ಏಷ್ಯನ್ ಗೇಮ್ಸ್ 2026ರ ಆಯ್ಕೆ ಪ್ರಕ್ರಿಯೆಯಲ್ಲಿ ಕುಸ್ತಿಪಟು ವಿನೇಶ್ ಫೋಗಟ್ ಭಾಗವಹಿಸಲು ಅನುಮತಿ ನೀಡುವಾಗ ದೆಹಲಿ ಹೈಕೋರ್ಟ್ ಮಾಡಿದ್ದ ಕಠಿಣ ಟೀಕೆಗಳನ್ನು ಮತ್ತು ಅವಲೋಕನಗಳನ್ನು ತೆಗೆದುಹಾಕಲು (Expunge) ಸುಪ್ರೀಂ ಕೋರ್ಟ್ ಗುರುವಾರ ನಿರಾಕರಿಸಿದೆ.
ನ್ಯಾಯಮೂರ್ತಿಗಳಾದ ಪಿ.ಎಸ್. ನರಸಿಂಹ ಮತ್ತು ಅರವಿಂದ್ ಕುಮಾರ್ ಅವರಿದ್ದ ಪೀಠವು, “ಮೇ 29 ರಂದು ಸುಪ್ರೀಂ ಕೋರ್ಟ್ ನೀಡಿದ ಆದೇಶದಂತೆ ವಿನೇಶ್ ಫೋಗಟ್ ಈಗಾಗಲೇ ಟ್ರಯಲ್ಸ್‌ನಲ್ಲಿ ಭಾಗವಹಿಸಿರುವುದರಿಂದ, ಭಾರತೀಯ ಕುಸ್ತಿ ಫೆಡರೇಶನ್ (WFI) ಸಲ್ಲಿಸಿದ್ದ ಈ ಅರ್ಜಿಗೆ ಈಗ ಯಾವುದೇ ಅರ್ಥ ಉಳಿದಿಲ್ಲ ಎಂದು ಹೇಳಿ ಪ್ರಕರಣವನ್ನು ಮುಕ್ತಾಯಗೊಳಿಸಿದೆ.
ಆದಾಗ್ಯೂ, ಹೈಕೋರ್ಟ್‌ನ ಟೀಕೆಗಳನ್ನು ಸುಪ್ರೀಂ ಕೋರ್ಟ್ ಎತ್ತಿಹಿಡಿದಿದೆ ಎಂದರ್ಥವಲ್ಲ, ಈ ಕಾನೂನು ವಿಷಯಗಳು ಇನ್ನೂ ಮುಕ್ತವಾಗಿವೆ ಎಂದು ಪೀಠವು ಸ್ಪಷ್ಟಪಡಿಸಿದೆ.
ವಿವಾದದ ಹಿನ್ನೆಲೆ ಏನು?
ಏಷ್ಯನ್ ಗೇಮ್ಸ್ ಟ್ರಯಲ್ಸ್‌ನಲ್ಲಿ ಭಾಗವಹಿಸಲು ವಿನೇಶ್ ಫೋಗಟ್ ಅವರಿಗೆ ಅರ್ಹತೆ ಇಲ್ಲ ಎಂದು WFI ವಾದಿಸಿತ್ತು. ನಿಯಮಗಳ ಪ್ರಕಾರ 2025 ಮತ್ತು 2026 ರ ಕೆಲವು ನಿರ್ದಿಷ್ಟ ಸ್ಪರ್ಧೆಗಳಲ್ಲಿ ಪದಕ ಗೆದ್ದವರಿಗೆ ಮಾತ್ರ ಟ್ರಯಲ್ಸ್‌ನಲ್ಲಿ ಅವಕಾಶವಿತ್ತು. 2024ರ ಒಲಿಂಪಿಕ್ಸ್ ಬಳಿಕ ನಿವೃತ್ತಿ ಘೋಷಿಸಿ, ಡಿಸೆಂಬರ್ 2025 ರಲ್ಲಿ ಕಂಬ್ಯಾಕ್ ಮಾಡಿದ್ದ ವಿನೇಶ್ ಯಾವುದೇ ಸ್ಪರ್ಧೆಗಳಲ್ಲಿ ಭಾಗವಹಿಸಿರಲಿಲ್ಲ. ಅಲ್ಲದೆ ಅವರು ಮರಳಿ ಬರುವ ಮುನ್ನ ನೀಡಬೇಕಾದ 6 ತಿಂಗಳ ಮುನ್ಸೂಚನೆ ಅವಧಿಯನ್ನು ಪೂರೈಸಿಲ್ಲ ಎಂದು WFI ಆರೋಪಿಸಿತ್ತು.
ಇದನ್ನು ಪ್ರಶ್ನಿಸಿ ವಿನೇಶ್ ಫೋಗಟ್ ದೆಹಲಿ ಹೈಕೋರ್ಟ್ ಮೆಟ್ಟಿಲೇರಿದ್ದರು. ಈ ಪ್ರಕರಣದ ವಿಚಾರಣೆ ನಡೆಸಿದ್ದ ದೆಹಲಿ ಹೈಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ ದೇವೇಂದ್ರ ಕುಮಾರ್ ಉಪಾಧ್ಯಾಯ ಮತ್ತು ನ್ಯಾಯಮೂರ್ತಿ ತೇಜಸ್ ಕಟಾರಿಯಾ ಅವರಿದ್ದ ಪೀಠವು ಮೇ 22 ರಂದು WFI ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿತ್ತು. ವಿನೇಶ್ ಫೋಗಟ್ ಅವರು ಹೆರಿಗೆ ರಜೆಯಲ್ಲಿದ್ದ ಕಾರಣಕ್ಕಾಗಿ 2025ರ ಸ್ಪರ್ಧೆಗಳಲ್ಲಿ ಭಾಗವಹಿಸಲು ಸಾಧ್ಯವಾಗಿರಲಿಲ್ಲ. ತಾಯ್ತನವನ್ನು ಮುಂದಿಟ್ಟುಕೊಂಡು ಮಹಿಳಾ ಕ್ರೀಡಾಪಟುಗಳನ್ನು ಕಡೆಗಣಿಸುವುದು ಅಥವಾ ಹೊರಗಿಡುವುದು ತಪ್ಪು ಎಂದು ಕೋರ್ಟ್ ಹೇಳಿತ್ತು.
2024 ರ ಪ್ಯಾರಿಸ್ ಒಲಿಂಪಿಕ್ಸ್‌ನಲ್ಲಿ ವಿನೇಶ್ ಫೋಗಟ್ ಹೆಚ್ಚಿನ ತೂಕದ ಕಾರಣಕ್ಕೆ ಅನರ್ಹಗೊಂಡಿದ್ದನ್ನು WFI ತನ್ನ ಶೋಕಾಸ್ ನೋಟಿಸ್‌ನಲ್ಲಿ ʼರಾಷ್ಟ್ರೀಯ ಅವಮಾನʼ ಎಂದು ಕರೆದಿತ್ತು. ಇದನ್ನು ಹೈಕೋರ್ಟ್ ತೀವ್ರವಾಗಿ ಖಂಡಿಸಿತ್ತು, ಈ ಪದಬಳಕೆ ದ್ವೇಷಪೂರಿತವಾಗಿದೆ ಎಂದು ಕಿಡಿಕಾರಿತ್ತು.
ಸುಪ್ರೀಂ ಕೋರ್ಟ್‌ನಲ್ಲಿ ನಡೆದಿದ್ದೇನು?
ಹೈಕೋರ್ಟ್‌ನ ಈ ಕಠಿಣ ತೀರ್ಪನ್ನು ಪ್ರಶ್ನಿಸಿ WFI ಸುಪ್ರೀಂ ಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಿತ್ತು. ಮೇ 29 ರಂದು ಸುಪ್ರೀಂ ಕೋರ್ಟ್ ವಿನೇಶ್‌ಗೆ ಟ್ರಯಲ್ಸ್‌ನಲ್ಲಿ ಭಾಗವಹಿಸಲು ತಾತ್ಕಾಲಿಕ ಅನುಮತಿ ನೀಡಿತ್ತು (ಆದರೆ ವಿನೇಶ್ ಟ್ರಯಲ್ಸ್‌ನಲ್ಲಿ ಅರ್ಹತೆ ಪಡೆಯಲು ವಿಫಲರಾಗಿದ್ದರು).
ಇದನ್ನೂ ಓದಿ: ನ್ಯಾಯಾಲಯಗಳಲ್ಲಿ AI ಬಳಕೆ; ಸಾರ್ವಜನಿಕರ ಸಲಹೆಗೆ ಸುಪ್ರೀಂ ಅವಕಾಶ
ಗುರುವಾರ ಮತ್ತೆ ವಿಚಾರಣೆ ಆರಂಭವಾದಾಗ, WFI ಪರ ಹಿರಿಯ ವಕೀಲ ಡಿ.ಎನ್. ಗೋಬರ್ಧನ್, “ಹೈಕೋರ್ಟ್ ತೀರ್ಪಿನಲ್ಲಿ ಬಳಸಿರುವ ‘ದ್ವೇಷಪೂರಿತ’ ಮತ್ತು ‘ಖಂಡನೀಯ’ ಎಂಬ ಪದಗಳನ್ನು ತೆಗೆದುಹಾಕಬೇಕು, ಇಲ್ಲದಿದ್ದರೆ ಕೆಳಹಂತದ ನ್ಯಾಯಾಲಯದಲ್ಲಿರುವ ಪ್ರಕರಣಗಳ ಮೇಲೆ ಇದು ಪ್ರಭಾವ ಬೀರುತ್ತದೆ” ಎಂದು ವಾದಿಸಿದರು.
ಆದರೆ, ಸುಪ್ರೀಂ ಕೋರ್ಟ್ ಈ ವಾದವನ್ನು ಪುರಸ್ಕರಿಸದೆ, ಪ್ರಕರಣ ಈಗ ಪ್ರಸ್ತುತತೆ ಕಳೆದುಕೊಂಡಿರುವುದರಿಂದ ಹೈಕೋರ್ಟ್‌ನ ಯಾವುದೇ ಮುಖ್ಯಾಂಶಗಳನ್ನು ಸದ್ಯಕ್ಕೆ ಬದಲಾಯಿಸಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿ ಅರ್ಜಿ ವಿಲೇವಾರಿ ಮಾಡಿದೆ.
