ದೆಹಲಿಯ ಹೌಜ್ ರಾಣಿಯ ‘ಫ್ಲರಿಶ್ ಸ್ಟೇಸ್’ (Flourish Stays) ಬೆಡ್ ಅಂಡ್ ಬ್ರೇಕ್‌ಫಾಸ್ಟ್ ಹೋಟೆಲ್‌ನಲ್ಲಿ ಬುಧವಾರ ಬೆಳಗ್ಗೆ ಸಂಭವಿಸಿದ ಭೀಕರ ಶಾರ್ಟ್ ಸರ್ಕ್ಯೂಟ್ ಅಗ್ನಿ ಅನಾಹುತದಲ್ಲಿ 21 ಜನ ಸಜೀವ ದಹನವಾಗಿದ್ದಾರೆ. ಈ ಮೃತ್ಯುಕೂಪದಿಂದ ನೈಜೀರಿಯಾ ದಂಪತಿ ವಿಡಿಯೋವೊಂದರಲ್ಲಿ ನೋಡಿದ್ದ ಫೈರ್ ಡ್ರಿಲ್ ಟಿಪ್ಸ್ ಬಳಸಿ ಪವಾಡಸದೃಶವಾಗಿ ಬದುಕುಳಿದಿದ್ದಾರೆ.
ಪೊಲೀಸರ ಪ್ರಾಥಮಿಕ ತನಿಖೆಯ ವೇಳೆ ಬದುಕುಳಿದ ನೈಜೀರಿಯಾ ದಂಪತಿ ತಮ್ಮ ಹೇಳಿಕೆ ದಾಖಲಿಸಿದ್ದಾರೆ. ಹೋಟೆಲ್‌ನಲ್ಲಿ ಬೆಂಕಿ ಕಾಣಿಸಿಕೊಂಡ ತಕ್ಷಣ ರೂಮಿನ ತುಂಬೆಲ್ಲಾ ದಟ್ಟ ಹೊಗೆ ಆವರಿಸಿತ್ತು. ಆ ಸಮಯದಲ್ಲಿ ಗಾಬರಿಯಾಗದೇ, ತಾವು ಈ ಹಿಂದೆ ನೋಡಿದ್ದ “ಬೆಂಕಿಯ ಅನಾಹುತದಿಂದ ಬದುಕುಳಿಯುವುದು ಹೇಗೆ?” ಎಂಬ ವಿಡಿಯೋವನ್ನು ನೆನಪಿಸಿಕೊಂಡಿದ್ದಾರೆ.
ಬೆಂಕಿ ಬಿದ್ದಾಗ ಹೊಗೆ ಯಾವಾಗಲೂ ಕೋಣೆಯ ಮೇಲ್ಭಾಗಕ್ಕೆ ಏರುತ್ತದೆ ಮತ್ತು ಕೆಳಭಾಗದಲ್ಲಿ ಆಮ್ಲಜನಕ ಇರುತ್ತದೆ ಎಂಬ ವೈಜ್ಞಾನಿಕ ಸತ್ಯ ಅವರಿಗೆ ನೆನಪಾಗಿದೆ. ತಕ್ಷಣವೇ ಕಾರ್ಯಪ್ರವೃತ್ತರಾದ ದಂಪತಿ ಕೆಲ ಟ್ರಿಕ್ಸ್‌ ಫಾಲೋ ಮಾಡಿದ್ದಾರೆ.
ದಂಪತಿ ತಕ್ಷಣವೇ ಬಾತ್ ರೂಮ್ ಒಳಗೆ ನುಗ್ಗಿದ್ದಾರೆ. ಬಾತ್ ರೂಮ್‌ನ ಶವರ್ ಮತ್ತು ನೀರಿನ ನಲ್ಲಿಗಳನ್ನು ಪೂರ್ತಿಯಾಗಿ ಆನ್ ಮಾಡಿದ್ದಾರೆ. ನೆಲದ ಮೇಲೆ ಟವೆಲ್‌ಗಳನ್ನು ಹರಡಿ ಅವು ಪೂರ್ತಿ ಒದ್ದೆಯಾಗುವಂತೆ ಮಾಡಿದ್ದಾರೆ. ಒದ್ದೆ ಟವೆಲ್ ಮೇಲೆ ದಟ್ಟ ಹೊಗೆ ತಾಗದಂತೆ ತೀರಾ ಕೆಳಮಟ್ಟದಲ್ಲಿ ಅಂದರೆ ನೆಲಕ್ಕೆ ಅಂಟಿಕೊಂಡಂತೆ ಮಲಗಿದ್ದಾರೆ.
ರಕ್ಷಕ ಸಿಬ್ಬಂದಿ ಬರುವವರೆಗೂ ದಂಪತಿ ಇದೇ ಸ್ಥಿತಿಯಲ್ಲಿದ್ದರು. ನೀರಿನ ಶವರ್ ಮತ್ತು ಒದ್ದೆ ಟವೆಲ್ ಕೋಣೆಯ ತಾಪಮಾನವನ್ನು ಕಡಿಮೆ ಮಾಡಿದ್ದಲ್ಲದೆ, ದಟ್ಟ ಹೊಗೆ ಅವರ ಶ್ವಾಸಕೋಶಕ್ಕೆ ಸೇರದಂತೆ ತಡೆದಿದೆ.
“ಈ ಅಗ್ನಿ ಅವಘಡದಲ್ಲಿ ಮೃತಪಟ್ಟ ಬಹುತೇಕರು ಬೆಂಕಿಯಿಂದ ಸುಟ್ಟು ಸತ್ತಿಲ್ಲ, ಬದಲಿಗೆ ದಟ್ಟ ಹೊಗೆಯಿಂದ ಉಸಿರುಗಟ್ಟಿ ಸಾವನ್ನಪ್ಪಿದ್ದಾರೆ. ಆದರೆ ಈ ನೈಜೀರಿಯಾ ದಂಪತಿಯ ಸಮಯಪ್ರಜ್ಞೆ ಅವರನ್ನು ರಕ್ಷಿಸಿದೆ” ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಇದನ್ನೂ ಓದಿ: ದೆಹಲಿಯ ರೆಸ್ಟೋರೆಂಟ್‌ನಲ್ಲಿ ಭಾರಿ ಅಗ್ನಿ ದುರಂತ: 21 ಮಂದಿ ಸಜೀವ ದಹನ
ಮೃತಪಟ್ಟ 21 ಜನರಲ್ಲಿ 13 ಮಂದಿ ವಿದೇಶಿ ಪ್ರಜೆಗಳಾಗಿದ್ದಾರೆ. ಇವರೆಲ್ಲರೂ ಭಾರತಕ್ಕೆ ಚಿಕಿತ್ಸೆಗಾಗಿ ಬಂದಿದ್ದ ಅಥವಾ ರೋಗಿಗಳ ಜೊತೆ ಬಂದಿದ್ದ ‘ಮೆಡಿಕಲ್ ಟೂರಿಸ್ಟ್ಸ್’ ಆಗಿದ್ದಾರೆ. ವಿದೇಶಾಂಗ ಸಚಿವಾಲಯದ ಪ್ರಕಾರ ಮೃತರ ಪೈಕಿ ನೈಜೀರಿಯಾದ ಐದು, ಕಿರ್ಗಿಸ್ತಾನ್‌ನ ನಾಲ್ಕು, ಮತ್ತು ಮೊಜಾಂಬಿಕ್, ಲೈಬೀರಿಯಾ, ಉಜ್ಬೇಕಿಸ್ತಾನ್, ಬಾಂಗ್ಲಾದೇಶ, ಕಾಂಗೋ ಹಾಗೂ ಇರಾಕ್ ದೇಶದ ತಲಾ ಒಬ್ಬರು ಪ್ರಜೆಗಳು ಸೇರಿದ್ದಾರೆ. ಮೃತದೇಹಗಳ ಗುರುತು ಪತ್ತೆಗಾಗಿ ಡಿಎನ್‌ಎ ಪರೀಕ್ಷೆ ನಡೆಸಲು ಪೊಲೀಸರು ನಿರ್ಧರಿಸಿದ್ದಾರೆ.
ದುರಂತ ನಡೆದ ಕಟ್ಟಡದಲ್ಲಿ ಯಾವುದೇ ತುರ್ತು ನಿರ್ಗಮನದ ವ್ಯವಸ್ಥೆ ಇರಲಿಲ್ಲ ಮತ್ತು ಗಾಳಿಯಾಡಲು ಸರಿಯಾದ ವೆಂಟಿಲೇಶನ್ ಕೂಡ ಇರಲಿಲ್ಲ ಎಂಬುದು ತನಿಖೆಯಿಂದ ತಿಳಿದುಬಂದಿದೆ. ಶಾರ್ಟ್ ಸರ್ಕ್ಯೂಟ್‌ನಿಂದಲೇ ಬೆಂಕಿ ಹೊತ್ತಿಕೊಂಡಿದೆ ಎನ್ನಲಾಗಿದ್ದು, ನಿಯಮ ಬಾಹಿರವಾಗಿ ಕಟ್ಟಡ ನಿರ್ಮಿಸಿರುವ ಕುರಿತು ಅಧಿಕಾರಿಗಳು ತನಿಖೆ ಕೈಗೊಂಡಿದ್ದಾರೆ.
