ಒಲಂಪಿಕ್‌ ಕುಸ್ತಿಪಟು ವಿನೇಶ್ ಫೋಗಟ್ ಅವರಿಗೆ ಹಿರಿಯರ ವಿಶ್ವ ಕುಸ್ತಿ ಚಾಂಪಿಯನ್‌ಶಿಪ್‌ ಆಯ್ಕೆ ಟ್ರಯಲ್ಸ್‌ನಲ್ಲಿ ಭಾಗವಹಿಸಲು ವಿಶೇಷ ವಿನಾಯಿತಿ ನೀಡಲು ದೆಹಲಿ ಹೈಕೋರ್ಟ್ ನಿರಾಕರಿಸಿದೆ. ಒಬ್ಬ ಕ್ರೀಡಾಪಟುವಿಗೆ ಮಾತ್ರ ನಿಯಮದಿಂದ ವಿನಾಯಿತಿ ನೀಡಿದರೆ ಅದು ಇತರ ಕ್ರೀಡಾಪಟುಗಳಿಗೆ ಅನ್ಯಾಯವಾಗಲಿದೆ ಮತ್ತು ಇದೇ ರೀತಿಯ ವಿನಾಯಿತಿಗಳನ್ನು ಕೋರುವ ಪ್ರಕರಣಗಳು ಹೆಚ್ಚಾಗಿ ‘ಪ್ಯಾಂಡೋರಾ ಬಾಕ್ಸ್‌’ (ಒಂದು ವಿನಾಯಿತಿ ಅಥವಾ ನಿರ್ಧಾರದಿಂದ ಮುಂದೆ ಹಲವು ಹೊಸ ಸಮಸ್ಯೆಗಳು, ಬೇಡಿಕೆಗಳು ಅಥವಾ ಪ್ರಕರಣಗಳು ಒಂದರ ಹಿಂದೆ ಒಂದಾಗಿ ಹುಟ್ಟಿಕೊಳ್ಳುವ ಪರಿಸ್ಥಿತಿ) ತೆರೆಯುವಂತಾಗಬಹುದು ಎಂದು ನ್ಯಾಯಾಲಯ ಹೇಳಿದೆ.
2025 ಮತ್ತು 2026ರಲ್ಲಿ ಪದಕ ಗೆದ್ದಿರುವ ಕುಸ್ತಿಪಟುಗಳಿಗೆ ಮಾತ್ರ ಆಯ್ಕೆ ಟ್ರಯಲ್ಸ್‌ನಲ್ಲಿ ಭಾಗವಹಿಸಲು ಅವಕಾಶ ನೀಡುವ ಭಾರತೀಯ ಕುಸ್ತಿ ಫೆಡರೇಷನ್‌ (WFI)ನ ಮಾನದಂಡವನ್ನು ವಿನೇಶ್ ಫೋಗಟ್ ಪ್ರಶ್ನಿಸಿದ್ದರು. ಈ ನಿಯಮದ ಮೂಲಕ ತಮ್ಮನ್ನು ಗುರಿಯಾಗಿಸಲಾಗುತ್ತಿದೆ ಎಂದು ಅವರು ಆರೋಪಿಸಿದ್ದರು. ಸೆಪ್ಟೆಂಬರ್‌ 14ರಂದು ನಡೆಯಲಿರುವ ಆಯ್ಕೆ ಟ್ರಯಲ್ಸ್‌ನಲ್ಲಿ ಭಾಗವಹಿಸಲು ಅವಕಾಶ ನೀಡದಿದ್ದರೆ, ಈ ವರ್ಷದ ಉಳಿದ ಅವಧಿಯಲ್ಲಿ ನಡೆಯುವ ಅಂತಾರಾಷ್ಟ್ರೀಯ ಚಾಂಪಿಯನ್‌ಶಿಪ್‌ಗಳಲ್ಲಿ ಸ್ಪರ್ಧಿಸುವ ಅವಕಾಶವೇ ತಪ್ಪಿಹೋಗಲಿದೆ ಎಂದು ಫೋಗಟ್ ನ್ಯಾಯಾಲಯದ ಮುಂದೆ ವಾದಿಸಿದ್ದರು.
ಆದರೆ ಗುರುವಾರ ನ್ಯಾಯಮೂರ್ತಿ ಸ್ವರ್ಣಕಾಂತ ಶರ್ಮಾ ಅವರ ಪೀಠವು ತುರ್ತು ಪರಿಹಾರ ನೀಡಲು ನಿರಾಕರಿಸಿತು. ಫೋಗಟ್ ಅವರಿಗೆ ಮಾತ್ರ ಆಯ್ಕೆ ಟ್ರಯಲ್ಸ್‌ನಲ್ಲಿ ಭಾಗವಹಿಸಲು ಅವಕಾಶ ನೀಡುವುದು, ಎಲ್ಲ ಕ್ರೀಡಾಪಟುಗಳಿಗೂ ಅನ್ವಯಿಸುವ ಅರ್ಹತಾ ಮಾನದಂಡದಿಂದ ಅವರ ಪರವಾಗಿ ವಿಶೇಷ ವಿನಾಯಿತಿ ನೀಡಿದಂತಾಗುತ್ತದೆ ಎಂದು ನ್ಯಾಯಾಲಯ ಹೇಳಿತು.
ಆಯ್ಕೆ ಮಾನದಂಡವು ನಿರ್ದಿಷ್ಟವಾಗಿ ವಿನೇಶ್ ಫೋಗಟ್ ಅವರನ್ನು ಗುರಿಯಾಗಿಸಿಕೊಂಡು ರೂಪಿಸಿರುವುದಲ್ಲ. ಆಯ್ಕೆ ಟ್ರಯಲ್ಸ್‌ನಲ್ಲಿ ಭಾಗವಹಿಸಲು ಬಯಸುವ ಎಲ್ಲ ಕ್ರೀಡಾಪಟುಗಳಿಗೂ ಅದು ಸಮಾನವಾಗಿ ಅನ್ವಯಿಸುತ್ತದೆ ಎಂದು ನ್ಯಾಯಾಲಯ ಹೇಳಿದೆ. ನಿಗದಿಪಡಿಸಿರುವ ಸ್ಪರ್ಧೆಗಳಲ್ಲಿ ಭಾಗವಹಿಸದ ಯಾವುದೇ ಕ್ರೀಡಾಪಟು, ಅದರ ಕಾರಣ ಏನೇ ಆಗಿದ್ದರೂ, WFI ನಿಗದಿಪಡಿಸಿರುವ ಅರ್ಹತಾ ಮಾನದಂಡದ ವ್ಯಾಪ್ತಿಗೆ ಬರುವುದಿಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.
ಈ ಹಿಂದೆ ಮೇ ತಿಂಗಳಲ್ಲಿ ಏಷ್ಯನ್‌ ಗೇಮ್ಸ್‌ ಆಯ್ಕೆ ಟ್ರಯಲ್ಸ್‌ನಲ್ಲಿ ಭಾಗವಹಿಸಲು ದೆಹಲಿ ಹೈಕೋರ್ಟ್ ವಿನೇಶ್ ಫೋಗಟ್ ಅವರಿಗೆ ನೀಡಿದ್ದ ವಿನಾಯಿತಿಯನ್ನೂ ಈಗ ಅನ್ವಯಿಸಲಾಗುವುದಿಲ್ಲ ಎಂದು ನ್ಯಾಯಾಲಯ ಹೇಳಿದೆ. ಆ ಸಂದರ್ಭದಲ್ಲಿ ನೀಡಿದ್ದ ವಿನಾಯಿತಿಯ ಬಳಿಕ ಫೋಗಟ್ ವಿರುದ್ಧ ಹೊಸದಾಗಿ ಶಿಸ್ತು ಕ್ರಮದ ವಿಚಾರಣೆ ನಡೆಯುತ್ತಿರುವುದನ್ನು ನ್ಯಾಯಾಲಯ ಗಮನಿಸಿದೆ.
WFI, ಫೋಗಟ್ ವಿರುದ್ಧ ಮೇ 9 ಮತ್ತು ಜೂನ್‌ 17ರಂದು ಎರಡು ಕಾರಣ ಕೇಳಿ ನೋಟಿಸ್‌ಜಾರಿ ಮಾಡಿದೆ. ಈ ಶಿಸ್ತು ವಿಚಾರಣೆಗೆ ಹಾಜರಾಗಲು WFI ಮೂರು ಬಾರಿ ಅವಕಾಶ ನೀಡಿದ್ದರೂ ಫೋಗಟ್ ಅದನ್ನು ಬಳಸಿಕೊಂಡಿಲ್ಲ ಎಂದು ನ್ಯಾಯಾಲಯ ಹೇಳಿದೆ. ಬದಲಾಗಿ, ಶಿಸ್ತು ಸಮಿತಿಯ ಸದಸ್ಯರ ವಿವರಗಳನ್ನು ಬಹಿರಂಗಪಡಿಸದಿರುವುದನ್ನು ಅವರು ಪ್ರಶ್ನಿಸಿದ್ದಾರೆ ಎಂದು ನ್ಯಾಯಾಲಯ ದಾಖಲಿಸಿದೆ.
ಇದನ್ನೂ ಓದಿ: ವಿನೇಶ್ ಫೋಗಟ್ ವಿವಾದ: WFI ವಿರುದ್ಧ ಹೈಕೋರ್ಟ್ ಟೀಕೆಗಳನ್ನು ತೆಗೆದುಹಾಕಲು ಸುಪ್ರೀಂ ನಿರಾಕರಣೆ
ಆದರೆ ಪ್ರಕರಣದ ಅಂತಿಮ ವಿಚಾರಣೆ ಇನ್ನೂ ಬಾಕಿಯಿದೆ. WFI ರೂಪಿಸಿರುವ ಆಯ್ಕೆ ಮಾನದಂಡದ ಮಾನ್ಯತೆ ಮತ್ತು ಅದರ ಅನ್ವಯಿಕತೆಯ ಕುರಿತು ಸೆಪ್ಟೆಂಬರ್‌ 29ರಂದು ದೆಹಲಿ ಹೈಕೋರ್ಟ್ ವಿಚಾರಣೆ ನಡೆಸಲಿದೆ.
ಗುರುವಾರದ ವಿಚಾರಣೆಯಲ್ಲಿ ಫೋಗಟ್ ಪರ ವಕೀಲರು, ಈ ವರ್ಷದ ಅಂತಾರಾಷ್ಟ್ರೀಯ ಸ್ಪರ್ಧೆಗಳ ಆಯ್ಕೆ ಟ್ರಯಲ್ಸ್‌ನಿಂದ ತಮ್ಮನ್ನು ಹೊರಗಿಡುವುದರಿಂದ ಅವರ ವೃತ್ತಿಜೀವನವೇ ಅಂತ್ಯವಾಗುವ ಸಾಧ್ಯತೆಯಿದೆ ಎಂದು ವಾದಿಸಿದ್ದರು. ಇದಕ್ಕೆ ಪ್ರತಿಯಾಗಿ WFI, ರಾಜ್ಯ ಮತ್ತು ರಾಷ್ಟ್ರೀಯ ಮಟ್ಟದ ಸ್ಪರ್ಧೆಗಳಲ್ಲಿ ಪದಕ ಗೆದ್ದು ಮತ್ತೆ ಸ್ಪರ್ಧೆಗೆ ಮರಳುವ ಮೂಲಕ ಫೋಗಟ್ ಆಯ್ಕೆ ಟ್ರಯಲ್ಸ್‌ಗೆ ಅರ್ಹತೆ ಪಡೆಯಬಹುದು ಎಂದು ಹೇಳಿದೆ.
2024ರ ಡಿಸೆಂಬರ್‌ನಿಂದ ವಿನೇಶ್ ಫೋಗಟ್ ಸ್ಪರ್ಧೆಯಿಂದ ದೂರ ಉಳಿದಿದ್ದಾರೆ. ಈ ಅವಧಿಯಲ್ಲಿ ಅವರು ಮಾತೃತ್ವ ವಿರಾಮವನ್ನೂ ಪಡೆದಿದ್ದರು. ಇದೇ ಕಾರಣದಿಂದಾಗಿ WFI ನಿಗದಿಪಡಿಸಿರುವ ಮಾನದಂಡದ ಅಡಿಯಲ್ಲಿ ಅವರು ಏಷ್ಯನ್‌ ಗೇಮ್ಸ್‌ ಆಯ್ಕೆ ಟ್ರಯಲ್ಸ್‌ನಿಂದಲೂ ಹೊರಗುಳಿದಿದ್ದರು. ಇದೀಗ ಹಿರಿಯರ ವಿಶ್ವ ಕುಸ್ತಿ ಚಾಂಪಿಯನ್‌ಶಿಪ್‌ ಆಯ್ಕೆ ಟ್ರಯಲ್ಸ್‌ನಲ್ಲೂ ಅದೇ ನಿಯಮ ಅವರಿಗೆ ಅಡ್ಡಿಯಾಗಿದೆ.
