ಕಾರ್ಗಿಲ್ ಯುದ್ಧದಲ್ಲಿ ದೇಶಕ್ಕಾಗಿ ಪ್ರಾಣತ್ಯಾಗ ಮಾಡಿದ ವೀರ ಯೋಧರ ತ್ಯಾಗವನ್ನು ಸ್ಮರಿಸುವ ‘ಕಾರ್ಗಿಲ್ ವಿಜಯ ದಿವಸ’ದಂದು ದೇಶಪ್ರೇಮದ ಅಲೆ ಮನೆಮಾಡಿರುತ್ತದೆ. 1999ರಲ್ಲಿ ಟೈಗರ್ ಹಿಲ್‌ನಲ್ಲಿ ನಡೆದ ಭೀಕರ ಕದನದಲ್ಲಿ ವೀರಮರಣ ಅಪ್ಪಿದ 18 ವರ್ಷದ ಯುವ ಯೋಧ, ಗ್ರೆನೇಡಿಯರ್ ಉದಯಮಾನ್ ಸಿಂಗ್ ಅವರ ಜಮ್ಮುವಿನ ಮನೆಯಲ್ಲಿ ಮಾತ್ರ ಕಾಲ ಇಂದಿಗೂ ಸಸ್ತಬ್ದಗೊಂಡಂತೆ ಭಾಸವಾಗುತ್ತದೆ. ಕಾರ್ಗಿಲ್ ಸಮರ ಮುಗಿದು ದಶಕಗಳು ಕಳೆದರೂ, ಉದಯಮಾನ್ ಸಿಂಗ್ ಅವರ ತಾಯಿ ಕಾಂತಾ ದೇವಿ ತಮ್ಮ ಮಗನ ನೆನಪುಗಳನ್ನು ಜೀವಂತವಾಗಿಡಲು ಮನೆಯ ಒಂದು ಸಣ್ಣ ಕೊಠಡಿಯನ್ನೇ ‘ದೇವಾಲಯ’ವನ್ನಾಗಿ ಪರಿವರ್ತಿಸಿದ್ದಾರೆ.
ಉದಯಮಾನ್ ಸಿಂಗ್ ಬಳಸುತ್ತಿದ್ದ ವಸ್ತುಗಳು, ಅವರ ಸಮವಸ್ತ್ರ ಮತ್ತು ಸ್ಮರಣಿಕೆಗಳನ್ನು ಈ ಕೊಠಡಿಯಲ್ಲಿ ಅತ್ಯಂತ ಪವಿತ್ರವಾಗಿ ಕಾಯ್ದುಕೊಳ್ಳಲಾಗಿದೆ. “ಪ್ರತಿ ಮುಂಜಾನೆ ನಾನು ಈ ಕೊಠಡಿಗೆ ಬಂದು ಮಗನ ಜತೆ ಮಾತನಾಡುತ್ತೇನೆ. ಆತ ಜೀವಂತವಾಗಿದ್ದಾಗ ಹೇಗೆ ಪ್ರತಿಯೊಂದು ವಿಷಯವನ್ನೂ ಹಂಚಿಕೊಳ್ಳುತ್ತಿದ್ದೆನೋ, ಈಗಲೂ ಹಾಗೆಯೇ ಹಂಚಿಕೊಳ್ಳುತ್ತೇನೆ” ಎಂದು ತಾಯಿ ಕಾಂತಾ ದೇವಿ ತಮ್ಮ ನೋವನ್ನು ತೋಡಿಕೊಳ್ಳುತ್ತಾರೆ.
ಇದನ್ನೂ ಓದಿ: ತುಮಕೂರು | ಕಾರ್ಗಿಲ್ ವಿಜಯ ದಿವಸ್ ಅಂಗವಾಗಿ ಜು.26ರಂದು ‘ತುಮಕೂರು ಲೇಕ್ ರನ್–2026’ : ಪ್ರೊ. ರವಿ
ಟೈಗರ್ ಹಿಲ್‌ನ ಕಡಿದಾದ ಬಂಡೆಯ ಮೇಲೆ ಶತ್ರುಗಳ ವಿರುದ್ಧ ಹೋರಾಡುವಾಗ ಉದಯಮಾನ್ ವೀರಮರಣ ಅಪ್ಪಿದ್ದರು. ಅವರ ಶೌರ್ಯಕ್ಕಾಗಿ ಮರಣೋತ್ತರ ‘ಸೇನಾ ಪದಕ’ ನೀಡಿ ಗೌರವಿಸಲಾಗಿತ್ತು.
ಇಂದಿಗೂ ಆ ಕೊಠಡಿಯಲ್ಲಿ ಅವರ ಪರ್ಸ್ ಅನ್ನು ಇಡಲಾಗಿದ್ದು, ಅದರ ಮೇಲೆ ವೈರಿಗಳ ಗುಂಡು ತಾಗಿದ ರಂಧ್ರವನ್ನು ಕಾಣಬಹುದು. ಆ ಪರ್ಸ್‌ನೊಳಗೆ ತಂಗಿ ವಂದನಾ ಬರೆದ ಪತ್ರಗಳು ಮತ್ತು ಉದಯಮಾನ್ ಕಳುಹಿಸಲಾಗದ ಪತ್ರಗಳು ಹಾಗೆಯೇ ಇವೆ. ಅದರ ಜೊತೆಗೆ, ಗುಂಡೇಟು ತಾಗಿದ್ದ ‘ಒಂದು ರೂಪಾಯಿ ನಾಣ್ಯ’ವನ್ನು ತಾಯಿ ಕಾಯ್ದುಕೊಂಡಿದ್ದಾರೆ.
ಉದಯಮಾನ್ ಅವರ ಸಹೋದರಿ ವಂದನಾ ಲಾಂಗೆಹ್, ತಮ್ಮ ಸಹೋದರನ ಫೋಟೋಗೆ ರಾಖಿ ಕಟ್ಟುತ್ತಾರೆ. “ಪ್ರತಿ ರಕ್ಷಾ ಬಂಧನದಲ್ಲೂ ನನ್ನ ಸಹೋದರನ ನೆನಪು ಕಾಡುತ್ತದೆ. ಆದರೆ, ಆತನ ತ್ಯಾಗದಿಂದಾಗಿ ಇಂದು ದೇಶದ ಲಕ್ಷಾಂತರ ಸಹೋದರಿಯರು ತಮ್ಮ ಸಹೋದರರೊಂದಿಗೆ ಹಬ್ಬ ಆಚರಿಸುತ್ತಿದ್ದಾರೆಂಬ ಹೆಮ್ಮೆ ನನಗಿದೆ” ಎಂದು ವಂದನಾ ಹೇಳುತ್ತಾರೆ.
ಪರಮವೀರ ಚಕ್ರ ವಿಜೇತ ಗ್ರೆನೇಡಿಯರ್ ಯೋಗೇಂದ್ರ ಸಿಂಗ್ ಯಾದವ್ ನಾಯಕತ್ವದ ಪಡೆಯಲ್ಲಿದ್ದ ಉದಯಮಾನ್ ಸಿಂಗ್, ಕೊನೆಯ ಉಸಿರಿರುವವರೆಗೂ ಹೋರಾಡಿ ಶತ್ರುಪಡೆಗೆ ಅಪಾರ ಹಾನಿ ಉಂಟುಮಾಡಿದ್ದರು. ದೇಶಕ್ಕಾಗಿ ಪ್ರಾಣ ತೆತ್ತ ಈ ವೀರ ಯೋಧನ ನೆನಪು ಜಮ್ಮುವಿನ ಈ ಸಣ್ಣ ಕೊಠಡಿಯಲ್ಲಿ ಮತ್ತು ಭಾರತೀಯರ ಹೃದಯದಲ್ಲಿ ಎಂದೆಂದಿಗೂ ಅಮರ.
