ವೆನೆಜುವೆಲಾದ ಅಧ್ಯಕ್ಷ ನಿಕೋಲಸ್ ಮಡುರೊ ಅವರನ್ನು ಅಮೆರಿಕದ ಪಡೆಗಳು ಬಂಧಿಸಿದ ನಂತರ, ಅಲ್ಲಿನ ಹಂಗಾಮಿ ಅಧ್ಯಕ್ಷೆಯಾಗಿ ಡೆಲ್ಸಿ ರೊಡ್ರಿಗಸ್ ಅವರನ್ನು ತಂದಾಗ ತಾನು ಹೇಗೆ ಪಾತ್ರ ವಹಿಸಿದ್ದೆನೋ, ಅದೇ ರೀತಿ ಇರಾನ್ ನಾಯಕನ ಆಯ್ಕೆಯಲ್ಲೂ ತಾನು ಪ್ರಮುಖ ಪಾತ್ರ ವಹಿಸಬೇಕಾಗಿದೆ ಎಂದಿದ್ದಾರೆ. ಇದು ಅಮೆರಿಕವು ಜಾಗತಿಕ ಮಟ್ಟದಲ್ಲಿ ಇತರ ರಾಷ್ಟ್ರಗಳ ಸಾರ್ವಭೌಮತೆಯನ್ನು ಹೇಗೆ ಕಾಲಕೆಳಗೆ ಹಾಕಿ ಹೊಸಕಿ ಹಾಕುತ್ತದೆ ಎಂಬುದಕ್ಕೆ ಸ್ಪಷ್ಟ ನಿದರ್ಶನವಾಗಿದೆ
ಇತ್ತೀಚೆಗಷ್ಟೇ ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ಜಂಟಿ ವೈಮಾನಿಕ ದಾಳಿಯಲ್ಲಿ ಇರಾನ್‌ನ ಸರ್ವೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಹತ್ಯೆಯಾದ ಬೆನ್ನಲ್ಲೇ, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ತೀರಾ ಉದ್ದಟತನದ ಮತ್ತು ಪ್ರಜಾಪ್ರಭುತ್ವ ವಿರೋಧಿ ಹೇಳಿಕೆಯೊಂದನ್ನು ನೀಡಿದ್ದಾರೆ. ಇರಾನ್‌ನ ಮುಂದಿನ ಸರ್ವೋಚ್ಚ ನಾಯಕನ ಆಯ್ಕೆಯ ಪ್ರಕ್ರಿಯೆಯಲ್ಲಿ ತಾನು ಖುದ್ದಾಗಿ ಭಾಗಿಯಾಗಬೇಕು ಮತ್ತು ಅಮೆರಿಕದ ಪಾತ್ರ ಅದರಲ್ಲಿ ಇರಲೇಬೇಕು ಎಂದು ಅವರು ಆಗ್ರಹಿಸಿದ್ದಾರೆ. ಒಂದು ಸ್ವತಂತ್ರ ರಾಷ್ಟ್ರದ ಆಂತರಿಕ ವಿಚಾರದಲ್ಲಿ ನೇರವಾಗಿ ಹಸ್ತಕ್ಷೇಪ ಮಾಡಲು ಹೊರಟಿರುವ ಅಮೆರಿಕದ ಈ ನಡೆಯು ಅದರ ಸಾಮ್ರಾಜ್ಯಶಾಹಿ ಮತ್ತು ದಬ್ಬಾಳಿಕೆಯ ಮನಸ್ಥಿತಿಯನ್ನು ಮತ್ತೊಮ್ಮೆ ಜಗತ್ತಿನೆದುರು ಬೆತ್ತಲು ಮಾಡಿದೆ.
ಮಾಧ್ಯಮಗಳಿಗೆ ನೀಡಿದ ಸಂದರ್ಶನದಲ್ಲಿ ಈ ಕಮರಿಹೋದ ಪ್ರಜಾಸತ್ತಾತ್ಮಕ ಮೌಲ್ಯಗಳ ಹೇಳಿಕೆಯನ್ನು ನೀಡಿರುವ ಟ್ರಂಪ್, ಇರಾನ್ ಮೇಲೆ ಬಾಂಬ್ ಮಳೆ ಸುರಿಸುತ್ತಲೇ ಅಲ್ಲಿನ ಭವಿಷ್ಯವನ್ನು ತಾನೇ ಬರೆಯುವುದಾಗಿ ಅಹಂಕಾರ ಪ್ರದರ್ಶಿಸಿದ್ದಾರೆ.
ಹತ್ಯೆಯಾಗಿರುವ ಅಲಿ ಖಮೇನಿ ಅವರ 56 ವರ್ಷದ ಪುತ್ರ ಮೊಜ್ತಬಾ ಖಮೇನಿ ಮುಂದಿನ ನಾಯಕನಾಗುವ ಸಾಧ್ಯತೆಗಳಿದ್ದು, ಇದನ್ನು ಟ್ರಂಪ್ ಸಾರಾಸಗಟಾಗಿ ತಿರಸ್ಕರಿಸಿದ್ದಾರೆ. ಮೊಜ್ತಬಾ ಅವರನ್ನು ಅತ್ಯಂತ ದುರ್ಬಲ ವ್ಯಕ್ತಿ ಎಂದು ಜರಿದಿರುವ ಟ್ರಂಪ್, ಆತನ ಆಯ್ಕೆ ಅಮೆರಿಕಕ್ಕೆ ಖಂಡಿತಾ ಒಪ್ಪಿಗೆಯಾಗುವುದಿಲ್ಲ ಎಂದು ಎಚ್ಚರಿಸಿದ್ದಾರೆ. ಹಳೆಯ ನಾಯಕನ ನೀತಿಗಳನ್ನೇ ಮುಂದುವರಿಸುವ ಯಾವುದೇ ವ್ಯಕ್ತಿಯನ್ನು ನಾಯಕನನ್ನಾಗಿ ಒಪ್ಪಿಕೊಳ್ಳಲು ಸಾಧ್ಯವಿಲ್ಲ, ಹಾಗೊಂದು ವೇಳೆ ಆದರೆ ಮುಂದಿನ ಐದು ವರ್ಷಗಳಲ್ಲಿ ಅಮೆರಿಕ ಮತ್ತೆ ಇರಾನ್ ವಿರುದ್ಧ ಯುದ್ಧ ಮಾಡಬೇಕಾಗುತ್ತದೆ ಎಂದು ಬೆದರಿಕೆ ಹಾಕಿದ್ದಾರೆ.
ಇರಾನ್‌ಗೆ ಶಾಂತಿ ಮತ್ತು ಸಾಮರಸ್ಯ ತರುವಂತಹ ನಾಯಕನ ಅಗತ್ಯವಿದೆ ಎಂದು ಹೇಳುವ ಮೂಲಕ, ವಾಸ್ತವದಲ್ಲಿ ಅಮೆರಿಕದ ತಾಳಕ್ಕೆ ತಕ್ಕಂತೆ ಕುಣಿಯುವ ಕೈಗೊಂಬೆ ನಾಯಕನೊಬ್ಬನನ್ನು ಇರಾನ್‌ನ ಗದ್ದುಗೆಯ ಮೇಲೆ ಕೂರಿಸುವ ತನ್ನ ಕುತಂತ್ರದ ಉದ್ದೇಶವನ್ನು ಟ್ರಂಪ್ ಪರೋಕ್ಷವಾಗಿ ಹೊರಹಾಕಿದ್ದಾರೆ.
ಇದನ್ನು ಓದಿದ್ದೀರಾ? ಪಶ್ಚಿಮ ಏಷ್ಯಾದಲ್ಲಿ ಅಮೆರಿಕದ ವಿನಾಶಕಾರಿ ನೀತಿ, ಭಾರತೀಯ ವಿಮಾನಯಾನಕ್ಕೆ ದುಃಸ್ವಪ್ನ
ತಮ್ಮ ಈ ಹಸ್ತಕ್ಷೇಪದ ನೀತಿಯನ್ನು ಸಮರ್ಥಿಸಿಕೊಳ್ಳಲು ಟ್ರಂಪ್, ವೆನೆಜುವೆಲಾದ ಉದಾಹರಣೆಯನ್ನು ನೀಡಿದ್ದಾರೆ. ವೆನೆಜುವೆಲಾದ ಅಧ್ಯಕ್ಷ ನಿಕೋಲಸ್ ಮಡುರೊ ಅವರನ್ನು ಅಮೆರಿಕದ ಪಡೆಗಳು ಬಂಧಿಸಿದ ನಂತರ, ಅಲ್ಲಿನ ಹಂಗಾಮಿ ಅಧ್ಯಕ್ಷೆಯಾಗಿ ಡೆಲ್ಸಿ ರೊಡ್ರಿಗಸ್ ಅವರನ್ನು ತಂದಾಗ ತಾನು ಹೇಗೆ ಪಾತ್ರ ವಹಿಸಿದ್ದೆನೋ, ಅದೇ ರೀತಿ ಇರಾನ್ ನಾಯಕನ ಆಯ್ಕೆಯಲ್ಲೂ ತಾನು ಪ್ರಮುಖ ಪಾತ್ರ ವಹಿಸಬೇಕಾಗಿದೆ ಎಂದಿದ್ದಾರೆ. ಇದು ಅಮೆರಿಕವು ಜಾಗತಿಕ ಮಟ್ಟದಲ್ಲಿ ಇತರ ರಾಷ್ಟ್ರಗಳ ಸಾರ್ವಭೌಮತೆಯನ್ನು ಹೇಗೆ ಕಾಲಕೆಳಗೆ ಹಾಕಿ ಹೊಸಕಿ ಹಾಕುತ್ತದೆ ಎಂಬುದಕ್ಕೆ ಸ್ಪಷ್ಟ ನಿದರ್ಶನವಾಗಿದೆ. ಯಾವುದೇ ದೇಶದ ನಾಯಕನನ್ನು ಆರಿಸುವ ಹಕ್ಕು ಆ ದೇಶದ ಜನರಿಗೆ ಮತ್ತು ಅಲ್ಲಿನ ವ್ಯವಸ್ಥೆಗೆ ಸೇರಿದ್ದೇ ವಿನಃ, ಶಸ್ತ್ರಾಸ್ತ್ರಗಳ ಬಲದಿಂದ ಬೇರೊಂದು ದೇಶದ ಮೇಲೆ ಸವಾರಿ ಮಾಡುವ ಅಮೆರಿಕದಂತಹ ರಾಷ್ಟ್ರಕ್ಕಲ್ಲ.
ಶಾಂತಿಯ ಮಾತುಗಳನ್ನಾಡುವ ಅಮೆರಿಕದ ನೈಜ ಮುಖವಾಡವು ಇರಾನ್ ಮತ್ತು ಮಧ್ಯಪ್ರಾಚ್ಯದಲ್ಲಿ ಅದು ಸೃಷ್ಟಿಸಿರುವ ರಕ್ತಪಾತದಿಂದ ಬಯಲಾಗುತ್ತದೆ. ಕಳೆದ ಕೆಲವು ದಿನಗಳಿಂದ ಇಸ್ರೇಲ್ ಜೊತೆಗೂಡಿ ಅಮೆರಿಕ ನಡೆಸುತ್ತಿರುವ ಭೀಕರ ದಾಳಿಯಿಂದಾಗಿ ಇರಾನ್‌ನಲ್ಲಿ ಈಗಾಗಲೇ 1,230 ಕ್ಕೂ ಹೆಚ್ಚು ಅಮಾಯಕ ಜೀವಗಳು ಬಲಿಯಾಗಿವೆ ಹಾಗೂ ಲೆಬನಾನ್‌ನಲ್ಲಿ ನೂರಕ್ಕೂ ಹೆಚ್ಚು ಜನ ಪ್ರಾಣ ಕಳೆದುಕೊಂಡಿದ್ದಾರೆ. ಇಷ್ಟೊಂದು ಭಾರಿ ಪ್ರಮಾಣದ ಸಾವು-ನೋವುಗಳಿಗೆ ಕಾರಣವಾಗಿರುವ ಅಮೆರಿಕದ ಅಧ್ಯಕ್ಷರು, ಇದೀಗ ನಾಚಿಕೆಯಿಲ್ಲದೆ ಶಾಂತಿ ಮತ್ತು ಸಾಮರಸ್ಯದ ಬಗ್ಗೆ ಮಾತನಾಡುವುದು ವಿಪರ್ಯಾಸವೇ ಸರಿ. ತಮ್ಮ ಸೇನಾ ಬಲವನ್ನು ಉಪಯೋಗಿಸಿಕೊಂಡು ಇಡೀ ಮಧ್ಯಪ್ರಾಚ್ಯವನ್ನು ಅಸ್ಥಿರಗೊಳಿಸುವುದು ಮತ್ತು ತಮಗೆ ಬೇಕಾದವರನ್ನು ಅಧಿಕಾರಕ್ಕೆ ತರುವುದು ಅಮೆರಿಕದ ದಶಕಗಳ ಹಳೆಯ ರಕ್ತಸಿಕ್ತ ಇತಿಹಾಸವಾಗಿದೆ.
ಅಮೆರಿಕದ ಈ ಬೆದರಿಕೆಗಳಿಗೆ ಇರಾನ್ ಕೂಡ ತೀಕ್ಷ್ಣವಾಗಿಯೇ ಪ್ರತಿಕ್ರಿಯಿಸಿದೆ. ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಗ್ಚಿ ಅವರು ಟ್ರಂಪ್ ಅವರ ಈ ನಡೆಯನ್ನು ಟೀಕಿಸಿದ್ದು, ಇರಾನ್ ಅನ್ನು ಮಣಿಸುವ ಅಮೆರಿಕದ ಯೋಜನೆ ವಿಫಲವಾಗಿದೆ ಎಂದು ತಿರುಗೇಟು ನೀಡಿದ್ದಾರೆ. ಇವೆಲ್ಲವನ್ನು ಗಮನಿಸಿದರೆ, ಇರಾನ್‌ನ ಮುಂದಿನ ನಾಯಕನ ಆಯ್ಕೆಯಲ್ಲಿ ತನ್ನದೇ ನಿರ್ಧಾರ ಅಂತಿಮವಾಗಬೇಕು ಎಂಬ ಟ್ರಂಪ್ ಹೇಳಿಕೆಯು ಅಂತಾರಾಷ್ಟ್ರೀಯ ಕಾನೂನುಗಳ ಸ್ಪಷ್ಟ ಉಲ್ಲಂಘನೆಯಾಗಿದೆ. ಪ್ರಜಾಪ್ರಬುತ್ವದ ದೊಡ್ಡ ಪ್ರತಿಪಾದಕನಂತೆ ತನ್ನನ್ನು ತಾನು ಹೇಳಿಕೊಳ್ಳುವ ಅಮೆರಿಕ ವಾಸ್ತವದಲ್ಲಿ ತನ್ನ ಹಿತಾಸಕ್ತಿಗಳಿಗಾಗಿ ಇತರ ರಾಷ್ಟ್ರಗಳ ಸ್ವಾತಂತ್ರ್ಯವನ್ನು ಕಸಿದುಕೊಳ್ಳುವ ಜಾಗತಿಕ ಮಟ್ಟದ ದೊಣ್ಣೆ ನಾಯಕನಂತೆ ವರ್ತಿಸುತ್ತಿದೆ ಎಂಬುದು ಈ ಘಟನಾವಳಿಗಳು ಸಾಬೀತುಪಡಿಸಿವೆ.
