ಸಂವಿಧಾನ ಆಧಾರಿತ ಪ್ರಬುದ್ಧ ಹಾಗೂ ಸಮಾನತೆಯ ಭಾರತ ನಿರ್ಮಾಣ ಮಾಡುವ ಆಶಯದೊಂದಿಗೆ, ೭೦ನೇ ಬೌದ್ಧ ಧಮ್ಮ ದೀಕ್ಷಾ ಕಾರ್ಯಕ್ರಮದ ಅಂಗವಾಗಿ ಬರೋಬ್ಬರಿ ಐದು ಲಕ್ಷ ಜನರಿಗೆ ಧಮ್ಮ ದೀಕ್ಷೆ ನೀಡುವ ಬೃಹತ್ ಗುರಿ ಹೊಂದಲಾಗಿದೆ ಎಂದು ಅಂತರರಾಷ್ಟ್ರೀಯ ಬೌದ್ಧ ಯುವ ಸಂಘಟನೆ (ಇಂಡಿಯಾ) ರಾಷ್ಟ್ರೀಯ ಅಧ್ಯಕ್ಷ, ಝೆನ್ ಮಾಂಕ್ ಡಾ. ಶಾಕು ಬೋಧಿಧಮ್ಮ ತಿಳಿಸಿದ್ದಾರೆ.
ಬಾಗಲಕೋಟೆಯ ನವನಗರದ 71ನೇ ಸೆಕ್ಟರ್‌ನಲ್ಲಿ ಆಯೋಜಿಸಿದ್ದ ಧಮ್ಮ ಜನಜಾಗೃತಿ ಯಾತ್ರೆಯ ಸ್ವಾಗತ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು. “ಐತಿಹಾಸಿಕ ಸನ್ನತಿ ನೆಲದಲ್ಲಿ 2026ರ ನವೆಂಬರ್ 1ರಂದು ಬೃಹತ್ ಧಮ್ಮ ದೀಕ್ಷಾ ಕಾರ್ಯಕ್ರಮ ಆಯೋಜಿಸಲಾಗಿದೆ. ಈ ಕಾರ್ಯಕ್ರಮದಲ್ಲಿ ಅಂಬೇಡ್ಕರ್ ವಾದಿಗಳು, ಬೌದ್ಧ ಅನುಯಾಯಿಗಳು, ಭಿಕ್ಷು ಸಂಘದ ಸದಸ್ಯರು, ಉಪಾಸಕ-ಉಪಾಸಿಕಾ ಸಂಘಗಳ ಸದಸ್ಯರು, ಸಾಮಾಜಿಕ ಮತ್ತು ರಾಜಕೀಯ ಮುಖಂಡರು, ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳ ಪ್ರತಿನಿಧಿಗಳು, ಹಿಂದುಳಿದ ವರ್ಗಗಳ ಮುಖಂಡರು ಹಾಗೂ ವಿವಿಧ ಬಹುಜನ ಸಂಘಟನೆಗಳ ಪ್ರಮುಖರು ಭಾಗವಹಿಸಲಿದ್ದಾರೆ” ಎಂದು ತಿಳಿಸಿದರು.
“ಬಾಬಾಸಾಹೇಬ ಡಾ. ಬಿ.ಆರ್ ಅಂಬೇಡ್ಕರ್ ಅವರ ಸಂಕಲ್ಪವನ್ನು ಸಾಕಾರಗೊಳಿಸುವ ಉದ್ದೇಶದಿಂದ ಕರ್ನಾಟಕದಾದ್ಯಂತ ಧಮ್ಮ ಜನಜಾಗೃತಿ ಯಾತ್ರೆ ಹಮ್ಮಿಕೊಳ್ಳಲಾಗಿದೆ” ಎಂದು ಪ್ರಾಸ್ತಾವಿಕವಾಗಿ ಮಾತನಾಡಿದ ಪ್ರೊ. ಐ.ಜಿ ಬೆಳ್ಳನ್ನವರ ಹೇಳಿದರು.
ಕಾರ್ಯಕ್ರಮದ ವೇದಿಕೆಯಲ್ಲಿ ಭದಂತ ಬೋಧಿರತ್ನ, ಭದಂತ ಬುದ್ಧರತ್ನ ಹಾಗೂ ನವನಗರ ಬೌದ್ಧ ವಿಹಾರದ ಭಂತೆಜಿ ಧಮ್ಮಪಾಲ ಉಪಸ್ಥಿತರಿದ್ದರು.
ಯಾತ್ರೆಯೊಂದಿಗೆ ಆಗಮಿಸಿದ ಗಣ್ಯರನ್ನು ಶಾಲು ಹೊದಿಸಿ, ಫಲಪುಷ್ಪ ನೀಡಿ ಗೌರವಿಸಲಾಯಿತು. ಸಂಜೆ ನವನಗರಕ್ಕೆ ಆಗಮಿಸಿದ ಧಮ್ಮ ಜನಜಾಗೃತಿ ಯಾತ್ರೆಯನ್ನು ಬೌದ್ಧ ವಿಹಾರ ಸಮಿತಿಯ ಅಧ್ಯಕ್ಷ ಪ್ರೇಮನಾಥ ಗರಸಂಗಿ ಅವರ ನೇತೃತ್ವದ ತಂಡ ಹೂಮಳೆ ಸುರಿಸುವ ಮೂಲಕ ಅದ್ದೂರಿಯಾಗಿ ಸ್ವಾಗತಿಸಿತು.
ಈ ಸಂದರ್ಭದಲ್ಲಿ ಸದಾಶಿವ ಕೊಡಬಾಗಿ, ಡಿ.ಎಸ್. ಭೀಮ್, ಮಹೇಶ ಬೀಳಗಿ, ಮನೋಹರ ಗರಸಂಗಿ, ದುರಗೇಶ ನೀಲನಾಯಕ, ರಾಜು ನಾರಾಯಣಿ, ಗುರುಶಾಂತಪ್ಪ ಮದೀನಕರ, ಬಾಬಾಸಾಹೇಬ ಕಾಂಬಳೆ, ಬಾಬು ಕಾಂಬಳೆ, ಮಲ್ಲಪ್ಪ ನಾರಾಯಣಿ, ಪ್ರಭು ಬಂಡಿ, ಗ್ಯಾನಪ್ಪ ನಾರಾಯಣಿ, ಹುಲಗಪ್ಪ ಹೊದ್ಲುರ, ಯಮನಪ್ಪ ಶಿರೂರ ಹಾಗೂ ಯಲ್ಲಪ್ಪ ಸಾನಕ್ಯಾನವರ ಸೇರಿದಂತೆ ಹಲವು ಮುಖಂಡರು ಉಪಸ್ಥಿತರಿದ್ದರು.
