ನಿಷೇಧಿತ ಉಗ್ರಗಾಮಿ ಸಂಘಟನೆ ಲಷ್ಕರ್-ಎ-ತಯಬಾದ (ಎಲ್‌ಇಟಿ) ಸಹ-ಸಂಸ್ಥಾಪಕ ಹಾಗೂ ಪ್ರಮುಖ ಉಗ್ರ ಹಫೀಜ್ ಸಯೀದ್‌ನ ಪರಮಾಪ್ತ ಅಮೀರ್ ಹಂಝಾ ಮೇಲೆ ಪಾಕಿಸ್ತಾನದ ಲಾಹೋರ್‌ನಲ್ಲಿ ಅಪರಿಚಿತರು ಗುಂಡಿನ ದಾಳಿ ನಡೆಸಿದ್ದಾರೆ. ಕಳೆದ ಒಂದು ವರ್ಷದ ಅಂತರದಲ್ಲಿ ಆತನ ಹತ್ಯೆಗೆ ನಡೆದ ಎರಡನೇ ಯತ್ನ ಇದಾಗಿದೆ.
ಲಾಹೋರ್‌ನ ಪಿಂಡಿ ಸ್ಟಾಪ್ ಬಳಿ ಮೋಟಾರ್‌ಸೈಕಲ್‌ನಲ್ಲಿ ಬಂದ ಇಬ್ಬರು ಶಸ್ತ್ರಸಜ್ಜಿತ ದುಷ್ಕರ್ಮಿಗಳು ಏಕಾಏಕಿ ಗುಂಡಿನ ದಾಳಿ ನಡೆಸಿದ್ದಾರೆ. ದಾಳಿಯಲ್ಲಿ ಗಾಯಗೊಂಡಿರುವ ಹಂಝಾನನ್ನು ತಕ್ಷಣವೇ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಪಾಕಿಸ್ತಾನದ ಆಂತರಿಕ ಸಚಿವ ಮೊಹ್ಸಿನ್ ನಖ್ವಿ ಒಡೆತನದ ’24NewsHD’ ಖಾಸಗಿ ವಾಹಿನಿಗೆ ಸೇರಿದ ವಾಹನದಲ್ಲಿ ಈ ಘಟನೆ ನಡೆದಿದೆ. ವಾಹನದಲ್ಲಿದ್ದ ಧಾರ್ಮಿಕ ಕಾರ್ಯಕ್ರಮವೊಂದರ ನಿರೂಪಕ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ‘ಟೈಮ್ಸ್ ಆಫ್ ಇಂಡಿಯಾ’ ವರದಿ ಮಾಡಿದೆ.
ಕಳೆದ ವರ್ಷ ಮೇ ತಿಂಗಳಿನಲ್ಲಿಯೂ ಹಂಝಾ ಮೇಲೆ ಇದೇ ಮಾದರಿಯ ದಾಳಿ ನಡೆದಿತ್ತು. ಆಗಲೂ ಅಪರಿಚಿತ ವ್ಯಕ್ತಿಗಳು ಗುಂಡಿನ ದಾಳಿ ನಡೆಸಿದ್ದರು. ಆದರೆ, ಸೊಂಟದ ಭಾಗಕ್ಕೆ ಗುಂಡು ತಗುಲಿದ್ದರಿಂದ ಆತ ಪ್ರಾಣಾಪಾಯದಿಂದ ಪಾರಾಗಿದ್ದ. ಲಷ್ಕರ್-ಎ-ತಯಬಾ ಸಂಘಟನೆಯೊಳಗಿನ ಆಂತರಿಕ ಬಣಗಳ ಕಚ್ಚಾಟವೇ ಈ ಸರಣಿ ಗುಂಡಿನ ದಾಳಿಗಳಿಗೆ ಪ್ರಮುಖ ಕಾರಣ ಎಂದು ಗುಪ್ತಚರ ಮೂಲಗಳು ತಿಳಿಸಿವೆ.
ಇದನ್ನು ಓದಿದ್ದೀರಾ? ಇರಾನ್‌: ಬಿತ್ತಿದ್ದನ್ನು ಬೆಳೆದ ಅಮೆರಿಕ, ಆಡಳಿತ ಬದಲಿಸುವ ಕೊಲೆಗಡುಕತನ ಕಡುಕಟ್ಟರ್ ವಾದವನ್ನು ಭುಗಿಲೆಬ್ಬಿಸಿತು!
ಅಮೆರಿಕದ ಖಜಾನೆ ಇಲಾಖೆಯ ವರದಿಗಳ ಪ್ರಕಾರ, ಹಂಝಾ ಲಷ್ಕರ್ ಸಂಘಟನೆಯ ಪ್ರಮುಖ ರೂವಾರಿಗಳಲ್ಲಿ ಒಬ್ಬ. 1985ರಲ್ಲಿ ಲಷ್ಕರ್ ಕಮಾಂಡರ್ ಝಾಕಿ-ಉರ್-ರೆಹಮಾನ್ ಲಖ್ವಿ ಮೂಲಕ ಉಗ್ರಗಾಮಿ ಜಾಲಕ್ಕೆ ಸೇರ್ಪಡೆಗೊಂಡಿದ್ದ ಈತ, ನಂತರ ಹಫೀಜ್ ಸಯೀದ್‌ನ ಅಣತಿಯಂತೆ ಕೆಲಸ ಮಾಡಲು ಆರಂಭಿಸಿದ್ದ. ಲಷ್ಕರ್-ಎ-ತಯಬಾ ಹಾಗೂ ಜಮಾತ್-ಉದ್-ದಾವಾ ಸಂಘಟನೆಗಳ ಮೇಲೆ ನಿಷೇಧ ಹೇರಲಾದ ಬಳಿಕ, 2018ರಲ್ಲಿ ಸಯೀದ್‌ನ ಸೂಚನೆಯ ಮೇರೆಗೆ ‘ಜೈಶ್-ಎ-ಮನ್ಕಫಾ’ ಎಂಬ ಹೊಸ ಉಗ್ರ ಸಂಘಟನೆಯನ್ನು ಕಟ್ಟುವಲ್ಲಿ ಈತ ಪ್ರಮುಖ ಪಾತ್ರ ವಹಿಸಿದ್ದ.
ಉಗ್ರ ಸಂಘಟನೆಯ ಮುಖವಾಣಿಯಾದ ವಾರಪತ್ರಿಕೆಯೊಂದರ ಸಂಪಾದಕನಾಗಿಯೂ ಕಾರ್ಯನಿರ್ವಹಿಸುತ್ತಿದ್ದ ಹಂಝಾ, ಲಷ್ಕರ್-ಎ-ತಯಬಾದ ‘ವಿಶೇಷ ಕಾರ್ಯಾಚರಣೆ’ ವಿಭಾಗದ ಮುಖ್ಯಸ್ಥನಾಗಿದ್ದ. ಅಷ್ಟೇ ಅಲ್ಲದೆ, ಜೈಲಿನಲ್ಲಿರುವ ಬಂಧಿತ ಲಷ್ಕರ್ ಉಗ್ರರ ಬಿಡುಗಡೆಗೆ ಮಾತುಕತೆ ನಡೆಸಲು ಸಂಘಟನೆ ನಿಯೋಜಿಸಿದ್ದ ಪ್ರಮುಖ ಮೂವರು ಉಗ್ರರಲ್ಲಿ ಈತನು ಕೂಡ ಒಬ್ಬನಾಗಿದ್ದ. ಆತನ ಮೇಲೆ ನಡೆದಿರುವ ಈ ಸರಣಿ ದಾಳಿಗಳು ಪಾಕಿಸ್ತಾನದಲ್ಲಿರುವ ಉಗ್ರ ಸಂಘಟನೆಗಳ ಆಂತರಿಕ ಭಿನ್ನಮತವನ್ನು ರಟ್ಟು ಮಾಡಿವೆ.
