ದೇಶದಲ್ಲಿ ಆರು ತಿಂಗಳೊಳಗಿನ ಶಿಶುಗಳಿಗೆ ಸಂಪೂರ್ಣ ತಾಯಿಹಾಲು ನೀಡುವ ಪ್ರಮಾಣ ಕುಸಿದಿರುವ ಕುರಿತು ಕಾಂಗ್ರೆಸ್ ಸಂಸದ ಶಶಿ ತರೂರ್ ಕಳವಳ ವ್ಯಕ್ತಪಡಿಸಿದ್ದಾರೆ. ಗ್ರಾಮೀಣ ಪ್ರದೇಶಗಳಲ್ಲಿ ಹೆರಿಗೆಯಾದ ಕೆಲವೇ ವಾರಗಳಲ್ಲಿ ಜೀವನೋಪಾಯಕ್ಕಾಗಿ ಮಹಿಳೆಯರು ಮತ್ತೆ ಕೆಲಸಕ್ಕೆ ಮರಳಬೇಕಾದ ಅನಿವಾರ್ಯತೆಯೇ ಈ ಕುಸಿತಕ್ಕೆ ಪ್ರಮುಖ ಕಾರಣವಾಗಿರಬಹುದು ಎಂದು ಅವರು ಹೇಳಿದ್ದಾರೆ. ಅಸಂಘಟಿತ ವಲಯದಲ್ಲಿ ಕೆಲಸ ಮಾಡುವ ಮಹಿಳೆಯರಿಗೆ ವೇತನ ಸಹಿತ ಹೆರಿಗೆ ರಜೆ ಮತ್ತು ಉದ್ಯೋಗ ಭದ್ರತೆ ಕಲ್ಪಿಸುವ ಅಗತ್ಯವಿದೆ ಎಂದು ಅವರು ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದ್ದಾರೆ.
ಆರೋಗ್ಯ ಸಚಿವ ಜೆ.ಪಿ. ನಡ್ಡಾ, ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವೆ ಅನ್ನಪೂರ್ಣಾ ದೇವಿ ಅವರನ್ನು ಉದ್ದೇಶಿಸಿ ಸಾಮಾಜಿಕ ಜಾಲತಾಣದಲ್ಲಿ ತರೂರ್ ಪೋಸ್ಟ್ ಮಾಡಿದ್ದಾರೆ. “ರಾಷ್ಟ್ರೀಯ ಕುಟುಂಬ ಆರೋಗ್ಯ ಸಮೀಕ್ಷೆ–6 (NFHS-6) ದತ್ತಾಂಶದ ಪ್ರಕಾರ, ದೇಶದ ಆಸ್ಪತ್ರೆಗಳಲ್ಲಿ ನಡೆಯುವ ಹೆರಿಗೆಗಳ ಪ್ರಮಾಣ 90.6% ಏರಿಕೆಯಾಗಿದೆ. ಆದರೆ, ಆರು ತಿಂಗಳೊಳಗಿನ ಶಿಶುಗಳಿಗೆ ಸಂಪೂರ್ಣವಾಗಿ ತಾಯಿಹಾಲು ನೀಡುವ ಪ್ರಮಾಣ ಮಾತ್ರ 63.7%ನಿಂದ 55.8%ಗೆ ಕುಸಿದಿದೆ. ಗ್ರಾಮೀಣ ಪ್ರದೇಶಗಳು ಸೇರಿದಂತೆ ಉತ್ತರ ಪ್ರದೇಶ ಮತ್ತು ಹರಿಯಾಣದಂತಹ ಪ್ರಮುಖ ರಾಜ್ಯಗಳಲ್ಲಿ ಈ ಕುಸಿತ ಹೆಚ್ಚು ತೀವ್ರವಾಗಿದೆ” ಎಂದು ಹೇಳಿದ್ದಾರೆ.
“ಭಾರತದ ಅಸಂಘಟಿತ ವಲಯದಲ್ಲಿ 16 ಕೋಟಿಗೂ ಹೆಚ್ಚು ಮಹಿಳೆಯರು ದುಡಿಯುತ್ತಿದ್ದಾರೆ. ಇವರಲ್ಲಿ ಬಹುತೇಕ ಮಹಿಳೆಯರಿಗೆ ವೇತನ ಸಹಿತ ಹೆರಿಗೆ ರಜೆ ಅಥವಾ ದೀರ್ಘಾವಧಿಯ ಉದ್ಯೋಗ ಭದ್ರತೆ ಇಲ್ಲದಿರುವುದರಿಂದ, ಹೆರಿಗೆಯಾದ ಕೆಲವೇ ವಾರಗಳಲ್ಲಿ ಮತ್ತೆ ದುಡಿಮೆಗೆ ಮರಳಬೇಕಾದ ಪರಿಸ್ಥಿತಿ ಇದೆ” ಎಂದು ಅವರು ಹೇಳಿದ್ದಾರೆ.
“ತಾಯಿ ಮತ್ತು ಮಗುವಿನ ಆರೋಗ್ಯದ ದೃಷ್ಟಿಯಿಂದ ಮೊದಲ ಆರು ತಿಂಗಳು ಅತ್ಯಂತ ಮಹತ್ವದ ಅವಧಿ. ಈ ಅವಧಿಯಲ್ಲಿ ಮಗುವಿಗೆ ಸಂಪೂರ್ಣವಾಗಿ ತಾಯಿಹಾಲು ನೀಡುವುದು ಶಿಶುವಿನ ಪೌಷ್ಟಿಕತೆ ಮತ್ತು ಆರೋಗ್ಯಕ್ಕೆ ಮಹತ್ವದ್ದಾಗಿದೆ. ಆದರೆ ದಿನಗೂಲಿ, ಗೃಹಾಧಾರಿತ ಕೆಲಸ, ನಿರ್ಮಾಣ ಕ್ಷೇತ್ರ, ಕೃಷಿ, ಸಣ್ಣ ವ್ಯಾಪಾರ ಸೇರಿದಂತೆ ಅಸಂಘಟಿತ ವಲಯದ ಹಲವು ಉದ್ಯೋಗಗಳಲ್ಲಿ ತಾಯಿಗೆ ದೀರ್ಘಕಾಲ ಕೆಲಸದಿಂದ ದೂರ ಉಳಿಯುವುದು ಆರ್ಥಿಕವಾಗಿ ಸಾಧ್ಯವಾಗುವುದಿಲ್ಲ” ಎಂದು ತರೂರ್ ಹೇಳಿದ್ದಾರೆ.
“ವೇತನ ಸಹಿತ ಹೆರಿಗೆ ರಜೆ ಅಥವಾ ಉದ್ಯೋಗ ಭದ್ರತೆ ಇಲ್ಲದಿದ್ದರೆ, ಬದುಕಿಗಾಗಿ ಸಾವಿರಾರು ದುಡಿಯುವ ತಾಯಂದಿರು ಹೆರಿಗೆಯಾದ ಕೆಲವೇ ವಾರಗಳಲ್ಲಿ ಮತ್ತೆ ಅಸಂಘಟಿತ ದುಡಿಮೆಗೆ ಮರಳಬೇಕಾಗುತ್ತದೆ. ಹೀಗಿರುವಾಗ ಆರು ತಿಂಗಳ ಸಂಪೂರ್ಣ ತಾಯಿಹಾಲು ನೀಡುವುದು ಆರ್ಥಿಕವಾಗಿ ಅಸಾಧ್ಯವಾಗುತ್ತದೆ” ಎಂದು ತರೂರ್ ಹೇಳಿದ್ದಾರೆ.
“ತಾಯಿಹಾಲು ನೀಡುವ ವಿಚಾರವನ್ನು ಕೇವಲ ತಾಯಿಯ ವೈಯಕ್ತಿಕ ನಿರ್ಧಾರ ಅಥವಾ ಆರೋಗ್ಯ ಜಾಗೃತಿಯ ಪ್ರಶ್ನೆಯಾಗಿ ನೋಡುವುದಕ್ಕಿಂತ, ಅದರ ಹಿಂದೆ ಇರುವ ಕೆಲಸದ ಪರಿಸ್ಥಿತಿ, ಆದಾಯದ ಭದ್ರತೆ ಮತ್ತು ಸಾಮಾಜಿಕ ರಕ್ಷಣೆಯನ್ನೂ ಪರಿಗಣಿಸಬೇಕಿದೆ” ಎಂದು ಅವರು ಹೇಳಿದ್ದಾರೆ.
“ಒಂದು ಕಡೆ ಆಸ್ಪತ್ರೆಗಳಲ್ಲಿ ನಡೆಯುವ ಹೆರಿಗೆಗಳ ಪ್ರಮಾಣ 90.6%ಗೆ ಏರಿಕೆಯಾಗಿದೆ. ಇನ್ನೊಂದೆಡೆ ಆರು ತಿಂಗಳೊಳಗಿನ ಶಿಶುಗಳ ಸಂಪೂರ್ಣ ತಾಯಿಹಾಲು ಪ್ರಮಾಣ ಕುಸಿದಿದೆ. ಈ ಕುಸಿತಕ್ಕೆ ಆರೋಗ್ಯ ವ್ಯವಸ್ಥೆ ಮತ್ತು ವಾಣಿಜ್ಯ ಕ್ಷೇತ್ರದಲ್ಲಿರುವ ಕೆಲವು ರಚನಾತ್ಮಕ ಸಮಸ್ಯೆಗಳೂ ಕಾರಣವಾಗಿರಬಹುದು” ಎಂದು ಅವರು ಹೇಳಿದ್ದಾರೆ.
“ಹೆರಿಗೆಯ ನಂತರ ತಾಯಿಗೆ ತಕ್ಷಣದ ಆರೈಕೆ, ಹಾಲುಣಿಸುವ ಕುರಿತು ಸರಿಯಾದ ಮಾರ್ಗದರ್ಶನ ಮತ್ತು ಅಗತ್ಯ ವೈದ್ಯಕೀಯ ನೆರವು ಸಿಗದಿದ್ದರೆ ಆರಂಭಿಕ ಹಂತದಲ್ಲೇ ತಾಯಿಹಾಲು ನೀಡುವ ಪ್ರಕ್ರಿಯೆಗೆ ತೊಂದರೆಯಾಗಬಹುದು. ಈ ಹಿನ್ನೆಲೆಯಲ್ಲಿ ಹೆರಿಗೆ ನಂತರದ ಆರೈಕೆ ವ್ಯವಸ್ಥೆಯನ್ನು ಬಲಪಡಿಸುವ ಅಗತ್ಯವಿದೆ” ಎಂದು ತರೂರ್ ಅಭಿಪ್ರಾಯಪಟ್ಟಿದ್ದಾರೆ.
ಈ ಲೇಖನ ಓದಿದ್ದೀರಾ?: ಕುಸಿದ ಮೋದಿ ಜನಪ್ರಿಯತೆ – ʼಪ್ರಜಾಪ್ರಭುತ್ವ ಅಪಾಯದಲ್ಲಿದೆʼ ಎನ್ನುತ್ತಿರುವ ಜನತೆ; ಸಮೀಕ್ಷಾ ವರದಿ
“ತಾಯಿಹಾಲು ಶಿಶುಗಳಿಗೆ ಅಪೌಷ್ಟಿಕತೆ ಮತ್ತು ಶಿಶು ಮರಣದ ಅಪಾಯದಿಂದ ರಕ್ಷಣೆ ನೀಡುವ ಪ್ರಮುಖ ಅಂಶಗಳಲ್ಲಿ ಒಂದಾಗಿದೆ. ಹೀಗಾಗಿ, ತಾಯಿಹಾಲು ನೀಡುವ ಪ್ರಮಾಣವನ್ನು ಹೆಚ್ಚಿಸುವ ಜವಾಬ್ದಾರಿ ಕೇವಲ ತಾಯಿಯ ಮೇಲೇ ಇರಬಾರದು; ಸರ್ಕಾರ, ಉದ್ಯೋಗದಾತರು ಮತ್ತು ಆರೋಗ್ಯ ವ್ಯವಸ್ಥೆಯೂ ಅದರ ಹೊಣೆ ಹೊರಬೇಕು. ಇದಕ್ಕಾಗಿ ಅಸಂಘಟಿತ ವಲಯದ ಮಹಿಳೆಯರಿಗೆ ಬಲವಾದ ಆರ್ಥಿಕ ಹೆರಿಗೆ ಪ್ರಯೋಜನಗಳನ್ನು ಒದಗಿಸಬೇಕು” ಎಂದು ಆಗ್ರಹಿಸಿದ್ದಾರೆ.
“ಶಿಶು ಹಾಲಿನ ಪರ್ಯಾಯ ಉತ್ಪನ್ನಗಳ ಜಾಹೀರಾತು ಮತ್ತು ಪ್ರಚಾರಕ್ಕೆ ಸಂಬಂಧಿಸಿದ Infant Milk Substitutes (IMS) ಕಾಯ್ದೆಯನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕು. ಆರೋಗ್ಯ ಕೇಂದ್ರಗಳಲ್ಲಿ ಹೆರಿಗೆ ನಂತರದ ಹಾಲೂಡಿಕೆ ಸಲಹೆ ಮತ್ತು ನೆರವು ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುಬೇಕು” ಎಂದೂ ಅವರು ಆಗ್ರಹಿಸಿದ್ದಾರೆ.
“ತಾಯಿಹಾಲು ನೀಡುವ ಪ್ರಮಾಣದ ಕುಸಿತವನ್ನು ಕೇವಲ ತಾಯಂದಿರಲ್ಲಿ ಜಾಗೃತಿ ಕೊರತೆಯಾಗಿ ನೋಡುವುದು ಸಮಸ್ಯೆಯ ಮೂಲವನ್ನು ಮರೆಮಾಚಬಹುದು. ಮಹಿಳೆಯೊಬ್ಬಳು ಹೆರಿಗೆಯಾದ ನಂತರವೂ ಕುಟುಂಬದ ಆದಾಯವನ್ನು ಉಳಿಸಿಕೊಳ್ಳಲು ಕೆಲಸಕ್ಕೆ ಮರಳಬೇಕಾದ ಪರಿಸ್ಥಿತಿ ಇದ್ದರೆ, ಆಕೆಯ ಮುಂದೆ ಆರೋಗ್ಯ ಮತ್ತು ಆರ್ಥಿಕ ಬದುಕಿನ ನಡುವೆ ಆಯ್ಕೆ ಮಾಡುವ ಅನಿವಾರ್ಯತೆ ಎದುರಾಗುತ್ತದೆ. ವಿಶೇಷವಾಗಿ ಅಸಂಘಟಿತ ವಲಯದಲ್ಲಿ ಕೆಲಸ ಮಾಡುವ ಮಹಿಳೆಯರಿಗೆ ಈ ಒತ್ತಡ ಇನ್ನಷ್ಟು ಹೆಚ್ಚಿರುತ್ತದೆ. ವೇತನ ಸಹಿತ ರಜೆ, ಉದ್ಯೋಗ ಭದ್ರತೆ, ಹೆರಿಗೆ ನಂತರದ ಆರೋಗ್ಯ ಸೇವೆ, ಮಗುವನ್ನು ನೋಡಿಕೊಳ್ಳಲು ಸುರಕ್ಷಿತ ಸ್ಥಳ ಮತ್ತು ಕೆಲಸದ ಸ್ಥಳದಲ್ಲಿ ಅಗತ್ಯ ಸೌಲಭ್ಯಗಳು ಇಲ್ಲದಿದ್ದರೆ, ತಾಯಿಗೆ ಮಾತ್ರ ಜವಾಬ್ದಾರಿ ಹೊರಿಸುವುದು ಸಮರ್ಥನೀಯವಲ್ಲ” ಎಂದು ಹೇಳಿದ್ದಾರೆ.
