರೆಗೂ ತೆರಳಬೇಕಾಯಿತು. ಕೆಳಗಿನ ಮಹಡಿಯ ಗೋಡೆಗಳು ಪ್ರವಾಹದ ರಭಸಕ್ಕೆ ಹಾನಿಗೊಳಗಾದರೂ, ಮನೆಯ ಮುಖ್ಯ ಕಂಬಗಳು ಉಳಿದುಕೊಂಡಿವೆ. ಇದರಿಂದ ಕುಟುಂಬದವರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
How the family trapped inside Nepal’s "Blue House" was rescued
— Massimo (@Rainmaker1973) August 30, 2026
[📹 Ganesha Shrestha] pic.twitter.com/nkH57tcFUU
ಹಾಗಾದರೆ ಮನೆ ಉಳಿದದ್ದು ಹೇಗೆ?
ಈ ಮನೆ ಪ್ರವಾಹವನ್ನು ತಡೆದುಕೊಳ್ಳಲು ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿತ್ತು ಎಂದು ಅಧಿಕೃತ ಎಂಜಿನಿಯರಿಂಗ್‌ ಅಧ್ಯಯನದಿಂದ ಸಾಬೀತಾಗಿಲ್ಲ. ಆದರೆ ಲಭ್ಯವಿರುವ ಚಿತ್ರಗಳು, ಮನೆಯ ನಿರ್ಮಾಣ ವಿಧಾನ ಮತ್ತು ಅದರ ಸ್ಥಳವನ್ನು ಆಧರಿಸಿ ಕೆಲವು ಪ್ರಮುಖ ಕಾರಣಗಳನ್ನು ತಜ್ಞರು ಗುರುತಿಸಿದ್ದಾರೆ.
ಮನೆ ರೀಇನ್‌ಫೋರ್ಸ್ಡ್‌ ಸಿಮೆಂಟ್‌ ಕಾಂಕ್ರೀಟ್‌ (RCC) ಕಂಬ ಮತ್ತು ಬೀಮ್‌ಗಳ ರಚನೆಯನ್ನು ಹೊಂದಿರುವಂತೆ ಕಾಣುತ್ತದೆ. ಅಂದರೆ, ಮನೆಯೊಳಗೆ ಕಾಂಕ್ರೀಟ್‌ ಮತ್ತು ಉಕ್ಕಿನ ಸರಳುಗಳಿಂದ ನಿರ್ಮಿಸಲಾದ ಬಲಿಷ್ಠ ಅಸ್ಥಿಪಂಜರವಿದೆ. ಕಾಂಕ್ರೀಟ್‌ ಕಟ್ಟಡದ ಮೇಲಿನ ಭಾರವನ್ನು ತಡೆದುಕೊಳ್ಳಲು ಸಹಾಯ ಮಾಡುತ್ತದೆ. ಪ್ರವಾಹದ ರಭಸಕ್ಕೆ ಮನೆಯ ಕೆಳ ಮಹಡಿಯ ಗೋಡೆಗಳು ಹಾನಿಗೊಳಗಾಗಿವೆ. ಆದರೆ ಮುಖ್ಯ ಕಂಬಗಳು ಉಳಿದುಕೊಂಡಿವೆ. ಇದು ಒಂದು ರೀತಿಯಲ್ಲಿ ಮನೆಯ ಪಾಲಿಗೆ ಅನುಕೂಲವಾಗಿರಬಹುದು. ಗೋಡೆಗಳು ಸಂಪೂರ್ಣವಾಗಿ ನೀರನ್ನು ತಡೆದಿದ್ದರೆ, ನೀರಿನ ಒತ್ತಡ ಮತ್ತಷ್ಟು ಹೆಚ್ಚಾಗಬಹುದಿತ್ತು. ಬದಲಾಗಿ ನೀರು ಮನೆಯ ಕೆಳಭಾಗದ ಮೂಲಕ ಹರಿದು ಹೋಗಿದ್ದರಿಂದ ಕಟ್ಟಡದ ಮೇಲೆ ಬೀಳುವ ಒತ್ತಡ ಕಡಿಮೆಯಾಗಿರಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ.
ಇದನ್ನೂ ಓದಿ: ‘ಪ್ರವಾಹಕ್ಕೆ ನೀವುಗಳೇ ಕಾರಣ’: ಚೀನಾ, ಅಮೆರಿಕ, ಭಾರತದ ಬಳಿ ಪರಿಹಾರ ಕೇಳಿದ ನೇಪಾಳ
ಮನೆ ನದಿಯ ನೇರ ಹಾಗೂ ಅತ್ಯಂತ ವೇಗದ ಪ್ರವಾಹದ ಮಾರ್ಗದಲ್ಲಿರಲಿಲ್ಲ ಎನ್ನುವುದು ಮತ್ತೊಂದು ಪ್ರಮುಖ ಅಂಶ. ಮನೆಯ ಮೇಲ್ಭಾಗದ ಸಮೀಪವಿರುವ ಸಣ್ಣ ಭೂಭಾಗ ಅಥವಾ ಎತ್ತರದ ಪ್ರದೇಶವು ನದಿಯ ಮುಖ್ಯ ರಭಸದಿಂದ ಕಟ್ಟಡವನ್ನು ಭಾಗಶಃ ರಕ್ಷಿಸಿರಬಹುದು. ಪರಿಣಾಮವಾಗಿ ಭಾರೀ ಬಂಡೆಗಳು ಮತ್ತು ದೊಡ್ಡ ಅವಶೇಷಗಳು ನೇರವಾಗಿ ಮನೆಗೆ ಅಪ್ಪಳಿಸದೇ, ಅದರ ಎರಡೂ ಬದಿಗಳಿಂದ ಹರಿದುಹೋಗಿರುವ ಸಾಧ್ಯತೆಯಿದೆ. ಮನೆಯ ಮಾಲೀಕರ ಹೇಳಿಕೆಯ ಪ್ರಕಾರ, ನದಿಯ ಸಮೀಪದಲ್ಲಿರುವ ಕಾರಣ ಕಟ್ಟಡ ನಿರ್ಮಿಸುವಾಗ ಅಡಿಪಾಯಕ್ಕೆ ವಿಶೇಷ ಗಮನ ನೀಡಲಾಗಿತ್ತು. ಸುಮಾರು 40 ವರ್ಷಗಳ ಹಿಂದೆ ನಿರ್ಮಿಸಲಾದ ಈ ಮನೆಯಲ್ಲಿ ಬಲಿಷ್ಠ ಕಂಬಗಳು ಮತ್ತು ಗಟ್ಟಿಯಾದ ನಿರ್ಮಾಣ ಸಾಮಗ್ರಿಗಳನ್ನು ಬಳಸಲಾಗಿತ್ತು . ಪ್ರವಾಹದ ಸಂದರ್ಭದಲ್ಲಿ ಸಾಮಾನ್ಯವಾಗಿ ಮಣ್ಣು ಕೊಚ್ಚಿಹೋಗುವುದರಿಂದ ಕಟ್ಟಡದ ಅಡಿಪಾಯ ದುರ್ಬಲವಾಗುತ್ತದೆ. ಆದರೆ ಈ ಮನೆಯ ಅಡಿಪಾಯ ಮತ್ತು ಮುಖ್ಯ ಕಂಬಗಳು ಸಾಕಷ್ಟು ಬಲಿಷ್ಠವಾಗಿದ್ದ ಕಾರಣ ಅದು ಸಂಪೂರ್ಣವಾಗಿ ಕುಸಿಯದೇ ಉಳಿದಿರಬಹುದು.
ಈ ಮನೆ ಉಳಿದಿದ್ದಕ್ಕೆ ಒಂದೇ ಒಂದು ಕಾರಣವನ್ನು ನಿಖರವಾಗಿ ಹೇಳಲು ಸಾಧ್ಯವಿಲ್ಲ. ಅಧಿಕೃತ ರಚನಾತ್ಮಕ ಮತ್ತು ಜಲವಿಜ್ಞಾನ ಅಧ್ಯಯನ ನಡೆದಿಲ್ಲ. ಆದರೆ ಬಲಿಷ್ಠ RCC ಕಂಬ-ಬೀಮ್‌ ರಚನೆ, ಗಟ್ಟಿಯಾದ ಅಡಿಪಾಯ, ಮನೆಯ ಕಾಂಪ್ಯಾಕ್ಟ್‌ ವಿನ್ಯಾಸ ಹಾಗೂ ಪ್ರವಾಹದ ನೇರ ರಭಸದಿಂದ ಸ್ವಲ್ಪ ದೂರವಿದ್ದ ಸ್ಥಳ ಎಲ್ಲವೂ ಒಟ್ಟಾಗಿ ಮನೆ ಉಳಿಯಲು ಕಾರಣವಾಗಿರಬಹುದು ಎಂದು ತಜ್ಞರ ವಿಶ್ಲೇಷಣೆಗಳು ತಿಳಿಸಿವೆ. ಸುತ್ತಮುತ್ತಲಿನ ಎಲ್ಲವನ್ನೂ ಕೊಚ್ಚಿಕೊಂಡು ಹೋದ ಪ್ರವಾಹದ ನಡುವೆ ಈ ಒಂದು ಮನೆ ಮಾತ್ರ ಎದ್ದು ನಿಂತಿರುವ ದೃಶ್ಯ ಈಗ ‘ಮಿರಾಕಲ್‌ ಹೌಸ್‌’ ಎಂದೇ ಗಮನ ಸೆಳೆಯುತ್ತಿದೆ.
