‘ಹಿಂದೂ ರಾಷ್ಟ್ರ’ ಎಂಬ ಕಲ್ಪನೆಯು ಕೇವಲ ಧರ್ಮ, ಪೂಜಾ ವಿಧಾನ ಅಥವಾ ಜೀವನಶೈಲಿಯನ್ನು ಆಧರಿಸಿಲ್ಲ, ಬದಲಾಗಿ ಅದು ವೈವಿಧ್ಯತೆಯ ಸ್ವೀಕಾರವಾಗಿದೆ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್‌ಎಸ್) ಮುಖ್ಯಸ್ಥ ಮೋಹನ್ ಭಾಗವತ್ ಪ್ರತಿಪಾದಿಸಿದ್ದಾರೆ. ಲಂಡನ್‌ನಲ್ಲಿ ಭಾರತೀಯ ಡಯಾಸ್ಪೊರಾವನ್ನು (ಪ್ರವಾಸಿ ಭಾರತೀಯರು) ಉದ್ದೇಶಿಸಿ ಮಾತನಾಡಿದ ಅವರು, “ಒಗ್ಗಟ್ಟಿಗೆ ಏಕರೂಪತೆಯೇ ಇರಬೇಕೆಂಬ ಅಗತ್ಯವಿಲ್ಲ” ಎಂದು ಸ್ಪಷ್ಟಪಡಿಸಿದರು.
ಆರ್‌ಎಸ್‌ಎಸ್‌ನ ಶತಮಾನೋತ್ಸವ ವರ್ಷದ ಅಂಗವಾಗಿ ಜಾಗತಿಕ ಮಟ್ಟದಲ್ಲಿ ಸಂಘದ ಬಗ್ಗೆ ಮತ್ತು ಅದರ ಕಾರ್ಯವೈಖರಿಯ ಬಗ್ಗೆ ಸರಿಯಾದ ದೃಷ್ಟಿಕೋನವನ್ನು ಮೂಡಿಸುವ ಉದ್ದೇಶದಿಂದ ಭಾಗವತ್ ಅವರು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಲಂಡನ್ ಭೇಟಿಗೂ ಮುನ್ನ ಅವರು ನ್ಯೂಯಾರ್ಕ್ ಮತ್ತು ಟೊರೊಂಟೊ ನಗರಗಳಲ್ಲೂ ಇದೇ ರೀತಿಯ ಕಾರ್ಯಕ್ರಮಗಳಲ್ಲಿ ಪಾಲ್ಗೊಂಡು ಸಂವಾದ ನಡೆಸಿದ್ದರು.
ಕಾರ್ಯಕ್ರಮದ ಪ್ರಶ್ನೋತ್ತರ ಅವಧಿಯಲ್ಲಿ ಹಿಂದೂ ರಾಷ್ಟ್ರ ಮತ್ತು ಹಿಂದುತ್ವದ ಅರ್ಥವನ್ನು ವಿವರಿಸಿದ ಅವರು, “ಯಾವುದೇ ಧಾರ್ಮಿಕ ಆಚರಣೆ ಅಥವಾ ಜೀವನಶೈಲಿಯ ಆಧಾರದ ಮೇಲೆ ‘ಹಿಂದೂ’ ಎಂಬ ಪದವನ್ನು ಅರ್ಥಮಾಡಿಕೊಳ್ಳಲು ಸಾಧ್ಯವಿಲ್ಲ. ಅದು ಒಂದು ಸ್ವಭಾವ. ಎಲ್ಲಾ ರೀತಿಯ ವೈವಿಧ್ಯತೆಗಳನ್ನು ಗೌರವಿಸುವ ಮತ್ತು ಸ್ವೀಕರಿಸುವ ಗುಣವದು” ಎಂದರು. “ನಾಸ್ತಿಕತೆ ಸೇರಿದಂತೆ ಎಲ್ಲಾ ರೀತಿಯ ವಿಚಾರಧಾರೆಗಳು ಭಾರತದಿಂದಲೇ ಬಂದಿವೆ. ಪ್ರತಿಯೊಬ್ಬರ ಹಾದಿಯೂ ಸತ್ಯವೆಂದೇ ಎಲ್ಲರೂ ಹೇಳುತ್ತಾರೆ. ನಾವೆಲ್ಲರೂ ಒಂದೇ ಗುರಿಯನ್ನು ತಲುಪಲಿದ್ದೇವೆ. ಹಾಗಾಗಿ ಒಬ್ಬರನ್ನೊಬ್ಬರು ಮತಾಂತರ ಮಾಡುವ ಅಗತ್ಯವಿಲ್ಲ. ‘ನಾವು ಮಾತ್ರ ಸರಿ’ ಎನ್ನುವುದಲ್ಲ, ‘ನಾವು ಸರಿ, ನೀವು ಕೂಡ ಸರಿ’ ಎನ್ನುವ ಮನೋಭಾವವೇ ಹಿಂದೂತ್ವ” ಎಂದು ಅವರು ವಿವರಿಸಿದರು.
’ನೇಶನ್’ (Nation – ರಾಷ್ಟ್ರ/ರಾಜ್ಯ) ಮತ್ತು ‘ರಾಷ್ಟ್ರ’ (Rashtra) ಪದಗಳ ನಡುವಿನ ವ್ಯತ್ಯಾಸವನ್ನು ವಿಶ್ಲೇಷಿಸಿದ ಭಾಗವತ್, ಭಾಷೆ, ಧರ್ಮ ಅಥವಾ ಆಡಳಿತ ಮಾದರಿಯಂತಹ ಸಮಾನತೆಗಳ ಆಧಾರದ ಮೇಲೆ ಜನರು ಒಗ್ಗೂಡುವ ವ್ಯವಸ್ಥೆ ನೇಶನ್. ಆದರೆ, ‘ರಾಷ್ಟ್ರ’ ಎಂಬುದು ಒಂದು ಸಮಾನ ಉದ್ದೇಶದಿಂದ ವ್ಯಾಖ್ಯಾನಿಸಲ್ಪಡುತ್ತದೆ ಎಂದರು. “ವೈವಿಧ್ಯತೆಯು ನೈಸರ್ಗಿಕ ಮತ್ತು ಏಕತೆಯೇ ಸತ್ಯ ಎಂಬುದನ್ನು ಜಗತ್ತಿಗೆ ಸಾರುವುದೇ ಹಿಂದೂ ರಾಷ್ಟ್ರದ ಉದ್ದೇಶವಾಗಿದೆ. ನಿರಂತರ ದಾಳಿಗಳು ಮತ್ತು ಗುಲಾಮಗಿರಿಯ ನಡುವೆಯೂ ಭಾರತವು ಒಂದು ‘ರಾಷ್ಟ್ರ’ವಾಗಿ ಉಳಿದುಕೊಂಡಿದೆ. ಈ ಹಾದಿಯಲ್ಲಿ ದೇಶ ಮುನ್ನಡೆದರೆ, ಎಂದಿಗೂ ಸರ್ವಾಧಿಕಾರಿಗಳು ಸೃಷ್ಟಿಯಾಗುವುದಿಲ್ಲ ಹಾಗೂ ಯುದ್ಧಗಳು ನಡೆಯುವುದಿಲ್ಲ” ಎಂದು ಅಭಿಪ್ರಾಯಪಟ್ಟರು.
ಇಂದಿನ ಯುವ ಪೀಳಿಗೆಯ ಬಗ್ಗೆ ತಮಗಿರುವ ವಿಶ್ವಾಸವನ್ನು ವ್ಯಕ್ತಪಡಿಸಿದ ಅವರು, “ಭವಿಷ್ಯದ ಪೀಳಿಗೆಯ ಬಗ್ಗೆ ನನಗೆ ಹೆಚ್ಚಿನ ಭರವಸೆ ಇದೆ. ಅವರು ಜಗತ್ತನ್ನು ಉತ್ತಮಗೊಳಿಸುವ ಹಂಬಲ ಹೊಂದಿದ್ದಾರೆ ಮತ್ತು ಅದಕ್ಕಾಗಿ ಸಣ್ಣಪುಟ್ಟ ಭಿನ್ನಾಭಿಪ್ರಾಯಗಳನ್ನು ಬದಿಗೊತ್ತಲು ಸಿದ್ಧರಿದ್ದಾರೆ” ಎಂದರು. ಯುವಕರಿಗೆ ಒಂದು ಗುರಿ ಮತ್ತು ಅಗತ್ಯ ಜ್ಞಾನವನ್ನು ನೀಡಬೇಕು, ಆದರೆ ಕೆಲಸದ ವಿಧಾನವನ್ನು ಅವರ ಮೇಲೆ ಹೇರಬಾರದು. “ಯಾವುದೇ ವಿಧಾನವನ್ನು ಹೇರುವ ಬದಲು ಅವರಿಗೆ ಗುರಿಯನ್ನು ನಿಗದಿಪಡಿಸಿ, ಯುವಕರು ಇತರರಿಗಿಂತ ವೇಗವಾಗಿ ಆ ಗುರಿ ತಲುಪುವ ದಾರಿಯನ್ನು ಕಂಡುಕೊಳ್ಳುತ್ತಾರೆ” ಎಂದು ಸಲಹೆ ನೀಡಿದರು.
ಬ್ರಿಟನ್ ಮತ್ತು ಭಾರತದ ಹಿತಾಸಕ್ತಿಗಳ ನಡುವೆ ಸಂಘರ್ಷ ಏರ್ಪಟ್ಟರೆ ಬ್ರಿಟಿಷ್ ಹಿಂದೂಗಳು ಹೇಗೆ ವರ್ತಿಸಬೇಕು ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, “ಬ್ರಿಟಿಷ್ ಹಿಂದೂಗಳು ‘ಪಕ್ಕಾ ಹಿಂದೂ’ಗಳಾಗಿದ್ದರೆ ಯಾವುದೇ ಸಂಘರ್ಷ ಎದುರಾಗುವುದಿಲ್ಲ. ಒಂದು ವೇಳೆ ಅಂತಹ ಪರಿಸ್ಥಿತಿ ನಿರ್ಮಾಣವಾದರೆ, ಅವರು ಸ್ವಾಭಾವಿಕವಾಗಿ ಬ್ರಿಟನ್ ಪರ ನಿಲ್ಲಬೇಕು. ಏಕೆಂದರೆ, ಹಿಂದುತ್ವವು ನಿಮ್ಮ ‘ಕರ್ಮಭೂಮಿ’ಗೆ ದ್ರೋಹ ಬಗೆಯಲು ಎಂದಿಗೂ ಹೇಳುವುದಿಲ್ಲ” ಎಂದು ಸ್ಪಷ್ಟಪಡಿಸಿದರು. ಒಗ್ಗಟ್ಟಿನ ಕುರಿತು ಮಾತನಾಡಿದ ಅವರು, ನಮ್ಮ ನಡುವಿನ ಭಿನ್ನಾಭಿಪ್ರಾಯಗಳಿಗಿಂತ ನಮ್ಮನ್ನು ಒಗ್ಗೂಡಿಸುವ ಸಮಾನ ಅಂಶಗಳ ಬಗ್ಗೆ ಹೆಚ್ಚು ಒತ್ತು ನೀಡಬೇಕು ಎಂದು ಕರೆ ನೀಡಿದರು.
