ಮದುವೆ ದಿನದಂದು ಬ್ಯಾಂಡ್ ಸೆಟ್ ಕಳುಹಿಸದೆ ವರನ ಕುಟುಂಬವನ್ನು ಪರದಾಡುವಂತೆ ಮಾಡಿದ ಬ್ಯಾಂಡ್ ಮಾಲೀಕನಿಗೆ ಹಿಮಾಚಲ ಪ್ರದೇಶದ ಕಾಂಗ್ರಾ ಜಿಲ್ಲಾ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗವು ಬರೋಬ್ಬರಿ 39,000 ರೂ. ದಂಡ ವಿಧಿಸಿದೆ. ಸೇವಾ ನ್ಯೂನತೆ ಮತ್ತು ಅನುಚಿತ ವ್ಯಾಪಾರ ಪದ್ಧತಿಗಾಗಿ ಈ ದಂಡ ವಿಧಿಸಿ ಜುಲೈ 13ರಂದು ಆದೇಶ ಹೊರಡಿಸಿದೆ.
ದೂರುದಾರರು ತಮ್ಮ ಮಗನ ಮದುವೆಗಾಗಿ ಫೆಬ್ರವರಿ 5, 2026 ರಂದು ಪವನ್ ಕುಮಾರ್ ಎಂಬುವವರಿಂದ ಐದು ಸದಸ್ಯರ ಬ್ರಾಸ್ ಬ್ಯಾಂಡ್ ಅನ್ನು ಬುಕ್ ಮಾಡಿದ್ದರು. ಮದುವೆಗೆ ಒಂದು ತಿಂಗಳ ಮುಂಚೆಯೇ ಒಟ್ಟು 9,000 ರೂ.ಗಳಿಗೆ ಒಪ್ಪಂದ ಮಾಡಿಕೊಂಡು, 4,200 ರೂ.ಗಳನ್ನು ಮುಂಗಡವಾಗಿ (ಅಡ್ವಾನ್ಸ್) ನೀಡಿದ್ದರು.
ಆದರೆ, ಮದುವೆಯ ದಿನದಂದು ಬ್ಯಾಂಡ್ ಸೆಟ್ ಬರಲೇ ಇಲ್ಲ. ದೂರುದಾರರು ಪದೇ ಪದೇ ಕರೆ ಮಾಡಿದಾಗ, ಬ್ಯಾಂಡ್ ದಾರಿಯಲ್ಲಿದೆ ಎಂದು ಹೇಳಿದ ಮಾಲೀಕ, ಸ್ವಲ್ಪ ಸಮಯದ ನಂತರ ಕರೆ ಸ್ವೀಕರಿಸುವುದನ್ನು ನಿಲ್ಲಿಸಿ ಫೋನ್ ಸ್ವಿಚ್ ಆಫ್ ಮಾಡಿಕೊಂಡಿದ್ದನು. ಬ್ಯಾಂಡ್ ಇಲ್ಲದೆ ಮದುವೆ ಮೆರವಣಿಗೆ ನಿಂತುಹೋಗಿದ್ದರಿಂದ, ದೂರುದಾರರು ಅನಿವಾರ್ಯವಾಗಿ ಕೊನೆ ಕ್ಷಣದಲ್ಲಿ 10,000 ರೂ. ಪಾವತಿಸಿ ಬೇರೊಂದು ಬ್ಯಾಂಡ್ ವ್ಯವಸ್ಥೆ ಮಾಡಿದ್ದರು. ಈ ಬಗ್ಗೆ ಅವರು ಸೇವಾ ನ್ಯೂನತೆ ಆರೋಪದಡಿ ಕಾಂಗ್ರಾ ಜಿಲ್ಲಾ ಗ್ರಾಹಕ ವೇದಿಕೆಯ ಮೆಟ್ಟಿಲೇರಿದ್ದರು.
ವಿಚಾರಣೆ ವೇಳೆ ಬ್ಯಾಂಡ್ ಮಾಲೀಕ ಪವನ್ ಕುಮಾರ್ ಗೈರುಹಾಜರಾಗಿದ್ದರಿಂದ ಹಾಗೂ ಯಾವುದೇ ಹಂತದಲ್ಲೂ ನೋಟಿಸ್‌ಗೆ ಪ್ರತಿಕ್ರಿಯಿಸದ ಕಾರಣ ಆಯೋಗವು ಏಕಪಕ್ಷೀಯ ವಿಚಾರಣೆ ನಡೆಸಿತು. ಅಧ್ಯಕ್ಷ ಹೇಮಾಂಶು ಮಿಶ್ರಾ ಹಾಗೂ ಸದಸ್ಯರಾದ ಆರತಿ ಸೂದ್ ಮತ್ತು ನಾರಾಯಣ್ ಠಾಕೂರ್ ಅವರಿದ್ದ ಪೀಠವು ದೂರುದಾರರ ವಾದವನ್ನು ಎತ್ತಿಹಿಡಿಯಿತು. “ಮಾಲೀಕನು ಮುಂಗಡ ಹಣ ಪಡೆದಿದ್ದರೂ ಮದುವೆಯಂತಹ ಶುಭ ಸಂದರ್ಭದಲ್ಲಿ ಭರವಸೆ ನೀಡಿದ್ದ ಬ್ಯಾಂಡ್ ಸೇವೆ ಒದಗಿಸಲು ವಿಫಲವಾಗಿರುವುದು ಗಂಭೀರ ಸೇವಾ ನ್ಯೂನತೆ ಮತ್ತು ಅನುಚಿತ ವ್ಯಾಪಾರ ಪದ್ಧತಿಯಾಗಿದೆ. ದೂರುದಾರರು ಒದಗಿಸಿರುವ ಸಾಕ್ಷ್ಯಗಳನ್ನು ಅವಿಶ್ವಸಿಸಲು ಯಾವುದೇ ಕಾರಣಗಳಿಲ್ಲ” ಎಂದು ಆಯೋಗ ಅಭಿಪ್ರಾಯಪಟ್ಟಿದೆ.
ದೂರುದಾರರು ಪಾವತಿಸಿದ್ದ ಮುಂಗಡ ಹಣ ಮತ್ತು ಕೊನೆ ಕ್ಷಣದಲ್ಲಿ ಮತ್ತೊಂದು ಬ್ಯಾಂಡ್‌ಗೆ ನೀಡಿದ ವೆಚ್ಚ ಸೇರಿ 14,000 ರೂ.ಗಳನ್ನು ಮರುಪಾವತಿಸುವಂತೆ ಮಾಲೀಕನಿಗೆ ಆಯೋಗ ಆದೇಶಿಸಿದೆ. ದೂರು ದಾಖಲಾದ ದಿನದಿಂದ ಈ ಮೊತ್ತ ಪಾವತಿಯಾಗುವವರೆಗೆ ಶೇ. 9ರಷ್ಟು ವಾರ್ಷಿಕ ಬಡ್ಡಿಯನ್ನೂ ನೀಡುವಂತೆ ಸೂಚಿಸಿದೆ. ಜೊತೆಗೆ, ಪರಿಹಾರವಾಗಿ 15,000 ರೂ. ಮತ್ತು ಕಾನೂನು ಹೋರಾಟದ ವೆಚ್ಚವಾಗಿ 10,000 ರೂ. ಸೇರಿ ಒಟ್ಟು 39,000 ರೂ. ಪಾವತಿಸುವಂತೆ ನಿರ್ದೇಶಿಸಿದೆ. ಗ್ರಾಹಕ ಸಂರಕ್ಷಣಾ ಕಾಯ್ದೆಯನ್ವಯ ಈ ಆದೇಶದ ಪ್ರತಿಯನ್ನು ಉಚಿತವಾಗಿ ಎರಡೂ ಕಡೆಯವರಿಗೆ ಒದಗಿಸುವಂತೆಯೂ ಆಯೋಗ ಸೂಚಿಸಿದೆ.
