ಸಂಸತ್ತಿನಲ್ಲಿ ಲೋಕಸಭೆ ಹಾಗೂ ರಾಜ್ಯಸಭೆ ಸದಸ್ಯರಾಗಿರುವ ಸಂಸದರಲ್ಲಿ ಶೇ.40ಕ್ಕೂ ಹೆಚ್ಚು ಮಂದಿ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ ದಾಖಲಾಗಿದ್ದು, ಈ ಪೈಕಿ ಶೇ.25ರಷ್ಟು ಮಂದಿ ಕೊಲೆ, ಕೊಲೆ ಯತ್ನ, ಅಪಹರಣ ಮತ್ತು ಮಹಿಳೆಯರ ವಿರುದ್ಧದ ಅಪರಾಧಗಳ ಅಡಿಯಲ್ಲಿ ಗಂಭೀರ ಕ್ರಿಮಿನಲ್ ಪ್ರಕರಣಗಳನ್ನು ಘೋಷಿಸಿದ್ದಾರೆ ಎಂದು ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ (ಎಡಿಆರ್) ವರದಿ ಬಹಿರಂಗಪಡಿಸಿದೆ.
ಅಲ್ಲದೆ ಲೋಕಸಭೆ ಮತ್ತು ರಾಜ್ಯಸಭೆಯ ಪ್ರತಿ ಸಂಸದರ ಆಸ್ತಿಯ ಸರಾಸರಿ ಮೌಲ್ಯ 38.33 ಕೋಟಿ ರೂ. ಇದೆ. ಮತ್ತು 53 (ಶೇ. 7) ಮಂದಿ ಶತ ಕೋಟ್ಯಾಧೀಶರು ಇದ್ದಾರೆ ಎಂದು ವರದಿ ಹೇಳಿದೆ.
ಲೋಕಸಭೆ ಮತ್ತು ರಾಜ್ಯಸಭೆಯ 776 ಸ್ಥಾನಗಳ ಪೈಕಿ 763 ಹಾಲಿ ಸಂಸದರ ಚುನಾವಣಾ ಅಫಿಡವಿಟ್‌ಗಳನ್ನು ಎಡಿಆರ್ ವರದಿ ವಿಶ್ಲೇಷಿಸಿದೆ.
763 ಹಾಲಿ ಸಂಸದರ ಪೈಕಿ 306 (ಶೇ.40) ಹಾಲಿ ಸಂಸದರು ತಮ್ಮ ವಿರುದ್ಧ ಕ್ರಿಮಿನಲ್ ಮೊಕದ್ದಮೆಗಳನ್ನು ಘೋಷಿಸಿದ್ದಾರೆ. 194 (ಶೇ. 25) ಹಾಲಿ ಸಂಸದರು ಕೊಲೆ, ಕೊಲೆ ಯತ್ನ, ಅಪಹರಣ, ಮಹಿಳೆಯರ ವಿರುದ್ಧದ ಅಪರಾಧಗಳು ಸೇರಿದಂತೆ ಗಂಭೀರ ಕ್ರಿಮಿನಲ್ ಮೊಕದ್ದಮೆಗಳನ್ನು ಘೋಷಿಸಿದ್ದಾರೆ ಎಂದು ವರದಿ ತಿಳಿಸಿದೆ.
ಕೇರಳದ 29 ಸಂಸದರಲ್ಲಿ 23 (ಶೇ. 79) ತಮ್ಮ ವಿರುದ್ಧ ಇರುವ ಪ್ರಕರಣಗಳನ್ನು ಘೋಷಿಸಿದ್ದಾರೆ. ಬಿಹಾರದಲ್ಲಿ 56 ಸಂಸದರಲ್ಲಿ 41 (ಶೇ. 73) ಮಂದಿಯ ವಿರುದ್ಧ ಕ್ರಿಮಿನಲ್ ಪ್ರಕರಣಗಳು ದಾಖಲಾಗಿವೆ. ಮಹಾರಾಷ್ಟ್ರದ 65 ಸಂಸದರಲ್ಲಿ 37 (ಶೇ. 57), ತೆಲಂಗಾಣದಲ್ಲಿ 24 ಸಂಸದರಲ್ಲಿ 13 (ಶೇ. 54) ಮತ್ತು ದೆಹಲಿಯಲ್ಲಿ 10 ಸಂಸದರಲ್ಲಿ 5 (ಶೇ. 50) ಕ್ರಿಮಿನಲ್ ಪ್ರಕರಣಗಳು ದಾಖಲಾಗಿರುವ ಬಗ್ಗೆ ತಮ್ಮ ಅಫಿಡವಿಟ್‌ಗಳಲ್ಲಿ ಬಹಿರಂಗವಾಗಿವೆ.
ಈ ಸುದ್ದಿ ಓದಿದ್ದೀರಾ? ಕೋಟಾ: ನೀಟ್‌ ಪರೀಕ್ಷೆಗೆ ತಯಾರಿ ನಡೆಸುತ್ತಿದ್ದ 16 ವರ್ಷದ ವಿದ್ಯಾರ್ಥಿನಿ ಆತ್ಮಹತ್ಯೆ; ಈ ವರ್ಷದಲ್ಲಿ 25ನೇ ಘಟನೆ
ಕ್ರಿಮಿನಲ್ ಪ್ರಕರಣಗಳ ವಿಷಯಕ್ಕೆ ಬಂದರೆ, ಬಿಜೆಪಿಯ 385 ಸಂಸದರಲ್ಲಿ ಸುಮಾರು 139 (ಶೇ. 36), ಕಾಂಗ್ರೆಸ್‌ನ 81 ಸಂಸದರಲ್ಲಿ 43 (ಶೇ 53), ಟಿಎಂಸಿಯ 36 ಸಂಸದರಲ್ಲಿ 14 (ಶೇ 39), ಆರ್‌ಜೆಡಿಯ 6 ಸಂಸದರಲ್ಲಿ 5 (ಶೇ.83), ಸಿಪಿಎಂನ 8 ಸಂಸದರಲ್ಲಿ 6 (ಶೇ. 75), ಎಎಪಿಯ 11 ಸಂಸದರಲ್ಲಿ 3 (ಶೇ. 27), ವೈಎಸ್‌ಆರ್‌ಸಿಪಿಯ 31 ಸಂಸದರಲ್ಲಿ 13 (ಶೇ 42) ಮತ್ತು ಎನ್‌ಸಿಪಿಯ 8 ಸಂಸದರ ಪೈಕಿ 3 (ಶೇ 38) ತಮ್ಮ ವಿರುದ್ಧ ಇಂತಹ ಪ್ರಕರಣಗಳಿವೆ ಎಂದು ಘೋಷಿಸಿಕೊಂಡಿದ್ದಾರೆ.
ಗಂಭೀರ ಅಪರಾಧ ಪ್ರಕರಣಗಳಿಗೆ ಸಂಬಂಧಿಸಿದಂತೆ, ಬಿಜೆಪಿಯ 385 ಸಂಸದರಲ್ಲಿ ಸುಮಾರು 98 (ಶೇ 25), ಕಾಂಗ್ರೆಸ್‌ನ 81 ಸಂಸದರಲ್ಲಿ 26 (ಶೇ 32), ಟಿಎಂಸಿಯ 36 ಸಂಸದರಲ್ಲಿ 7 (ಶೇ 19), 3 (ಶೇ 50) ಆರ್‌ಜೆಡಿಯಿಂದ 6 ಸಂಸದರು, ಸಿಪಿಎಂನ 8 ಸಂಸದರಲ್ಲಿ 2 (ಶೇ 25), ಎಎಪಿಯ 11 ಸಂಸದರಲ್ಲಿ 1 (ಶೇ 9), ವೈಎಸ್‌ಆರ್‌ಸಿಪಿಯಿಂದ 31 ಸಂಸದರಲ್ಲಿ 11 (ಶೇ 35) ಮತ್ತು ಎನ್‌ಸಿಪಿಯ 8 ಸಂಸದರಲ್ಲಿ 2 (ಶೇ 25) ಇಂತಹ ಪ್ರಕರಣಗಳನ್ನು ಎದುರಿಸುತ್ತಿದ್ದಾರೆ.
ಹನ್ನೊಂದು ಹಾಲಿ ಸಂಸದರು ಕೊಲೆಗೆ ಸಂಬಂಧಿಸಿದ ಪ್ರಕರಣಗಳನ್ನು ಘೋಷಿಸಿದ್ದಾರೆ. 32 ಹಾಲಿ ಸಂಸದರು ಕೊಲೆ ಯತ್ನ ಪ್ರಕರಣಗಳು, 21 ಹಾಲಿ ಸಂಸದರು ಮಹಿಳೆಯರ ವಿರುದ್ಧದ ಅಪರಾಧಗಳಿಗೆ ಸಂಬಂಧಿಸಿದ ಪ್ರಕರಣಗಳನ್ನು ಘೋಷಿಸಿದ್ದಾರೆ. ಈ 21 ಸಂಸದರ ಪೈಕಿ ನಾಲ್ವರು ಸಂಸದರು ಅತ್ಯಾಚಾರ ಪ್ರಕರಣಗಳನ್ನು ಘೋಷಿಸಿದ್ದಾರೆ.
ಉಭಯ ಸದನಗಳ ಪ್ರತಿ ಸಂಸದರ ಸರಾಸರಿ ಆಸ್ತಿ ಮೌಲ್ಯ 38.33 ಕೋಟಿ ರೂಪಾಯಿ ಎಂದು ವರದಿ ಹೇಳಿದೆ. ತಮ್ಮ ವಿರುದ್ಧ ಕ್ರಿಮಿನಲ್ ಮೊಕದ್ದಮೆಗಳನ್ನು ಘೋಷಿಸಿರುವ ಸಂಸದರ ಸರಾಸರಿ ಆಸ್ತಿ 50.03 ಕೋಟಿ ರೂ. ಇದೆ ಎಂದು ವರದಿ ಹೇಳಿದೆ.
53 ಶತ ಕೋಟಿ ಸಂಸದರಲ್ಲಿ ತೆಲಂಗಾಣದ ಏಳು, ಆಂಧ್ರಪ್ರದೇಶದ ಒಂಬತ್ತು, ದೆಹಲಿಯ ಇಬ್ಬರು, ಪಂಜಾಬ್‌ನಿಂದ ನಾಲ್ವರು, ಉತ್ತರಾಖಂಡದಿಂದ ಒಬ್ಬರು, ಮಹಾರಾಷ್ಟ್ರದಿಂದ ಆರು ಮತ್ತು ಕರ್ನಾಟಕದ ಮೂವರು ಸೇರಿದ್ದಾರೆ.
ಪಕ್ಷಗಳ ಪ್ರಕಾರ ಶತ ಕೋಟಿ ಸಂಸದರಲ್ಲಿ ಬಿಜೆಪಿಯ ಹದಿನಾಲ್ಕು, ಭಾರತ್ ರಾಷ್ಟ್ರ ಸಮಿತಿ ಮತ್ತು ವೈಎಸ್‌ಆರ್ ಕಾಂಗ್ರೆಸ್ ಪಕ್ಷದ ತಲಾ ಏಳು, ಕಾಂಗ್ರೆಸ್‌ನಿಂದ ಆರು, ಎಎಪಿಯಿಂದ ಮೂರು, ಶಿರೋಮಣಿ ಅಕಾಲಿದಳದಿಂದ ಇಬ್ಬರು ಮತ್ತು ತೃಣಮೂಲ ಕಾಂಗ್ರೆಸ್‌ನ ಒಬ್ಬರು 100 ಕೋಟಿ ರೂ.ಗೂ ಅಧಿಕ ಮೌಲ್ಯದ ಆಸ್ತಿ ಘೋಷಿಸಿದ್ದಾರೆ.
