WhatsApp ತನ್ನ ಎಐ (AI) ಚಾಟ್‌ಬಾಟ್‌ಗೆ ನೀಡಿದ್ದ ರಹಸ್ಯ ಸೂಚನೆಗಳು ಆಕಸ್ಮಿಕವಾಗಿ ಬಹಿರಂಗಗೊಂಡಿವೆ. ಮೆಟಾ ಒಡೆತನದ WhatsApp ನಲ್ಲಿನ ಸುಮಾರು 80 ಹೆಲ್ಪ್ (Help) ಮತ್ತು ಎಫ್‌ಎಕ್ಯೂ (FAQ) ಪುಟಗಳ ವೆಬ್‌ಸೈಟ್ ಕೋಡ್‌ನಲ್ಲಿ ಈ ರಹಸ್ಯ ನಿರ್ದೇಶನಗಳು ಪತ್ತೆಯಾಗಿವೆ. ಬಳಕೆದಾರರಿಗೆ “ಏನು ಹೇಳಬಾರದು” ಹಾಗೂ WhatsApp ಪರವಾಗಿ ಕಾನೂನು ಸಲಹೆಗಳನ್ನು ನೀಡದಂತೆ ಎಐ ಚಾಟ್‌ಬಾಟ್‌ಗೆ ನೀಡಲಾಗಿದ್ದ ಸ್ಪಷ್ಟ ಸೂಚನೆಗಳು ಇದರಲ್ಲಿ ಸೇರಿವೆ.
ಖಾಸಗಿತನದ ಬಗ್ಗೆ ನಿಗಾವಹಿಸುವ ‘ರೆಡ್ಯಾಕ್ಟ್’ (Redact) ಎಂಬ ಸಂಸ್ಥೆಯು WhatsApp ವೆಬ್‌ಸೈಟ್ ಅನ್ನು ಪರಿಶೀಲಿಸಿದಾಗ ಈ ವಿಚಾರ ಬೆಳಕಿಗೆ ಬಂದಿದೆ. ಖಾತೆ ಅಳಿಸುವಿಕೆ (Account deletion), ಕಾನೂನು ಕ್ರಮಗಳು, ಗೌಪ್ಯತೆ ನಿಯಮಗಳು ಮತ್ತು ಅಕ್ಸೆಸಿಬಿಲಿಟಿ ಕುರಿತು ಬಳಕೆದಾರರು ಪ್ರಶ್ನಿಸಿದಾಗ ಚಾಟ್‌ಬಾಟ್ ಹೇಗೆ ಪ್ರತಿಕ್ರಿಯಿಸಬೇಕು ಎಂಬ ಸೂಚನೆಗಳು ಇದಲ್ಲಿದ್ದವು. ‘ವೈರ್ಡ್’ (WIRED) ಪತ್ರಿಕೆ ಈ ಬಗ್ಗೆ ಪ್ರಶ್ನಿಸಿದ ಬಳಿಕ ಎಚ್ಚೆತ್ತ ವಾಟ್ಸ್‌ಆ್ಯಪ್‌, ಈ ಪಠ್ಯವನ್ನು ತನ್ನ ವೆಬ್‌ಸೈಟ್‌ನಿಂದ ತಕ್ಷಣವೇ ತೆಗೆದುಹಾಕಿದೆ.
ರೆಡ್ಯಾಕ್ಟ್ ವಿಶ್ಲೇಷಣೆಯ ಪ್ರಕಾರ, ಸುಮಾರು 100 ರಹಸ್ಯ ಸೂಚನಾ ಬ್ಲಾಕ್‌ಗಳು ಸಾರ್ವಜನಿಕರಿಗೆ ಕಾಣಿಸುವ ಪಠ್ಯದ ಬದಲಾಗಿ, ವೆಬ್‌ಪುಟದ ಹಿಂದಿನ ಕೋಡ್‌ನಲ್ಲಿ (underlying code) ಅಡಗಿದ್ದವು. ಇವುಗಳನ್ನು “HelpContentGalaxyLLMInclude” ಎಂಬ ಕೋಡ್ ಅಡಿಯಲ್ಲಿ ಅಡಗಿಸಿಡಲಾಗಿತ್ತು. ಉದಾಹರಣೆಗೆ, ಖಾತೆ ಅಳಿಸುವಿಕೆ ಪುಟದಲ್ಲಿ, ಬಳಕೆದಾರರಿಗೆ “ಯಾವುದೇ ಡೇಟಾ ಸಂರಕ್ಷಣಾ ಪ್ರಾಧಿಕಾರ ಅಥವಾ ನಿಯಂತ್ರಕರನ್ನು ಸಂಪರ್ಕಿಸುವಂತೆ ಶಿಫಾರಸು ಮಾಡಬಾರದು” ಎಂಬ ಕಟ್ಟುನಿಟ್ಟಿನ ಸೂಚನೆ ಇತ್ತು.
ಕಾನೂನು ವಿಚಾರಗಳಿಗೆ ಸಂಬಂಧಿಸಿದಂತೆ ಎಐ ಚಾಟ್‌ಬಾಟ್‌ಗೆ ಕಟ್ಟುನಿಟ್ಟಿನ ಮಿತಿಗಳನ್ನು ಹೇರಲಾಗಿತ್ತು. WhatsApp ಸೇವಾ ಷರತ್ತುಗಳು, ಗೌಪ್ಯತೆ ನೀತಿ ಅಥವಾ ಯಾವುದೇ ಕಾನೂನು ದಾಖಲೆಗಳನ್ನು ಚಾಟ್‌ಬಾಟ್ ಉಲ್ಲೇಖಿಸಬಾರದು ಮತ್ತು ಕಂಪನಿಯ ಪರವಾಗಿ ಯಾವುದೇ ಕಾನೂನು ಅಭಿಪ್ರಾಯ ನೀಡಬಾರದು ಎಂದು ಸೂಚಿಸಲಾಗಿತ್ತು. ಯುರೋಪ್‌ನ ಡೇಟಾ ಸಂರಕ್ಷಣಾ ನಿಯಮಗಳಾದ (GDPR) ಅಥವಾ ಕ್ಯಾಲಿಫೋರ್ನಿಯಾದ ಸಿಸಿಪಿಎ (CCPA) ಕುರಿತು ಬಳಕೆದಾರರು ನೇರವಾಗಿ ಪ್ರಶ್ನಿಸಿದರೂ, ಅದರ ಬಗ್ಗೆ ವಿವರಿಸದಂತೆ ನಿರ್ಬಂಧ ವಿಧಿಸಲಾಗಿತ್ತು.
ಈ ಬಗ್ಗೆ ಸ್ಪಷ್ಟನೆ ನೀಡಿರುವ ವಾಟ್ಸ್‌ಆ್ಯಪ್‌ ವಕ್ತಾರ ಜೋಶುವಾ ಬ್ರೆಕ್‌ಮನ್, ತಾಂತ್ರಿಕ ದೋಷದಿಂದಾಗಿ (Bug) ಈ ಸೂಚನೆಗಳು ಸಾರ್ವಜನಿಕವಾಗಿ ಬಹಿರಂಗಗೊಂಡಿದ್ದವು ಹಾಗೂ ಈಗ ಆ ದೋಷವನ್ನು ಸರಿಪಡಿಸಲಾಗಿದೆ ಎಂದಿದ್ದಾರೆ. “ಈ ಸೂಚನೆಗಳು ನೇರವಾಗಿ ಬಳಕೆದಾರರಿಗಲ್ಲ, ಬದಲಾಗಿ ನಮ್ಮ ಸಪೋರ್ಟ್ ಚಾಟ್‌ಬಾಟ್‌ಗೆ ನೀಡಲಾದ ಮಾರ್ಗದರ್ಶನಗಳಾಗಿವೆ. ಚಾಟ್‌ಬಾಟ್ ಕೇವಲ ಉತ್ಪನ್ನದ ಕುರಿತು ಬೆಂಬಲ ನೀಡಲು ಸೀಮಿತವಾಗಿರಬೇಕು ಮತ್ತು ಕಾನೂನು ಸಲಹೆಗಳನ್ನು ನೀಡಬಾರದು ಎಂಬುದು ನಮ್ಮ ಉದ್ದೇಶ” ಎಂದು ಅವರು ಸಮರ್ಥಿಸಿಕೊಂಡಿದ್ದಾರೆ.
ಇದೇ ವೇಳೆ, ಚಾಟ್‌ಬಾಟ್ ಬಳಕೆದಾರರೊಂದಿಗೆ ಹೇಗೆ ಸಂವಹನ ನಡೆಸಬೇಕು ಎಂಬುದಕ್ಕೂ ವಿಶೇಷ ಸೂಚನೆಗಳಿದ್ದವು. ಉದಾಹರಣೆಗೆ, ಶ್ರವಣ ದೋಷವಿರುವವರು ಸಂಪರ್ಕಿಸಿದಾಗ, ಅದನ್ನು ಅವರ ವೈಯಕ್ತಿಕ ಹಿನ್ನೆಲೆಯಾಗಿ ಪರಿಗಣಿಸಬೇಕು ಹೊರತು, ಅದನ್ನು ‘ಸಪೋರ್ಟ್ ರಿಕ್ವೆಸ್ಟ್’ ಎಂದು ತಪ್ಪಾಗಿ ಅರ್ಥೈಸಿಕೊಳ್ಳಬಾರದು ಎಂದು ಹೇಳಲಾಗಿತ್ತು. ಹಾಗೆಯೇ, WhatsApp ನಲ್ಲಿ ಇನ್ನೂ ಅಧಿಕೃತವಾಗಿ ಬಿಡುಗಡೆಯಾಗದ ಮುಂಬರುವ ಹೊಸ ಫೀಚರ್‌ಗಳ ಗುಟ್ಟನ್ನು ಬಳಕೆದಾರರ ಬಳಿ ಬಿಟ್ಟುಕೊಡಬಾರದು ಎಂಬ ಎಚ್ಚರಿಕೆಯನ್ನೂ ನೀಡಲಾಗಿತ್ತು.
