ಹಲವು ಎಚ್ಚರಿಕೆಗಳ ನಡುವೆಯೂ ಅಶ್ಲೀಲ ವಿಡಿಯೋಗಳನ್ನು ಪ್ರಸಾರ ಮಾಡುತ್ತಿದ್ದ 18 ಒಟಿಟಿ ವೇದಿಕೆಗಳು ಹಾಗೂ 19 ವೆಬ್ಸೈಟ್ಗಳನ್ನು ಕೇಂದ್ರ ಸರ್ಕಾರ ನಿಷೇಧಿಸಿದೆ.
19 ವೆಬ್‌ಸೈಟ್‌ಗಳಲ್ಲಿ 10 ಆಪ್‌ಗಳು 7 ಗೂಗಲ್‌ ಹಾಗೂ 3 ಆಪಲ್‌ ಆಪ್‌ ಸ್ಟೋರ್‌ನಿಂದ ನಿಷೇಧಿಸಲಾಗಿದೆ. 57 ಸಮಾಜಿಕ ಮಾಧ್ಯಮಗಳಿಗೆ ಸಂಬಂಧ ಹೊಂದಿದ ಈ ವೇದಿಕೆಗಳನ್ನು ನಿರ್ಬಂಧಗೊಳಿಸಲಾಗಿದೆ ಎಂದು ಕೇಂದ್ರ ವಾರ್ತಾ ಮತ್ತು ಪ್ರಸಾರ ಇಲಾಖೆ ಸಚಿವಾಲಯ ತಿಳಿಸಿದೆ.
ಸೃಜನಶೀಲ ಅಭಿವ್ಯಕ್ತಿತ್ವದಡಿ ಅಶ್ಲೀಲ, ಅಸಭ್ಯತೆ ವಿಷಯಗಳನ್ನು ಪ್ರಸಾರ ಮಾಡಬಾರದೆಂದು ಈ ಆನ್‌ಲೈನ್‌ ವೇದಿಕೆಗಳಿಗೆ ಎಚ್ಚರಿಕೆ ನೀಡಿದ ನಂತರವೂ ಪ್ರಸಾರ ಮಾಡಿದ ಕಾರಣ ಈ ಬೆಳವಣಿಗೆ ನಡೆದಿದೆ. ಮಾಹಿತಿ ತಂತ್ರಜ್ಞಾನ ಕಾಯ್ದೆ 2000 ರ ಆದ್ಯತೆಗಳಡಿ ಈ ನಿರ್ಧಾರ ಕೈಗೊಳ್ಳಲಾಗಿದೆ.
ಈ ಸುದ್ದಿ ಓದಿದ್ದೀರಾ? ಈ ದಿನ ಸಂಪಾದಕೀಯ | ಮಾರ್ಚ್ ನಲ್ಲೇ ನೀರಿಗಾಗಿ ಹಾಹಾಕಾರ, ಮಿತ ಬಳಕೆಯ ಪಾಠ ಕಲಿಯಲು ಇದು ಸಕಾಲ
ಡ್ರೀಮ್‌ ಫಿಲ್ಮ್ಸ್‌, ವೋವಿ, ಯಸ್ಸಮಾ, ಅನ್‌ಕಟ್‌ ಅಡ್ಡ, ಟ್ರಿ ಫ್ಲಿಕ್ಸ್, ಎಕ್ಸ್‌ ಪ್ರೈಮ್‌, ನಿಯೋನ್‌ ಎಕ್ಸ್‌ ವಿಐಪಿ, ಬೆಶರ್ಮಾಸ್, ಹಂಟರ್ಸ್, ರಾಬಿಟ್, ಎಕ್ಸ್‌ಟ್ರಾಮೂಡ್, ನ್ಯೂಫ್ಲಿಕ್ಸ್, ಮೂಡ್‌ಎಕ್ಸ್, ಮೋಜ್‌ಫ್ಲಿಕ್ಸ್‌, ಹಾಟ್‌ ಶಾಟ್ಸ್‌, ವಿಐಪಿ, ಫುಗಿ, ಚಿಕ್ಕೋಫ್ಲಿಕ್ಸ್‌ ಹಾಗೂ ಪ್ರೈಮ್‌ ಪ್ಲೇ ನಿಷೇಧಗೊಂಡಿರುವ ಒಟಿಟಿಗಳು.
ದೃಶ್ಯ ಪ್ರಸಾರ ಮಾಡುವ ಸಂದರ್ಭದಲ್ಲಿ ಈ ಒಟಿಟಿಗಳು ಮಹಿಳೆಯರನ್ನು ಕೀಳಾಗಿ ಚಿತ್ರಿಸುತ್ತಿದ್ದವು. ಶಿಕ್ಷಕರು,ವಿದ್ಯಾರ್ಥಿಗಳು ಹಾಗೂ ಕುಟುಂಬ ಸಂಬಂಧಗಳ ಹಲವು ಅಸಮರ್ಪಕ ವಿಷಯಗಳಲ್ಲಿ ಬೆತ್ತಲೆ ಹಾಗೂ ಅಶ್ಲೀಲ ಚಿತ್ರಗಳನ್ನು ತೋರಿಸಲಾಗುತ್ತಿತ್ತು ಎಂದು ಕೇಂದ್ರದ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಈ ಒಟಿಟಿ ಆಪ್‌ಗಳಲ್ಲಿ ಒಂದು ಆಪ್‌ ಒಂದು ಕೋಟಿಗೂ ಹೆಚ್ಚು ಡೌನ್‌ಲೋಡ್‌ಗಳಾಗಿದ್ದರೆ, ಇತರ ಎರಡು 50 ಲಕ್ಷ ಡೌನ್‌ಲೋಡ್‌ಗಳಾಗಿವೆ. ಸಾಮಾಜಿಕ ಮಾಧ್ಯಮಗಳಲ್ಲಿ ಈ ಒಟಿಟಿ ವೇದಿಕೆಗಳು 32 ಲಕ್ಷಕ್ಕೂ ಹೆಚ್ಚು ಚಂದಾದಾರರನ್ನು ಹೊಂದಿದೆ.
