ಪ್ರಧಾನಿ ನರೇಂದ್ರ ಮೋದಿ ಅವರ ಲೋಕಸಭಾ ಕ್ಷೇತ್ರವಾದ ವಾರಾಣಸಿ ನಡುವೆ ಸಂಪರ್ಕ ಕಲ್ಪಿಸುವ ಚೊಚ್ಚಲ ನೇರ ಹಾಗೂ ಹವಾನಿಯಂತ್ರಿತ (ಎಸಿ) ರೈಲಾದ ‘ಸಂತ ರವಿದಾಸ್ ಎಕ್ಸ್‌ಪ್ರೆಸ್’ಗೆ ಜುಲೈ 17 ರಂದು ಪ್ರಧಾನಿ ನರೇಂದ್ರ ಮೋದಿ ಅವರು ಚಾಲನೆ ನೀಡಲಿದ್ದಾರೆ.
ಈ ಮೂಲಕ ರವಿದಾಸಿಯಾ ಸಮುದಾಯದ ಬಹುಕಾಲದ ಬೇಡಿಕೆಯೊಂದು ಈಡೇರಿದಂತಾಗಿದೆ.15ನೇ ಶತಮಾನದ ಸಂತ ಗುರು ರವಿದಾಸ್ ಅವರ ಜನ್ಮದಿನದ ಪ್ರಯುಕ್ತ ಪ್ರತಿ ವರ್ಷ ಫೆಬ್ರವರಿಯಲ್ಲಿ ಜಲಂಧರ್‌ನಿಂದ ಅವರ ಜನ್ಮಸ್ಥಳವಾದ ವಾರಾಣಸಿಗೆ ‘ಬೇಗಂಪುರ ಎಕ್ಸ್‌ಪ್ರೆಸ್’ ಎಂಬ ವಿಶೇಷ ನಾನ್-ಎಸಿ ರೈಲು ಸಂಚರಿಸುತ್ತಿತ್ತು. ಆದರೆ, ಈ ಮಾರ್ಗದಲ್ಲಿ ಎಸಿ ಸೌಲಭ್ಯವಿರುವ ನೇರ ರೈಲಿಗಾಗಿ ರವಿದಾಸಿಯಾ ಸಮುದಾಯ ಹಲವು ವರ್ಷಗಳಿಂದ ಬೇಡಿಕೆ ಇಟ್ಟಿತ್ತು. ವಾರಾಣಸಿಯ ಸೀರ್ ಗೋವರ್ಧನ್‌ಪುರದಲ್ಲಿ ನಡೆಯಲಿರುವ ಗುರು ರವಿದಾಸ್ ಅವರ 650ನೇ ಪ್ರಕಾಶ್ ಪುರಬ್ (ಜನ್ಮದಿನಾಚರಣೆ) ಹಿನ್ನೆಲೆಯಲ್ಲಿ ಈ ಹೊಸ ರೈಲು ಸೇವೆ ಆರಂಭವಾಗುತ್ತಿದೆ.
ಇತ್ತೀಚೆಗಷ್ಟೇ ಪ್ರಧಾನಿ ಮೋದಿ ಅವರು ಪ್ರಭಾವಿ ಡೇರಾ ಸಚ್‌ಖಂಡ್ ಬಲ್ಲನ್‌ನ ಮುಖ್ಯಸ್ಥರಾದ ಸಂತ ನಿರಂಜನ್ ದಾಸ್ ಅವರನ್ನು ಭೇಟಿಯಾದ ಬೆನ್ನಲ್ಲೇ ಈ ಮಹತ್ವದ ಬೆಳವಣಿಗೆ ನಡೆದಿದೆ.ಜುಲೈ 17 ರಂದು ಮಧ್ಯಾಹ್ನ 3.40ಕ್ಕೆ ಜಲಂಧರ್ ಕಂಟೋನ್ಮೆಂಟ್‌ನಿಂದ ಪ್ರಧಾನಿ ಮೋದಿಯವರು ನೂತನ ರೈಲಿಗೆ ಹಸಿರು ನಿಶಾನೆ ತೋರಲಿದ್ದಾರೆ. 18 ಬೋಗಿಗಳನ್ನು ಹೊಂದಿರುವ ಈ ಎಕ್ಸ್‌ಪ್ರೆಸ್ ರೈಲು ಅಮೃತಸರ (ಛೇಹರ್ತಾ) ಮತ್ತು ವಾರಾಣಸಿ ನಡುವೆ ಒಟ್ಟು 1,048.33 ಕಿ.ಮೀ ದೂರವನ್ನು ಕ್ರಮಿಸಲಿದೆ.
ವಾರದಲ್ಲಿ ಮೂರು ದಿನ ಅಂದರೆ ಬುಧವಾರ, ಶುಕ್ರವಾರ ಮತ್ತು ಭಾನುವಾರಗಳಂದು ಸಂಚರಿಸಲಿದ್ದು, ಮರುದಿನ ವಾಪಸಾಗಲಿದೆ. ಮಾರ್ಗಮಧ್ಯೆ ಅಮೃತಸರ, ಜಲಂಧರ್, ಲುಧಿಯಾನ, ಅಂಬಾಲಾ ಕ್ಯಾಂಟ್, ಸಹರಾನ್‌ಪುರ, ಮೊರಾದಾಬಾದ್, ಬರೇಲಿ, ಶಹಜಹಾನ್‌ಪುರ, ಲಕ್ನೋ, ಸುಲ್ತಾನ್‌ಪುರ, ಜೌನ್‌ಪುರ ಸಿಟಿ ಮತ್ತು ವಾರಾಣಸಿ ಸೇರಿದಂತೆ 12 ನಿಲ್ದಾಣಗಳಲ್ಲಿ ಈ ರೈಲು ತಂಗಲಿದೆ. ಈ ರೈಲಿನಲ್ಲಿ ಮೂರು ಎಸಿ ಬೋಗಿಗಳು (ಎರಡು ಎಸಿ 3-ಟೈರ್ ಮತ್ತು ಒಂದು ಎಸಿ 2-ಟೈರ್), ಆರು ದ್ವಿತೀಯ ದರ್ಜೆಯ ಸಾಮಾನ್ಯ ಬೋಗಿಗಳು ಹಾಗೂ ಏಳು ವೆಸ್ಟಿಬ್ಯೂಲ್ಡ್ ಸೆಕೆಂಡ್-ಕ್ಲಾಸ್ 3-ಟೈರ್ ಸ್ಲೀಪರ್ ಬೋಗಿಗಳನ್ನು ಅಳವಡಿಸಲಾಗಿದೆ.
ಪಂಜಾಬ್‌ನ ಒಟ್ಟು ಜನಸಂಖ್ಯೆಯಲ್ಲಿ ದಲಿತರು ಶೇ 41 ರಿಂದ 42 ರಷ್ಟಿದ್ದು, ಅದರಲ್ಲಿ ರವಿದಾಸಿಯಾ ಸಮುದಾಯವು (ಮುಖ್ಯವಾಗಿ ದೋವಾಬಾ ಭಾಗದಲ್ಲಿ ಕೇಂದ್ರೀಕೃತವಾಗಿದೆ) ರಾಜ್ಯದ ದಲಿತ ಜನಸಂಖ್ಯೆಯ ಶೇ 31 ರಿಂದ 32 ರಷ್ಟಿದೆ. 2027ರ ಪಂಜಾಬ್ ವಿಧಾನಸಭಾ ಚುನಾವಣೆಯ ಹೊತ್ತಿಗೆ ಸಂತರ 650ನೇ ಜನ್ಮದಿನಾಚರಣೆ ನಡೆಯಲಿದೆ. ರಾಜ್ಯದ ದಲಿತ ಸಮುದಾಯದಲ್ಲಿ ಗಣನೀಯ ಪ್ರಭಾವ ಹೊಂದಿರುವ ಈ ಸಮುದಾಯವನ್ನು ಮತ್ತು ಡೇರಾವನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳುವ ನಿಟ್ಟಿನಲ್ಲಿ ಈ ರೈಲು ಸೇವೆ ರಾಜಕೀಯವಾಗಿಯೂ ತೀವ್ರ ಮಹತ್ವ ಪಡೆದುಕೊಂಡಿದೆ.
