ಅಮೆರಿಕ ವಿಧಿಸಬಹುದಾದ ಆರ್ಥಿಕ ನಿರ್ಬಂಧಗಳ ಭೀತಿಯಿಂದಾಗಿ, ಇರಾನ್ ಜತೆಗಿನ ನೇರ ವಿಮಾನಗಳ ಸಂಚಾರಕ್ಕೆ ಭಾರತ ಸರ್ಕಾರ ಅನುಮತಿ ನಿರಾಕರಿಸಿದೆ. ಪರಿಣಾಮವಾಗಿ, ಇರಾನ್ ದೇಶವು ಭಾರತದಲ್ಲಿ ಈಗಾಗಲೇ ಖರೀದಿಸಿ ಸಿದ್ಧವಾಗಿಟ್ಟುಕೊಂಡಿರುವ ಜೀವ ರಕ್ಷಕ ಔಷಧಗಳನ್ನು ತನ್ನ ದೇಶಕ್ಕೆ ಸಾಗಿಸಲು ಆಗಸ್ಟ್‌ನಿಂದಲೂ ಸಾಧ್ಯವಾಗಿಲ್ಲ. ಔಷಧ ಸಾಗಣೆಗೆ ನಿಗದಿತ ಸರಕು ಸಾಗಣೆ (ಕಾರ್ಗೋ) ವಿಮಾನಗಳಿಗೆ ಮಾತ್ರವಲ್ಲದೆ, ಸಾಮಾನ್ಯ ಪ್ರಯಾಣಿಕರ ವಿಮಾನಗಳ ಮೂಲಕವೂ ಔಷಧಗಳನ್ನು ಕೊಂಡೊಯ್ಯಲು ಇರಾನ್ ಸಿದ್ಧವಿದ್ದರೂ, ಭಾರತದ ನಾಗರಿಕ ವಿಮಾನಯಾನ ಸಚಿವಾಲಯ ಅನುಮತಿ ನೀಡಲು ಹಿಂದೇಟು ಹಾಕುತ್ತಿದೆ ಎಂದು ವರದಿಯಾಗಿದೆ.
ಅಕ್ಟೋಬರ್ 19 ರಂದು ಟೆಹ್ರಾನ್‌ನಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಇರಾನ್ ಏರ್ ಮ್ಯಾನೇಜಿಂಗ್ ಡೈರೆಕ್ಟರ್ ತಾಹೆರ್ ಅಬ್ದುಲ್ಹಾಯ್ ಅವರು ಈ ಕುರಿತು ಮಾಹಿತಿ ಹಂಚಿಕೊಂಡಿದ್ದಾರೆ. “ಭಾರತ ಮತ್ತು ಸಿಂಗಾಪುರದಿಂದ ಔಷಧಗಳನ್ನು ಸಾಗಿಸಲು ತಮಗೆ ಅನುಮತಿ ಸಿಗುತ್ತಿಲ್ಲ. ಮುಂಬೈನಿಂದ ಹೊರಡುವ ಪ್ರಯಾಣಿಕರ ವಿಮಾನದಲ್ಲೇ ಔಷಧದ ಕಾರ್ಗೋವನ್ನು ತೆಗೆದುಕೊಂಡು ಹೋಗುವುದಾಗಿ ಪ್ರಸ್ತಾಪಿಸಿದರೂ ಅದಕ್ಕೆ ಭಾರತ ಒಪ್ಪಿಗೆ ನೀಡಲಿಲ್ಲ. ಅಲ್ಲದೆ, ಸಿಂಗಾಪುರದಿಂದ ಸುಮಾರು 60 ರಿಂದ 70 ಟನ್ ಸರಕುಗಳನ್ನು ಸಾಗಿಸಲು ಕೂಡ ಹಲವು ಬಾರಿ ಕೋರಿದ್ದರೂ ಅನುಮತಿ ದೊರೆತಿಲ್ಲ” ಎಂದು ಹೇಳಿದ್ದಾರೆ.
ಕಳೆದ ಫೆಬ್ರವರಿ 28ರಂದು ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಜಂಟಿಯಾಗಿ ಇರಾನ್ ಮೇಲೆ ದಾಳಿ ನಡೆಸಿದವು. ಇರಾನ್ ಸುಪ್ರೀಂ ಲೀಡರ್ ಆಯತೊಲ್ಲಾ ಅಲಿ ಖಮೇನಿ ಅವರನ್ನು ಹತ್ಯೆಗೈದವು. ಅಂದಿನಿಂದ, ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಾರ್ಮೋಡ ಕವಿದಿದೆ. ಅಮೆರಿಕ-ಇಸ್ರೇಲ್ ದಾಳಿಗೆ ಪ್ರತಿಯಾಗಿ ಇರಾನ್ ಕ್ಷಿಪಣಿ ದಾಳಿಗಳನ್ನು ನಡೆಸಿದ್ದಲ್ಲದೆ, ಹಾರ್ಮುಜ್ ಜಲಸಂಧಿಯನ್ನು ಮುಚ್ಚಿದೆ. ಇದರಿಂದ ಜಾಗತಿಕ ಹಡಗು ಸಾರಿಗೆ, ತೈಲ ಹಾಗೂ ರಸಗೊಬ್ಬರದ ಬೆಲೆಗಳು ಏರಿಕೆಯಾಗಿ ಇಡೀ ಏಷ್ಯಾ ಖಂಡದ ಮೇಲೆ ಗಂಭೀರ ಪರಿಣಾಮ ಬೀರಿದೆ.
ಯುದ್ಧ ಪ್ರಾರಂಭವಾಗುವ ಮೊದಲು, ಇರಾನ್‌ನ ಮಹಾನ್ ಏರ್ ನವದೆಹಲಿಗೆ ವಾರಕ್ಕೆ ಎರಡು ಬಾರಿ ಮತ್ತು ಇರಾನ್ ಏರ್ ಮುಂಬೈಗೆ ವಾರಕ್ಕೊಮ್ಮೆ ವಿಮಾನ ಸೇವೆ ನಡೆಸುತ್ತಿದ್ದವು. ಆದರೆ, ಯುದ್ಧದಿಂದಾಗಿ, ವಿಮಾನ ಸೇವೆ ರದ್ದಾಗಿದ್ದವು. ಆರಂಭಿಕ ತಿಂಗಳುಗಳಲ್ಲಿ ಭಾರತವು ಮಾನವೀಯ ಆಧಾರದ ಮೇಲೆ ಪ್ರತ್ಯೇಕ ಔಷಧ ಸಾಗಣೆ ವಿಮಾನಗಳಿಗೆ ಅವಕಾಶ ನೀಡಿತ್ತು. ಆದಾಗ್ಯೂ, ಮಾರ್ಚ್ 30 ರಂದು ಭಾರತೀಯರಿಂದ ಸಂಗ್ರಹಿಸಿದ ದೇಣಿಗೆಯಿಂದ ಖರೀದಿಸಿದ 40 ಟನ್ ಔಷಧಗಳನ್ನು ಸಾಗಿಸಲು ಮಾಶಾದ್‌ನಿಂದ ದೆಹಲಿಗೆ ಬರಬೇಕಿದ್ದ ಮಹಾನ್ ಏರ್ ವಿಮಾನದ ಮೇಲೆ ಅಮೆರಿಕ ದಾಳಿ ನಡೆಸಿದ್ದರಿಂದ ಆ ಸರಕು ಇಲ್ಲೇ ಉಳಿಯಿತು. ನಂತರ ಏಪ್ರಿಲ್‌ನಲ್ಲಿ ಮತ್ತೊಂದು ಕಂತಿನ ಔಷಧಗಳನ್ನು ಯಶಸ್ವಿಯಾಗಿ ರವಾನಿಸಲಾಗಿತ್ತು. ಭಾರತ ಕೂಡ ಇರಾನ್ ರೆಡ್ ಕ್ರೆಸೆಂಟ್ ಸೊಸೈಟಿಯ ಮೂಲಕ 5 ಟನ್ ವೈದ್ಯಕೀಯ ನೆರವು ಕಳುಹಿಸಿತ್ತು.
ಆದರೆ, ಆಗಸ್ಟ್ ತಿಂಗಳಿನಿಂದ ಈ ಎಲ್ಲ ಹಾರಾಟ ಅನುಮತಿಗಳನ್ನು ಭಾರತ ಸಂಪೂರ್ಣವಾಗಿ ಸ್ಥಗಿತಗೊಳಿಸಿದೆ. ಜುಲೈ ಕೊನೆಯಲ್ಲಿ ಅಥವಾ ಆಗಸ್ಟ್ ಆರಂಭದಲ್ಲಿ ಭಾರತದಿಂದ ಹಲವು ಟನ್ ಔಷಧಗಳನ್ನು ಒಯ್ಯಬೇಕಿದ್ದ ಮಹಾನ್ ಏರ್ ವಿಮಾನಕ್ಕೆ ಇಂದಿಗೂ ಭಾರತದಲ್ಲಿ ಲ್ಯಾಂಡಿಂಗ್ ಅನುಮತಿ ಸಿಕ್ಕಿಲ್ಲ.
ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಅವರು ಇರಾನ್ ವಿಮಾನಗಳಿಗೆ ಗ್ರೌಂಡ್ ಹ್ಯಾಂಡ್ಲಿಂಗ್ ಅಥವಾ ಇಂಧನ ಇತ್ಯಾದಿ ಸೇವೆಗಳನ್ನು ಒದಗಿಸುವ ಯಾವುದೇ ಸಂಸ್ಥೆಯ ಮೇಲೆ ಕಠಿಣ ನಿರ್ಬಂಧಗಳನ್ನು ಹೇರಲಾಗುವುದು ಎಂದು ಎಚ್ಚರಿಸಿದ್ದರು. ಅಮೆರಿಕದ ಈ ಬೆದರಿಕೆಗೆ ಹೆದರಿ ಭಾರತದ ನಾಗರಿಕ ವಿಮಾನಯಾನ ಸಚಿವಾಲಯ ನೇರ ವಿಮಾನಗಳಿಗೆ ಅನುಮತಿ ನೀಡಲು ನಿರಾಕರಿಸುತ್ತಿದೆ ಎಂದು ತಿಳಿದುಬಂದಿದೆ.
ಈ ಕುರಿತು ಅಕ್ಟೋಬರ್ 23 ರಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ (MEA) ವಕ್ತಾರ ರಣಧೀರ್ ಜೈಸ್ವಾಲ್ ಮಾತನಾಡಿ, “ನಾವು ಇರಾನ್‌ಗೆ ಜೀವ ರಕ್ಷಕ ಔಷಧಗಳ ಸಾಗಣೆಗೆ ನೆರವಾಗುತ್ತಲೇ ಬಂದಿದ್ದೇವೆ. ಆದರೆ ಪ್ರಸ್ತುತ ನಡೆಯುತ್ತಿರುವ ಸಂಘರ್ಷದಿಂದಾಗಿ ಎರಡೂ ದೇಶಗಳ ನಡುವಿನ ವಿಮಾನ ಸಂಪರ್ಕಕ್ಕೆ ಹೊಸ ಸವಾಲುಗಳು ಎದುರಾಗಿವೆ. ಮಾನವೀಯ ಆಧಾರದ ಮೇಲೆ ಔಷಧಗಳನ್ನು ಕಳುಹಿಸಲು ಇರಾನ್ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸಲಾಗುತ್ತಿದೆ” ಎಂದಿದ್ದಾರೆ.
ಭಾರತವು ಇರಾನ್‌ಗೆ ಪರ್ಯಾಯ ಮಾರ್ಗವನ್ನು ಪ್ರಸ್ತಾಪಿಸಿದೆ. ಇರಾನೇತರ ವಿಮಾನ ಸಂಸ್ಥೆಯ ಮೂಲಕ ಔಷಧಗಳನ್ನು ಅರ್ಮೇನಿಯಾ ಅಥವಾ ಅಜರ್‌ಬೈಜಾನ್‌ಗೆ ವಿಮಾನದಲ್ಲಿ ಸಾಗಿಸಿ, ಅಲ್ಲಿಂದ ರಸ್ತೆ ಮಾರ್ಗವಾಗಿ (ಟ್ರಕ್‌ಗಳಲ್ಲಿ) ಇರಾನ್‌ಗೆ ಕೊಂಡೊಯ್ಯುವಂತೆ ಸೂಚಿಸಿದೆ. ರಸ್ತೆ ಮಾರ್ಗದ ಮೂಲಕ ಸಾಗಿಸಿದರೆ ಅಮೆರಿಕದ ನಿರ್ಬಂಧಗಳ ಭೀತಿ ಇರುವುದಿಲ್ಲ ಮತ್ತು ಈ ಹಿಂದೆ ಕೂಡ ಇದೇ ಮಾರ್ಗದಲ್ಲಿ ಕೆಲವು ಕಂತುಗಳ ಔಷಧಗಳನ್ನು ಯಶಸ್ವಿಯಾಗಿ ತಲುಪಿಸಲಾಗಿದೆ ಎಂದು ಭಾರತ ಹೇಳುತ್ತಿದೆ.
ಈ ಲೇಖನ ಓದಿದ್ದೀರಾ?: ಅಮೆರಿಕದ ಮಧ್ಯಂತರ ಚುನಾವಣೆ: ಬೆಲೆ ಏರಿಕೆ, ಇರಾನ್ ಯುದ್ಧದ ನಡುವೆ ಟ್ರಂಪ್‌ಗೆ ಅಗ್ನಿಪರೀಕ್ಷೆ!
ಆದರೆ, ಇರಾನ್ ಸರ್ಕಾರವು ಪರ್ಯಾಯ ರಸ್ತೆ ಮಾರ್ಗದ ಬದಲಾಗಿ ನೇರ ವಿಮಾನ ಹಾರಾಟಕ್ಕೇ ಪಟ್ಟು ಹಿಡಿದಿದೆ. ಜಗತ್ತಿನ ದೇಶಗಳು ಅಮೆರಿಕದ ಏಕಪಕ್ಷೀಯ ನಿರ್ಬಂಧಗಳಿಗೆ ತಲೆಬಾಗುತ್ತಿಲ್ಲ ಎಂಬುದನ್ನು ತೋರಿಸಲು ಟೆಹ್ರಾನ್ ಬಯಸುತ್ತಿದೆ. ಆದರೆ, ಈ ರಾಜಕೀಯ ಪಟ್ಟುಗಳಿಂದಾಗಿ ಈಗಾಗಲೇ ಖರೀದಿಸಲಾಗಿರುವ ಜೀವ ರಕ್ಷಕ ಔಷಧಗಳು ಇರಾನ್ ತಲುಪದೇ ತಡವಾಗುತ್ತಿವೆ.
ಅಮೆರಿಕವು ಇರಾನ್‌ನ ಮಹಾನ್ ಏರ್ ವಿರುದ್ಧ ದೀರ್ಘಕಾಲದಿಂದ ನಿರ್ಬಂಧಗಳನ್ನು ಹೇರುತ್ತಾ ಬಂದಿದೆ. ಏಪ್ರಿಲ್‌ನಲ್ಲಿ ಅದರ ಪೋಷಕ ಸಂಸ್ಥೆ ಮತ್ತು ಬೋಯಿಂಗ್ 777 ವಿಮಾನಗಳನ್ನು ನಿರ್ಬಂಧಿತ ಪಟ್ಟಿಗೆ ಸೇರಿಸಲಾಗಿತ್ತು. ಜುಲೈ 30ರಂದು ಅಮೆರಿಕವು ಚೀನಾ, ಭಾರತ, ರಷ್ಯಾ ಹಾಗೂ ಇರಾನ್‌ನ ಕೆಲವು ಸಂಸ್ಥೆಗಳ ಮೇಲೆ ನಿರ್ಬಂಧ ವಿಧಿಸಿತು. ಇದರಲ್ಲಿ ಭಾರತದಲ್ಲಿದ್ದುಕೊಂಡು ಮಹಾನ್ ಏರ್‌ಗೆ ಜನರಲ್ ಸೇಲ್ಸ್ ಏಜೆಂಟ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ‘ಸ್ಕೈಸ್ ಟ್ರಾವೆಲ್ಸ್ ಅಂಡ್ ಲಾಜಿಸ್ಟಿಕ್ಸ್ ಪ್ರೈವೇಟ್ ಲಿಮಿಟೆಡ್’ ಸಂಸ್ಥೆಯೂ ಸೇರಿದೆ.
ಆಗಸ್ಟ್ 24 ಮತ್ತು ಸೆಪ್ಟೆಂಬರ್ 8 ರಂದು ಅಮೆರಿಕವು ಇರಾನ್‌ನ ಉಳಿದ 27 ವಿಮಾನಯಾನ ಸಂಸ್ಥೆಗಳ ಮೇಲೆಯೂ ಕಠಿಣ ನಿರ್ಬಂಧಗಳನ್ನು ಹೇರಿತು. ಇರಾನ್ ವಿಮಾನಗಳಿಗೆ ಸೇವೆ ನೀಡುವ ವಿದೇಶಿ ವಿಮಾನ ನಿಲ್ದಾಣಗಳು, ಇಂಧನ ಪೂರೈಕೆದಾರರು, ಗ್ರೌಂಡ್ ಹ್ಯಾಂಡ್ಲಿಂಗ್ ಸಂಸ್ಥೆಗಳನ್ನು ಅಮೆರಿಕದ ಡಾಲರ್ ಮತ್ತು ಹಣಕಾಸು ವ್ಯವಸ್ಥೆಯಿಂದ ಹೊರಗಿಡಲಾಗುವುದು ಎಂದು ಅಮೆರಿಕ ಬೆದರಿಕೆ ಹಾಕಿದೆ.
ಈ ಬೆದರಿಕೆ ಬೆನ್ನಲ್ಲೇ ಯುಎಇ, ಓಮನ್, ಇರಾಕ್, ಅಜರ್‌ಬೈಜಾನ್, ಜಾರ್ಜಿಯಾ ಹಾಗೂ ತುರ್ಕಮೆನಿಸ್ತಾನ್ ದೇಶಗಳು ಇರಾನ್ ವಿಮಾನಗಳ ಪ್ರವೇಶವನ್ನು ಸಂಪೂರ್ಣವಾಗಿ ನಿರ್ಬಂಧಿಸಿವೆ ಅಥವಾ ಸೀಮಿತಗೊಳಿಸಿವೆ. ಇದೇ ಭೀತಿಯಿಂದಾಗಿ ಭಾರತ ಕೂಡ ಇರಾನ್‌ಗೆ ನೇರ ವಿಮಾನ ಹಾರಾಟಕ್ಕೆ ಅನುಮತಿ ನೀಡಲು ಹಿಂದೇಟು ಹಾಕುತ್ತಿದೆ ಎಂದು ಹೇಳಲಾಗಿದೆ.
