ನಾಜಿ ಆಡಳಿತದ ಇತಿಹಾಸದ ಕರಾಳ ನೆನಪನ್ನು ಹೊಂದಿದ್ದ ಅಡಾಲ್ಫ್ ಹಿಟ್ಲರ್‌ನ ಅತಿಥಿ ಗೃಹ ಎಂದೇ ಹೆಸರುವಾಸಿಯಾಗಿದ್ದ ‘ಈಗಲ್ಸ್ ನೆಸ್ಟ್’ (ಕೆಹ್ಲ್‌ಸ್ಟೀನ್‌ಹೌಸ್) ಭೀಕರ ಅಗ್ನಿ ದುರಂತಕ್ಕೆ ತುತ್ತಾಗಿ ಸಂಪೂರ್ಣವಾಗಿ ಸುಟ್ಟು ಭಸ್ಮವಾಗಿದೆ. ಜರ್ಮನಿಯ ಬವೇರಿಯನ್ ಆಲ್ಪ್ಸ್ ಪರ್ವತ ಶ್ರೇಣಿಯ ತುದಿಯಲ್ಲಿದ್ದ ಈ ಕಟ್ಟಡ ಭಾನುವಾರ ಹೊತ್ತಿ ಉರಿದಿದೆ.
ಸಮುದ್ರ ಮಟ್ಟದಿಂದ ಸುಮಾರು 1,834 ಮೀಟರ್ (5,900 ಅಡಿ) ಎತ್ತರದಲ್ಲಿರುವ ಬವೇರಿಯಾದ ಬೆರ್ಚ್‌ಟೆಸ್ಗೇಡನ್ ಪರ್ವತ ಶಿಖರದಲ್ಲಿ ಈ ಕಟ್ಟಡ ಸ್ಥಾಪಿತವಾಗಿತ್ತು. ಕಟ್ಟಡದ ಆವರಣದಲ್ಲಿದ್ದ ಅಗ್ನಿಶಾಮಕ ಸಂವೇದಕವು ಎಚ್ಚರಿಕೆಯ ಕರೆ ಗಂಟೆಯನ್ನು ಭಾರಿಸಿದ ತಕ್ಷಣ ಜರ್ಮನ್ ಆಡಳಿತವು ಬೆಂಕಿ ನಂದಿಸಲು ಕಾರ್ಯಾಚರಣೆ ಆರಂಭಿಸಿತ್ತು. ಆದರೆ, ಪರ್ವತದ ತುದಿಯಲ್ಲಿದ್ದ ಹಿಮಪಾತ, ತೀವ್ರ ಗಾಳಿ ಹಾಗೂ ಕಡಿದಾದ ರಸ್ತೆಯ ಕಾರಣದಿಂದಾಗಿ ಸ್ಥಳಕ್ಕೆ ತಲುಪುವುದು ಅಗ್ನಿಶಾಮಕ ಸಿಬ್ಬಂದಿಗೆ ಸವಾಲಾಗಿ ಪರಿಣಮಿಸಿತ್ತು. ಸುಮಾರು 200 ಕ್ಕೂ ಹೆಚ್ಚು ಸಿಬ್ಬಂದಿ ಕಾರ್ಯಾಚರಣೆಯಲ್ಲಿ ತೊಡಗಿ ಬೆಂಕಿಯನ್ನು ಹತೋಟಿಗೆ ತರಲು ಹಗಲಿರುಳು ಶ್ರಮಿಸಿದರೂ, ಕಟ್ಟಡವು ಬಹುತೇಕ ಉರಿದು ನಾಶವಾಗಿದೆ.
ಅದೃಷ್ಟವಶಾತ್, ಘಟನೆಯಲ್ಲಿ ಕಟ್ಟಡದ ಒಳಗೆ ಯಾರೂ ಇಲ್ಲದ ಕಾರಣ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ ಎಂದು ವರದಿಯಾಗಿದೆ.
ಈ ಘಟನೆಯು ಆಕಸ್ಮಿಕವಲ್ಲ, ಬದಲಾಗಿ ದುಷ್ಕರ್ಮಿಗಳು ಮಾಡಿದ ಕೃತ್ಯ ಇರಬಹುದು ಎಂಬ ಶಂಕೆ ವ್ಯಕ್ತವಾಗಿದೆ. ಘಟನಾ ಸ್ಥಳದ ಸಮೀಪದಲ್ಲೇ ಅನುಮಾನಾಸ್ಪದವಾಗಿ ಚಲಿಸುತ್ತಿದ್ದ 33 ವರ್ಷದ ಮೋಟಾರ್ ಸೈಕಲ್ ಸವಾರನನ್ನು ಪೊಲೀಸರು ಬಂಧಿಸಿದ್ದಾರೆ. ತನಿಖೆಯ ವೇಳೆ ಆತನಿಗೆ ಮಾನಸಿಕ ಅಸ್ವಸ್ಥತೆ ಇರುವುದು ಕಂಡುಬಂದಿದ್ದರಿಂದ, ಆತನನ್ನು ಮಾನಸಿಕ ಆರೋಗ್ಯ ಕೇಂದ್ರಕ್ಕೆ ರವಾನಿಸಲಾಗಿದೆ.
ಹಿಟ್ಲರ್‌ನ 50ನೇ ಜನ್ಮದಿನದ ಕೊಡುಗೆಯಾಗಿ 1937 ರಿಂದ 1938ರ ಅವಧಿಯಲ್ಲಿ ಈಗಲ್ಸ್ ನೆಸ್ಟ್ ಅತಿಥಿ ಗೃಹವನ್ನು ನಿರ್ಮಿಸಲಾಗಿತ್ತು. ಈ ಕಟ್ಟಡವನ್ನು 1952 ರಿಂದ ಪ್ರವಾಸಿ ತಾಣವನ್ನಾಗಿ ಪರಿವರ್ತಿಸಲಾಗಿತ್ತು. ಬವೇರಿಯಾ ಸರ್ಕಾರದ ಸುಪರ್ದಿಯಲ್ಲಿದ್ದ ಈ ಕಟ್ಟಡದಲ್ಲಿ ಪ್ರಸ್ತುತ ದಿನಗಳಲ್ಲಿ ರೆಸ್ಟೋರೆಂಟ್ ಮತ್ತು ನಾಜಿ ಆಡಳಿತದ ಇತಿಹಾಸವನ್ನು ವಿವರಿಸುವ ಪ್ರದರ್ಶನ ಮಳಿಗೆಯನ್ನು ನಡೆಸಲಾಗುತ್ತಿತ್ತು.
