ರಾಜಧಾನಿ ಬೆಂಗಳೂರಿನ ಹೊರವಲಯದಲ್ಲಿ ಮಾಜಿ ವಿಧಾನ ಪರಿಷತ್ ಸದಸ್ಯ ದಯಾನಂದರೆಡ್ಡಿ ಅವರನ್ನು ಬಂದೂಕಿನ ಅಲುಗಿನಲ್ಲಿ ಅಪಹರಿಸಿದ ದುಷ್ಕರ್ಮಿಗಳ ಗುಂಪೊಂದು, ಕೋಟ್ಯಂತರ ರೂಪಾಯಿ ಹಣಕ್ಕೆ ಬೇಡಿಕೆಯಿಟ್ಟು, ಗಂಟೆಗಳ ಕಾಲ ಒತ್ತೆಯಾಳಾಗಿರಿಸಿಕೊಂಡಿದ್ದ ಆಘಾತಕಾರಿ ಘಟನೆ ಮಂಗಳವಾರ ಬೆಳಕಿಗೆ ಬಂದಿದೆ. ಜೀವಬೆದರಿಕೆಯೊಡ್ಡಿ, ಹಣಕ್ಕಾಗಿ ಪೀಡಿಸಿದ ಅಪಹರಣಕಾರರು, ಹಣ ತಲುಪಿಸುವ ಭರವಸೆ ಪಡೆದ ನಂತರವೇ ಬೆಳಗಿನ ಜಾವ ಅವರನ್ನು ಬಿಡುಗಡೆ ಮಾಡಿದ್ದಾರೆ. ಈ ಸಂಬಂಧ ಅತ್ತಿಬೆಲೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದ್ದು, ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ.
ಪೊಲೀಸರಿಗೆ ನೀಡಿರುವ ದೂರಿನ ಪ್ರಕಾರ, ಮಂಗಳವಾರ ಮಧ್ಯರಾತ್ರಿ ಸುಮಾರು 12.15ರ ವೇಳೆಗೆ ಈ ಘಟನೆ ನಡೆದಿದೆ. 63 ವರ್ಷದ ದಯಾನಂದರೆಡ್ಡಿ ಅವರು ತಾವು ಅಧ್ಯಕ್ಷರಾಗಿರುವ ಹುಸ್ಕೂರು ರಸ್ತೆಯ ‘ಗೋಲ್ಡ್ ಕಾಯಿನ್ ಕ್ಲಬ್’ನಲ್ಲಿ ಕೆಲಸ ಮುಗಿಸಿ, ತಮ್ಮ ಟೊಯೊಟಾ ವೆಲ್‌ಫೈರ್ ಕಾರಿನಲ್ಲಿ ಬೊಮ್ಮಸಂದ್ರದ ಮನೆಗೆ ಒಬ್ಬರೇ ಮರಳುತ್ತಿದ್ದರು. ಈ ವೇಳೆ ಹೀಲಲಿಗೆ ಗ್ರಾಮದ ಆಂಜನೇಯ ಸ್ವಾಮಿ ದೇವಸ್ಥಾನದ ಬಳಿ ದ್ವಿಚಕ್ರ ವಾಹನದಲ್ಲಿ ಬಂದ ಇಬ್ಬರು ಅಪರಿಚಿತರು, ಕಾರನ್ನು ಅಡ್ಡಗಟ್ಟಿ ತಾವೊಂದು “ಉಡುಗೊರೆ” (ಗಿಫ್ಟ್ ಬಾಕ್ಸ್) ತಂದಿರುವುದಾಗಿ ಹೇಳಿ ವಾಹನ ನಿಲ್ಲಿಸುವಂತೆ ಮಾಡಿದ್ದಾರೆ.
ಉಡುಗೊರೆ ಪಡೆಯಲು ದಯಾನಂದರೆಡ್ಡಿ ಅವರು ಕಾರಿನ ಕಿಟಕಿ ತೆರೆಯುತ್ತಿದ್ದಂತೆಯೇ, ಇಬ್ಬರು ದುಷ್ಕರ್ಮಿಗಳು ವಾಹನದೊಳಗೆ ನುಗ್ಗಿ ಅವರಿಗೆ ಪಿಸ್ತೂಲ್ ತೋರಿಸಿ ಜೀವಬೆದರಿಕೆ ಹಾಕಿದ್ದಾರೆ. ಬಳಿಕ ದಯಾನಂದರೆಡ್ಡಿ ಅವರನ್ನು ಹಿಂದಿನ ಸೀಟಿಗೆ ದೂಡಿದ ದುಷ್ಕರ್ಮಿಯೊಬ್ಬ ತಾನೇ ವಾಹನ ಚಲಾಯಿಸಲು ಆರಂಭಿಸಿದ್ದಾನೆ. ಸ್ವಲ್ಪ ದೂರ ಸಾಗಿದ ನಂತರ ಕೇರಳ ನೋಂದಣಿಯ (KL-43-6403) ಕೆಂಪು ಬಣ್ಣದ ಕಾರೊಂದು ಇವರನ್ನು ಹಿಂಬಾಲಿಸಿಕೊಂಡು ಬಂದಿದ್ದು, ಆ ಕಾರಿನಲ್ಲಿದ್ದ ಮತ್ತಿಬ್ಬರು ದುಷ್ಕರ್ಮಿಗಳು ಮಾಜಿ ಶಾಸಕರ ವಾಹನವನ್ನು ಹತ್ತಿದ್ದಾರೆ. ಬಳಿಕ ಅಪಹರಣಕಾರರು ವಾಹನವನ್ನು ಬೊಮ್ಮಸಂದ್ರ ಮುಖ್ಯರಸ್ತೆ ಮೂಲಕ ಅತ್ತಿಬೆಲೆ-ಜಿಗಣಿ ರಸ್ತೆಯಲ್ಲಿರುವ ಕೆಎಚ್‌ಬಿ ಬಡಾವಣೆಯ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದಿದ್ದಾರೆ.
ನಿರ್ಜನ ಪ್ರದೇಶದಲ್ಲಿ ದಯಾನಂದರೆಡ್ಡಿ ಅವರ ಕುತ್ತಿಗೆಗೆ ಬಂದೂಕು ಇಟ್ಟು ಬೆದರಿಸಿದ ಅಪಹರಣಕಾರರು, “ನಿನ್ನನ್ನು ಮುಗಿಸಲು ನಮಗೆ 10 ಕೋಟಿ ರೂಪಾಯಿಗಳ ಸುಪಾರಿ ಸಿಕ್ಕಿದೆ” ಎಂದು ಹಿಂದಿ ಮತ್ತು ಇಂಗ್ಲಿಷ್‌ನಲ್ಲಿ ಬೆದರಿಕೆ ಹಾಕಿದ್ದಾರೆ. ಅಲ್ಲದೆ, ದುಷ್ಕರ್ಮಿಗಳು ತಮ್ಮತಮ್ಮಲ್ಲೇ ಮಲಯಾಳಂ ಭಾಷೆಯಲ್ಲಿ ಮಾತನಾಡಿಕೊಂಡಿದ್ದಾರೆ. ತಮ್ಮನ್ನು ಬಿಟ್ಟುಬಿಡುವಂತೆ ಮಾಜಿ ಎಂಎಲ್‌ಸಿ ಪರಿಪರಿಯಾಗಿ ಬೇಡಿಕೊಂಡಾಗ, ದುಷ್ಕರ್ಮಿಗಳು ಮೊದಲು 3 ಕೋಟಿ ರೂಪಾಯಿ ನೀಡುವಂತೆ ಬೇಡಿಕೆಯಿಟ್ಟಿದ್ದಾರೆ. ಅಂತಿಮವಾಗಿ ಚೌಕಾಸಿಯ ನಂತರ 3 ಕೋಟಿ ರೂಪಾಯಿಗಳನ್ನು ನೀಡಲು ತಿಳಿಸಿದರು ಎಂದು ದೂರಿನಲ್ಲಿ ವಿವರಿಸಲಾಗಿದೆ.
ಇದನ್ನು ಓದಿದ್ದೀರಾ? ಒಡಿಶಾ | ‘ವೇದಾಂತ’ ಗಣಿಗಾರಿಕೆಯಡಿ ಸಮಾಧಿಯಾಗಲಿದೆ ಸಿಜಿಮಲಿ ಗುಡ್ಡದ ಆದಿವಾಸಿಗಳ ಆಸ್ಥೆ-ಅಸ್ಮಿತೆ
ರಾತ್ರೋರಾತ್ರಿ ಅಷ್ಟೊಂದು ದೊಡ್ಡ ಮೊತ್ತದ ನಗದು ಹೊಂದಿಸಲು ಸಾಧ್ಯವಿಲ್ಲ, ಬೆಳಿಗ್ಗೆ ಬ್ಯಾಂಕ್‌ಗಳು ತೆರೆದ ನಂತರವೇ ಹಣ ತೆಗೆದುಕೊಡುವುದಾಗಿ ದಯಾನಂದರೆಡ್ಡಿ ಅವರು ಅಪಹರಣಕಾರರಿಗೆ ಮನವರಿಕೆ ಮಾಡಿದ್ದಾರೆ. ಇದಕ್ಕೆ ಸಮ್ಮತಿಸಿದ ದುಷ್ಕರ್ಮಿಗಳು, ಹಣ ಹೊಂದಿಸಿದ ನಂತರ ಕರೆ ಮಾಡುವಂತೆ ಸೂಚಿಸಿ, ತಮ್ಮಲ್ಲಿ ಒಬ್ಬಾತನ ಹೆಸರನ್ನು “ಪ್ರವೀಣ್” ಎಂದು ಪರಿಚಯಿಸಿಕೊಂಡು ಮೊಬೈಲ್ ಸಂಖ್ಯೆಯೊಂದನ್ನು ನೀಡಿದ್ದಾರೆ. ಬೆಳಗಿನ ಜಾವ ಸುಮಾರು 4.45ರವರೆಗೆ ಮಾಜಿ ಶಾಸಕರನ್ನು ತಮ್ಮ ವಶದಲ್ಲೇ ಇಟ್ಟುಕೊಂಡಿದ್ದ ಅಪಹರಣಕಾರರು, ಬಳಿಕ ಅವರನ್ನು ಅಲ್ಲಿಯೇ ಬಿಟ್ಟು ಪರಾರಿಯಾಗಿದ್ದಾರೆ.
ಘಟನೆಯಿಂದ ತೀವ್ರ ಆಘಾತಕ್ಕೊಳಗಾದ ದಯಾನಂದರೆಡ್ಡಿ ಅವರು, ಸುರಕ್ಷಿತವಾಗಿ ಮನೆ ತಲುಪಿದ ಬಳಿಕ ತಮ್ಮ ಕುಟುಂಬಸ್ಥರಿಗೆ ಮಾಹಿತಿ ನೀಡಿ, ಅತ್ತಿಬೆಲೆ ಪೊಲೀಸ್ ಠಾಣೆಯಲ್ಲಿ ಅಧಿಕೃತ ದೂರು ದಾಖಲಿಸಿದ್ದಾರೆ. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ಪೊಲೀಸರು, ಅಪಹರಣ, ಶಸ್ತ್ರಾಸ್ತ್ರ ಕಾಯ್ದೆ, ಸುಲಿಗೆ ಮತ್ತು ಜೀವಬೆದರಿಕೆ ಆರೋಪಗಳಡಿ ಎಫ್‌ಐಆರ್ ದಾಖಲಿಸಿಕೊಂಡಿದ್ದಾರೆ. ಆರೋಪಿಗಳ ಪತ್ತೆಗಾಗಿ ವಿಶೇಷ ತಂಡಗಳನ್ನು ರಚಿಸಲಾಗಿದ್ದು, ದುಷ್ಕರ್ಮಿಗಳು ನೀಡಿದ ಮೊಬೈಲ್ ಸಂಖ್ಯೆ, ಕೇರಳ ನೋಂದಣಿಯ ಕಾರು ಹಾಗೂ ಅವರು ಸಂಚರಿಸಿದ ಮಾರ್ಗಗಳ ಸಿಸಿಟಿವಿ ದೃಶ್ಯಾವಳಿಗಳನ್ನು ಆಧರಿಸಿ ತೀವ್ರ ಶೋಧ ಕಾರ್ಯ ನಡೆಸಲಾಗುತ್ತಿದೆ.
