ಯುವ ಸಮೂಹ ದುಶ್ಚಟಗಳಿಂದ ಹೊರಬಂದು ಬಸವಾದಿ ಶರಣರ ತತ್ವಾದರ್ಶಗಳನ್ನು ಮೈಗೂಡಿಸಿಕೊಳ್ಳಿ ಎಂದು ಬೈಲೂರು-ನಿಷ್ಕಲ ಮಂಟಪದ ನಿಜಗುಣಾನಂದ ಸ್ವಾಮೀಜಿ ಅವರು ನುಡಿದರು.
ಬೀದರ ಬಸವ ಕೇಂದ್ರ ಬೆಳ್ಳಿ ಮಹೋತ್ಸವ ಪ್ರಯುಕ್ತ ಬೀದರ್ ತಾಲೂಕಿನ ಚಿಮಕೋಡ ಗ್ರಾಮದಲ್ಲಿ ಬಸವ ಸಂದೇಶ ಯಾತ್ರೆಯ ಉದ್ಘಾಟನೆ ನೆರವೇರಿಸಿ ಮಾತನಾಡಿ, ʼಜೀವನದಲ್ಲಿ ಅಂತರಂಗ ಬಹಿರಂಗ ಒಂದಾಗಬೇಕು. ಶ್ರೀಮಂತಿಕೆ ಮುಖ್ಯವಲ್ಲ ಮನುಷ್ಯತ್ವ ಪ್ರಮುಖವಾಗಿದೆ. ಯುವಕರು ವ್ಯಸನಿಗಳಾಗಿ ಜೀವನ ಹಾಳು ಮಾಡಿಕೊಳ್ಳುತ್ತಿದ್ದಾರೆʼ ಎಂದು ಕಳವಳ ವ್ಯಕ್ತಪಡಿಸಿದರು.
ಸರಾಯಿ, ತಂಬಾಕು ಪ್ರಾಣಿಗಳು ಮೂಸುವುದಿಲ್ಲ. ಆದರೆ ಮನುಷ್ಯರಾದ ನಾವು ಅವುಗಳಿಗಾಗಿ ತತ್ತರಿಸಿದ್ದೇವೆ. ವ್ಯಸನದಿಂದ ವೈಯಕ್ತಿಕ ಬದುಕು ಜೊತೆಗೆ ಸಮಾಜ ಹಾಳಾಗುತ್ತದೆ. ನಮ್ಮೆಲ್ಲರ ಬದುಕು ಹಸನಾಗಬೇಕಾದರೆ ಬಸವಣ್ಣನವರ ತತ್ವಸಿದ್ಧಾಂತ ಮೈಗೂಡಿಸಿಕೊಳ್ಳಬೇಕು. ಉತ್ತಮ ಸಂಸ್ಕಾರದಿಂದ ಸಮಾಜದಲ್ಲಿ ಶಾಂತಿ, ನೆಮ್ಮದಿ, ಭಾವೈಕ್ಯತೆ ನೆಲೆಗೊಳ್ಳುತ್ತದೆʼ ಎಂದರು.
ಜಿಲ್ಲಾ ಯುವ ಬಸವ ಕೇಂದ್ರ ಅಧ್ಯಕ್ಷ ಸುರೇಶ ಚೆನ್ನಶೆಟ್ಟಿ ಮಾತನಾಡಿ, ʼಬಸವಣ್ಣನವರು ಎಲ್ಲ ಕಾಲಕ್ಕೂ ಬೇಕಾಗಿದವರು, ಅವರ ತತ್ವಸಿದ್ಧಾಂತ ಕಳೆದ 25 ವರ್ಷಗಳಿಂದ ಬಸವ ಕೇಂದ್ರ ಸಂಸ್ಥೆ ಧಾರ್ಮಿಕ, ಸಾಹಿತ್ಯಿಕ, ವೈಚಾರಿಕ, ಸಾಂಸ್ಕೃತಿಕ ಚಟುವಟಿಕೆಗಳ ಮುಖಾಂತರ ಇಡೀ ಜಿಲ್ಲೆಯ ಜನರ ಭಾವನೆಗಳಿಗೆ ಸ್ಪಂದಿಸುವ ಕೆಲಸ ಮಾಡಿದೆ. ಇಂದು 25 ವಸಂತಗಳು ಪೂರೈಸಿರುವ ಹಿನ್ನಲೆಯಲ್ಲಿ ʼಭವ್ಯ ಭಾರತದ ಬಸವಣ್ಣʼ ಪ್ರವಚನ ಹಾಗೂ ಹಳ್ಳಿಗಳಲ್ಲಿ ʼಬಸವ ಸಂದೇಶ ಯಾತ್ರೆʼ ಕೈಗೊಂಡು ಕೊನೆಗೆ ಮೂರು ದಿವಸಗಳ ಕಾಲ ʼಶರಣ ಸಂಸ್ಕೃತಿ ಉತ್ಸವʼ ಹಮ್ಮಿಕೊಳ್ಳಲಾಗುತ್ತಿದೆ’ ಎಂದು ನುಡಿದರು.
ಡಾ.ಬಿ.ಆರ್.ಅಂಬೇಡ್ಕರ್ ವೃತ್ತ, ಸಂಗೊಳ್ಳಿ ರಾಯಣ್ಣ ವೃತ್ತ, ಬಸವೇಶ್ವರ ವೃತ್ತ ಮುಖಾಂತರ ಪೂಜ್ಯರನ್ನು ಭವ್ಯ ಮೆರವಣಿಗೆ ಮುಖಾಂತರ ಸ್ವಾಗತಿಸಲಾಯಿತು.
ಇದನ್ನೂ ಓದಿ : ತಮಿಳುನಾಡು ಚುನಾವಣೆ | ತನ್ನ ಕಾರು ಚಾಲಕನ ಮಗನನ್ನು ಸ್ಪರ್ಧೆಗಿಳಿಸಿದ ವಿಜಯ್‌ : ಭಾವುಕ ಕ್ಷಣಕ್ಕೆ ಅಪ್ಪ ಮಗ ಸಾಕ್ಷಿ
ಕಾರ್ಯಕ್ರಮದಲ್ಲಿ ತಾಲ್ಲೂಕು ಬಸವ ಕೇಂದ್ರದ ಅಧ್ಯಕ್ಷ ಸೋಮನಾಥ ಕಂದಗೂಳೆ ಸೇರಿದಂತೆ ಪ್ರಮುಖರಾದ ಶ್ರೀಕಾಂತ ಬಿರಾದಾರ, ನಾಗರಾಜ ಕರಪೂರ, ವೀರಶೆಟ್ಟಿ ಪಾಟೀಲ ಮರಖಲ, ವೆಂಕಟರಾವ ಬಿರಾದಾರ, ಆನಂದ ವಿಜಯಕುಮಾರ, ನಾಗಶೆಟ್ಟಿ ಬಿರಾದಾರ, ಸಂಜೀವ ಸಾಗರ, ರಘುನಾಥ್ ಬಿರಾದಾರ, ರವಿ ಚಿನ್ನಪ್ಪನ್ನೊರ,, ನಾಗಶೆಟ್ಟಿ ಸಿದ್ರಾಮಪ್ಪ, ಸೂರ್ಯಕಾಂತ ಪಾಟೀಲ, ಶಿವಕುಮಾರ ಟೊಳ್ಳೆ, ಮಲ್ಲಶೆಟ್ಟಿ ಢೆಂಪೆ, ನಾಗಶೆಟ್ಟಿ ಪೋಲೀಸ್ ಪಾಟೀಲ, ಚಂದ್ರಕಾಂತ ಚಿನ್ನಪ್ಪನ್ನೊರ, ಶಾಂತಕುಮಾರ ಅಬ್ಬೆಂದೆ, ಮಾರುತಿ ಶಿವಪುರೆ, ಮಲ್ಲಿಕಾರ್ಜುನ, ಮಾರುತಿ ಟೊಲ್ಲೆ ಉಪಸ್ಥಿತರಿದ್ದರು. ಪರಮೇಶ್ವರ ಢೆಂಪೆ, ನಿರೂಪಿಸಿದರು. ಉಮೇಶ ಪಾಟೀಲ ಸ್ವಾಗತಿಸಿದರು. ವಿಜಯಕುಮಾರ ಚೆನ್ನಪ್ಪನ್ನೋರ ವಂದಿಸಿದರು. ಸಂಜೀವಕುಮಾರ ಗಡ್ಡೆ ದಾಸೋಹಗೈದರು.
