ಪ್ರಧಾನಿ ನರೇಂದ್ರ ಮೋದಿ ಮೂರನೇ ಅವಧಿಗೆ ಅಧಿಕಾರವನ್ನು ಸ್ವೀಕರಿಸಿ ಎರಡು ದಿನಗಳು ಆಗುತ್ತಿದ್ದಂತೆ “ಎನ್‌ಡಿಎ ಸರ್ಕಾರ ಐದು ವರ್ಷ ಉಳಿಯಲ್ಲ” ಎಂದು ಕಾಂಗ್ರೆಸ್ ನಾಯಕ ಗೌರವ್ ಗೊಗೊಯ್ ಭವಿಷ್ಯ ನುಡಿದಿದ್ದಾರೆ.
ಸುದ್ದಿಸಂಸ್ಥೆಯ ಪಿಟಿಐ ಪ್ರಧಾನ ಕಚೇರಿಯಲ್ಲಿ ಸಂಪಾದಕರೊಂದಿಗೆ ನಡೆದ ಸಂದರ್ಶನದಲ್ಲಿ ಮಾತನಾಡಿದ ಗೌರವ್ ಗೊಗೊಯ್, “ಸಮ್ಮಿಶ್ರ ಎನ್‌ಡಿಎ ಸರ್ಕಾರವು ಪೂರ್ಣಾವಧಿಯಲ್ಲಿ ಉಳಿಯುವುದಿಲ್ಲ. ಮೋದಿ ಅವರ ನಾಯಕತ್ವದ ಶೈಲಿಯು ಅವರು ಐದು ವರ್ಷಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸುವ ವಿಶ್ವಾಸ ಹುಟ್ಟಿಸಲ್ಲ” ಎಂದು ಹೇಳಿದ್ದಾರೆ.
ಇದನ್ನು ಓದಿದ್ದೀರಾ? ನೂತನ ಎನ್‌ಡಿಎ ಸರ್ಕಾರ| ಏಳು ಮಹಿಳೆಯರು ಕೇಂದ್ರ ಸಚಿವರಾಗಿ ಪ್ರಮಾಣ ವಚನ ಸ್ವೀಕಾರ
“ಇಂಡಿಯಾ ಒಕ್ಕೂಟವು 236 ಸಂಸದರನ್ನು ಹೊಂದಿದ್ದು ಎನ್‌ಡಿಎ ಸರ್ಕಾರವು ಮಸೂದೆಗಳನ್ನು ಬೇಕಾಬಿಟ್ಟಿ ಜಾರಿ ಮಾಡಲು ಸಾಧ್ಯವಿಲ್ಲ. ನಮ್ಮನ್ನು ಬೆದರಿಸಲು ಮತ್ತು ನಮ್ಮನ್ನು ಅಮಾನತುಗೊಳಿಸಲು ಸಾಧ್ಯವಿಲ್ಲ” ಎಂದಿದ್ದಾರೆ. “ಕಳೆದ ವರ್ಷ ಬಿಜೆಪಿ ಸರ್ಕಾರದವರು 146 ಸಂಸದರನ್ನು ಅಮಾನತುಗೊಳಿಸಿದ್ದರು. ಈ ಬಾರಿ 236 ಸಂಸದರನ್ನು ಅಮಾನತುಗೊಳಿಸುತ್ತಾರೆಯೇ” ಎಂದು ಕಾಂಗ್ರೆಸ್ ನಾಯಕ ಪ್ರಶ್ನಿಸಿದರು.
ಎನ್‌ಡಿಎ ಮಿತ್ರಪಕ್ಷಗಳಾದ ಟಿಡಿಪಿಯ ಚಂದ್ರಬಾಬು ನಾಯ್ಡು ಮತ್ತು ಜೆಡಿಯುನ ನಿತೀಶ್ ಕುಮಾರ್ ಅವರು ಸರ್ಕಾರ ರಚನೆಯ ಸಂದರ್ಭದಲ್ಲಿ ಬಿಜೆಪಿಗೆ ಮಣಿದಿದ್ದಾರೆ ಎಂಬುವುದನ್ನು ತಳ್ಳಿಹಾಕಿದ ಗೊಗೊಯ್, “ಅತ್ಯಂತ ಚಾಣಾಕ್ಷ ರಾಜಕೀಯ ಮನಸ್ಸುಗಳನ್ನು ಅವರು ಹೊಂದಿದ್ದು, ಕಾಲ ಮಾತ್ರ ನಮಗೆ ಉತ್ತರ ನೀಡುತ್ತದೆ. ಈಗಲೇ ನಾವು ಅವರ ಉದ್ಧೇಶವನ್ನು ನಿರ್ಣಯಿಸಬಾರದು” ಎಂದರು.
ಇದನ್ನು ಓದಿದ್ದೀರಾ? ಎನ್‌ಡಿಎ ನಾಯಕರ ಸಭೆ ಮುಕ್ತಾಯ: ಪ್ರಧಾನಿ ಅಭ್ಯರ್ಥಿಯಾಗಿ ನರೇಂದ್ರ ಮೋದಿ ಅವಿರೋಧ ಆಯ್ಕೆ
“ಮೋದಿ ಪ್ರಧಾನಿಯಾಗುವವರೆಗೆ ಸಂಸದೀಯ ಪ್ರಜಾಪ್ರಭುತ್ವದ ಬಗ್ಗೆ ಬಿಜೆಪಿಯ ಧೋರಣೆ ಬದಲಾಗಬಹುದು ಎಂದು ನಿರೀಕ್ಷಿಸುವುದಿಲ್ಲ. ತಮ್ಮ ಪಕ್ಷದೊಳಗಿದ್ದರೂ ಅವರು ತಮ್ಮ ವಿಧಾನವನ್ನು ಬದಲಾಯಿಸುವ ನಮ್ಯತೆ ಹೊಂದಿಲ್ಲ. ಈಗಲೂ ಅವರ ಮಿತ್ರಪಕ್ಷಗಳು ವಿಶೇಷ ಸ್ಥಾನಮಾನ, ಜಾತಿ ಗಣತಿ, ಅಗ್ನಿಪಥ ಯೋಜನೆ ಹಿಂಪಡೆಯಲು ಒತ್ತಾಯಿಸುತ್ತಲೇ ಇರುತ್ತದೆ. ಆದರೆ ಮಿತ್ರಪಕ್ಷಗಳ ಬಗೆಗಿನ ಅವರ ಧೋರಣೆ ಬದಲಾಗುವುದಿಲ್ಲ” ಎಂದು ತಿಳಿಸಿದರು.
ಕಾಂಗ್ರೆಸ್ ನಾಯಕ ಗೌರವ್ ಗೊಗೊಯ್ ಅಸ್ಸಾಂನ ಬಿಜೆಪಿ ಭದ್ರಕೋಟೆಯಾದ ಜೋರ್ಹತ್‌ನಿಂದ 1.44 ಲಕ್ಷಕ್ಕೂ ಹೆಚ್ಚು ಮತಗಳ ಅಂತರದಿಂದ ಗೆಲುವು ಸಾಧಿಸಿದ್ದಾರೆ.
