ವೆನೆಜುವೆಲಾದ ಹೋರಾಟಗಾರ್ತಿ ಮಾರಿಯಾ ಕೊರಿನಾ ಮಚಾಡೊ ಅವರಿಗೆ 2025 ನೇ ಸಾಲಿನ ನೊಬೆಲ್ ಶಾಂತಿ ಪ್ರಶಸ್ತಿ ಘೋಷಿಸಲಾಗಿದೆ. ಮಾರಿಯಾ ಕೊರಿನಾ ಮಚಾಡೊ ಅವರು ತನ್ನ ದೇಶದಲ್ಲಿ ಪ್ರಜಾಸತ್ತಾತ್ಮಕ ಹಕ್ಕುಗಳ ಪರ ಹೋರಾಟ ನಡೆಸಿದಕ್ಕೆ ಈ ಗೌರವ ಸಂದಿದೆ.
ಮಾರಿಯಾ 1967ರ ಅಕ್ಟೋಬರ್ 7ರಂದು ವೆನೆಜುವೆಲಾದ ಕ್ಯಾರಕಾಸ್‌ನಲ್ಲಿ ಜನಿಸಿದರು. ಅವರ ತಂದೆ ಹೆನ್ರಿಕ್ ಮಚಾಡೊ ಉಕ್ಕಿನ ವ್ಯಾಪಾರಿ, ತಾಯಿ ಕೊರಿನಾ ಪ್ಯಾರಿಸ್ಕಾ ಮನೋವಿಜ್ಞಾನಿ. ಅಮೆರಿಕಾದ ಕಾರ್ನೆಗಿ ಮೆಲನ್ ವಿಶ್ವವಿದ್ಯಾಲಯದಿಂದ ಕೈಗಾರಿಕಾ ಎಂಜಿನಿಯರಿಂಗ್‌ನಲ್ಲಿ ಪದವಿ ಪಡೆದ ಅವರು, ರಾಜಕೀಯದಲ್ಲಿ ತಮ್ಮ ವೃತ್ತಿಯನ್ನು ತೊಡಗಿಸಿಕೊಂಡರು.
2002ರಲ್ಲಿ ಮಾರಿಯಾ ‘ಸೂಮ್ಯಾಟೆ’ ಎಂಬ ಸಂಸ್ಥೆ ಸ್ಥಾಪಿಸಿ, ಚುನಾವಣೆಯಲ್ಲಿನ ವಂಚನೆಯನ್ನು ಬಯಲಿಗೆಳೆದರು. 2011-2014ರವರೆಗೆ ವೆನೆಜುವೆಲಾದ ರಾಷ್ಟ್ರೀಯ ಸಭೆಯ ಸದಸ್ಯರಾಗಿ, ಚಾವೆಜ್ ಮತ್ತು ಮಾಡುರೊ ಸರ್ಕಾರದ ವಿರುದ್ಧ ಧ್ವನಿಯಿತ್ತಿದರು. ವೆನೆಜುವೆಲಾದಲ್ಲಿ 1999ರಿಂದ ಆರ್ಥಿಕ ಕುಸಿತ, ಆಹಾರ-ಔಷಧ ಕೊರತೆ, ದಮನ ಜನರನ್ನು ಕಾಡಿತು. 70 ಲಕ್ಷಕ್ಕೂ ಹೆಚ್ಚು ಜನ ದೇಶ ಬಿಟ್ಟರು. ಇಂತಹ ಸಂಕಷ್ಟದಲ್ಲಿ ಮಾರಿಯಾ ಜನತಂತ್ರಕ್ಕಾಗಿ ಹೋರಾಡಿದರು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಸಂವಿಧಾನ ಬದಲಿಸುವ ಸನಾತನಿಗಳ ಹುನ್ನಾರಕ್ಕೆ ವಕೀಲರೇ ದಾಳ
ಮಾರಿಯಾ ಕೊರಿನಾ ಮಚಾಡೊ ಅವರು 2023ರಲ್ಲಿ ವಿರೋಧ ಪಕ್ಷದ ಅಭ್ಯರ್ಥಿಯಾಗಿ ಗೆದ್ದರೂ, ಮಾಡುರೊ ಸರ್ಕಾರ ಅವರನ್ನು ಚುನಾವಣೆಯಿಂದ ತಡೆಯಿತು. 2024ರ ಚುನಾವಣೆಯಲ್ಲಿ ವಿರೋಧ ಪಕ್ಷ ಶೇ. 67 ರಷ್ಟು ಮತ ಪಡೆದರೂ, ಮಾಡುರೊ ಫಲಿತಾಂಶವನ್ನು ಒಪ್ಪಲಿಲ್ಲ. ಮಾರಿಯಾ, ಜೀವ ಭಯದ ನಡುವೆಯೂ ಜನರನ್ನು ಒಗ್ಗೂಡಿಸಿ, ಚುನಾವಣಾ ದಾಖಲೆಗಳನ್ನು ಕಾಪಾಡಿದರು. ಈಗಲೂ ಅವರು ವಿಪಕ್ಷ ನಾಯಕಿಯಾಗಿದ್ದಾರೆ.
ಮಾರಿಯಾ ಕೊರಿನಾ ಮಚಾಡೊ ಅವರು 2024ರಲ್ಲಿ ಐರೋಪ್ಯ ಸಂಸತ್‌ನಿಂದ ಸಾಖಾರೊವ್ ಪ್ರಶಸ್ತಿ, 2018ರಲ್ಲಿ ಬಿಬಿಸಿಯ 100 ಪ್ರಭಾವಿ ಮಹಿಳೆಯರ ಪಟ್ಟಿಯಲ್ಲಿ ಸ್ಥಾನ, 2025ರಲ್ಲಿ ಟೈಮ್‌ನ 100 ಪ್ರಭಾವಿ ವ್ಯಕ್ತಿಗಳ ಪಟ್ಟಿ ಮತ್ತು ಜಾರ್ಜಿಯಾ ಟೆಕ್‌ನಿಂದ ಸಾಮಾಜಿಕ ಸಾಹಸ ಪ್ರಶಸ್ತಿ ಲಭಿಸಿದವು.
ನೊಬೆಲ್ ಸಮಿತಿಯ ಅಧ್ಯಕ್ಷ ಜೊರ್ಗೆನ್ ವಾಟ್‌ಹೊಲ್ಟ್, “ಮಾರಿಯಾ ಅವರ ಧೈರ್ಯದ ಹೋರಾಟ ಜನತಂತ್ರದ ಆಶಯಗಳ ಕಿರಣ” ಎಂದು ಹೇಳಿದ್ದಾರೆ. ಡಿಸೆಂಬರ್ 10ರಂದು ಓಸ್ಲೋದಲ್ಲಿ 10 ಲಕ್ಷ ಡಾಲರ್‌ನೊಂದಿಗೆ ಶಾಂತಿ ಪ್ರಶಸ್ತಿಯನ್ನು ನೀಡಲಾಗುವುದು.
ಮಾರಿಯಾ ಅವರ ಹೋರಾಟ ಜಗತ್ತಿನ ಜನತಂತ್ರ ಚಳವಳಿಗಳಿಗೆ ಮಾದರಿ. ಭಾರತದಲ್ಲಿ ಅವರನ್ನು ಮಹಾತ್ಮ ಗಾಂಧೀಜಿಯಂತೆ ಕಾಣಲಾಗುತ್ತದೆ. ಈ ಪ್ರಶಸ್ತಿ ವೆನೆಜುವೆಲಾದ ಜನರಿಗೆ ಹೊಸ ಆಶಯವನ್ನು, ಜಗತ್ತಿಗೆ ಜನತಂತ್ರದ ಸಂದೇಶವನ್ನು ನೀಡಿದೆ.
