ಪಶ್ಚಿಮ ಏಷ್ಯಾ ಬಿಕ್ಕಟ್ಟಿನಿಂದಾಗಿ 2027ರ ಹಣಕಾಸು ವರ್ಷದಲ್ಲಿ ಬೆಳವಣಿಗೆಯ ಅಂದಾಜುಗಳು ಗಣನೀಯವಾಗಿ ಕುಸಿಯುವ ಅಪಾಯವಿದೆ ಎಂದು ಅನಂತ ನಾಗೇಶ್ವರನ್ ಹೇಳಿದ್ದಾರೆ. ಹಾಗೂ ಸರ್ಕಾರದ ವೆಚ್ಚಗಳ ಆದ್ಯತೆಯನ್ನು ಬದಲಿಸಲು ಕರೆ ನೀಡಿದ್ದಾರೆ.
2027ರಲ್ಲಿ ಜಿಡಿಪಿ ಶೇಕಡ 6.8ರಿಂದ 7.2ರ ನಡುವೆ ಇರಬಹುದು ಎಂದು ಅಂದಾಜು ಮಾಡಲಾಗಿತ್ತು. ಫೆಬ್ರವರಿ 27 ರಂದು ಜಿಡಿಪಿಯ ಆಧಾರ ವರ್ಷವನ್ನು ಪರಿಷ್ಕರಣೆ ಮಾಡಿದ ಮೇಲೆ ನಾಗೇಶ್ವರನ್ ಅವರು 2027ರ ಜಿಡಿಪಿ ಅಂದಾಜನ್ನು ಪರಿಷ್ಕರಿಸಿ ಅದು ಶೇಕಡಾ 7 – 7.4ಕ್ಕೆ ಇರುತ್ತದೆ ಎಂದು ಆಶಾಭಾವನೆ ವ್ಯಕ್ತಪಡಿಸಿದ್ದರು.
ಆದರೆ ಇತ್ತೀಚಿನ ವರದಿಯಲ್ಲಿ “ಈ ಸಂಖ್ಯೆಯಲ್ಲಿ ಗಣನೀಯ ಕುಸಿತದ ಸಾಧ್ಯತೆಯಿದೆ.” ಎಂದು ಹೇಳಿದ್ದಾರೆ. ಅಷ್ಟೆ ಅಲ್ಲ “ಚಾಲ್ತಿ ಖಾತೆಯ ಕೊರತೆಯು ಕೂಡ 2027ರಲ್ಲಿ ಗಮನಾರ್ಹವಾಗಿ ಹೆಚ್ಚಾಗಲಿದೆ” ಎಂದು ಆರ್ಥಿಕ ವ್ಯವಹಾರಗಳ ಇಲಾಖೆ ಸಿದ್ಧಪಡಿಸಿದ ‘ಮಾಸಿಕ ಆರ್ಥಿಕ ವಿಮರ್ಶೆ’ಯ ಮುನ್ನುಡಿಯಲ್ಲಿ ಅವರು ತಿಳಿಸಿದ್ದಾರೆ.
ಪರಿಣಾಮ ಬೀರಬಹುದಾದ ನಾಲ್ಕು ಕಾರಣಗಳು
ಈ ಯುದ್ಧದ ಪರಿಣಾಮವು ಭಾರತದ ಮೇಲೆ ನಾಲ್ಕು ರೀತಿಯಲ್ಲಿ ಆಗಬಹುದು ಎಂದು ಕಳೆದ ತಿಂಗಳು ಅವರು ಬರೆದಿದ್ದರು. ಅದನ್ನು ಮತ್ತೆ ಈ ಮುನ್ನುಡಿಯಲ್ಲಿ ಉಲ್ಲೇಖಿಸಿದ್ದಾರೆ:
- ತೈಲ, ಆನಿಲ ಮತ್ತು ರಸಗೊಬ್ಬರಗಳ ಪೂರೈಕೆಯಲ್ಲಿ ವ್ಯತ್ಯಯ ಮತ್ತು ಮುಖ್ಯವಾಗಿ ರಫ್ಟಿನ ಮೇಲೆ ಪರಿಣಾಮ,
- ಹೆಚ್ಚಿನ ಆಮದು ಬೆಲೆಗಳು.
- ಹೆಚ್ಚಿನ ಲಾಜಿಸ್ಟಿಕ್ಸ್ ವೆಚ್ಚಗಳು (ಉದಾಹರಣೆಗೆ, ಸರಕು ಸಾಗಣೆ ಮತ್ತು ವಿಮೆ).
- ಗಲ್ಫ್ ದೇಶಗಳಲ್ಲಿನ ಭಾರತೀಯರಿಂದ ಬರುವ ಹಣದ ವರ್ಗಾವಣೆಯಲ್ಲಿ ಸಂಭವನೀಯ ಕುಸಿತ.
“ಆರ್ಥಿಕ ಪ್ರಗತಿ, ಹಣದುಬ್ಬರ, ಹಣಕಾಸಿನ ಸಮತೋಲನ ಮತ್ತು ಬಾಹ್ಯ ಸಮತೋಲನಗಳ ಮೇಲೆ ಈ ನಾಲ್ಕು ಅಂಶಗಳು ಒಟ್ಟಾರೆಯಾಗಿ ಬೀರುವ ಪರಿಣಾಮ ಗಣನೀಯವಾಗಿರುವ ಸಾಧ್ಯತೆಗಳಿವೆ” ಎಂದು ಅವರು ತಿಳಿಸಿದ್ದಾರೆ.
ಅತಿ ಹೆಚ್ಚು ತೊಂದರೆಗೊಳಗಾದ ಮತ್ತು ದುರ್ಬಲ ವ್ಯವಹಾರಗಳಿಗೆ ಹಾಗೂ ಕುಟುಂಬಗಳಿಗೆ ಭಾರತವು ತಕ್ಷಣದ ಪರಿಹಾರವನ್ನು ನೀಡಬೇಕಾದ ಅಗತ್ಯವಿದೆ. ಅದೇ ಸಮಯದಲ್ಲಿ, ಸಂಘರ್ಷದಿಂದ ಉದ್ಭವಿಸಿರುವ ಆಯಕಟ್ಟಿನ ಮತ್ತು ದೀರ್ಘಕಾಲೀನ ಅಗತ್ಯಗಳನ್ನು ಪೂರೈಸಲು (ಕೇವಲ ಇಂಧನಕ್ಕೆ ಸಂಬಂಧಿಸಿದಲ್ಲದೆ, ಹಲವಾರು ಇತರ ಸರಕು ಮತ್ತು ಸಾಮಗ್ರಿಗಳಲ್ಲಿ ಬಫರ್ ದಾಸ್ತಾನುಗಳನ್ನು ನಿರ್ಮಿಸುವಂತಹ ಕ್ರಮಗಳಿಗಾಗಿ) ಹಣಕಾಸನ್ನು ಹೊಂದಿಸಿಕೊಳ್ಳಬೇಕಾಗಿದೆ ಎಂದು ಅವರು ಹೇಳಿದ್ದಾರೆ.
ಮಾರ್ಚ್ 2026ರ ವರದಿಯ ಪ್ರಕಾರ, ಭಾರತದ ಆರ್ಥಿಕತೆಯ ವೇಗ ಸ್ವಲ್ಪ ತಗ್ಗಿದೆ. ಇದಕ್ಕೆ ಜಾಗತಿಕವಾಗಿ ನಡೆಯುತ್ತಿರುವ ವಿದ್ಯಮಾನಗಳೇ ಮುಖ್ಯ ಕಾರಣ ಎನ್ನುತ್ತಾರೆ ನಾಗೇಶ್ವರನ್.
ಸರಕು ಸಾಗಾಟ: ಮಾರ್ಚ್ 22ರವರೆಗೆ ಸರಕು ಸಾಗಾಟದ ಬಿಲ್‌ಗಳ (E-way bills) ಸಂಖ್ಯೆ ಕಳೆದ ತಿಂಗಳಿಗೆ ಹೋಲಿಸಿದರೆ ಶೇ. 5.3 ರಷ್ಟು ಕಡಿಮೆಯಾಗಿದೆ. ಅಂದರೆ ಸಾಮಾನಿನ ಓಡಾಟ ಸ್ವಲ್ಪ ಕಡಿಮೆಯಾಗಿದೆ ಎಂದರ್ಥ. ಆದರೆ, ಕಳೆದ ವರ್ಷಕ್ಕೆ ಹೋಲಿಸಿದರೆ ಇದು ಇನ್ನೂ ಶೇ. 9.4ರಷ್ಟು ಹೆಚ್ಚಿಗೆಯೇ ಇದೆ.
ಉತ್ಪಾದನೆ: ಪೆಟ್ರೋಲ್, ಡೀಸೆಲ್ ಅಥವಾ ಇಂಧನದ ಬೆಲೆಗಳು ಏರಿಕೆಯಾದ ಕಾರಣ, ಕಂಪನಿಗಳ ಉತ್ಪಾದನಾ ವೇಗವು ಸ್ವಲ್ಪ ಮಂದಗತಿಯಲ್ಲಿದೆ.
ಖರೀದಿಸುವ ಆಸಕ್ತಿ: ಇಷ್ಟೆಲ್ಲಾ ಆದರೂ ಜನರ ಬೇಡಿಕೆ ಮಾತ್ರ ಕಡಿಮೆಯಾಗಿಲ್ಲ. ಹೊಸ ವಾಹನಗಳ ನೋಂದಣಿ ಶೇ. 19.1 ರಷ್ಟು ಹೆಚ್ಚಾಗಿದೆ ಮತ್ತು ಜನರು ಡಿಜಿಟಲ್ ಮೂಲಕ (UPI ಇತ್ಯಾದಿ) ಹಣ ಪಾವತಿ ಮಾಡುವುದು ಕೂಡ ವೇಗವಾಗಿ ಬೆಳೆಯುತ್ತಿದೆ.
ಗ್ರಾಮೀಣ ಪ್ರದೇಶಗಳ ಸ್ಥಿತಿ: ಹಳ್ಳಿಗಳಲ್ಲಿ ಜನರ ಆರ್ಥಿಕ ಉತ್ಸಾಹ ಸ್ವಲ್ಪ ಕಡಿಮೆಯಾದಂತೆ ಕಂಡರೂ, ಅಲ್ಲಿನ ಜನರು ವಸ್ತುಗಳನ್ನು ಖರೀದಿಸುವುದು ಮಾತ್ರ ಹೆಚ್ಚಾಗುತ್ತಿದೆ.
ಆನಂತ ನಾಗೇಶ್ವರನ್ ಇಂತಹ ಸಂದರ್ಭದಲ್ಲೂ, ಪರಿಸ್ಥಿತಿ ಮಂಕಾಗದಂತೆ ಸರ್ಕಾರ ಎಚ್ಚರಿಕೆ ವಹಿಸುತ್ತಿದೆ. ಜನರಿಗೆ ಇಂಧನದ ಕೊರತೆಯಾಗದಂತೆ ನೋಡಿಕೊಳ್ಳಲು ಮತ್ತು ಬೆಲೆ ಏರಿಕೆಯನ್ನು ತಡೆಗಟ್ಟಲು ಸರ್ಕಾರ ಕ್ರಮಗಳನ್ನು ಕೈಗೊಳ್ಳುತ್ತಿದೆ ಎಂದು ತಿಳಿಸಿದ್ದಾರೆ.
-ಅನಂತ ನಾಗೇಶ್ವರನ್
ಆರ್ಥಿಕತೆಯ ಕುರಿತು, ಅರ್ಥಶಾಸ್ತ್ರದ ಕುರಿತು ಮತ್ತು ಈ ವಿಷಯದಲ್ಲಿ ಜಗತ್ತಿನಲ್ಲಿ ನಡೆಯುವ ಹಲವಾರು ವಿದ್ಯಮಾನಗಳ ಕುರಿತು ಈದಿನ.ಕಾಮ್‌ನಲ್ಲಿ ಪ್ರಕಟವಾಗುತ್ತಿರುವ ಈ ಬರೆಹಗಳು ಮೂಲದಲ್ಲಿ ಡಾ.ಟಿ.ಎಸ್.ವೇಣುಗೋಪಾಲ್‌ ಮತ್ತು ಡಾ.ಶೈಲಜಾ ಅವರು ಹೊರತರುತ್ತಿರುವ ʼಅರ್ಥʼ ಎಂಬ ಇ-ಮ್ಯಾಗಜೀನ್‌ನಲ್ಲಿ ಪ್ರಕಟವಾದಂಥವು. ಇವುಗಳನ್ನು ನಮ್ಮಲ್ಲಿ ಪ್ರಕಟಿಸಲು ಅನುಮತಿ ಕೊಟ್ಟಿರುವ ಅವರಿಗೆ ಹೃತ್ಪೂರ್ವಕ ಧನ್ಯವಾದಗಳು. ಮೂಲ ಲೇಖನಗಳ ಜೊತೆಗೆ ಅವರ ಕೆಲವು ಪುಸ್ತಕಗಳನ್ನು ನೇರವಾಗಿ ಓದಲು ಬಯಸುವವರು ಇಲ್ಲಿ ಕ್ಲಿಕ್ ಮಾಡಿ.
lokayatha.com
ಅರ್ಥಶಾಸ್ತ್ರವನ್ನು ಕುರಿತು ಪ್ರಕಟವಾಗಿರುವ ಬರಹಗಳು ಇಲ್ಲವೆ.
