“ಉರಿಗೌಡ ಮತ್ತು ನಂಜೇಗೌಡರ ಸೃಷ್ಟಿಕರ್ತರಿಗೆ ಎದುರಾಗಿ ಈ ಪುಸ್ತಕ ಬಂದಿದೆ. ಇತಿಹಾಸ ಮಾತ್ರವಲ್ಲ, ವಿಜ್ಞಾನವನ್ನು ಹಾಗೂ ಭವಿಷ್ಯವನ್ನೂ ಸಹ ತಿರುಚಲಾಗುತ್ತಿದೆ” ಎಂದು ಹಿರಿಯ ಚಿಂತಕ ಸಿದ್ದನಗೌಡ ಪಾಟೀಲ್ ಹೇಳಿದರು.
ಬೆಂಗಳೂರಿನಲ್ಲಿ ಪತ್ರಕರ್ತ ನವೀನ್ ಸೂರಿಂಜೆ ಅವರು ರಚಿಸಿರುವ ‘ಕರಾವಳಿಯ ಚರಿತ್ರೆಯಲ್ಲಿ ಹೈದರ್ ಅಲಿ ಮತ್ತು ಟಿಪ್ಪು ಸುಲ್ತಾನ್’ ಪುಸ್ತಕ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು “ಟಿಪ್ಪು ಮತ್ತು ಹೈದರ್ ವಿಚಾರವನ್ನು ಆಗಿನ ಕಾಲಘಟ್ಟವನ್ನು ನಿಂತು ಅಧ್ಯಯನ ಮಾಡುವುದು ಅವಶ್ಯಕತೆ ಇದೆ. ಆದರೆ ಇವತ್ತು ಮಾಡುತ್ತಿರುವ ಅಪಪ್ರಚಾರದ ವಿರುದ್ಧ ನವೀನ್ ಸೂರಿಂಜೆ ಬರೆದಿದ್ದಾರೆ” ಎಂದು ಅಭಿಮತ ವ್ಯಕ್ತಪಡಿಸಿದರು.
“ಟಿಪ್ಪು ಬ್ರಿಟಿಷ್ ವಿರೋಧಿಯಾಗಿದ್ದ ಎಂದು ಹೇಳದ ಸಂಘಪರಿವಾರದವರು, ಹಿಂದೂ ವಿರೋಧಿ ಎಂದು ಬಿಂಬಿಸುತ್ತಾರೆ. ಕರ್ನಾಟಕದಲ್ಲಿ ವೈದಿಕ ರಾಜಕಾರಣ ಮಾಡುತ್ತಿರುವ ಸಂಘರ್ಷವನ್ನು ಬಿಜೆಪಿಯವರು ಮುಚ್ಚಿಟ್ಟಿದ್ದಾರೆ. ಬಿಟ್ಟಿದೇವ, ವಿಷ್ಣವರ್ಧನ ಹೇಗೆ ಆದ ಎಂದು ಕೇಳಿದರೆ ಅವರ ಬಳಿ ಉತ್ತರವಿಲ್ಲ” ಎಂದು ಹೇಳಿದರು.
“ಇತಿಹಾಸದ ಘಟನೆಗಳನ್ನು ಇಟ್ಟುಕೊಂಡು ಪ್ರಚೋದನೆ ಮಾಡುವ ಹಂತಕ್ಕೆ ಕರ್ನಾಟಕ ಬಂದು ನಿಂತಿದೆ. ಟಿಪ್ಪು ಅವರಲ್ಲಿದ್ದ ವಸಾಹತು ಶಾಹಿ ವಿರೋಧಿ ಪ್ರಜ್ಞೆ ಇವತ್ತಿಗೂ ಅವಶ್ಯಕತೆ ಆಗಿದೆ. ಇರಾನ್ ನಾಶ ಆಗಬೇಕು ಎಂದು ಭಯಸಿದವರು ಈಗ ಎಲ್ಪಿಜಿ ಸಮಸ್ಯೆ ಆದ ಮೇಲೆ ಯುದ್ಧ ನಿಲ್ಲಬೇಕು ಅಂತ ಹೇಳುತ್ತಾರೆ. ಭಾರತವನ್ನು ನಿಯಂತ್ರಿಸುತ್ತಿರುವುದು ಮೋದಿನಾ? ಅಥವಾ ಟ್ರಂಪ್?” ಎಂದು ಪ್ರಶ್ನಿಸಿದರು.
ಕಾರ್ಯಕ್ರಮದಲ್ಲಿ ಸಂಸ್ಕೃತಿ ಚಿಂತಕರಾದ ಬಂಜಗೆರೆ ಜಯಪ್ರಕಾಶ್ ಅವರು ಮಾತನಾಡಿ “ಇತಿಹಾಸವನ್ನು ವಸ್ತು ನಿಷ್ಟವಾಗಿ ನೋಡಬೇಕು. ಆದರೆ ಇತಿಹಾಸವನ್ನು ತಿರುಚಿ ಟಿಪ್ಪುವನ್ನು ಕಳನಾಯಕನನ್ನಾಗಿ ಮಾಡಲಾಗುತ್ತಿದೆ. ಅದಕ್ಕಾಗಿ ಕರಾವಳಿಯಲ್ಲಿ ಮರೆಮಾಚಿದ ಸತ್ಯವನ್ನು ನವೀನ್ ಸೂರಿಂಜೆ ಪುಸ್ತಕದ ಮೂಲಕ ನಮ್ಮೆದುರಿಟ್ಟಿದ್ದಾರೆ” ಎಂದರು.
“ಮೈಸೂರು ರಾಜರಿಗೆ ರಾಜ್ಯವನ್ನು ಕಟ್ಟಲು ಅರ್ಹತೆ ಇದ್ದಂತೆ, ಟಿಪ್ಪುವಿಗೂ ರಾಜ್ಯವನ್ನು ಕಟ್ಟಲು ಅರ್ಹತೆ ಇತ್ತು. ಅದಕ್ಕಾಗಿ ಆತನ ಬಳಿ ತೋಳ್ಬಲವಿತ್ತು. ಜೊತೆಗೆ ಬಹಳ ತಿಳುವಳಿಕೆ ಇದ್ದಂತಹ ಆಡಳಿತಗಾರನಾಗಿದ್ದ. ಟಿಪ್ಪುವನ್ನು ಕಳನಾಯಕನನ್ನಾಗಿ ಮೊದಲು ಚಿತ್ರಿಸಿದವರು ಬ್ರಿಟಿಷರು. ಈಗ ಟಿಪ್ಪುವನ್ನು ವಿರೋಧಿಸುತ್ತಿರುವರು ಬ್ರಿಟಿಷರ ಸ್ನೇಹಿತರು” ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಸಚಿವ ಪ್ರಿಯಾಂಕ್ ಖರ್ಗೆ, ಇತಿಹಾಸಕಾರರು ಡಾ.ರುಚಿಕಾ ಶರ್ಮ, ಹಿರಿಯ ಪತ್ರಕರ್ತ ಸುದೀಪ್ತೋ ಮೊಂಡಲ್, ಪುಸ್ತಕದ ಕತೃ ನವೀನ್ ಸೂರಿಂಜೆ, ನಿರೂಪಕಿ ಧನಲಕ್ಷ್ಮೀ ದೇವರಾಜ್ ಇದ್ದರು.
