10ನೇ ತರಗತಿಯ ಪಠ್ಯಕ್ರಮದಿಂದ ಪ್ರಮುಖ ವಿಷಯಗಳನ್ನು ತೆಗೆದು ಹಾಕಿರುವ ಕೇಂದ್ರ ಸರ್ಕಾರದ ನಡೆಯನ್ನು ಬಾಲಿವುಡ್‌ನ ಹಿರಿಯ ನಟ ನಾಸೀರುದ್ದೀನ್‌ ಶಾ ವಿರೋಧಿಸಿದ್ದಾರೆ. ಜೊತೆಗೆ ʼಇಸ್ರೋʼ ಮುಖ್ಯಸ್ಥರ ಮೇಲೂ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಸಂದರ್ಶನವೊಂದರಲ್ಲಿ ಮಾತನಾಡಿರುವ ನಾಸೀರುದ್ದೀನ್‌ ಶಾ, “ದಿನ ಕಳೆಯುತ್ತಾ ನಮ್ಮ ದೇಶದ ಜನರಲ್ಲಿ ವಿಜ್ಞಾನದ ಕುರಿತ ಕುತೂಹಲ ಕ್ಷೀಣಿಸುತ್ತಿದೆ. ಜನ ವಿಜ್ಞಾನದಿಂದ ವಿಮುಖರಾಗಿ ಮೂಡನಂಬಿಕೆಯತ್ತ ವಾಲಿಕೊಳ್ಳುತ್ತಿದ್ದಾರೆ. 10ನೇ ತರಗತಿಯ ಪಠ್ಯಪುಸ್ತಕದಿಂದ ವಿಜ್ಞಾನಿ ಚಾರ್ಲ್ಸ್‌ ಡಾರ್ವಿನ್‌ ಅವರ ʼದಿ ಎವಲ್ಯೂಷನ್‌ ಥಿಯರಿʼ ವಿಷಯವನ್ನು ತೆಗೆದು ಹಾಕಲಾಗಿದೆ. ಹಾಗೇ ಬಿಟ್ಟರೆ ಅಲ್ಬರ್ಟ್‌ ಐನ್‌ಸ್ಟೈನ್‌ ಕುರಿತ ವಿಷಯಗಳನ್ನು ಕಿತ್ತೆಸೆಯುತ್ತಾರೆ. ಇಂತಹ ಮಹಾನ್‌ ಚೇತನಗಳ ವಿಚಾರಗಳಿಲ್ಲದ ನಮ್ಮ ಪಠ್ಯಪುಸ್ತಕಗಳು ಹೇಗಿರಲಿವೆ ಎಂದು ಊಹಿಸಿದ್ದೀರಾ” ಎಂದು ಸಾರ್ವಜನಿಕರಿಗೆ ಪ್ರಶ್ನೆ ಹಾಕಿದ್ದಾರೆ.
ಇದೇ ವೇಳೆ ಇಸ್ರೋ ಮುಖ್ಯಸ್ಥರ ಬಗ್ಗೆ ಕೂಡ ನಾಸೀರುದ್ದೀನ್‌ ಶಾ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. “ಇಸ್ರೋ ಮುಖ್ಯಸ್ಥೆ ಬಹುಶಃ ಮಹಿಳೆ ಎಂದುಕೊಳ್ಳುತ್ತೇನೆ. ಆಕೆ, ʼಎಲ್ಲ ವೈಜ್ಞಾನಿಕ ಆವಿಶ್ಕಾರಗಳು ಪುರಾಣಗಳಲ್ಲಿವೆ. ಪುರಾಣದಲ್ಲಿ ಹಿಂದೆಯೇ ದಾಖಲಾಗಿದ್ದ ಆವಿಶ್ಕಾರಗಳನ್ನು ತಮ್ಮದು ಎನ್ನುವಂತೆ ಯುರೋಪಿಯನ್ನರು ಬಿಂಬಿಸುತ್ತಿದ್ದಾರೆʼ ಎಂದು ತಪ್ಪು ಹೇಳಿಕೆ ನೀಡಿದ್ದಾರೆ. ಈ ರೀತಿ ಮಾತನಾಡುವವರ ಜೊತೆಗೆ ವಾದ ಮಾಡಿಯಾದರೂ ಏನು ಪ್ರಯೋಜನ” ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಇಳಯರಾಜ ಜನುಮದಿನ | ಸಂಗೀತ ಮಾಂತ್ರಿಕನ ಹೆಜ್ಜೆ ಗುರುತುಗಳು
ಮಕ್ಕಳ ವಿದ್ಯಾಭ್ಯಾಸಕ್ಕೆ ಹೊರೆಯಾಗಲಿವೆ ಎಂಬ ಕಾರಣ ನೀಡಿ 10ನೇ ತರಗತಿಯ ಪಠ್ಯಕ್ರಮದಿಂದ ʼಪೀರಿಯಾಡಿಕ್‌ ಟೇಬಲ್‌ʼ, ʼದಿ ಎವಲ್ಯೂಷನ್‌ ಥಿಯರಿʼ ಸೇರಿದಂತೆ 6 ಪ್ರಮುಖ ವಿಷಯಗಳನ್ನು ʼಎನ್‌ಸಿಇಆರ್‌ಟಿʼ ಇತ್ತೀಚೆಗಷ್ಟೇ ತೆಗೆದು ಹಾಕಿತ್ತು. ಸಂಸ್ಥೆಯ ಈ ನಡೆಗೆ ದೇಶವ್ಯಾಪಿಯಾಗಿ ವಿದ್ಯಾರ್ಥಿಗಳು ಮತ್ತು ಪೋಷಕರಿಂದ ವಿರೋಧ ವ್ಯಕ್ತವಾಗಿತ್ತು.
