2023ರಲ್ಲಿ 106ನೇ ಸಂವಿಧಾನ ತಿದ್ದುಪಡಿಯ ಮೂಲಕ ನಮ್ಮ ಸಂವಿಧಾನದಲ್ಲಿ ಈಗಾಗಲೇ ಅಂಕಿತಗೊಂಡಿರುವ ಮಹಿಳಾ ಮೀಸಲಾತಿ ಮಸೂದೆಯನ್ನು, ಇದೀಗ ಬಿಜೆಪಿ ನೇತೃತ್ವದ ಎನ್‌ಡಿಎ ಸರ್ಕಾರವು ಮತ್ತೆ ಲೋಕಸಭೆಯ ಮುಂದೆ ತಂದಿರುವ ಹಿಂದೆ ಹಿಡನ್ ಅಜೆಂಡಾ ಇದೆ ಎಂದು ಮಾಜಿ ಸಂಸದ ಕೆ.ಜಯಪ್ರಕಾಶ್ ಹೆಗ್ಡೆ ಅವರು ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ತರಾತುರಿಯಲ್ಲಿ ಮಸೂದೆ ತರುವ ಹಿಂದೆ ಮಹಿಳೆಯರ ಬಗ್ಗೆ ಇರುವ ನಿಜವಾದ ಕಾಳಜಿ ಕಾಣಿಸುವುದಿಲ್ಲ, ಬದಲಾಗಿ ದೇಶದಲ್ಲಿ ಬಿಜೆಪಿ ಅಧಿಕಾರವನ್ನು ಸ್ಥಿರಗೊಳಿಸುವ ಲೆಕ್ಕಾಚಾರದ ಪ್ರಯತ್ನವೇ ಸ್ಪಷ್ಟವಾಗಿದೆ. ಪ್ರಧಾನ ಮಂತ್ರಿ ಮೋದಿ ಮತ್ತು ಅವರ ಪಕ್ಷವು ಶಾಸನ ಮಂಡಳಿಗಳಲ್ಲಿ ಮಹಿಳೆಯರಿಗೆ ಮೂರನೇ ಒಂದು ಭಾಗ ಮೀಸಲಾತಿಯನ್ನು ನಿಜವಾಗಿಯೂ ಜಾರಿಗೆ ತರಲು ಬದ್ಧರಾಗಿದ್ದರೆ, ಈಗಾಗಲೇ ಕಾನೂನಿನಲ್ಲಿ ಇರುವ ವಿಧಿಗಳನ್ನು ಜಾರಿಗೆ ತರುವ ಸ್ಪಷ್ಟ ಯೋಜನೆಯನ್ನು ರೂಪಿಸಬೇಕಾಗಿತ್ತು ಹಾಗೂ ಪ್ರಸ್ತುತ ನಡೆಯುತ್ತಿರುವ ರಾಜ್ಯ ಚುನಾವಣೆಗಳನ್ನೇ ಈ ಮೀಸಲಾತಿಯ ಅಡಿಯಲ್ಲಿ ನಡೆಸಬಹುದಾಗಿತ್ತು. ಆದರೆ ಅದನ್ನು ಕಡೆಗಣಿಸಲಾಗಿದೆ. ಅದರ ಬದಲು, ವೈಜ್ಞಾನಿಕ ಆಧಾರವಿಲ್ಲದ ಕ್ಷೇತ್ರ ಪುನರ್‌ವಿಂಗಡಣೆ (ಡಿಲಿಮಿಟೇಶನ್) ಮಸೂದೆಗೆ ಮಹಿಳಾ ಮೀಸಲಾತಿಯನ್ನು ಜೋಡಿಸಿ, ಒಂದೇ ಪ್ಯಾಕೇಜ್‌ ಆಗಿ ಸದನದ ಮುಂದೆ ತಂದಿದ್ದು, ದೇಶದ ಮಹಿಳೆಯರ ಹೆಸರಿನಲ್ಲಿ ಶಾಶ್ವತ ರಾಜಕೀಯ ಪ್ರಾಬಲ್ಯ ಸಾಧಿಸುವ ಉದ್ದೇಶ ಕಾಣಿಸುತ್ತಿದೆ.
ಎನ್‌ಡಿಎ ಸರ್ಕಾರದ ನಾಯಕತ್ವಕ್ಕೆ ದೇಶದ ಜನರು ರಾಜಕೀಯ ಸಮತೋಲನವನ್ನು ಬದಲಾಯಿಸುವ ರೀತಿಯ ಡಿಲಿಮಿಟೇಶನ್ ಮಸೂದೆಯನ್ನು ಸುಲಭವಾಗಿ ಒಪ್ಪಿಕೊಳ್ಳುವುದಿಲ್ಲ ಎನ್ನುವ ಸತ್ಯ ಮೊದಲೇ ತಿಳಿದಿತ್ತು. ಎರಡೂ ಮಸೂದೆಗಳನ್ನು ಒಂದೇ ಸಮಯದಲ್ಲಿ ಮಂಡಿಸಿದರೆ ಮಹಿಳಾ ಮೀಸಲಾತಿಗೂ ಅಡ್ಡಿ ಉಂಟಾಗುತ್ತದೆ ಎಂಬುದೂ ಅವರಿಗೆ ಗೊತ್ತಿತ್ತು. ಇದನ್ನೆಲ್ಲ ತಿಳಿದಿದ್ದರೂ, ಪೂರ್ವಯೋಜಿತವಾಗಿ ಮತ್ತು ತುರ್ತುಗತಿಯಲ್ಲಿ ಮಸೂದೆ ಮಂಡಿಸಿ ಬಿಜೆಪಿಯ ಗುಪ್ತ ಕಾರ್ಯಸೂಚಿಯನ್ನು ಜಾರಿಗೊಳಿಸಿದ್ದಾರೆ.
ಮಸೂದೆ ವಿಫಲವಾದ ನಂತರ ಬಿಜೆಪಿ ನಾಯಕರು ಈಗ ಕಾಂಗ್ರೆಸ್ ಪಕ್ಷವನ್ನು ದೋಷಾರೋಪಣೆ ಮಾಡುತ್ತಿದ್ದಾರೆ. ಅದಕ್ಕೂ ಮುನ್ನ ಅವರು ದೇಶದ ಮುಂದೆ ಸತ್ಯವಾದ ಲೆಕ್ಕವನ್ನು ಇಡಬೇಕು. ಬಿಜೆಪಿಗೆ ಲೋಕಸಭೆ ಮತ್ತು ರಾಜ್ಯಸಭೆಯಲ್ಲಿ ಎಷ್ಟು ಮಹಿಳಾ ಸಂಸದರು ಇದ್ದಾರೆ ? ಕೇಂದ್ರ ಸಚಿವ ಸಂಪುಟದಲ್ಲಿ ಮತ್ತು ಬಿಜೆಪಿ ಆಡಳಿತದ ರಾಜ್ಯಗಳಲ್ಲಿ ಎಷ್ಟು ಮಹಿಳಾ ಸಚಿವರು ಇದ್ದಾರೆ ? ಎಷ್ಟು ಮಹಿಳಾ ಮುಖ್ಯಮಂತ್ರಿಗಳು ? ತಮ್ಮದೇ ಪಕ್ಷದಲ್ಲಿ ಎಷ್ಟು ಮಹಿಳಾ ರಾಜ್ಯಾಧ್ಯಕ್ಷರು ಇದ್ದಾರೆ? ಮಹಿಳಾ ಸಬಲೀಕರಣದ ಬಗ್ಗೆ ಉಪದೇಶ ನೀಡುವ ಮೊದಲು ಈ ಅಂಕಿಅಂಶಗಳನ್ನು ದೇಶದ ಜನತೆಗೆ ತಿಳಿಸಬೇಕು ಎಂದು ಹೆಗ್ಡೆ ಆಗ್ರಹಿಸಿದ್ದಾರೆ.
ಕಾಂಗ್ರೆಸ್ ಪಕ್ಷವು ಹಲವು ದಶಕಗಳಿಂದ ಮಹಿಳೆಯರಿಗೆ ಸಾರ್ವಜನಿಕ ಜೀವನದ ಎಲ್ಲ ಕ್ಷೇತ್ರಗಳಲ್ಲಿ, ವಿಶೇಷವಾಗಿ ಶಾಸನ ಮಂಡಳಿಗಳಲ್ಲಿ, ಸಮರ್ಪಕ ಪ್ರತಿನಿಧಿತ್ವ ದೊರಕಬೇಕು ಎಂಬ ನಿಲುವನ್ನು ಹೊಂದಿದ್ದು, ಅದರಲ್ಲಿ ಯಾವುದೇ ಬದಲಾವಣೆ ಇಲ್ಲ. ಬಿಜೆಪಿಯ ಮಹಿಳಾ ಕಾಳಜಿ ನಿಜವಾದದ್ದೇ ಆಗಿದ್ದರೆ, ಡಿಲಿಮಿಟೇಶನ್ ಮಸೂದೆಯನ್ನು ಬೇರ್ಪಡಿಸಿ, ಮಹಿಳಾ ಮೀಸಲಾತಿ ಮಸೂದೆಯನ್ನು ಪ್ರತ್ಯೇಕವಾಗಿ, ಸ್ಪಷ್ಟವಾಗಿ, ಪ್ರಸ್ತುತ ಲೋಕಸಭೆಯಲ್ಲಿ ಮಂಡಿಸಲಿ. ಅಂತಹ ಮಸೂದೆಗೆ ಕಾಂಗ್ರೆಸ್ ಪಕ್ಷವು ಯಾವುದೇ ಸಂಶಯವಿಲ್ಲದೆ ಬೆಂಬಲ ನೀಡುತ್ತದೆ ಎಂದು ಜಯಪ್ರಕಾಶ್ ಹೆಗ್ಡೆ ಹೇಳಿದ್ದಾರೆ.
