ಗೂಗಲ್‌ನ ಮಾತೃಸಂಸ್ಥೆಯಾದ ‘ಆಲ್ಫಾಬೆಟ್’, ಅಮೆರಿಕದ ಕ್ಯಾಲಿಫೋರ್ನಿಯಾ ಮತ್ತು ಫ್ಲೋರಿಡಾ ರಾಜ್ಯಗಳಲ್ಲಿ ಒಟ್ಟು 3.2 ಕೋಟಿ ಸೊಳ್ಳೆಗಳನ್ನು ಹಾರಿಬಿಡುವ ವಿನೂತನ ಯೋಜನೆಯೊಂದನ್ನು ರೂಪಿಸಿದೆ. ವೆಸ್ಟ್ ನೈಲ್ ವೈರಸ್ (West Nile virus) ಮತ್ತು ಸೈಂಟ್ ಲೂಯಿಸ್ ಎನ್ಸೆಫಲೈಟಿಸ್‌ನಂತಹ ಸೊಳ್ಳೆಗಳಿಂದ ಹರಡುವ ಅಪಾಯಕಾರಿ ರೋಗಗಳನ್ನು ತಡೆಗಟ್ಟುವ ಉದ್ದೇಶದಿಂದ ಮುಂದಿನ ಎರಡು ವರ್ಷಗಳಲ್ಲಿ ಈ ವಿಶೇಷ ಸೊಳ್ಳೆಗಳನ್ನು ಪರಿಸರಕ್ಕೆ ಬಿಡಲು ನಿರ್ಧರಿಸಲಾಗಿದೆ. ಇದಕ್ಕಾಗಿ ಅಮೆರಿಕದ ಪರಿಸರ ಸಂರಕ್ಷಣಾ ಸಂಸ್ಥೆಯ (EPA) ಅನುಮತಿ ಕೋರಿ ಸಂಸ್ಥೆಯು ಅರ್ಜಿ ಸಲ್ಲಿಸಿದೆ.
ಆಲ್ಫಾಬೆಟ್ ಸಂಸ್ಥೆಯ ಜೀವವಿಜ್ಞಾನ ವಿಭಾಗವಾದ ‘ವೆರಿಲಿ’ (Verily) 2016ರಲ್ಲಿ ಪ್ರಾರಂಭಿಸಿದ ‘ಡಿಬಗ್’ (Debug) ಎಂಬ ಯೋಜನೆಯ ಅಡಿಯಲ್ಲಿ ಈ ಕಾರ್ಯಾಚರಣೆ ನಡೆಯಲಿದೆ. ಈ ಯೋಜನೆಗೆ ಅನುಮತಿ ದೊರೆತರೆ, ಮುಂದಿನ ಎರಡು ವರ್ಷಗಳ ಕಾಲ ಹಂತ ಹಂತವಾಗಿ ಸೊಳ್ಳೆಗಳನ್ನು ಬಿಡಲಾಗುತ್ತದೆ. ಮೊದಲ ವರ್ಷದಲ್ಲಿ ಪ್ರತಿ ರಾಜ್ಯಕ್ಕೆ ತಲಾ 1.6 ಕೋಟಿ ಸೊಳ್ಳೆಗಳು ಹಾಗೂ ಎರಡನೇ ವರ್ಷದಲ್ಲಿ ಮತ್ತೆ ತಲಾ 1.6 ಕೋಟಿ ಸೊಳ್ಳೆಗಳನ್ನು ಬಿಡುಗಡೆ ಮಾಡಲಾಗುವುದು ಎಂದು ವರದಿ ತಿಳಿಸಿದೆ.
ಈ ಯೋಜನೆಯು ‘ವೊಲ್ಬಾಚಿಯಾ’ (Wolbachia) ಎಂಬ ನೈಸರ್ಗಿಕ ಬ್ಯಾಕ್ಟೀರಿಯಾವನ್ನು ಆಧರಿಸಿದೆ. ಡಿಬಗ್ ಯೋಜನೆಯಡಿ ಕೇವಲ ಈ ಬ್ಯಾಕ್ಟೀರಿಯಾವನ್ನು ಹೊಂದಿರುವ ‘ಗಂಡು ಸೊಳ್ಳೆ’ಗಳನ್ನು ಮಾತ್ರ ಪ್ರಯೋಗಾಲಯದಲ್ಲಿ ಬೆಳೆಸಿ ಹೊರಬಿಡಲಾಗುತ್ತದೆ. ಗಂಡು ಸೊಳ್ಳೆಗಳು ಮನುಷ್ಯರಿಗೆ ಕಚ್ಚುವುದಿಲ್ಲ ಎಂಬುದು ಇಲ್ಲಿನ ಪ್ರಮುಖ ಅಂಶ. ಈ ವಿಶೇಷ ಗಂಡು ಸೊಳ್ಳೆಗಳು, ಪ್ರಕೃತಿಯಲ್ಲಿರುವ ಸಾಮಾನ್ಯ ಹೆಣ್ಣು ಸೊಳ್ಳೆಗಳೊಂದಿಗೆ ಸೇರಿದಾಗ ಉತ್ಪತ್ತಿಯಾಗುವ ಮೊಟ್ಟೆಗಳು ಒಡೆದು ಮರಿಗಳಾಗುವುದಿಲ್ಲ. ಇದರಿಂದಾಗಿ ರೋಗ ಹರಡುವ ಅಪಾಯಕಾರಿ ‘ಕ್ಯೂಲೆಕ್ಸ್’ (Culex) ಸೊಳ್ಳೆಗಳ ಸಂತತಿಯು ನೈಸರ್ಗಿಕವಾಗಿಯೇ ಕ್ರಮೇಣ ಕ್ಷೀಣಿಸುತ್ತದೆ. ಕೇವಲ ಹೆಣ್ಣು ಸೊಳ್ಳೆಗಳು ಮಾತ್ರ ಕಚ್ಚುವುದರಿಂದ, ಈ 3.2 ಕೋಟಿ ಗಂಡು ಸೊಳ್ಳೆಗಳನ್ನು ಬಿಡುವುದರಿಂದ ಸಾರ್ವಜನಿಕರಿಗೆ ಒಂದು ಸೊಳ್ಳೆಯೂ ಹೆಚ್ಚುವರಿಯಾಗಿ ಕಚ್ಚುವುದಿಲ್ಲ.
ಇದನ್ನು ಓದಿದ್ದೀರಾ? ‘ಈ ಸಲವೂ ಕಪ್ ನಮ್ದೇ’ ನಿಜವಾಗಿಸಿದ್ದು ಹೇಗೆ?
ಇಷ್ಟು ಬೃಹತ್ ಪ್ರಮಾಣದಲ್ಲಿ (ಮಿಲಿಯನ್‌ಗಟ್ಟಲೆ) ಸೊಳ್ಳೆಗಳನ್ನು ಬೆಳೆಸುವುದು ಮತ್ತು ಗಂಡು-ಹೆಣ್ಣು ಸೊಳ್ಳೆಗಳನ್ನು ಬೇರ್ಪಡಿಸುವುದು ದೊಡ್ಡ ಸವಾಲಿನ ಕೆಲಸ. ಇದನ್ನು ನಿಭಾಯಿಸಲು ಗೂಗಲ್, ಕೃತಕ ಬುದ್ಧಿಮತ್ತೆ ಆಧಾರಿತ ಲಿಂಗ-ವಿಂಗಡಣಾ ವ್ಯವಸ್ಥೆ, ಸ್ವಯಂಚಾಲಿತ ರೋಬೋಟ್‌ಗಳು ಮತ್ತು ವಾಹನಗಳ ಮೂಲಕ ಸೊಳ್ಳೆಗಳನ್ನು ನಿಖರವಾಗಿ ಬಿಡುಗಡೆ ಮಾಡುವ ಅತ್ಯಾಧುನಿಕ ತಂತ್ರಜ್ಞಾನವನ್ನು ಬಳಸಿಕೊಳ್ಳುತ್ತಿದೆ.
ಇದಕ್ಕೂ ಮೊದಲು ಫ್ಲೋರಿಡಾದಲ್ಲಿ ನಡೆದ ಸಣ್ಣ ಮಟ್ಟದ ಪ್ರಯೋಗಗಳು ಯಶಸ್ವಿಯಾಗಿದ್ದು, ಇದೀಗ ಕೃತಕ ಬುದ್ಧಿಮತ್ತೆ ಮತ್ತು ಜೀವವಿಜ್ಞಾನದ ಸಮ್ಮಿಲನದ ಮೂಲಕ ಈ ಬೃಹತ್ ಯೋಜನೆಗೆ ಗೂಗಲ್ ಮುಂದಾಗಿದೆ.
