ಎಲ್‌ಡಿಎಫ್ ಮತ್ತು ಯುಡಿಎಫ್ ದಶಕಗಳಿಂದ ಕೇರಳವನ್ನು ಲೂಟಿ ಮಾಡುತ್ತಿವೆ. ಇವರದ್ದು ಹೊಂದಾಣಿಕೆ ರಾಜಕೀಯ ಎಂದು ಪಾಲಕ್ಕಾಡ್‌ನ ಕೊಟ್ಟ ಮೈಥಾನಂನಲ್ಲಿ ಚುನಾವಣಾ ಪ್ರಚಾರವನ್ನು ನಡೆಸುತ್ತಾ ಪ್ರಧಾನಿ ನರೇಂದ್ರ ಮೋದಿ ಆರೋಪಿಸಿದ್ದಾರೆ.
“ಕಮ್ಯುನಿಸ್ಟರು ಕಾಂಗ್ರೆಸ್ ಬಿಜೆಪಿಯ ‘ಬಿ ಟೀಮ್’ ಎಂದು ಹೇಳುತ್ತಾರೆ. ಆದರೆ ಕಾಂಗ್ರೆಸ್ ಎಡಪಕ್ಷಗಳ ಬಗ್ಗೆ ಅದೇ ಆರೋಪ ಮಾಡುತ್ತಾರೆ. ವಾಸ್ತವದಲ್ಲಿ, ಕೇರಳದಲ್ಲಿರುವ ಏಕೈಕ ‘ಎ ಟೀಮ್’ ಬಿಜೆಪಿ. ದೀರ್ಘಕಾಲದ ರಾಜಕೀಯವನ್ನು ಹೊಡೆದು ಹೊಸ ರಾಜಕೀಯ ಶಕ್ತಿ ಇರುವುದು ನಮಗೆ ಮಾತ್ರ” ಎಂದು ಹೇಳಿಕೊಂಡರು.
ಇದನ್ನು ಓದಿದ್ದೀರಾ? ಕೇರಳ ಚುನಾವಣೆ | ಎಲ್‌ಡಿಎಫ್, ಯುಡಿಎಫ್ ಜತೆ ಸ್ಪರ್ಧೆಗೆ ಬಿಜೆಪಿಯೂ ಸಜ್ಜಾಗುತ್ತಿದೆ: ಯಾರ ತಂತ್ರ ಫಲಿಸುತ್ತೆ?
“ಯಾವುದೇ ರಂಗ ಅಧಿಕಾರದಲ್ಲಿದ್ದರೂ ಸಾರ್ವಜನಿಕ ಹಣವನ್ನು ದುರುಪಯೋಗ ಮಾಡಿಕೊಂಡಿದೆ. ಎರಡು ಮೈತ್ರಿಕೂಟಗಳು ಪೈಪೋಟಿ ಹೊಂದಿದ್ದರೂ, ಹೊಂದಾಣಿಕೆ ಮಾಡಿಕೊಳ್ಳುತ್ತಾರೆ. ಇವರ ಎಲ್ಲ ಭ್ರಷ್ಟಾಚಾರವನ್ನು ಎನ್‌ಡಿಎ ಸರ್ಕಾರವು ಭ್ರಷ್ಟಾಚಾರವನ್ನು ತನಿಖೆ ಮಾಡುತ್ತದೆ, ಬಹಿರಂಗಪಡಿಸುತ್ತದೆ” ಎಂದೂ ಹೇಳಿದರು.
“ರಾಜ್ಯದ ಸಾಲವು ಸುಮಾರು ₹5 ಲಕ್ಷ ಕೋಟಿ ತಲುಪಿದೆ. ಕಳೆದ ದಶಕದಲ್ಲಿ ಮೂರು ಪಟ್ಟು ಹೆಚ್ಚಾಗಿದೆ. ಆಡಳಿತ ವ್ಯವಸ್ಥೆ ದುರುಪಯೋಗ ಮಾಡಲಾಗುತ್ತಿದೆ. ಭ್ರಷ್ಟಾಚಾರ ನಡೆಯುತ್ತಿದೆ” ಎಂದು ಆರೋಪಿಸಿದರು.
ಪ್ರಧಾನಿ ಹೇಳಿಕೆಗೆ ಎಲ್‌ಡಿಎಫ್, ಯುಡಿಎಫ್ ವಿರೋಧ
ಇನ್ನೆರಡು ವಾರದಲ್ಲಿ ಕೇರಳದಲ್ಲಿ ವಿಧಾನಸಭೆ ಚುನಾವಣೆ ನಡೆಯಲಿದೆ. ಈವರೆಗೆ ಯುಡಿಎಫ್ ಮತ್ತು ಎಲ್‌ಡಿಎಫ್‌ಗೆ ಅಧಿಕಾರ ನೀಡುತ್ತಿರುವ ಈ ರಾಜ್ಯದ ಜನರನ್ನು ತಮ್ಮತ್ತ ಸೆಳೆಯುವ ಪ್ರಯತ್ನವನ್ನು ಬಿಜೆಪಿ ಮಾಡುತ್ತಲೇ ಇದೆ. ಅದರ ಭಾಗವಾಗಿ ಅಲ್ಲಲ್ಲಿ ಕೋಮುದ್ವೇಷ ಹಬ್ಬಿಸುತ್ತಿದೆ ಎಂಬುದು ಎಲ್‌ಡಿಎಫ್, ಯುಡಿಎಫ್ ಆರೋಪವಾಗಿದೆ.
ಮೋದಿಯ ಆರೋಪಗಳನ್ನು ಎಲ್‌ಡಿಎಫ್ ಮತ್ತು ಯುಡಿಎಫ್ ಎರಡೂ ತಳ್ಳಿಹಾಕಿವೆ. “ಕೇಂದ್ರ ಸರ್ಕಾರವು ರಾಜ್ಯಗಳ ಮೇಲೆ ಸವಾರಿ ಮಾಡುತ್ತಿದೆ. ಆರೋಗ್ಯಕರ ಕೇಂದ್ರ-ರಾಜ್ಯ ಸಂಬಂಧವನ್ನು ಗೌರವಿಸುತ್ತಿಲ್ಲ” ಎಂದು ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ದೂರಿದ್ದಾರೆ. ಹಾಗೆಯೇ ಪ್ರಧಾನಿ ಉಳಿದೆಡೆ ಮಾಡುವಂತೆ ಇಲ್ಲಿಯೂ ಜನರನ್ನು ದಾರಿ ತಪ್ಪಿಸಲು ಸುಳ್ಳು ಹೇಳುತ್ತಿದ್ದಾರೆ ಎಂದು ಯುಡಿಎಫ್ ದೂರಿದೆ.
ಇದನ್ನು ಓದಿದ್ದೀರಾ? ಕೇರಳ ಚುನಾವಣೆ | ಬೂತ್ ಕಾರ್ಯಕರ್ತರಿಗೆ ಯುಎಇ ಪ್ರವಾಸದ ಆಫರ್: ಯುಡಿಎಫ್ ನಾಯಕನ ವಿರುದ್ಧ ಎಫ್‌ಐಆರ್
ಕಾಂಗ್ರೆಸ್ ಸಂಸದ ಶಶಿ ತರೂರ್ ಸೇರಿದಂತೆ ಹಲವು ನಾಯಕರು, “ಬಿಜೆಪಿಯು ಕೇರಳದಲ್ಲಿ ಇನ್ನೂ ಖಾತೆ ತೆರೆಯದ ಪಕ್ಷವಾಗಿದ್ದು, ಅದರ ಹೇಳಿಕೆಗಳನ್ನು ಗಂಭೀರವಾಗಿ ಪರಿಗಣಿಸುವ ಅಗತ್ಯವಿಲ್ಲ” ಎಂದು ತಿರುಗೇಟು ನೀಡಿದ್ದಾರೆ. ಇನ್ನು ಯುಡಿಎಫ್ ನಾಯಕರು ಬಿಜೆಪಿಯ ಕೋಮುವಾದಿ ರಾಜಕಾರಣವನ್ನು ಟೀಕಿಸಿದ್ದು, ರಾಜ್ಯದ ಜಾತ್ಯತೀತ ಪರಂಪರೆಯನ್ನು ಹಾಳುಮಾಡಲು ಪ್ರಧಾನಿ ಪ್ರಯತ್ನಿಸುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.
ಇನ್ನು ಕೇರಳದ ಅಭಿವೃದ್ಧಿಗೆ ಕೇಂದ್ರ ಸರ್ಕಾರವು ಸತತವಾಗಿ ಅಡ್ಡಿಪಡಿಸುತ್ತಿದೆ ಮತ್ತು ರಾಜ್ಯಕ್ಕೆ ಬರಬೇಕಾದ ಅನುದಾನವನ್ನು ತಡೆಹಿಡಿಯುತ್ತಿದೆ ಎಂದು ಎಲ್‌ಡಿಎಫ್ ದೂರಿದೆ. ಹಾಗೆಯೇ, ನಮ್ಮ ಆಡಳಿತದಲ್ಲಿ ಕೇರಳದ ಸಾರ್ವಜನಿಕ ಶಿಕ್ಷಣ ಮತ್ತು ಆರೋಗ್ಯ ವ್ಯವಸ್ಥೆಯನ್ನು ಜಾಗತಿಕ ಮಟ್ಟಕ್ಕೆ ನಾವು ಕೊಂಡೊಯ್ದಿದ್ದೇವೆ. ಇದು ‘ಲೂಟಿ’ಯಲ್ಲ ಬದಲಾಗಿ ‘ಜನಸೇವೆ’ ಎಂದು ಎಲ್‌ಡಿಎಫ್ ಪ್ರತಿಪಾದಿಸಿದೆ.
