ಸೈನಿಕ ಶಾಲೆಗಳನ್ನು ‘ಖಾಸಗೀಕರಣ’ ಮಾಡುವ ಕೇಂದ್ರ ಸರ್ಕಾರದ ಕ್ರಮವನ್ನು ಖಂಡಿಸಿ ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರು ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರಿಗೆ ಪತ್ರ ಬರೆದಿದ್ದಾರೆ. ಕೇಂದ್ರ ಸರ್ಕಾರವು ತಮ್ಮ ನಿರ್ಧಾರವನ್ನು ಹಿಂಪಡೆಯಬೇಕು. ಅದಕ್ಕಾಗಿ, ರಾಷ್ಟ್ರಪತಿ ಸಹಿ ಹಾಕಿರುವ ತಿಳುವಳಿಕೆ ಪತ್ರ (ಎಂಒಯು) ಅನ್ನು ರದ್ದುಗೊಳಿಸಬೇಕು ಎಂದು ಒತ್ತಾಯಿಸಿದ್ದಾರೆ.
ದೇಶದಲ್ಲಿ 33 ಸೈನಿಕ ಶಾಲೆಗಳಿವೆ. ಅವು ರಕ್ಷಣಾ ಸಚಿವಾಲಯದ (ಎಂಒಡಿ) ಅಡಿಯಲ್ಲಿರುವ ಸ್ವಾಯತ್ತ ಸಂಸ್ಥೆಯಾದ ಸೈನಿಕ್ ಸ್ಕೂಲ್ಸ್ ಸೊಸೈಟಿ (ಎಸ್‌ಎಸ್‌ಎಸ್‌) ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸಂಪೂರ್ಣ ಸರ್ಕಾರಿ ಅನುದಾನಿತ ಸಂಸ್ಥೆಗಳಾಗಿವೆ. ಅವುಗಳನ್ನು ಖಾಸಗೀಕರಣ ಮಾಡುವುದು ದೇಶದ ಭದತ್ರೆಗೆ ಅಪಾಯಕಾರಿ ಎಂದು ಖರ್ಗೆ ಹೇಳಿದ್ದಾರೆ.
“ಭಾರತೀಯ ಪ್ರಜಾಪ್ರಭುತ್ವದಲ್ಲಿ ಸಶಸ್ತ್ರ ಪಡೆಗಳನ್ನು ರಾಜಕೀಯದಿಂದ ಸಾಂಪ್ರದಾಯಿಕವಾಗಿ ದೂರವಿಡಲಾಗಿದೆ. ಆದರೆ, ಕೇಂದ್ರ ಸರ್ಕಾರವು ಅದನ್ನು ಖಾಸಗೀಕರಣ ಮಾಡಲು ಮುಂದಾರುವುದು ಆತಂಕಕಾರಿ” ಎಂದಿದ್ದಾರೆ.
“ಸಂಸ್ಥೆಗಳನ್ನು ದುರ್ಬಲಗೊಳಿವುದು ಆರ್ಎಸ್ಎಸ್ ತನ್ನ ಸಿದ್ಧಾಂತವನ್ನು ಯದ್ವಾತದ್ವಾ ಹೇರುವ ತಂತ್ರದ ಭಾಗವಾಗಿದೆ. ಸಶಸ್ತ್ರ ಪಡೆಗಳ ಸ್ವಭಾವ ಮತ್ತು ನೈತಿಕತೆಯ ಮೇಲೆ ಬಿಜೆಪಿ ಹೊಡೆತ ನೀಡುತ್ತಿದೆ. ಸೈನಿಕ ಶಾಲೆಗಳನ್ನು ಖಾಸಗೀಕರಣ ಮಾಡಿ, ಅವುಗಳಲ್ಲಿ ಆರ್ಎಸ್ಎಸ್ ಸಿದ್ದಾಂತವನ್ನು ಹೇರುವುದು ಸಶಸ್ತ್ರ ಪಡೆಗಳ ಅಂತರ್ಗತತೆಯನ್ನು ನಾಶಪಡಿಸುವುದು ಮಾತ್ರವಲ್ಲದೆ, ಸೈನಿಕ ಶಾಲೆಗಳ ರಾಷ್ಟ್ರೀಯ ಸ್ವರೂಪಕ್ಕೂ ಹಾನಿ ಮಾಡುತ್ತದೆ. ಅಲ್ಲದೆ, ಧಾರ್ಮಿಕ/ಕಾರ್ಪೊರೇಟ್/ಸಾಮಾಜಿಕ/ಸಾಂಸ್ಕೃತಿಕ ಧೋರಣೆಗಳ ಮೂಲಕ ಸಶಸ್ತ್ರ ಪಡೆಗಳ ಪಾತ್ರದ ಮೇಲೆ ಪ್ರಭಾವ ಬೀರುತ್ತದೆ” ಎಂದು ಖರ್ಗೆ ಹೇಳಿದ್ದಾರೆ.
“ಸೈನಿಕ ಶಾಲೆಗಳ ಖಾಸಗೀಕರಣವನ್ನು ರಾಷ್ಟ್ರೀಯ ಹಿತಾಸಕ್ತಿಗಾಗಿ ಕಾಂಗ್ರೆಸ್ ವಿರೋಧಿಸುತ್ತದೆ. ಆ ನೀತಿಯನ್ನು ಹಿಂಪಡೆಯಬೇಕು ಮತ್ತು ಎಂಒಯುಗಳನ್ನು ರದ್ದುಗೊಳಿಸಬೇಕೆಂದು ಒತ್ತಾಯಿಸುತ್ತದೆ. ಖಾಸಗೀಕರಣವನ್ನು ರದ್ದುಗೊಳಿಸುವುದರಿಂದ ಸಶಸ್ತ್ರ ಪಡೆಗಳ ಶಾಲೆಗಳಲ್ಲಿ ಕಲಿಯುವವರು ರಾಷ್ಟ್ರದ ಸೇವೆಗೆ ಅಗತ್ಯವಾದ ಪಾತ್ರ, ದೃಷ್ಟಿ ಮತ್ತು ಗೌರವವನ್ನು ಉಳಿಸಿಕೊಳ್ಳುತ್ತಾರೆ” ಎಂದು ಖರ್ಗೆ ಬರೆದಿದ್ದಾರೆ.
ಸರ್ಕಾರವು ಪರಿಚಯಿಸಿದ ಹೊಸ ಪಿಪಿಪಿ ಮಾದರಿಯನ್ನು ಬಳಸಿಕೊಂಡು ಸೈನಿಕ ಶಾಲೆಗಳನ್ನು ಖಾಸಗೀಕರಣಗೊಳಿಸಲಾಗುತ್ತಿದೆ ಎಂದು ಸರ್ಕಾರ ಹೇಳಿದೆ. ಈ ಪೈಕಿ, 62% ಶಾಲೆಗಳು ಬಿಜೆಪಿ-ಆರ್ಎಸ್ಎಸ್ ನಾಯಕರ ಒಡೆತನಕ್ಕೆ ಒಳಪಡುತ್ತಿವೆ.
“ದೇಶದಲ್ಲಿ ಅಧಿಕಾರ ನಡೆಸಿದ ಎಲ್ಲ ಕೇಂದ್ರ ಸರ್ಕಾರಗಳು ಸಶಸ್ತ್ರ ಪಡೆಗಳು ಮತ್ತು ಅದರ ಅಂಗ ಸಂಸ್ಥೆಗಳನ್ನು ರಾಜಕೀಯ ಸಿದ್ಧಾಂತಗಳಿಂದ ದೂರವಿಟ್ಟಿವೆ. ಆ ಕಾರಣದಿಂದಲೇ, ನಮ್ಮ ಪ್ರಜಾಪ್ರಭುತ್ವವು ದೃಢವಾಗಿ ಅಭಿವೃದ್ಧಿ ಹೊಂದುತ್ತಿದೆ. ಜಗತ್ತಿನಾದ್ಯಂತ ಆಡಳಿತಗಳು ಮಿಲಿಟರಿ ಹಸ್ತಕ್ಷೇಪ ಮತ್ತು ರಕ್ಷಣಾ ಕಾನೂನಿನ ವಿಧ್ವಂಸಕತೆಗೆ ಬಿದ್ದಾಗಲೂ ಸಹ; ಭಾರತದ ಸರ್ಕಾರಗಳು ಮಿಲಿಟರಿಯಲ್ಲಿ ರಾಜಕೀಯ ಹಸ್ತಕ್ಷೇಪ ಮಾಡಿಲ್ಲ. ಆದರೆ, 2021ರಲ್ಲಿ ಮೋದಿ ನೇತೃತ್ವದ ಕೇಂದ್ರ ಸರ್ಕಾರವು ಸೈನಿಕ ಶಾಲೆಗಳನ್ನು ನಿರ್ಲಜ್ಜವಾಗಿ ಶಾಸಗೀಕರಣ ಮಾಡಲು ಪ್ರಾರಂಭಿಸಿದೆ” ಎಂದು ಖರ್ಗೆ ಕಿಡಿಕಾರಿದ್ದಾರೆ.
“ಇದರ ಪರಿಣಾಮವಾಗಿ, 100 ಹೊಸ ಶಾಲೆಗಳಲ್ಲಿ 40 ಶಾಲೆಗಳಿಗೆ ತಿಳುವಳಿಕೆ ಪತ್ರ (ಎಂಒಯು) ಸಹಿ ಮಾಡಲಾಗಿದೆ. ಈ 40 ಶಾಲೆಗಳ ಪೈಕಿ, 62% ರಷ್ಟು ಶಾಲೆಗಳಲ್ಲಿ ಆರ್ಎಸ್ಎಸ್-ಬಿಜೆಪಿಗೆ ಸೇರಿದ ವ್ಯಕ್ತಿಗಳು ಮತ್ತು ಸಂಸ್ಥೆಗಳೊಂದಿಗೆ ಒಡಂಬಡಿಕೆ ಮಾಡಿಕೊಳ್ಳಲಾಗಿದೆ. ಇದರಲ್ಲಿ ಒಬ್ಬ ಮುಖ್ಯಮಂತ್ರಿ ಕುಟುಂಬ, ಹಲವಾರು ಶಾಸಕರು, ಬಿಜೆಪಿ ಪದಾಧಿಕಾರಿಗಳು ಮತ್ತು ಆರ್ಎಸ್ಎಸ್ ಮುಖಂಡರು ಸೇರಿದ್ದಾರೆ. ಸ್ವತಂತ್ರ ಸೈನಿಕ ಶಾಲೆಗಳನ್ನು ರಾಜಕೀಯಗೊಳಿಸುವುದು ನಿರ್ಲಜ್ಜ ಹೆಜ್ಜೆಯಾಗಿದೆ” ಎಂದು ಕಾಂಗ್ರೆಸ್ ಅಧ್ಯಕ್ಷರು ಆರೋಪಿಸಿದ್ದಾರೆ.
ಸೈನಿಕ ಶಾಲೆಗಳು ರಾಷ್ಟ್ರೀಯ ರಕ್ಷಣಾ ಅಕಾಡೆಮಿ ಮತ್ತು ಭಾರತೀಯ ನೌಕಾ ಅಕಾಡೆಮಿಗೆ ಕೆಡೆಟ್‌ಗಳನ್ನು ಕಳುಹಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಸೈನಿಕ ಶಾಲೆಗಳನ್ನು 1961ರಲ್ಲಿ ಭಾರತದ ಮೊದಲ ಪ್ರಧಾನಿ ಪಂಡಿತ್ ನೆಹರು ಸ್ಥಾಪಿಸಿದ್ದರು. ಅಂದಿನಿಂದ ಮಿಲಿಟರಿ ನಾಯಕತ್ವ ಮತ್ತು ಶ್ರೇಷ್ಠತೆಗೆ ದಾರಿದೀಪವಾಗಿವೆ. ಅಎರೆ, ಅವುಗಳನ್ನು ಖಾಸಗೀಕರಣ ಮಾಡಲಾಗುತ್ತಿದೆ.
“ಹೊಸ ಸೈನಿಕ ಶಾಲೆಗಳನ್ನು ಕೇಂದ್ರ ಸರ್ಕಾರವು ತಮ್ಮ ರಾಜಕೀಯ ಅಥವಾ ಸೈದ್ಧಾಂತಿಕ ಸಂಬಂಧಗಳ ಆಧಾರದ ಮೇಲೆ ಸಂಸ್ಥೆಗಳಿಗೆ ಹಂಚುತ್ತಿದೆ” ಎಂದು ಖರ್ಗೆ ಆರೋಪಿಸಿದ್ದಾರೆ.
